1 Nooria, ngkanne e koro bukina bwa i mwina ngke ana ^aaomata Amon a tekateka raoi n te aba are Ietion, eng, ao i mwina naba ngke a tia Reimwanaite ni ^bkakioaki nako man te aba, ao aia aomata a tia n taunaki irouia aomata ake kaain te aba—

2 Ao ngkanne aia mate a bon aki warekaki ibukina bwa e rang korakora mwaitia; ao aia mate naba Nibwaite aki warekaki mwaitia—ma e koro bukina bwa i mwin are a tia n tauniia aia mate, ao i mwin naba aia bong n aki mamatam, man tang ni wenei, man tataro (ao aio bon te katebwi ma onoua n ririki n aia tai n tautaeka taan moti iaoia ana botanaomata Nibwaai) ao e a reitinako te rau ni kabuta te aba.

3 Eng, ao aomata a bon kataia ni kaawakin ana tua te Uea; ao a bon matoatoa ni kawakinan ana ^aotenanti nako te Atua, n aron ana tua Mote; bwa a bon reireinaki bwa a na ^bkaawakin ana tua Mote n uaa e koro bukina.

4 Ao ngaia are aomata a bon aki kakiriweaki i nanon tebwi ma onoua te ririki are a tautaeka iai taan moti i aoia ana botanaomata Nibwaai.

5 Ao e koro bukina bwa ni moan waakin aia katebwi ma itiua n ririki n tautaeka taan moti, ao e bon reitinako te rau.

6 Ma e koro bukina bwa ni banen te katebwi ma itiua n ririki, ao e kaoti te mwaane temanna n te aba are Taraemera, ao bon te ^atia kakewea Kristo, bwa e waaki ni kabwarabwara nakoia aomata ni kaaitarai taeka ni burabeti ake a tia n taekinaki irouia burabeti, ni kaineti ma rokon Kristo.

7 Ao ngkanne bon akea te tua ni kaitaraa ana ^akoaua te aomata; bwa e aki boraoi ma ana tua te Atua bwa e na iai te tua are a na aki boraoi iai aomata.

8 Bwa e kangai te koroboki ae tabu: Ko na ^arineia n te bong aei, bwa antai ae ko na toro irouna.

9 Ao ngkanne ngkana te aomata e tangiria bwa e na toro iroun te Atua, ao bon kabwaiana anne; ke, ngkana e kakoaua te Atua bon kabwaiana bwa e na beku irouna; ma ngkana e aki kakoaua ao bon akea te tua ae e na katuaeaki iai.

10 Ma ngkana e tiritiri ao e katuaeaki nakon te ^amate; ao ngkana e iraa e katuaeaki naba; ao ngkana e kimoa ao e bon katuaeaki naba; ao ngkana e wenenibure e bon katuaeaki naba; eng, ibukin taian buakaka aikai ao a bon katuaeaki.

11 Bwa bon iai te tua are aomata a na motikaki taekaia n aron aia bure. Ma e ngae n anne, bon akea te tua ni kaitaraa ana koaua te aomata; ngaia are, e katuaeaki te aomata ti ibukin bure ake e a tia ni karaoi; ngaia are aomata a bon ^akaboraoaki aroia.

12 Ao te tia kakewea Kristo, are arana Korioa, (ao e bon aki kona n tauaki i aan te tua) e waaki ni kabwarabwara nakoia aomata bwa e na bon akea Kristo. Ao aio aekan ana kabwarabwara, ni kangai:

13 O ngkami ake kam kabaeaki inano i aan te kantaninga ae nanobaba man akea manena, e aera ngkai kam kabaeingkami ma bwaai aika a nanobaba? E aera ngkai kam kakaea Kristo? Bwa akea te aomata ae kona n atai bwaai aika a na roko.

14 Nooria, bwaai aikai ake kam aran bwa taeka ni burabeti, ake kam taku bwa a anga burabeti aika a tabu, nooria, bon nanobaban aia katei ami bakatibu.

