1 Ao ngkai e koro bukina bwa ni moan waakin aia katenibwi n ririki n tautaeka taan moti, ni kauouan bongin te moan namwakaina, e a karekea te reta Moronaai mai iroun Ereman, are e takinna iai aroia aomata ni mwakoron te aba arei.

2 Ao aikai taeka ake e koroi, ni kangai: Tariu ae moan te tangiraki, Moronaai, i nanon te Uea ao i nanon naba karawawatakira n ara bubuaka; nooria, tariu ae moan te tangiraki, iai te bwai ae I kan tuangko ni kaineti ma aron ara bubuaka ni mwakoron te aba aio.

3 Nooria, ^auangaa naati mwaane ake natia aomata ake e kairia rikaaki Amon man te aba are Nibwaai—ngkanne ko ataia bwa naakai bon kanoan Reimwan, are bon ana karimoa n naati mwaane ara bakatibu are Riaai;

4 Ngkai akea bonganan ae N na karakina nakoim aron aia katei ke aroia ni kakewekewe, bwa ko bon atai bwaai ni kabane—

5 Ngaia are e a tau naba bwa N na tuangko ae ataeinimwaane aika uangaa aikai a bon tia n anai aia bwai ni buaka, ma n tangiria bwa N na riki bwa aia tia kairiri; ao ti a tia ni waaki n tei ibukin abara.

6 Ao ngkai ko ataia naba ni kaineti ma te ^aberita ae tabu are a karaoia tamaia, are a na bon aki tabeki bwaai ni buaka ni kaaitaraia tariia bwa a na kawawaeanako raraaia.

7 Man te kauabwi ma onoua n ririki, ngke a noora aron karawawatakira ma kainnanora nako ibukiia, ao a nang bon ^aurua aia berita ae tabu are a tia ni karaoia ma n tabeki aia bwai ni buaka bwa a na tei ibukira.

8 Ma I aki kariaia bwa a na urua te berita ae tabu aei, ni kataua inanou bwa e na kakorakoraira te Atua, n te aro are ti na bon aki manga kainnanoaki riki ibukin kakoroan bukin te berita are a tia ni karaoia.

9 Ma nooria, aio te bwai teuana are ti na kona ni kimwareirei iai. Bwa nooria, n te kauabwi ma onoua n ririki, Ngai, ae Ereman, I bon mwananga ni kairia ataeinimwaane aika uangaa aikai nakon te kaawa ae Iutea, ni buoka Anetebwati, are ko rineia bwa e na kairiri i aoia te botanaomata ni mwakoron te aba anne.

10 Ao I kotiia natiu mwaane ake uangaa, (a bon tau bwa a na aranaki bwa naati mwaane) ma ana taanga ni buaka Anetebwati, are e a karika te kimwareirei ae korakora nakon Anetebwati ibukin korakoraia; bwa nooria, e a bon kerikaaki mwaitia ana taanga ni buaka irouia Reimwanaite ibukina bwa a tia aia taanga ni buaka n tiringia mwaitia ana koraki ae bati, are e a karika nanokawakira.

11 Ma e ngae n anne, ti na karaua nanora n aei, bwa a tia ni mate ibukin ana waaki abaia ma Atuaia, eng, ao a bon ^akukurei.

12 Ao Reimwanaite a bon tia naba n tauia aia bure aika a mwaiti, ao ni kabane bon mataniwia aia mataniwi, bwa bon akea riki ae a katikua ni kamaiua. Ao ti katautau bwa ngkai a bon mena n te aba are Nibwaai; ao e koaua aei ngkana a bon aki tiringaki.

13 Ao ngkanne aikai kaawa are a tia n reke irouia Reimwanaite ma ni kawawaean raraaia ara koraki aika a rangi ninikoria aika a mwaiti.

14 Te aba are Maentaai, ke te kaawa are Maentaai, ao te kaawa are Teeterom, ao te kaawa are Kumeni, ao te kaawa are Anetebwara.

15 Ao aikai kaawa ake a tauii ngke I roko n te kaawa are Iutea; ao I kunea Anetebwati ma ana koraki ni mwakuri ma korakoraia ni kabane ni kamatoatoa te kaawa.

