1 Ao ngkanne e koro bukina bwa i mwin maten Korioa, ao Aramwa ngke e tia ni karekea te rongorongo bwa Tioramwaite a kabwaoua ana kawai te Uea, ao bwa Tioram, are aia mataniwi, e kaira nanoia aomata bwa a na ^abobaraaki nakoia ^bbouananti aika a babanga n taetae, e ^caoraki nanon Aramwa ibukin buakakaia aomata.

2 Bwa bon te bwai ae karika te ^ananokawaki ae bati nakon Aramwa ataakin te buakaka are e mena i buakoia ana botanaomata; ngaia are e korakora nanokawakin nanona ibukin maenakoia Tioramwaite mai irouia Nibwaite.

3 Ngkai Tioramwaite a ikotiia ni kabane n te aba are a aranna bwa Anteonam, are e mena i mainikun te aba are Taraemera, are e wene ni kaania tian mataniwin te bike, are e mena i maiakin te aba are Ietion, are e bon wene n tian te rereua are i maiaki, are te rereua are e onrake irouia Reimwanaite.

4 Ngkai Nibwaite a korakora maakuia bwa mwiina Tioramwaite a na karekea te reitaki ma Reimwanaite, are nanona bwa e na korakora ae bua n aia itera Nibwaite.

5 Ao ngkai, ibukina bwa te ^ataeka ae ^bkabwarabwaraki iai ana konabwai ni ^ckairia aomata bwa a na karaoa ae e eti—eng, bon iai korakoran riki korakorana iaon aia iango aomata nakon te kabaang, ke te bwai riki teuana, are e a tia n riki nakoia—ngaia are Aramwa e iangoia bwa e riai bwa a na kata tamaroan ana taeka te Atua.

6 Ngaia are e anaa Amon, ma Aaron, ma Aomna; ao Imnaai e bon katukaki n te ekaretia i Taraemera; ma naake teniman ake i mwain ae kairia mangaia, ma Amureki naba ma Teeterom, ake a mena i Mereki; ao e kairia naba natina aika uoman mwaane.

7 Ngkai e bon aki kaira ana karimoa te mwaane, ao arana bon ^aEreman; ma araia ake e kairia ma ngaia bon Tiburon ma Korianton; ao aikai araia ake a iria nako buakoia ^bTioramwaite bwa a na kabwarabwara nakoia te taeka.

8 Ngkai Tioramwaite bon ^ataan biri nako mai irouia Nibwaite; ngaia are e a bon tia ni kabwarabwaraki nakoia ana taeka te Atua

9 Ma a bon tia ni ^abwaka ni bure aika a korakora, bwa a aki kataia ni kawakina ana tua te Atua ma ana reirei, n aron ana tua Mote.

10 Ao a aki naba kataia ni kaawakin ana mwakuri te ekaretia, n reitinako n tataro ma ni bubuti nakon te Atua ni katoa bong, bwa aonga n aki kaririaki.

11 Eng, ni kakimototoa, a bon kabwaouai kawain te Uea n taai aika a mwaiti; ngaia are ibukin aei, ao Aramwa ma tarina a nako n te aba bwa a na kabwarabwara te taeka nakoia.

12 Ao ngkanne, ngke a tia n roko n te aba, nooria, a mimi ngke Tioramwaite a katea aia auti n nebo, ao are a ikoikotaki tebongina n te wiiki, are te bong are aranna bwa ana bong te Uea; ao a bon nebonebo n te aro ae Aramwa ma tarina a bon tuai n nonoria mai i mwaaina.

13 Bwa iai te tabo are a kateia i nukan aia auti n nebo, te tabo n tei, are e rietata i etan te atu; ao bon ti temanna ae kona n rin n are mai ieta.

14 Ngaia are, ane iai nanona ni kan ^ataromauri e na riai n nako man tei i eta, man arori baina nako karawa man tang n te bwanaa ae takarua, ni kangai:

15 E Mimitong, e Mimitong te Atua: ti kakoaua ae ngkoe te Atua, ao ti kakoaua bwa ko mimitong, ao bon ngkoe te tamnei, ao kona bon tiku n tamnei n aki toki.

16 Te Atua ae ko Mimitong, ti kakoaua bwa ko a tia ni kamaenakoira mai irouia tarira: ao ti bon aki kakoauai aia katei tarira, are a anganaki n nanoroia aia bakatibu; ma ti kakoaua bwa ko a tia n ^arineira bwa natim aika ti ^btabu; ao ko a tia naba ni kaotia nakoira bwa a na akea te Kristo.

17 Ma titebo ngkoe ngkoananoa, ngkai ao n aki toki; ao ko a tia n ^arineira bwa ti aonga ni kamaiuaki, ao naake i rarikira a rineaki bwa a na teweaki rikaaki n unim nako moone; ao ibukin mimitongim, O te Atua, ti kaitauko, ao ti kaitauko naba bwa ko a tia n rineira bwa ti na aki kairaki nako ni burababan aia katei tarira, are a kabaeaki iai bwa ana kakoaua Kristo, are e kaira nanoia bwa a na tiotio nako mai iroum, Atuara.