15 Kam kangaa n atai koauaia? Nooria, kam aki kona n atai bwaai aika kam aki ^anoori; ngaia are kam aki kona n ataia bwa e na iai te Kristo.

16 Kam ingainga man taku bwa kam a noora kamaunan ami bure. Ma nooria, aio korakoran te iango ae mino; ao minon ami iango aio e reke man aia katei ami bakatibu, are e kairingkami nako bwa kam na kakoauai bwaai aika bon tiaki.

17 Ao a mwaiti riki bwaai ake e tuangiia, ao e tuangiia bwa e na aki kona n iai te mwakuri ni kamaiu ibukin aia bure aomata, ma te aomata e nakoraoi ke e nakobuaka arona n te maiu aei man ana waaki; ngaia are ni kabane aomata a nakoraoi aroia man wanawanaia, ao aomata ni kabane a reke bwaai irouia man korakoraia; ao te bwai ae karaoia te aomata bon ti aki te bure.

18 Ao aio aron ana kabwarabwara nakoia, ao e kairanako nanoia aika a mwaiti, ma ni menakiia bwa a na kakatonga ni buakakaia, eng, ma ni kairianako aika a mwaiti, aine, ao mwaane naba, bwa a na kabekaau—ao e tuangiia bwa ngkana e mate te aomata, ao ai bon anne naba tokina.

19 Ao ngkanne te mwaane aio e nako naba nakon te aba are Ietion, ni kabwarabwarai bwaai aikai i buakoia ana botanaomata Amon, ake bon Reimwanaite ngkoa.

20 Ma nooria a bon wanawana riki nakon angiia Nibwaite; bwa a anaia, ma ni kabaea, man uotia nako matan Amon, are bon te ibonga ae rietata i aoia te botanaomata arei.

21 Ao e koro bukina bwa e tua bwa e na uotaki nako man te aba. Ao e roko nakon te aba are Kiteon, ao e waaki ni kabwarabwara nakoia naba; ao e aki bati n nakoraoi ana waaki ikekei, bwa e anaaki ma ni kabaeaki ao e uotaki nako matan te ibonga are e rietata, are mataniwia naba taan moti.

22 Ao e koro bukina bwa te ibonga ae rietata e taku nakoina: E aera ngkai ko mwamwananga ni kabwaouai ana kawai te Uea? E aera ngkai ko reireinia te botanaomata aio bwa a na akea te Kristo, bwa ko na urua kukureia? E aera ngkai ko tataetae ni kaaitarai aia taeka ni burabeti ni kabane burabeti aika a tabu?

23 Ao ngkanne aran te ibonga ae rietata bon Kitona. Ao e taku Korioa nakoina: Ibukina bwa I aki reirei aia katei ami bakatibu aika a burababa, ao ibukina bwa I aki reireinia te botanaomata aio bwa N na kabaeiia inano i aan taian otenanti ma mwakuri ake a kaweneaki irouia ibonga ngkoa, bwa a aonga n taua mwaakaia ma korakoraia i aoia, bwa aonga n tiku n aki ataibwai, bwa aonga n aki kakatonga ma a na uotaki rikaaki n aron am taeka.

24 Ko taku bwa te botanaomata aio a bon inaomata. Nooria, I taku bwa a bon kabaeaki. Ko taku bwa taeka ni burabeti ni kawai akekei a bon koaua. Nooria, I taku ko bon aki atai koauaia.

25 Ko taku bwa te botanaomata aio a bon bure ao a bwaka, ibukin riaoan te tua irouia aia karo. Nooria, I taku bwa te teei e aki bure mai irouia ana karo.

