1 Ha ojehu omoĩ hikuái lamanita-kuéra prisionéro ári ñangarekohára, ha oñemyaña chupekuéra oho ha oñotỹ hag̃ua iteʼõnguekuéra, heẽ, ha avei nefita-kuéra omanovaʼekue reʼõngue; ha Moroni omoĩ hiʼarikuéra ñangarekohára omaʼẽ hag̃ua hesekuéra ojapo aja hembiapo.

2 Ha Moroni oho Mulek tavaguasúpe Lehi ndive, ha ojagarra pe tavaguasu ñeisãmbyhy ha omeʼẽ Lehi-pe. Koʼág̃a péina ápe, kóva ko Lehi haʼe pe oĩvaʼekue Moroni ndive hetave iñorairõme; ha haʼevaʼekue peteĩ kuimbaʼe Moroni joguaha, ha ovyʼavaʼekue hikuái peteĩ ha ambue ñemoʼãme; heẽ, ojoayhuvaʼekue peteĩva ambuépe, ha avei ohayhuvaʼekue chupekuéra opa Nefi tavayguakuéra.

3 Ha ojehu lamanita-kuéra oñotỹmba rire heʼõnguekuéra, ha avei nefita-kuéra reʼõngue, ojeguerahajey chupekuéra Abundancia retãme; ha Teáncum, Moroni rembiapoukapy rupi, ojoʼouka chupekuéra peteĩ yvykua tetã jerére, térã tavaguasu, Abundancia jerére.

4 Ha omopuʼãuka peteĩ ñemoʼãha yvyrágui pe yvykua rembeʼy hyepy gotyogua ári; ha oity hikuái pe yvy osẽvaʼekue yvykuágui pe ñemoʼãha yvyra rehe; ha péicha omombaʼapouka hikuái lamanita-kuérape omongora peve tavaguasu Abundancia peteĩ tápia yvyrágui ha yvyguigua imbaretéva reheve, ijyvatekuépe ndaijojaháiva.

5 Ha ko tavaguasúgui oiko upe guive peteĩ moʼãha imbaretetereíva; ha ko tavaguasúpe oñongatuvaʼekue hikuái lamanita-kuéra prisionéro; heẽ, jepe peteĩ tápia ryepýpe omopuʼãukavaʼekue chupekuéra ipópe. Koʼág̃a Moroni omyaña lamanita-kuérape ombaʼapo hag̃ua, ndahasýigui oñangareko hesekuéra hembiapo aja; ha haʼe oguerekose opa isoldádo lamanita-kuéra oñemoĩ vove g̃uarã hesekuéra.

6 Ha ojehu péicha Moroni ohupytýkuri puʼaka peteĩ lamanita-kuéra ehérsito tuichavéva ári, ha ojagarrákuri Mulek tavaguasu, haʼéva peteĩ lamanita-kuéra renda imbaretevéva Nefi retãme; ha péicha avei haʼe omopuʼãkuri peteĩ moʼãha mbarete ojoko hag̃ua iprisionerokuérape.

7 Ha ojehu noñehaʼãvéima ogueru ñorairõ lamanita-kuéra rehe upe arýpe, ha katu omombaʼapo ijehersitokuérape ñorairõguasurã ñembosakoʼípe, heẽ, ha omopuʼã hag̃ua tendamoʼãha oñeñongatu hag̃ua lamanita-kuéragui, heẽ, ha avei omosãso hag̃ua ikuña ha itaʼyrakuérape ñembyahýi ha jehasaʼasýgui, ha omoĩ hag̃ua tembiʼu ijehersitokuérape g̃uarã.

8 Ha koʼág̃a ojehu lamanita-kuéra ehérsito, yguasu kuarahyreikepegua, sur gotyo, Moroni ndaipóri aja, mbaʼeñemi oĩva nefita-kuéra apytépe rupi, oguerúva ñesẽ ijapytepekuéra, ohupytýkuri puʼaka nefita-kuéra renda rehe, heẽ, ojagarra peve hikuái heta itavaguasukuéra upéva upe tetãme.

9 Ha péicha tembiapovai oĩva ijapytepekuéra rupi, heẽ, umi ñesẽ ha mbaʼeñemi oĩva ijapytepekuéra rupi haʼekuéra ojehecha ñeime vaietépe.

10 Ha koʼág̃a péina ápe, che aguereko mbaʼe haʼevaʼerã Ammón tavayguakuéra rehe, haʼevaʼekue, iñepyrũmbýpe, lamanita-kuéra; ha katu Ammón ha ijoykeʼykuéra rupi, térã jaʼeporã hag̃ua Tupã puʼaka ha ñeʼẽ rupi, haʼekuéra oñekonvertivaʼekue Ñandejárape; ha ojeguerahavaʼekue chupekuéra Zarahemla retãme, ha nefita-kuéra omoʼãvaʼekue chupekuéra upe guive.

