1 Ha koʼág̃a, che raʼy Helamán, che haʼe ndéve ejagarra hag̃ua umi kuatiajehaipyre oñemeʼẽvaʼekue chéve;

2 Ha che avei haʼe ndéve egueraha hag̃ua peteĩ kuatiajehaipyre ko tavayguakuéra rehegua, che ajapo haguéicha, Nefi planchakuéra ári, ha eñongatu marangatúpe opa koʼã mbaʼe che añongatuvaʼekue, jepe che añongatu haguéicha; oñeñongatúgui peteĩ mbaʼe arandurã.

3 Ha koʼã pláncha bronce-guigua, oguerekóva koʼã jehaipyre, oguerekóva hiʼári umi escritura marangatu ñemombeʼu, ha oguerekóva ñande rukuéra genealogía, jepe iñepyrũmby guive—

4 Péina ápe, ñande rukuéra oprofetisavaʼekue, oñeñongatuvaʼerãha ha oñemeʼẽvaʼerã peteĩgui ambue ñemoñareʼatýpe, ha oñeñangareko ha oñeñongatuvaʼerã Ñandejára po rupi oho peve opa tetã, avaretã, ñeʼẽ ha tavakuérape, oikuaa hag̃ua hikuái umi mbaʼeñemimby oguerekóvagui.

5 Ha koʼág̃a péina ápe, oñeñongatúramo oñongatuvaʼerã iverakue; heẽ, ha oñongatúta iverakue; heẽ, ha avei opa pláncha oguerekóva jehaipyre marangatu.

6 Koʼág̃a ikatu reimoʼã koʼãva haʼeha vyrorei che ajapóva; ha katu péina ápe che haʼe ndéve, mbaʼe michĩ ha mbaʼe ndahaʼéivaicha mbaʼeve rupive ojejapo tuicha mbaʼe; ha heta hendáicha umi mbaʼe michĩva omoapañuãi iñarandúvape.

7 Ha Tupã Ñandejára ombaʼapo mbaʼe michĩ reheve ojapo hag̃ua hembipota tuicha ha ijapyraʼỹva; ha mbaʼe michĩetereíva rupi Ñandejára omoapañuãi iñarandúvape ha ojapo heta ánga salvasiõ.

8 Ha koʼág̃a, ko ára peve haʼékuri Tupã arandúpe koʼã mbaʼe oñeñongatuha; ha péina ápe, oipysókuri hikuái ko tavayguakuéra manduʼa, heẽ, ha okonvensékuri hetápe hape oĩvaiha, ha oguerúkuri chupekuéra Itupã jeikuaápe hiʼangakuéra salvasiõrã.

9 Heẽ, che haʼe ndéve, ndahaʼéirire koʼã mbaʼe koʼã kuatiajehaipyre oguerekóva rupi, oĩva koʼã pláncha ári, Ammón ha ijoykeʼykuéra ndaikatuivaʼerãmoʼã okonvense hetaite miles lamanita-kuérape ituvakuéra jepokuaa oĩvaiha; heẽ, koʼã kuatiajehaipyre ha iñeʼẽnguéra oguerahavaʼekue chupekuéra arrepentimiéntope; térã, ogueraha chupekuéra Ñandejára Itupã jeikuaápe, ha ovyʼa hag̃ua Jesucristo Irredentórpe.

10 Ha máva piko oikuaa ndahaʼemoʼãipa upéva rupi ojeguerútaha heta miles chupekuéra, heẽ, ha avei heta miles ñande joykeʼykuéra, umi Nefita, ipyʼahatãvape, koʼág̃a omohatãva ikorasõkuéra angaipa ha tembiapovaípe, oikuaa hag̃ua hikuái Irredentórgui?

11 Koʼág̃a neʼĩra gueteri ojehechaukapa chéve koʼã mbaʼeñemimby; upévare ajejokóta.

12 Ha iporãntema haʼéramo oñeñongatuha peteĩ mbaʼe arandurã, Tupã oikuaáva; haʼe omotenondégui arandúpe opa hembiapo, ha hapekuéra naikarẽi, ha hape haʼe peteĩ ñembojere ijapyraʼỹva.

13 O nemanduʼáke, nemanduʼáke, che raʼy Helamán, noñemovãiha Tupã rembiapoukapykuéra. Ha haʼe heʼíkuri: Peneñeʼẽrendúramo che rembiapoukapykuérare peñakãrapuʼãta upe tetãme—ha katu napeneñeʼẽrendúiramo hembiapoukapykuérare peñemosẽta henondégui.