26 Ao ko taku naba bwa e na roko Kristo. Ma nooria, I taku bwa kam aki ataia ae iai te Kristo. Ao kam taku naba bwa e na tiringaki ibukin ^aburen te aonaba—

27 Ao ngaia are kam a kairanako te botanaomata aio n aron burababan kateia ami bakatibu, ao n aron oin nanomi; ao kam menakiia inano, n aron ae a kabureaki, bwa kam na katoki nanomi ni baki bwai ma ni korakoran aia mwakurin baia, bwa a na aki kona n tararake ma te ninikoria, ao a na aki kona ni kukurei n inaomataia ma kakabwaiaia.

28 Eng, a rawa ni kabongana are bon oin aia bwai bwa mwiina ao a un aia ibonga, ake a bobotiia n toronia n aron nanoia, ma ni kairia bwa a na kakoaua, man aia katei ao miia ao aia iango n tamnei ao miia ni burabeti ma mwakuri aika a kamimi are aongkoa a atai, bwa a na riai, ao ngkana aki karaoa ae aron are a taekinna, ao a kauna te aomata ae e aki ataaki, are a taku bwa te Atua—te aomata are e bon tuai man nonoraki ke n ataaki, are bon akea ke e na bon aki kona n iai.

29 Ao ngkanne ngke te ibonga are e rietata ma mataniwia taan moti e noora matoatoan nanona, eng, ngke a nooria bwa e kairiribai naba ni kaitara te Atua, a bon aki karaoi kaekan ana taeka; ma a tua bwa e na kabaeaki; ao a anga ngaia nako nanon baia taan mwakuri, ma ni kanakoa nakon te aba are Taraemera, bwa e aonga n uotaki nako matan Aramwa, ao mataniwia taan moti are bon te kowana ni kabuta te aba.

30 Ao e koro bukina bwa ngke e a uotaki nako matan Aramwa ma mataniwia taan moti, ao e bon waaki naba n aron are e karaoia n te aba are Kiteon; eng, e waaki n ^ataetae n aki akaaka ibukin te Atua.

31 Ao e bon rikirake ^akorakoran ana kauntaeka i matan Aramwa, ma ni kairiribai ni kaaitaraia ibonga ma tia reirei, ni bukiniia bwa a kairia nako aomata bwa ana toua mwiin aia katei ni burababa aia bakatibu, ti ibukin mataaiakinan bwaai ni mwiin aia mwakuri aomata.

32 Ao ngkanne e taku Aramwa nakoia: Ko bon ataia bwa ti aki mataaiakin korakoran aia mwakuri te botanaomata aio; bwa nooria I a bon tia ni mwakuri man te tai are e waaki iai aia tautaeka taan moti n uaa ngkai, n oin baiu ibukin maiu, e ngae ngke a mwaiti mwamwanangau ni kabuta te aba bwa N na taekina ana taeka te Atua nakoia au aomata.

33 Ao e ngae ngke a mwaiti mwakuri ake I a tia ni karaoi n te ekaretia, I bon aki karekea ae bati n aekan teuana te ^atienin ibukin au mwakuri; ao aki naba tariu, ma ti n te kaintekateka ni motikitaeka; ma ti bon ti karekea are e kaineti ma te tua n ara tai.

34 Ao ngkanne ngkana akea te bwai ae ti karekea ibukin ara mwakuri n te ekaretia, teraa ara raka are ti na kan mwakuri iai n te ekaretia ma bon ti taekinan te koaua, bwa ti aonga ni kimwareirei ni ^akimwareireia tarira?

35 Ao ngkanne e aera ngkai ko taku bwa ti kabwarabwara nakoia te botanaomata aio bwa e aonga n reke ara raka, ngke ngkoe, iroum, ko ataia bwa akea ara raka ae ti karekea? Ao ngkanne, ko kakoaua bwa ti mwaamwanaia te botanaomata aio, ngkai e korakora kimwareireia inanoia?

