1 Ao ngkai, natiu ae te mwaane, I nooria bwa iai riki bwaai aika a katabetabea am iango, are ko aki oota iai—are e kaineti ma ana ^amomotiraoi te Atua ni katuaea te tia bure; bwa ko kataia n iangoia bwa bon tiaki te motiraoi ae e na katukaki n te aro ae kananokawaki.

2 Ngkai nooria, natiu ae te mwaane, N na kabwarabwara te bwai aio nakoim. Bwa nooria, i mwin are te Uea ae te Atua e ^akaotinakoia ara moan kaaro man te nne n aroka are ^bEten, bwa a na mwakuria aontano, are a anaaki mai iai—eng, e kaotinakoa te mwaane, ao e katuka mai tabon te nne n aroka are Eten, te ^ckerubim, ma te kabaang ae e ura are e rarairaki nakon taabo ni bane, bwa a na kawakina te ^dkai ni kamaiu—

3 Ngkai, ti nooria bwa te aomata e a riki n aron te Atua, n ataa te raoiroi ao te buakaka; ao mwiina e arora baina, man anaia naba man te kai ni kamaiu, ma ni kanna ao ni maiu n aki toki, te Uea ae te Atua e katuka te kerubim ma te kabaang ae e ura, bwa e aonga n aki kana te uaanikai—

4 Ao ngaia are ti a nooria, bwa bon iai te tai are e a tia te aomata n anganaki bwa e na rairananona iai, eng, te ^atai ni kataki, te tai n rairannano ao ni beku ibukin te Atua.

5 Bwa nooria, ngke arona bwa Atam e waekoa n arora baina, ma ni kana uaan te kai ni kamaiu, e na bon maiu n aki totoki, n aron ana taeka te Atua, n akea ana tai ibukin te rairannano; eng, ao e na bon akea naba bonganan ana taeka te Atua, ao te babaire ni kamaiu are e korakora e na bon tia ni kamangaoaki.

6 Ma nooria, e bon baireaki nakon te aomata bwa e na ^amate—ngaia are, ngke a kamaenakoaki man te kai ni kamaiu a bon riai naba ni kamaenakoaki man te aonaba—ao e bua te aomata n aki toki, eng, a riki bwa te aomata ae ^bbwaka.

7 Ao ngkai, ko nooria man aei bwa ara moan karo a bon ^akamaenakoaki n te rabwata ao te tamnei mai matan te Uea; ao ngaia are ti a nooria bwa a toronaki i bon irouia bwa a na irira oin ^bnanoia.

8 Ao ngkai nooria, e bon aki riai bwa te aomata e na manga kaokaki man te mate n rabwata aio, bwa e na bon uruaki iai te ^ababaire ni kakukurei are e korakora.

9 Ngaia are, ngkai e aki kona ni mate te tamnei, ao te ^abwaka e bon uota nako aoia aomata ni kabane te mate n tamnei ao te mate n rabwata naba, are nanona, bwa a kanakoaki mai matan te Uea, ao e bon riai bwa aomata a na manga kaokaki man te mate n tamnei aei.

10 Ngaia are, ngkai a tia ni bwaina te nano n ^arabwata, te namakin n rabwata, ma te nano n riaboro, n aroia ni ^bkoaua, te ^caro ni kataitai aio e riki bwa te tai ibukiia bwa a na katauraoia; ao e riki bwa te tai ni katauraoi.

11 Ao ngkai uringnga, natiu ae te mwaane, bwa ngke arona bwa akea te babaire ni kabomwi, (ngke e katukaki n aki tabeakinaki) n te tai naba are a mate iai ao a bon ^ananokawaki tamneia, bwa a maenako mai matan te Uea.

12 Ao ngkai, a na bon akea angan kaokaia aomata man te aro ni bwaka aei, are e a bon tia n reke nakon te aomata ibukin ana aki ongeaba.

13 Ngaia are, ni kaineti ma te motiraoi, te ^ababaire ni kabomwi e bon aki kona ni koro bukina, ma ti man te ^brairannano mai irouia aomata n te tai ni kataki aei, eng, te tai ni katauraoi aei; bwa ngke akea aaro aikai, ao bon akea korakoran te nanoanga ma e na ti kamauna te motiraoi. Ao ngkanne te mwakuri ni motiraoi e bon aki kona ni kamaunaki; bwa ngkana e riki aei, ao te Atua bon ^ctiaki te Atua.

14 Ao ikai are ti a nooria bwa ni kabane aomata a ^abwaka, ao a mena n ana tautau te ^bmotiraoi; eng, ana motiraoi te Atua, are a katukaki iai bwa a na kanakoaki mai matana n aki totoki.

15 Ao ngkai, te babaire n nanoanga e aki kona ni koro bukina ngkana akea te mwakuri ni kamaiu ae karaoaki; ngaia are te Atua i bon irouna e karaoa te ^amwakuri ni kamaiu ibukin buren te aonaba, bwa e aonga n reke te babaire n ^bnanoanga, e na rau te nano n tangiran te ^cmotiraoi, bwa e aonga ni ^dkororaoi te Atua, e na etieti te Atua, ao te Atua ae nanoanga naba.

