1 Ao ngkanne, natiu Ereman, I anganiko te tua bwa ko na anai mwiin ^arongorongo ake a tia ni ^bkatukaki irou;

2 Ao I anganiko naba te tua bwa ko na korea rongorongoia te botanaomata aio, n aron ae I a tia ni karaoia, iaon ana bwaatua Nibwaai, ma ni kaawakin bwaai aika a tabu are I a tia ni kaawakin, n aron ae I a tia ni kaawakin; bwa iai bukina ae ^akakannato are a kawakinaki iai.

3 Ao ^abwaatua aika a buraati aikai, ake iai taian koroboki iai, ake iai mwiin koroboki aika tabu, ake a mena iai kateirikiaia ara bakatibu, n aron are mai i moana—

4 Nooria, e a tia n taetae ni burabetiaki irouia ara bakatibu, bwa a na kawakinaki man uotaki rikaaki man te roro teuana nakon are teuana, man tararuaki ao ma ni kawakinaki ni bain te Uea ni karokoa te tai are e na waaki nako, nakon aaba, reeti, neewe ao botanaomata, bwa a na atai ^abwaai aika a raba ake a koreaki i aoia.

5 Ao ngkai nooria, ngkana a kawakinaki e na riai n tiku raneaneaia; eng, ao ai aroia naba ni kabane bwaatua ake iai koroboki aika tabu iai.

6 Ao ngkanne tao ko na taku bwa iai te ^aburababa irou; ma nooria I taku nakoim, bwa a riki bwaai aika a korakora man bwaai aika a ^buarereke man aki kaangaanga; ao bwaai aika a uarereke n angiin te tai a kaminoia aika a wanawana.

7 Ao te Uea ae te Atua e bon mwakuri ma te ^akantaninga bwa e na karokoa ana babaire are kakannato man akea tokina; ao man bwaai aika a ^buarereke ao te Uea e kaminoia aika a wanawana ma ni karekea kamaiuaia aomata aika a mwaiti.

8 Ao ngkai, e a kaman iai te wanawana iroun te Atua bwa bwaai aikai a na kawakinaki; bwa nooria, a ^akarababa aia urururing te botanaomata aio, eng, ma ni kakoaua nakoia aika a mwaiti ibukin buren aroia, ma ni kairia aika a mwaiti nakon ataakin Atuaia nakon kamaiuan tamneia.

9 Eng, I taku nakoim, ^abwa ngke arona bwa akea bwaai aikai ake a koreaki n rongorongo aikai, ake iai ni bwaatua aikai, ao Amon ma tarina a bon aki kona ni ^bkairoroia ngaa ma ngaa mwaitia Reimwanaite bwa a na kakoaua buren aia katei aia bakatibu; eng, rongorongo aikai ma aia ^ctaeka a uotia nakon te rairannano; nanona bwa, a kairia nakon ataakin aia Uea ae Atuaia, ao bwa a na kimwareirei i nanon Iesu Kristo aia Tia Kaboia.

10 Ao antai ae e na ataia bwa tao a na riki bwa ngaia taan kairia ngaa ma ngaa, eng, ao ngaa ma ngaa naba tarira aika a bonotaninga, Nibwaite, ake a kamatoai nanoia ngkai n te bure ma te buakaka, nakon ataakin aia Tia Kaboia.

11 Ngkai mwakuri aika a kamimi aikai a bon aki kaotaki ni bwanin nakoiu; ngaia are I taona nanou.

12 Ao e a tau naba ngkana I a ti taekinna naba bwa iai bukin kawakinakia ae wanawana, ae bukina ae e ataia te Atua; bwa e bon anganga ^akaetieti ni wanawanana iaon ana mwakuri ni kabane, ao a eti kawaina, ao kawaina kanga aiaron te ^bmronron ae akea tokina.

13 O uringnga, uringnga, natiu ae Ereman, ^amatoatoan ana tua te Atua. Ao e taku: ^bNgkana kam kaawakin au tua ao kam na ^crikirake iaon te aba—Ma ngkana kam aki kaawakin ana tua ao kam na teweaki nako mai matana.