16 Eng, ao a bon kainnano n rabwataia ao n tamneia naba, bwa a bon tia ni buaka ma te ninikoria n te ngaina ma ni beku n te tairiki ni kamatoa aia kaawa; ao ngaia are a bon korakai n aekan karawawata n aekaia nako.

17 Ao ngkai a matoa nanoia bwa a na karekea te tabo aei ke ana mate; ngaia are ko bon kona n iangoia inanom bwa te taanga ni buaka ae e uarereke aei ae I kariia, eng, natiu mwaane aikai, e bon anganiia te kantaninga ae korakora ao te kimwareirei ae bati.

18 Ao ngkanne e koro bukina bwa ngke Reimwanaite a nooria bwa e a manga reke kakorakoraia ana taanga ni buaka Anetebwati, a bon kairoroaki n ana kaetieti Amoron bwa a na aki kaitaraa te kaawa are Iutea, ke ni kaaitaraira, bwa a na buaka.

19 Ao ngaia are ti bon mutiakinaki iroun te Uea; bwa ngke arona bwa a kawarira n arora are ti mamaara ao a na bon tia ni kamauna ara taanga ni buakaka ae uarereke; ma ti bon kawakinaki.

20 A bon tuangaki iroun Amoron bwa a na tararuai taian kaawa ake a bubura ake a tia n anai. Ao ngaia are e a toki te kauabwi ma onoua n ririki. Ao ni moan waakin te kauabwi ma itiua n ririki ti a bon tia ni katauraoa ara kaawa ao ngaira n tauraoi ni kaitaraa buakanakira.

21 Ao ngkanne ti a bon tangiria bwa a na roko Reimwanaite nakoira; bwa ti bon rawa n ekianako i nanon aia tabo ni kamanomano.

22 Ao e koro bukina bwa bon iai ara tia uarongorongo ake ti katikuia n taabo aika a kakaokoro bwa a na tatarataraa mwamwanangaia Reimwanaite, bwa a na aki kona n riaora n te tairiki ke te ngaina n ekaanako ara kaawa ake a bubura riki tabeua ake a mena i meang.

23 Bwa ti ataia bwa e bon aki tau korakorara ni kaaitaraia n taian kaawa ake a bubura akekei; ngaia are ti tangiria, bwa ngkana a rirarikira ao ti na roko i aoia mai bukiia, ma ni buakaniia mai ibuki n te tai naba are a bon kaaitaraki iai i moa. Ti taku i nanora bwa ti kona n tokanikai i aoia; ma nooria, ti bon nanokawaki n aron te bwai are ti tangiria aei.

24 A bon aki kan rirarikira ma aia taanga ni buaka ae bwanin, ao ma mwakorona naba, bwa mwiina e aki tau korakoraia ao a bwaka.

25 Ao a bon rawa naba ni mwananga ni kaitaraa te kaawa are Taraemera; ao a rawa naba n rinanon mwiin te karaanga are Tiitan, n riaona nakon te kaawa are Nibwaaia.

26 Ao ngaia are, a bon kamatoatoa nanoia bwa a na tauii kaawa ake a bubura ake a tia n anai, n aia taanga ni buaka.

27 Ao ngkai e koro bukina bwa n te kauoua n namwakaina n te ririki aei, a bon uotaki nakoira bwaai aika ti kainnanoi aika a bati mai irouia tamaia natiu mwaane ake uangaa.

28 Ao a kanakomaiakaki naba nakoira uangaa mwaane man te aba are Taraemera. Ao ngaia are ti a tauraoi ma tebwina te ngaa mwaane, ma bwaai nako ibukiia, ao ibukiia naba buiia ma natia.

29 Ao Reimwanaite, ngke a nooria bwa e rikirake ara taanga ni katoa bong, ao a roko bwaai ake ti kainnanoi ibukin boutokaara, a waaki n e ekiranako, bwa a na kataia ni katoka reken ara bwai ma korakorara.