36 Ao Korioa e kaeka ni kangai, Eng.

37 Ao ngkanne e taku Aramwa nakoina: Ko kakoaua bwa iai te Atua?

38 Ao e kaeka, I aki.

39 Ao ngkanne Aramwa e taku nakoina: Ko na manga kaakea riki ae iai te Atua, ma ni kaakea naba te Kristo? Bwa nooria, I taku nakoim, I ataia ae iai te Atua, ao bwa Kristo e na roko naba.

40 Ao ngkai teraa am bwai ni kakoaua bwa akea te ^aAtua, ke bwa e na aki roko Kristo? I taku nakoim bwa bon akea, ma bon ti am taeka.

41 Ma, nooria, iai irou bwaai ni kabane bwa te ^akakoaua bwa a bon koaua bwaai aikai; ao iai naba iroum bwaai ni kabane bwa te kakoaua nakoim bwa a bon koaua; ao ko na kakewei? Ko kakoaua bwa a koaua bwaai aikai?

42 Nooria, I ataia bwa ko kakoaua ma ko bon niniaki iroun te tamnei ae kewe, ao ko a tia ni katuka Tamnein te Atua bwa e na akea nnena iroum; ma te riaboro e a mwaaka i aom, ao e kaiririko nako, ma ni mwakuri aanga are e na kona n tiringia iai natin te Atua.

43 Ao ngkanne Korioa e taku nakon Aramwa: Ngkana ko kaota te ^akanikina nakoiu, bwa i aonga ni kakoaua bwa iai te Atua, eng, ni kaotia nakoiu bwa iai mwaakana, ao ngkanne N na kakoauai am taeka bwa a koaua.

44 Ma Aramwa e taku nakoina: Ko a tia ni karekei kanikina aika a tau; ko na kariria Atuam? Ko na kangai, Kaota nakoiu te kanikina, ngkai ko a karekea aia taeka ni kakoaua tarim ^aaikai, ma burabeti ni kabane aika a tabu? A wene i matam koroboki aika tabu, eng, ao bwaai ni ^bkabane a kaotia bwa iai te Atua; eng, n te ^caba, ao bwaai ni kabane ake a mena iaona, eng, ma ^dbutina, eng, ma ^eburaneti ni kabane ake a buti n aron karaoaia a kakoaua bwa iai te Tia Karikibwai ae Moan te Rietata.

45 Ma e ngae n anne ko bon mwananga naba, ni kairia nako nanoia te botanaomata aio, ni kakoaua nakoia bwa akea te Atua? Ao ngkanne, ko na kakewei bwaai ni kakoaua aikai ni kabane? ao e taku: Eng, N na bon kaakeai, ti ngkana ko kaota nakoiu te kanikina.

46 Ao ngkanne e koro bukina bwa Aramwa e taku nakoina: Nooria, I bon rang nanokawaki ibukin matoatoan nanom, eng, bwa ko bon teimatoa naba n totokoa tamnein te koaua, bwa e na kona ni kamauna tamneim.

47 Ma nooria, e ^araoiroi riki bwa e na bua tamneim nakon ae ko na riki ngkoe bwa te tia uotia aomata aika a mwaiti rikaaki nakon te tiringaki, man am kewe ma am taeka ni kababa; mangaia ae ngkana ko a manga kakewekewe riki, nooria e na oroiko te Atua, bwa e na bae newem, bwa ko na aki manga kona ni kaurea wiim, bwa ko na aki manga oki ni mwaamwanaiia te botanaomata aio.

48 Ao ngkanne e taku Korioa nakoina: I aki kaakea ae iai te Atua, ma I aki kakoaua bwa iai te Atua, ao I taku naba, bwa ko aki ataia bwa iai te Atua; ma ti ngkana ko kaota nakoiu te kanikina, ao N na bon aki kakoaua.

49 Ao ngkanne e taku Aramwa nakoina: Aio are N na anganiko bwa te kanikina, bwa ko na ^arootaki ma ni bae newem, n aron au taeka; ao I kangai, bwa n aran te Atua, ko na teke ma ni bae newem, bwa ko na aki manga kona n taetae.