14 Ao ngkai uringnga, natiu, bwa te Atua e a tia ni ^amwiokoiko ma bwaai aikai, ake e kaawakin bwa a ^btabu, are e na taua naba ma ni kawakinna bwa iai bukina ae ^cwanawana irouna, bwa e na kaota mwaakana nakoia rooro aika a na roko.

15 Ao ngkanne nooria, I tuangko iroun tamnein te taeka ni burabeti, bwa ngkana ko karaoa te bure ni kaineti ma ana tua te Atua, nooria, bwaai aika a tabu aikai a na bon anaaki mai iroum ni mwaakan te Atua, ao ko na kanakoaki nakon Tatan, bwa e na ioiko n aron kunin te wiita n te ang.

16 Ma ngkana ko kawakina ana tua te Atua, ma ni karaoi bwaai aika a tabu ni kaineti ma te bwai are e tuangko te Uea, (bwa ko na bubuti nakon te Uea ibukin bwaai ni kabane are ko na karaoi mangaia) nooria, akea te mwaaka iaon te aba ke i moone ae kona n ^aanaia mai iroum, bwa te Atua e korakora mwaakana ni kakoroi bukin ana taeka ni kabane.

17 Bwa e na kakoroi ana berita ni kabane, are e na karaoi nakoim, bwa e a tia ni kakoroi bukin ana berita ake e karaoi nakoia ara bakatibu.

18 Bwa e berita bwa e na ^akaawakin bwaai aikai bwa iai bukina ae wanawana irouna, bwa e na kaota mwaakana nakoia rooro aika a na roko.

19 Ao nooria, teuana bukina ae e a koro bukina, bon kaokaia ngaa ma ngaa ^amwaitia aika Reimwanaite nakon ataakin te koaua; ao e a tia ni kaota mwaakana irouia, ao e na bon teimatoa naba ni kaota mwaakana irouia nakoia roro ^baika a na roko; ngaia are a na bon kawakinaki.

20 Ngaia are I anganiko te tua, natiu ae Ereman, bwa ko na botumwaaka ni kakoroi bukin au taeka ni kabane, ao bwa ko na botumwaaka ni kaawakin ana tua te Atua n aron ake a koreaki.

21 Ao ngkai, N na taetae nakoim ni kaineti ma bwaatua ake ^auabwi ma aua, bwa ko na tauii, bwa mwakuri aika a kamimi ma mwakuri aika a roo, ma aia mwakuri ni ^bkaraba, ke aia mwakuri ni karaba aomata ake a tia n tiringaki, bwa a na kaotaki nakoia te botanaomata aio; eng, ni kabane aia tiritiri, ma aia iraa, ma aia anaibwai n iowawa, ma buakakaia ni kabane ma aia mwakuri aika bati n ribaki, bwa a na kaotaki nakoia te botanaomata aio; eng, ngaia are ko na kaawakin ^cbwaai n raitaeka aikai.

22 Bwa nooria, te Uea e nooria ana aomata bwa a waaki ni karaoi mwakuri aika a roo, eng, ni waakin mwakuri n tiritiri aika raba ma mwakuri aika bati n ribaki; ngaia are te Uea e taku, ngkana aki raira nanoia ao a na kamaunaki mai iaon te aba.

23 Ao te Uea e taku: N na katauraoa nakon au toro ae Katerem, te ^aatibu, ae e na raneanea ni kaootaa te roo, bwa N na kaota nakoia au botanaomata ae a toro irou aia mwakuri tariia, eng, aia mwakuri ni karaba, aia mwakuri n roo, ma buakakaia ao aia mwakuri aika bati n ribaki.

