1 Ao e koro bukina bwa ni moan waakin aia kauabwi ma nimaua n ririki n tautaeka taan moti i aoia ana botanaomata Nibwaai, ao a tia ni kamatoa te rau i marenaia kaain Riaai ma kaain Morianton ni kaineti ma abaia, man tia ni waakina te kauabwi ma nimaua n ririki i nanon te rau;

2 Ma e ngae n anne, a bon aki maan ni kateimatoa te rau ni kabuta te aba, bwa e a waaki te itabaraara i buakoia aomata ni kaineti ma mataniwia taan moti are Bwaoraan; bwa nooria, iai mwakoron te botanaomata are a tangiria bwa iai tabeua taekan te tua ae a riai ni bitaki.

3 Ma nooria, Bwaoraan e rawa ni bita ke ni kariaia bwa e na bitaki te tua; ngaia are, e bon aki ongo nakoia ake a kanakoa aia taeka ma aia bubuti ni kaineti ma bitakin te tua.

4 Ngaia are, naake a tangiria bwa e na bitaki te tua a bon un irouna, man tangiria bwa e nang aki riki bwa mataniwia taan moti iaon te aba; ngaia are e a teirake te kauntaeka ae korakora ni kaineti ma te bwai are e riki, ma akea kawawaean te raraa.

5 Ao e koro bukina bwa naake a tangira Bwaoraan bwa e na kabwakaki man te kaintekateka ni motikitaeka a bon aranaki bwa te koraki are a tangira temanna bwa e na uea, bwa a bon tangira te tua bwa e na bitaki n te aro are e na kabwakaki te tautaeka ae inaomata ma ni kateirakea te uea iaon te aba.

6 Ao naake a tangira Bwaoraan bwa e na tiku bwa mataniwia taan moti n te aba a bon aranaki bwa aomata ake a inaomata; ao aio aekan bwenaua i marenaia, bwa aomata ake a inaomata a bon tia ni berita ke ni berita n te berita ae tabu bwa a na taua inaomataia ma aroia n raka n aia aaro n te tautaeka ae inaomata.

7 Ao e koro bukina bwa te bwai ae kauntaekaki aio e bon baireaki taekana ni bwanaia aomata. Ao e koro bukina bwa e iraki nanon bwaanaia aomata ake a inaomata, ao Bwaoraan e taua ana kaintekateka ni motikitaeka, are e a bon karika te kakukurei ae bati i buakoia tarin Bwaoraan ao mwaitia aomata aika a inaomata, ake a kain wiia te koraki ake a tangira temanna bwa e na uea, n te aro are a aki kona ni kaaitaraia ma a kaantaningaki bwa a na kateimatoa te waaki n inaomata.

8 Ngkai naake a nano irouia uea bon naake a reke aroia ngke a ^abungiaki, ao a ukoukora te riki n uea; ao a boutokaaki irouia ake a ukoukora naba te mwaaka ma te kan tautaeka i aoia aomata.

9 Ma nooria, bon aio te tai ae kakamaku ibukin itabaraara n aekan aikai i buakoia ana botanaomata Nibwaai; bwa nooria, Amarakaai e a manga kairi riki nanoia te botanaomata ae Reimwanaite bwa a na kaaitaraia Nibwaite, ao e ikoikotiia tautia ma ni mwakoron nako te aba, n anganiia bwaai ni buaka, ma ni botumwaaka ni katauraoia nakon te buaka; bwa e a bon tia ni ^aberita bwa e na mooi n raraan Moronaai.

10 Ma nooria, ti na bon nooria bwa te berita are e karaoia bon te bwai ae katawea n aki iangoia raoi; e ngae n anne, e bon katauraoia ao ana taanga ni buaka bwa a na roko ni buakaniia Nibwaite.