14 Ha koʼág̃a nemanduʼáke, che raʼy, Tupã omeʼẽhague ndéve koʼã mbaʼe imarangatúva, haʼe oñongatuvaʼekue marangatúpe, ha oñangareko ha oñongatútava avei peteĩ hembipota arandurã, ohechauka hag̃ua ipuʼaka ñemoñareʼaty oútavape.

15 Ha koʼág̃a péina ápe, haʼe ndéve pe espíritu profesía rehegua rupive, rejapyharáramo Tupã rembiapoukapykuéra, péina ápe, koʼã mbaʼe imarangatúva ojeipeʼáta ndehegui Tupã puʼaka rupive, ha reñemeʼẽta Satanápe, nemonguʼe hag̃ua mbaʼe ratykuéicha yvytúpe.

16 Ha katu neñeʼẽrendúramo Tupã rembiapoukapykuérare, ha rekumplíramo koʼã mbaʼe imarangatúva Ñandejára heʼiháicha ndéve, (rehovaʼerãgui Ñandejárape opa mbaʼe umívare rejapótavare) péina ápe, mbaʼevéichagua puʼaka yvy térã añaretãmegua ikatúta oipeʼa ndehegui koʼãva, Tupã ipuʼakapágui okumpli hag̃ua opa iñeʼẽ.

17 Haʼe okumplítagui opa ñeʼẽmeʼẽ ojapóva ndéve, okumplígui iñeʼẽmeʼẽ ojapovaʼekue ñande rukuérape.

18 Oñeʼẽmeʼẽgui chupekuéra oñongatutaha koʼã mbaʼe peteĩ hembipota arandurã, ohechauka hag̃ua ipuʼaka ñemoñareʼaty oútavape.

19 Ha koʼág̃a péina ápe, okumplíkuri peteĩ tembipota, jepe heta miles lamanita-kuéra oñemoĩjey pe añetegua jeikuaápe; ha umívape haʼe ohechaukákuri ipuʼaka, ha avei ohechaukáta gueteri umíva rupi ipuʼaka ñemoñareʼaty oútavape; upévare oñeñongatúta koʼãva.

20 Upévare haʼe ndéve, che raʼy Helamán, rejesareko hag̃ua rekumplívo opa che ñeʼẽ, ha rejesareko hag̃ua neñeʼẽrendúvo Tupã rembiapoukapykuérare umíva ojehaiháicha.

21 Ha koʼág̃a, añeʼẽta ndéve umi veinticuatro pláncha rehe, reñongatuvaʼerã, umi mbaʼeñemimby ha tembiapo ypytũ rehegua, ha hembiapo ñeminguéra, térã pe tavayguakuéra oñehundivaʼekue rembiapo ñeminguéra, ojehechauka hag̃ua ko tavayguakuérape; heẽ, opa ijejukakuéra, ha ñemonda, ha ipokarẽ, ha opa hembiapoñaña ha hembiapokyʼakuéra, ikatu hag̃ua ojehechauka ko tavayguakuérape; heẽ, ha reñongatuvaʼerã koʼã intérprete.

22 Ha katu péina ápe, Ñandejára ohechákuri itavayguakuéra oñepyrũha ombaʼapo pytũmbýpe, heẽ, ojapo jejuka ha tembiapokyʼa ñemi; upévare Ñandejára heʼíkuri, noñearrepentíramo oñehunditaha chupekuéra yvy ape árigui.

23 Ha heʼi Tupã: Che ambosakoʼíta che rembiguái Gazelem-pe g̃uarã, peteĩ ita, omimbítava pytũmbýpe omeʼẽ peve tesakã, ahechauka hag̃ua che tavayguakuéra chepytyvõvape, ahechauka hag̃ua chupekuéra ijoykeʼykuéra rembiapo, heẽ, hembiapo ñeminguéra, hembiapokuéra ypytũmegua, ha hekoñaña ha hekokyʼakuéra.

24 Ha koʼág̃a, che raʼy, oñembosakoʼivaʼekue koʼã intérprete oñekumpli hag̃ua Tupã ñeʼẽ, haʼe oñeʼẽvaʼekue, heʼívo:

25 Che aguenohẽta pytũmbýgui tesakãme opa hembiapo ñemi ha hembiapokyʼakuéra; ha noñearrepentíriramo hikuái ahundíta chupekuéra yvy ape árigui; ha aguenohẽta tesakãme opa imbaʼeñemi ha hembiapokyʼakuéra, opa tetãme ára pahápe ohupytýtava upe tetã.