24 Ao ngkanne, natiu te mwaane, aikai bwaai n raitaeka aika a katauraoaki bwa e aonga ni koro bukin ana taeka te Atua, are e taekinna ni kangai:

25 N na ^akaotinakoi man te roo nakon te oota aia mwakuri ni kabane aika a raba ma aia mwakuri aika bati n ribaki; ao N na ^bkamaunaia mai aon te aonaba ngkana aki rairinanoia; ao N na kaoti aia mwakuri aika a raba ma aia mwakuri aika bati n ribaki nakon te oota, nakoia aomata ni kabane ake a na bwaina te aba aio i mwina.

26 Ao ngkai, natiu te mwaane, ti nooria bwa a bon aki rairi nanoia; ngaia are a bon tiringaki, ao ngaia are e a koro moa bukin ana taeka te Atua; eng, mwakuri aika bati n ribaki aika a raba a bon kaotaki man te roo nakoira.

27 Ao ngkai, natiu te mwaane, I anga te tua nakoim bwa ko na tauii ni kabane aia tuea, ma aia berita, ma aia boraraoi n aia mwakuri aika bati n ribaki aika a raba; eng, ma aia ^akanikina ni kabane ma aia waaki aika a kamimi ni kabane ko na karabai mai irouia te botanaomata aio, bwa a na aki atai, bwa mwiina a karina ni bwaka n te roo naba ao a manga kamaunaki.

28 Bwa nooria, iai te ^amaraia iaon te aba aio, bwa e na roko te tiringaki nakoia ni kabane taan mwakuri n te roo, nakon mwaakan te Atua, ngkana a bon tawaa; ngaia are I tangiria te botanaomata aio bwa a na aki tiringaki.

29 Ngaia are ko na tauii aia babaire ni karaba ibukin aia ^aberita ma aia berita aika tabu mai irouia te botanaomata aio, ma ti buakakaia ma aia tiritiri ma aia mwakuri aika bati n ribaki ae ko na kaotia nakoia; ao ko na reireiniia bwa a na ^bribaa aekan te buakaka ma mwakuri aika bati n ribaki ma tiritiri akanne; ao ko na reireiniia naba bwa aomata aikai a bon tiringaki ibukin buakakaia ma aia mwakuri aika bati n ribaki ma aia tiritiri.

30 Bwa nooria, a tiringia ni kabane ana burabeti te Uea ake a roko i buakoia n taekina nakoia aia bure; ao raraaia ake a tiringia e bon tang nakon te Uea ae Atuaia ibukin te irantaanga i aoia ake taan tiringia; ao ngaia are e roko ana motikitaeka te Atua i aoia taan mwakuri n te roo ma botaki ni karaba aika buakaka.

31 Eng, ao e na maraia te aba n aki totoki ibukiia naake a mwakuria te roo ma botaki ni karaba aika buakaka, n tiritiri, ngkana aki rairinanoia i mwaain ae a tai.

32 Ao ngkai, natiu te mwaane, uringi taeka ake I a tia n taekin nakoim; tai anganiia te botanaomata aio babaire aika a karaba aikai, ma reireinia bwa a na aki toki ni ^akairiribai nakon te bure ma te buakaka.

33 ^aKabwarabwara nakoia te rairannano, ma onimakinan te Uea are Iesu Kristo; reireinia bwa a na kananorinanoia ao a na ^bnimamannei man nanorinano inanoia; reireinia bwa a na kaaitarai ana ^ckariri nako te riaboro, n aia onimaki iroun te Uea are Iesu Kristo.

34 Reireinia bwa a na aki kua ni mwakuri aika a raraoi, ma a na nimamannei man nanorinano inanoia; bwa aikai ake a na karekea ^araun tamneia.

35 O, uringnga, natiu te mwaane, ao reireiniko te ^awanawana i nanon ataeim; eng, reireiniko n am tai n ataei bwa ko na kaawakin ana tua te Atua.

36 Eng, ^atang nakon te Atua ibukin boutokaam; eng, tarai am mwakuri ni kabane bwa ko karaoi nakon te Uea, ao taraia bwa taabo nako ake ko kawari, ko nako iai ibukin te Uea; eng, taraia bwa am iango ni kabane a kaineta te Uea; eng, taraia bwa ana namakin nanom e mena iaon te Uea n taai nako.