16 Ngkai, te rairannano e aki kona n reke nakoia aomata ma ti ngkana iai te katuaa, are ^aakea naba tokina n aiaron naba maiuin te tamnei, ao e kanimwaki mangaia bwa e na kaitaraa te babaire ibukin te kukurei, are bon akea naba tokina n aiaron naba maiun te tamnei.

17 Ngkai, e na kanga n rairananona te aomata ma ti ngkana e karaoa te ^abure? E na kanga ni bure ngkana akea te ^btua? E na kanga n iai te tua ma ti ngkana iai te katuaa?

18 Ao ngkai, bon iai te tua ae kanimwaki mangaia, ao te tua ae etieti, are e karekea te namakin ma te ^aatatai ae kananokawaki nakon te aomata.

19 Ngkai, ngke arona bwa akea te tua ae ti anganaki—ao ngkana e ^atiritiri te aomata ao e mate—e na maaku ni mate ngkana e tiritiri?

20 Ao riki, ngkana bon akea te tua ni kaitaraa te bure ao aomata a na bon aki maaku ni bure.

21 Ao ngkana ^aakea te tua ae ti anganaki, ngkana a bure aomata ao teraa ae e kona ni karaoia te motiraoi, ke te nanoanga naba, bwa a na bon akea aia bwai iroun te aomata?

22 Ma bon iai te tua ae ti anganaki, ao te katuaa ae kanimwaki mangaia, ao te ^arairannano ae ti anganaki; ao te rairannano e butimwaeaki n te nanoanga; bwa ngkana e aki, ao te motiraoi e na butimwaea te aomata ma ni karaoa nanon te tua, ao te tua e na karaoa te katuaa, bwa ngkana e aki ao te mwakuri ni momotiraoi e na kamaunaki, ao te Atua e na bon toki arona n Atua.

23 Ma te Atua e aki toki arona bwa te Atua, ao te ^ananoanga e butimwaea taan raraoma, ao e reke te nanoanga man te ^bmwakuri ni kamaiu; ao te mwakuri ni kamaiu e kakoroa bukin ^cmangautiia maate; ao mangautiia maate e ^dkaokiia aomata nako matan te Atua; ao ngaia are a kaokaki nako matana, bwa a na ^emotikaki taekaia n aron aia mwakuri, ni kaineti ma te tua ao te momotiraoi.

24 Bwa nooria, te momotiraoi e karaoi bwaai ni kabane ake e tangiri, ao te nanoanga e anai bwaai ni kabane ake bon oin ana bwai; ao ngaia, are akea ma bon ake a raraoma ni koaua aika a na kamaiuaki.

25 Tera, tao ko taku inanom bwa te nanoanga e kona n ira mai iroun te ^amomotiraoi? I taku nakoim, E aki; e bon aki naba teutana. Bwa ngkana ti aki arona aei, ao te Atua e na bon toki arona n Atua.

26 Ao ngaia are te Atua e a kakoroa bukin ana ^akantaninga nako aika a korakora ao akea tokia, are a katauraoaki ^bngke e karaoaki aan te aonaba. Ao ngaia are e a koro bukin kamaiuakia ma kaboakia aomata, ma kamaunakia ao te kananokawaki.

27 Ngaia are, O natiu ae te mwaane, ^aane kan roko e na roko ni mooi n te ran ni kamaiu n akea bona; ao ane e rawa n roko ao e na bon aki kairoroaki bwa e na roko; man te kabanea ni bong e na manga bon ^bkaokaki nakoina aron ana ^cmwakuri.

28 Ngkana iai nanona ni karaoa ae ^abuakaka, ao e tuai n rairananona n ana bong ni maiu, nooria, e na karaoaki ae buakaka nakoina, n aron are kaoki bwaai te Atua.

29 Ao ngkanne, natiu ae te mwaane, I tangiria bwa a na aki manga katabetabeko bwaai aikai, ma ko na ti tabetabe n am bure, n te katabetabe are e na uotiko nakon te rairannano.

30 O natiu ae te mwaane, I tangiria bwa ko na manga aki oki ni kaakea ana momotiraoi te Atua. Tai kataia ni kakaea maium naba teutana man am bure, man kaakeaan ana momotiraoi te Atua; ma kariaia bwa ana momotiraoi te Atua ma ana nanoanga, ma ana taotaonannano n te tai ae maan a na iai korakoraia inanom; n te aro are a na uotiko rikaaki nako aontano bwa ko na ^ananorinano.

31 Ao ngkai, O natiu ae te mwaane, ko a tia ni weteaki iroun te Atua bwa ko na reirei ana taeka nakoia te botanaomata aio. Ao ngkanne, natiu ae te mwaane, nako ni kawaim, taekina te taeka ma te koaua ao taua raum, bwa ko aonga ni kairia aomata nakon te rairannano, bwa e aonga n iai korakoran te babaire n nanoanga i aoia. Ao ke anganiko te Atua n aron au taeka. Amen.