26 Ha koʼág̃a, che raʼy, jahecha noñearrepentirihague hikuái; upévare oñehundi chupekuéra, ha koʼág̃a peve oñekumplíkuri Tupã ñeʼẽ; heẽ, hembiapokyʼa ñeminguéra osẽkuri pytũmbýgui ha ojeikuaaukákuri ñandéve.

27 Ha koʼág̃a, che raʼy, haʼe ndéve ejoko hag̃ua opa iñeʼẽmeʼẽnguéra, ha ikonveniokuéra, ha iñemopeteĩ hembiapokyʼa ñeminguérape; heẽ, ha opa hechaukahakuéra ha hechapyrãkuéra reñongatúta ko tavayguakuéragui, ani hag̃ua oikuaa hikuái, ani peichahágui hoʼa avei hikuái pytũmbýpe ha oñehundi.

28 Ha péina ápe, oĩ peteĩ ñeʼẽngái opa ko tetã ári, outaha peteĩ ñehundi opavave umi ojapóva tembiapo ypytũ ári, Tupã puʼaka rupi, hiʼajupa vove hikuái; upévare che ndaipotái ko tavayguakuéra oñehundi.

29 Upévare reñomíta ko tavayguakuéragui koʼã plan ñemi iñeʼẽmeʼẽnguéra ha ikonveniokuéra rehegua, ha hekoñañakuéra ha ijejukakuéra ha hembiapokyʼakuérante reikuaaukáta chupekuéra; ha remboʼéta chupekuéra ani hag̃ua ohayhu koʼã tekoñaña ha tembiapokyʼa ha jejuka; ha remboʼevaʼerã avei chupekuéra koʼã tavayguakuéra oñehundihague hekoñaña ha hembiapokyʼa ha jejukakuéra rupi.

30 Ha péina ápe, ojuka hikuái opa Ñandejára proféta ouvaʼekue ijapytepekuéra oñemoñeʼẽ hag̃ua chupekuéra hembiapovaikuérare; ha umi ojukavaʼekue hikuái ruguy ojerureʼasy Ñandejára Itupãme ovenga hag̃ua chupekuéra umi ijukaharégui; ha péicha Tupã huisiokuéra oguejy koʼã tembiapo ypytũ ha tembiapoñemi apohakuéra ári.

31 Heẽ, ha oñemoñeʼẽngái ko tetã tapiaite g̃uarã umi tembiapo ypytũ ha tembiapovaiñemi apohára rupi, jepe oñehundi peve, noñearrepentíriramo hikuái hiʼajupa mboyve.

32 Ha koʼág̃a, che raʼy, nemanduʼa koʼã ñeʼẽ haʼevaʼekue ndéve rehe; ani remombeʼu umi plan ñemi koʼã tavayguakuérape, ha katu emboʼe chupekuéra oguereko hag̃ua jehayhuʼỹ opaveʼỹva pe angaipa ha tembiapovai rehe.

33 Ehekomboʼe chupekuéra pe arrepentimiénto, ha jerovia Ñandejára Jesucristo rehe; emboʼe chupekuéra oñemomirĩ hag̃ua ha ipyʼaguapy ha imirĩ hag̃ua ikorasõme; emboʼe chupekuéra ipuʼaka hag̃ua opa aña jeipyʼaraʼã rehe, ijerovia reheve Ñandejára Jesucristo-re.

34 Emboʼe chupekuéra ani hag̃ua ikaneʼõ tembiapo porãgui, ha katu taipyʼaguapy ha taimirĩ hikuái ikorasõme; koʼãva ojuhúta haguére pytuʼu hiʼángape g̃uarã.

35 O, nemanduʼáke, che raʼy, ha eñehekomboʼe arandúpe ndepyahu aja; heẽ, eñehekomboʼe ndepyahu aja neñeʼẽrenduvaʼerãha Tupã rembiapoukapykuérare.

36 Heẽ, ha ejerureʼasy Tupãme opa mbaʼe reikotevẽvare; heẽ, opa ne rembiapo tahaʼe Ñandejárape, ha opa tenda rehohápe tahaʼe Ñandejárape; heẽ, eheja opa ne remiandu toho Ñandejára gotyo; heẽ, eheja ne korasõ mborayhukuéra toĩ Ñandejára ndive tapiaite peve.