18 Ao riki ti kaitauko, O te Atua, bwa ngaira te botanaomata ae ti rineaki man tabu. Amen.

19 Ngkai e koro bukina bwa i mwina ngke Aramwa ma tarii ao natina mwaane a ongo tataro aikai, a bon rianako miimiia.

20 Bwa nooria, ni kabane te aomata e waaki rake n anga te tataro ae titebo.

21 Ao ngkanne te tabo aio e aranaki irouia bwa Ramantam, are, nanona, bon te tabo n tei ae tabu.

22 Ao ngkai, man te tabo n tei aei are ni kabane aomata, a tabeka rake te tataro ae ti te aekakina nako te Atua, ni karabwa Atuaia bwa a tia n rineaki irouna, ao bwa e aki kairia nako bwa a na katotonga aia katei tariia, ao bwa a aki kairaki nako nanoia bwa a na kakoauai bwaai aika a na roko, are aki atai taekaia.

23 Ngkai, i mwina ngke aomata a bane n tia n tabeka rake aia karabwarabwa n te aekaki aei, a bane n okira mwengaia, n aki manga ^ataekina riki Atuaia ni karokoa te tai are a manga ikotaki riki n te tabo n tei are e tabu, bwa a na manga tabeka rake aia karabwarabwa n aekaia arei.

24 Ngkai, ngke Aramwa e noora aio ao e ^arawawata nanona; bwa e nooria bwa bon aomata aika a buakaka ma ni matoa n aia eti; eng, e nooria bwa nanoia e mena n te koora, ao te tirewa, ma aekan nako bwaai aika a raka tamaroaia.

25 Eng, ao e nooria naba bwa nanoia e ^atabekaki rake n te kamoamoa ae korakora, ibukin aia kainikatonga.

26 Ao e tabeka rake bwanana nako karawa, man ^atang, ni kangai: O, maanra O te Uea, ae ko na kariaia bwa am toro ana maeka iaon te aba ni maiu n rabwata, bwa a na taratara korakoran te buakaka i buakoia natia aomata?

27 Nooria, O te Atua, a ^atang nakoim, ma nanoia e kabwautaki ni kainikatongaia. Nooria, O te Atua, a tang nakoim ni matanriaia, ma a ^bkaonrakeaki, n te aro are a taku bwa a korakora, ni bwain te aonaba aika akea manenaia.

28 Nooria, O Atuau, bwaai aika a rang bobuaka, ma aia mwamwa, ma aia ^aburenibai, ma aia bwai ni katamaroa aika a koora, ma bwaai aika a kakawaki ake a katamaroaki iai; ao nooria, a mena nanoia iai, ma a bon tang nakoim ni kangai—Ti karabwako, O te Atua, bwa ngaira bon te botanaomata ae rineaki iroum, ao tabemwaang a na mate.

29 Eng, ao a taku bwa ko a tia ni kaotia nakoia bwa a na akea te Kristo.

30 O te Uea ae te Atua, ai maannra riki ae ko na kariaia bwa te buakaka ma te aki kakaonimaki nakon te Atua e na mena i buakoia te botanaomata aio? O te Uea, ko kona n anganai korakorau, bwa N na kona n uouota mamaarau. Bwa I mamaara, ao te buakaka are i buakoia aomata aikai e bon kammaraka tamneiu.

31 O te Uea, e korakora nanokawakin nanou; ko kona ni karaua nanou ^ai nanon Kristo. O te Uea, ko kona n anganai bwa e na reke korakorau, bwa N na keiakin ma te taotaona n nano ni karawawata ake a na roko nakoiu, ibukin buakakaia te botanaomata aio.

32 O te Uea, ko kona n anganai karauan nanou, man anganai bwa e na nakoraoi au waaki, ma raou naba ni beku ake a raonai—eng, Amon, ma Aaron, ma Aomna, ma Amureki ma Teeterom naba, ma natiu mwaane naba aika ^auoman—eng, ko na karau nanoia aikai, O te Uea. Eng, ko kona ni karau nanoia i nanon Kristo?

33 Ko kona n anganiia bwa e na reke irouia te korakora, bwa a na kona ni keiakin karawawatakia ake a na roko i aoia ibukin buakakaia te botanaomata aio.

34 O te Uea, ko kona n ^aanganiira bwa e na nakoraoi ara waaki ni kairia riki nakoim i nanon Kristo.

35 Noori, O te Uea, a kakawaki ^atamneia, ao a mwaiti i buakoia aika tarira; ngaia are, anganiira, O te Uea, te mwaaka ao te wanawana bwa ti na kona ni manga kairia tarira, riki nakoim.

36 Ao ngkanne e koro bukina bwa ngke Aramwa e a tia n taekin taeka aikai, e ^auboi ^bbaina i aoia ake a raonna. Ao nooria, ngke e uboa baina i aoia, a kaonaki n te Tamnei ae Tabu.

37 Ao i mwin arei a maenako temanna mai iroun temanna, ^an aki iangoia bwa teraa kanaia, ke teraa nimaia, ke teraa ae ana bwainna.

38 Ao te Uea e katauraoi ibukiia bwa a na aki baki, ao a na aki naba taka; eng, ao e anganiia naba te korakora, bwa a na aki kainnanoaki n aekan ^akarawawata n aekaia nako, ma a na ti kabwautaki n te kimwareirei iroun Kristo. Ao ngkanne aio e bon kaineti ma ana tataro Aramwa: ao aio ibukina bwa e tataro i nanon te ^bonimaki.