50 Ao ngkanne ngke e a tia Aramwa n taekin taeka aikai, ao Korioa e a rootaki ma ni bae newena, bwa e aki kona n taetae n aron ana taeka Aramwa.

51 Ao ngkai ngke mataniwia taan moti e noora aio, e arora baina ma ni koroboki nakon Korioa ni kangai: Ko a kakoaua ngkanne mwaakan te Atua? Ko tangira Aramwa bwa e na kaota te kanikina mai iroun antai? Ko tangiria bwa e na kammarakia tabemwaang, bwa e aonga ni kaota te kanikina nakoim? Nooria, e a tia ni kaota nakoim te kanikina ao ngkanne ko na manga oki ni kauntaeka?

52 Ao Korioa e arora baina ma ni koroboki ni kangai: I ataia bwa e a bae neweu, bwa I a aki kona n taetae; ao I ataia bwa akea ma ti mwaakan te Atua ae e kona ni karokoa aio iaou; eng, ao I a kaman ^aataia bwa bon iai te Atua.

53 Ma nooria, e ^amwaamwanai te riaboro; bwa e ^bkaoti nakoiu n aekan te anera, man taku nakoiu: Nako ao kaoka te botanaomata aio, bwa a tia ni bua kawaia n ririmwia te Atua ae e aki ataaki. Ao e taku nakoiu: ^cAkea te Atua; eng, ao e reireinai te bwai are N na taekinna. Ao I a tia n reirei ana taeka; ao I reiakini ibukina bwa a tang raoi nakon te iango n ^drabwata; ao I reiakini, n te aro are e korakora nako raoin au mwakuri, n te aro are I a bon kakoauai bwa a bon koaua; ao ibukin aio are I totokoa te koaua, n uaa e a roko te maraia ae korakora aio iaou.

54 Ao ngkanne ngke e a tia n taekin aikai, e bubutia Aramwa bwa e na tataro nakon te Atua, bwa e na anaaki te maraia arei mai irouna.

55 Ma e taku Aramwa nakoina: Ngkana e anaaki te maraia aio mai iroum ko na manga kairia nako riki nanoia aomata aikai, ngaia are, e na riki nakoim are e tangiria te Uea.

56 Ao e koro bukina bwa e aki anaaki te maraia mai iroun Korioa; ma e teweaki nako, ao e mwananga man te bata teuana nakon te bata teuana ni bubuti ibukin kanana.

57 Ao ngkanne ataakin te bwai are e riki nakon Korioa e bon waekoa ni katanoataki ni kabuta te aba; eng, e kanakoaki te katanoata mai iroun mataniwia taan moti nakoia aomata ni kabane n te aba, n tuangiia aomata ni kabane ake a tia ni kakoauai ana taeka Korioa bwa ana waekoa n rairinanoia, bwa mwiina e roko nakoia te motikitaeka ae aekan arei.

58 Ao e koro bukina bwa a bane ni kakoaua buakakan Korioa; ngaia are a bane n rairaki nakon te Uea; ao aio are e a katoka te buakaka are e waakinna Korioa. Ao Korioa e mwananga man te bata teuana nakon te bata teuana, ni bubuti kanana ibukin maiuna.

59 Ao e koro bukina bwa ngke e waaki i buakoia aomata, eng, i buakoia aomata ake a tia ni kamaenakoia mai irouia Nibwaite ake ararania bwa Tioramwaite, ake a tia ni kairaki nako iroun te aomata ae Tioram—ao ngke e waaki nako i buakoia, nooria, e bon taonaki nako man toubekaki, n uaa e a mate.

60 Ao ikai are ti a noora tokin teuare e kabwaouai kawain te Uea: ao ikai are ti nooria bwa te ^ariaboro e na bon aki ^bboutokaia natina n te kabanea ni bong, ma e bon waekoa n uotia rikaaki nako ^cmoone.