30 Ngkai ngke ti nooria bwa a moanna n aki rau Reimwanaite n te aro aei, ti a bon tangiria ni karaoa te babaire ae a na rotaki iai; ngaia are Anetebwati e anga te kaetieti bwa N na mwananga ma natiu aika a uarereke nakon te kaawa ae bubura ae uakaan, bwa aongkoa ti uoti bwaai aika a kainnanoaki nakon te kaawa ae bubura ae uakaan.

31 Ao ti na mwananga i rarikin te kaawa ae bubura ae Anetebwara, bwa aongkoa ti na nakon te kaawa are e raroa riki, n tian te aba I rarikin taari.

32 Ao e koro bukina bwa ti bon mwananga, ma aongkoa ti na nako nakon te kaawa ma ara bwaai nako ake ti kainnanoi.

33 Ao e koro bukina bwa e mwananga Anetebwati ma mwakoron ana taanga ni buaka, ma ni katikuia ake nikiraia bwa a na tararua te kaawa. Ma e bon aki mwananga ni karokoa ae I a tia ni mwananga ma au taanga ni buaka ae uarereke, man roko n uakaan ma te kaawa are bubura are Anetebwara.

34 Ao ngkai, n te kaawa are Anetebwara a bon mena iai aia taanga ni buaka Reimwanaite ake a rang korakora riki; eng, ake a rang mwaiti riki kaaia.

35 Ao e koro bukina bwa ngke a tia ni kaongoraeaki irouia aia taan kareke rongorongo, a bon mwananga ni kaaitaraira ma aia taanga ni buaka.

36 Ao e koro bukina bwa ti bon birinako mai irouia, nako meang. Ao ngaia are ti a kairianako aia taanga ae te kabanea ni korakora Reimwanaite.

37 Eng, nakon te raroa ae bon tau, n te aro are ngke a noora ana taanga ni buaka Anetebwati bwa e kakioia, ma korakoraia, a bon aki rairaki nakon te maing ke te atai, ma a waakina mwanangaia n te kawai ae eti n rimwira; ao, n aron are ti kataua bon aia iango bwa a na tiringira i mwaain are a reke iroun Anetebwati, ao a karaoa aio bwa aonga n aki otabwaniniaki irouia ara koraki.

38 Ao ngkai, Anetebwati, ngke e noora te kabuanibwai are e na reke nakoira, e kawaekoa riki mwanangaia ana taanga ni buaka. Ma nooria, e a bon bong; ngaia are ti aki reke irouia, ao aki naba reke iroun Anetebwati; ngaia are ti a motirawa ibukin te tairiki.

39 Ao e koro bukina bwa i mwaain karangainan te ingabong, nooria, a kakioira Reimwanaite. Ngkai e bon aki tau korakorara n un mangaia; eng, I aki kariaia bwa natiu mwaane aika a uarereke a na reke i nanon baia; ngaia are ti bon waakina mwanagara, ao ti mwananga nakon te rereua.

40 Ngkai a bon rawa n rairaki nakon te atai ao nakon te maing bwa mwiina ao a otabwaniniaki; ao ngai naba I rawa n rairaki nakon te atai ke te maing bwa mwiina I reke irouia, ao ti bon aki kona n tei ni kaaitaraia, ma ti na tiringaki, ao a na birinako; ao ngaia are ti birinako ni kabongnga nakon te rereua, ni karokoa ae e a roo.

41 Ao e koro bukina bwa, ngke e a roko ootan te ingabong, ti a manga nooria riki Reimwanaite bwa a kakioira, ao ti bon birinako mai irouia.

42 Ma e koro bukina bwa a bon aki kakioira n ae raroa i mwaain ae a toki; ao bon moaningabongin te kateniua ni bong n te kaitiua n namwakaina.

43 Ao ngkai, ti aki ataia bwa tao a reke iroun Anetebwati, ma I taku nakoia au koraki: Nooria, ti aki ataia ma a bon toki i aan te kantaninga are a na roko nakoira, bwa aonga ni kamwaneira n aia bwai ni kamwane;

44 Ngaia are teraa ami iango, natiu mwaane, kam na kaitaraia n te buaka?

45 Ao ngkai I taku nakoim, tariu ae moan te tangiraki ae Moronaai, bwa I bon tuai man noora te ^aninikoria ae moan te korakora, tiaki, bon akea i buakoia Nibwaite.