11 Ha iñeʼẽmeʼẽnguéra rupi ojejokókuri chupekuéra ani hag̃ua ojagarra umi árma ijoykeʼykuéra rehe; ojapóguikuri hikuái ñeʼẽmeʼẽ noñohẽmoʼãveimaha tuguy; ha iñeʼẽmeʼẽnguérape heʼiháicha omanovaʼerãmoʼãkuri hikuái; heẽ, haʼekuéra ojeitykavaʼerãmoʼã ijoykeʼykuéra pópe, ndahaʼéirire pe poriahuvereko ha tuicha mborayhu rupi Ammón ha ijoykeʼykuéra oñandúva hesekuéra.

12 Ha upéva rupi ojeguerahavaʼekue chupekuéra Zarahemla retãme; ha upe guive omoʼãvaʼekue chupekuéra nefita-kuéra.

13 Ha katu ojehu ohechávo hikuái upe mbaʼevai, ha umi heta jehasaʼasy ha jeikoʼasy nefita-kuéra ohasáva hesekuéra, henyhẽ hikuái poriahuverekógui ha ojagarrase umi árma omoʼã hag̃ua hetãme.

14 Ha katu péina ápe, oĩma jave hikuái ojagarra hag̃uáicha hiʼárma ñorairõguasurã, okonvense chupekuéra Helamán ha ijoykeʼykuéra ñeʼẽ, haimetégui ojapyhara hikuái pe ñeʼẽmeʼẽ ojapovaʼekuére.

15 Ha Helamán okyhyje ojapóramo hikuái upéva ohunditaha hiʼangakuéra; upévare opavave umi ojapovaʼekue kóva ko konvénio oñemyañámante chupekuéra ohechávo ijoykeʼykuérape ohasa koʼã jehasaʼasy, koʼã iñeimevaietépe ko árape.

16 Ha katu péina ápe, ojehu oguerekókuri hikuái heta itaʼyrakuéra, ojapoʼỹvaʼekue konvénio ndogarramoʼãiha hiʼárma ñorairõrã oñemoʼã hag̃ua ihayhuʼỹhakuéragui; upévare oñembyaty hikuái upe árape, opavave ikatúva ojagarra árma, ha oñembohéra hikuái nefita.

17 Ha ojapo hikuái peteĩ ñeʼẽmeʼẽ oñorairõtaha nefita-kuéra tekosãso rehe, heẽ, omoʼãvo upe tetã hekove reheve jepe; heẽ, jepe ojapo hikuái konvénio arakaʼeve nomboykemoʼãiha hekosãso, ha katu oñorairõtaha hikuái opa ára omoʼã hag̃ua nefita-kuérape ha ijupekuéra ñeñapytĩmbýgui.

18 Koʼág̃a péina ápe, oĩkuri dos mil koʼã mitãrusu, ojapovaʼekue péva pe konvénio ha ojagarravaʼekue hikuái hiʼárma ñorairõguasurã omoʼã hag̃ua hetã.

19 Ha koʼág̃a péina ápe, upéicha arakaʼeve nomokangyivaʼekue hikuái nefita-kuérape, oiko chuguikuéra upe jave peteĩ tuicha pytyvõ; ojagarrágui hikuái hiʼárma ñorairõguasurã, ha oipotákuri Helamán tahaʼe imburuvichakuéra.

20 Ha opavave haʼekuéra mitãrusu, ha ikatupyryeterei hikuái pyʼaguasúpe, ha avei mbarete ha tembiapokuaápe; ha katu péina ápe, ndahaʼéi péva añónte—haʼe hikuái yvypóra ijeroviarekóva opa ára opáichagua mbaʼe oñemeʼẽvape chupekuéra.

21 Heẽ, haʼékuri hikuái kuimbaʼe añetegua ha iñakãguapýva, oñemboʼéguikuri chupekuéra iñeʼẽrendu hag̃ua Tupã rembiapoukapykuérare ha oiko hag̃ua kareʼỹme henondépe.

22 Ha koʼág̃a ojehu Helamán oguata idos mil soldadokuéra mitãrusu renonderã, oipytyvõ hag̃ua tavayguakuérape tetã surpegua rembeʼýpe yguasu kuarahyreikepegua ypy gotyo.

23 Ha péicha opákuri ary veintiocho huekuéra ñeisãmbyhy aja Nefi tavayguakuéra ári.