37 ^aReitaki ma te Uea n am waaki ni kabane, ao e na kairiko nakon ae raoiroi; eng, ngkana ko wene n te bong wene i nanon te Uea, bwa e na tararuaiko n am tai ni matu; ao ngkana ko teirake n te ingabong taraia bwa e na onrake nanom ni ^bkarabwarabwa nakon te Atua; ao ngkana ko karaoi bwaai aikai, ko na uotaki rake n te kabanea ni bong.

38 Ao ngkai, natiu te mwaane, iai te bwai ae I kan taekinna ibukin te bwai are ara bakatibu a aranna bwa te booro, ke te tia kairi—ke ara bakatibu aranna bwa te ^aRiaona, are, nanona, te kambwati; ao te Uea e bon katauraoia.

39 Ao nooria, akea te aomata ae kona ni karaoa te bwai ae rang kamimi aron mwakuriana. Ao nooria, e bon katauraoaki bwa e na kaota nakoia ara bakatibu te kawai are a riai n toua i nanon te rereua.

40 Ao e bon mwakuri ibukiia n aron aia ^aonimaki i nanon te Atua; ngaia are, ngkana iai aia onimaki ni kakoaua bwa te Atua e kona ni kammwakuri taian kainikoto akekei bwa a na kotea te kawai are a riai n toua, nooria, e bon riki aei, ngaia are e reke irouia te bwai ae kamimi aio, ma bwaai riki aika a kamimi tabeua ake a riki man mwaakan te Atua, n te bong teuana nakon te bong teuana.

41 Ma e ngae n anne, ibukina bwa bwaai aika a kamimi aikai a riki ma ni mwakuri aika a ^auarereke ao e bon kaota nakoia mwakuri aika a kamimi. A bon taningaroti, ao a mwaninga ni kamwakura aia onimaki ma aia botumwaaka ao ngkanne a toki naba mwakuri ake a kamimi akekei, ao aikoa waaki ni kawaia.

42 Ngaia are a tiku i nanon te rereua, ke a aki mwananga ni kaineta kawaia, ao a karawawataki n te baki ma te taka, ibukin riaoan tua irouia.

43 Ao ngkai, natiu te mwaane, I tangiria bwa ko na oota bwa aki riki bwaai aikai n akea te bwai ae a katotongnga; bwa ngkai ara bakatibu a taningaroti n ongeaba nakon te kambwati aio (ngkai bwaai aikai bwain te aonaba) ao a bon aki riki rake; ao ai bon aekan naba bwaai aika a tamnei.

44 Bwa nooria, e na bon riai n rang beebete ibukim bwa ko na ongeaba nakon ana ^ataeka Kristo, are e na kotea nakoim te kawai ae eti nakon te kakukurei ae akea tokina, n aekaia naba ara bakatibu bwa a na ongeaba nakon te kambwati, are e na kotea nakoia te kawai ae eti nakon te aba ni berita.

45 Ao ngkai I kangai, tiaki bwa iai aekan te bwai teuana n te bwai aei? Bwa n aron are te tia kairiri aei e bon kairia ara bakatibu, ngke a ira kawaina, nakon te aba ni berita, ao a na taeka Kristo, ngkana ti ira kawaina, e na uotira riaon mwaruan te nanokawaki nakon te aba ni berita ae tamaroa riki.

46 O natiu te mwaane, ti na riai n aki ^ataningaroti ibukina bwa e beebete te ^bkawai; bwa bon aekaia naba ara bakatibu; bwa e bon katauraoaki ibukiia, bwa ngkana a taraia ao a na ^ckamaiuaki; ao ai bon aekara naba. E katauraoaki te kawai, ao ngkana ti taraia ao ti na maiu n aki toki.

47 Ao ngkai, natiu te mwaane, taraia bwa ko kaawakin raoi bwaai aika a tabu aikai, eng, taraia bwa ko taara te Atua ma ni maiu. Nako nakoia te botanaomata aio man taekina te taeka, man taua ma nanom. Natiu te mwaane, tiabo.