46 Bwa ngkai I aki toki ni weteia bwa natiu mwaane (bwa a bon bane n uarereke) a bon kangai nakoiu: Tamara, nooria e mena Atuara iroura, ao e na bon aki kariaia bwa ti na bwaka; ngkanne ti na mwananga; ti na aki tiringia tarira ngkana aki kumeira; ngaia are ti na mwananga, i mwina ao a tokanikai iaon ana taanga ni buaka Anetebwati.

47 Ngkai a bon tuai ma ni bubuaka, ma a bon aki maaka te mate; ao a bon iangoa riki ^ainaomataia tamaia nakon maiuia; eng, a bon tia n reireinaki irouia ^btinaia, bwa ngkana aki nanououa, ao e na kamaiuia te Atua.

48 Ao a taekin nakoiu aia taeka tinaia, ni kangai: Ti bon aki nanououa bwa a ataa aio tinara.

49 Ao e koro bukina bwa I oki rikaaki ma au koraki ake uangaa ni kaaitaraia Reimwanaite aikai ake a kakiokioira. Ao ngkai nooria, a reke n ana taanga ni buaka Anetebwati, ao e waaki te buaka ae moan te kakamaku.

50 E a kua ana taanga ni buaka Anetebwati, ibukin mwanangaia ae e abwaabwaki i nanon te tai ae uarereke, ao a nang reke i nanon baia Reimwanaite; ao ngke I aki okirikaki ma au koraki ake uangaa ao e na bon aki reke are bon oin bukin mwanangaia.

51 Bwa Anetebwati e teke n te kabaang, ao angiia naba aia taan kairiri, ibukin kuaia, are e reke man kawaekoakoakia ni mwananga—ngaia are ana koraki Anetebwati a bon mangaongao ngke a bwaka aia taan kairiri, ao a moanna ni kerikaaki i mataia Reimwanaite.

52 Ao e koro bukina bwa a karekea te ninikoria Reimwanaite, ao a waaki ni kakioia ma te korakora ae bati ngke e a roko naba Ereman ma ibukiia ma ana koraki ae uangaa, man tiringia aika mwaiti, n te aro are aia taanga ni buaka Reimwanaite ae bwanin a toki man rairakia Ereman.

53 Ao ngkai ngke ana botanaomata Anetebwati a nooria bwa tannako mai irouia, a ikotiia ma aia koraki man roko mai bukiia Reimwanaite.

54 Ao ngkai e koro bukina bwa ngaira, ana botanaomata Nibwaai, ana botanaomata Anetebwati, ao ngai ma au koraki are uangaa, ti bon otabwaninia Reimwanaite, man tiringia; eng, n te aro are a bon kairoroaki bwa a na anganako aia bwai ni buaka ao ngaia naba bwa bure man te buaka.

55 Ao ngkai e koro bukina bwa ngke a bon tia n taenikai nakoira, nooria, I warekia ataeinimwaane ake a buaka ma ngai, bwa I maaku bwa mwiina a mwaiti ake a tiringaki.

56 Ma nooria, e koro kukureiu, bwa bon ^aakea naba temanna mai i buakoia ae e bwaka nako aontano; eng, ao a bon buaka n aron ae iai irouia korakoran te Atua; eng, a bon tuai man nonoraki mwaane bwa a na buaka ma te korakora ae kamimi; ao a roko i aoia Reimwanaite ma te korakora ae bati, n te aro are a maakuia; ao ibukin aei ao Reimwanaite a bon anga ngaia bwa a na riki bwa bure man te buaka.

57 Ao ibukina bwa akea ara tabo ibukiia bure, are ti na kona n tararuaia iai mai irouia aia taanga Reimwanaite, ngaia are ti a kanakoia nakon te aba are Taraemera, ma mwakoron ana koraki Anetebwati ake a aki tiringaki, bwa raoia; ao nikiraia I anaia man ikotiia ma au ataeinimwaane aika a uarereke aika ^aAmonaite, ma ni mwananga n okira te kaawa are Iutea.