37 Eporandu Ñandejárape opa ne rembiapópe, ha haʼe neisambyhýta mbaʼeporãrã; heẽ, reñenóvo pyharekue eñeno Ñandejárape, haʼe oñangareko hag̃ua nderehe reke jave; ha repuʼãvo pyharevekue tahenyhẽ ne korasõ aguyjégui Tupãme; ha rejapóramo koʼã mbaʼe, reñemopuʼãta ára pahápe.

38 Ha koʼág̃a, che raʼy, aguereko peteĩ mbaʼe haʼevaʼerã pe ñande rukuéra ohenóiva esfera, térã director rehe—térã haʼekuéra ohenoivaʼekue Liahona, oñehesaʼỹijóvo heʼiséva, brújula; ha Ñandejára ombosakoʼivaʼekue.

39 Ha péina ápe, avave kuimbaʼe ndaikatúi péicha ombaʼapo porãite. Ha péina ápe, oñembosakoʼivaʼekue ohechauka hag̃ua ñande rukuérape tape ohovaʼerãháre hikuái taveʼỹre.

40 Ha ombaʼapo chupekuéra g̃uarã ojerovia haguéicha hikuái Tupãre; upévare, oguerekóramo hikuái jerovia oguerovia hag̃ua Tupã ikatuha ojapo umi ju ohechauka pe tape ohovaʼerãha hikuái, péina ápe, upéicha oiko; upévare ojejapo chupekuéra ko milágro, ha avei heta ambue milágro ojejapovaʼekue ára ha ára Tupã puʼaka rupive.

41 Upevére, ojejapógui koʼã milágro mbaʼe michĩ rupive ojehechaukákuri chupekuéra tembiapo hechapyrãva. Ha katu iñateʼỹ hikuái, ha hesarái hikuái omombaʼapo hag̃ua ijerovia ha ijesareko ha upéva rupi umi tembiapo techapyrãva opa, ha noñemotenondéi hikuái ijeguatápe;

42 Upévare, hiʼare hikuái pe taveʼỹme, térã ndoguatái hikuái kareʼỹme, ha ohasa hikuái ñembyahýi ha yʼuhéi, hembiapovai rupi.

43 Ha koʼág̃a, che raʼy, aipota reikũmby koʼã mbaʼe haʼeha peteĩ ñemohaʼanga; ñande rukuéra imbeguégui ojesareko hag̃ua pe brújula rehe (koʼág̃a koʼã mbaʼe yvyʼariguákuri) haʼekuéra noñakãrapuʼãikuri; jepe upéicha avei haʼe umi mbaʼe espíritu reheguáva ndive.

44 Ha katu péina ápe, ndahasyiete niko jajesareko hag̃ua pe Cristo ñeʼẽ rehe, ohechaukátava ndéve peteĩ tape ikareʼỹva pe vyʼapavẽ opaveʼỹvape, haʼe haguéicha ñande rukuérape ojesareko ko brújula rehe, ohechaukáva chupekuéra peteĩ tape ikareʼỹva pe yvy ñeʼẽmeʼẽngue gotyo.

45 Ha koʼág̃a che haʼe, ndaipóri piko koʼã mbaʼépe peteĩ ñemohaʼanga? Ha añetehápe ogueru haguéicha ko director ñande rukuérape, pe yvy ñeʼẽmeʼẽnguépe, ojapo haguére hikuái heʼíva ipype, péicha Cristo ñeʼẽ, jajapóramo pe heʼíva, ñandegueraháta ko yvytupaʼũ mboypýrigui oĩháme vyʼaʼỹ peteĩ yvy jehejapyre iporãvévape.

46 O che raʼy, ani ñaneateʼỹ pe tape ndahasýi haguére; péicha ojehúgui ñande rukuérape; péicha oñembosakoʼígui chupekuéra g̃uarã, oikove hag̃ua omañáramo; péicha avei ñanendive. Pe tape oñembosakoʼíma, ha ñamañaséramo ikatúta jaikove tapiaite peve.

47 Ha koʼág̃a, che raʼy, eñangareko koʼã mbaʼe marangatúre, heẽ, eñehaʼãke tereho Tupãme reikove hag̃ua. Tereho ko tavayguakuéra apytépe ha emombeʼu pe ñeʼẽ, ha ne akãguapy. Che raʼy, jajoecha peve.