11 Ao ngkanne ana taanga ni buaka e bon aki mwaiti kaaina n aron are mai mwaaina, ibukin ngaa ma ngaa ake a bon tia n tiringaki I aan baia Nibwaite; ma e ngae ngke e mwaiti aika a tia ni bua, Amarakaai e bon ikota naba te taanga ni buaka ae bubura, n te aro are e a bon aki maaku n ruo rikaaki nakon te aba are Taraemera.

12 Eng, ao e bon nako naba Amarakaai, ni kairia Reimwanaite. Ao aio bon n aia kauabwi ma nimaua n ririki n tautaeka taan moti; ao bon n te tai naba are e a tia ni waaki ni babairea aron aia waaki n itabaraara ni kaineti ma mataniwia taan moti, are Bwaoraan.

13 Ao e koro bukina bwa mwaane ake a aranaki bwa a tangira temanna bwa e na uea ngke a tia n ongo bwa a roko Reimwanaite bwa a na kaaitaraia n te buaka, a bon kukurei i nanoia; ao a rawa n tabeki aia bwai ni buaka, bwa a bon korakora unia iroun mataniwia taan moti, ao ^aaomata naba ake a inaomata, n te aro are a rawa n tabeki aia bwai ni buaka bwa a na kamaiua abaia.

14 Ao e koro bukina bwa ngke Moronaai e noora aio, man nooria naba Reimwanaite n roko n tian te aba, e a bon rang korakora unna ibukin imanonoia aomata akekei ake e a bon tia ni kakorakora ni beku ibukiia ma te botumwaaka bwa a na kawakinaki; eng, e a bon rang korakora unna; ao e a onrake tamneina n unna ni kaaitaraia.

15 Ao e koro bukina bwa e kanakoa te bubuti ae koreaki, ao iriana bwanaia aomata, nakon te kowana n te aba, n tangiria bwa e na warekia, man anganna (Moronaai) te kariaiakaki bwa e na kairoroia taan kan biri nako bwa a na tei ibukin abaia ke a na tiringaki.

16 Bwa bon te moan bwai ae riai n tabeakinna katokan taian itabaraara ma kakauntaeka i buakoia ana botanaomata; bwa nooria, aio bukin kamaunakia ma i mwaaina. Ao e koro bukina bwa e kariaiakaki ni kaineti ma bwanaia te botanaomata.

17 Ao e koro bukina bwa Moronaai e tua bwa ana taanga ni buaka a na nako ni kaaitaraia ana aomata te uea, ni katoka aia kainikatonga ma aia kan rietata man kaboraoia ma aontano, ke a na tabeki aia bwai ni buaka man tei ibukin waakinan te inaomata.

18 Ao e koro bukina bwa a bon mwananga ni kaaitaraia; ao a katoka aia kainikatonga ma aia kan rietata, n te aro are ngke a tabeki aia bwai ni buaka ni buakaniia ana botanaomata Moronaai a bon kabwakaki man tiringaki.

19 Ao e koro bukina bwa bon aua te ngaa mwaitia ^ataan kan birinako ake a kabwakaki n te kabaang; ao aia mataniwi ake aki tiringaki n te buaka a bon anaaki man teweaki nako nanon te nne ni kaikain, bwa e bon aki reke tain kabowiakiia n te tai aei.

20 Ao nikiraia taan kan biri nako, a bon ongeaba nakon te buraeki n inaomata nakon riki are a na tiringaki n te kabaang, ao a kairoroaki bwa a na irakea te ^aburaeki n inaomata iaon aia taua, ao i nanon aia kaawa, man tabeki aia bwai ni buaka n tei ibukin abaia.

21 Ao ngaia are Moronaai e tiringia ana aomata te uea, ao bon akea riki ae manga kinaaki n te ara ae ana aomata te uea; ao ikai are e a katoka imanonoia ma kainikatongaia aomata akekei ake a taku bwa iai raraaia n uea; ma a kananorinanoaki n aekaia tariia, ao bwa a na buaka n ninikoria ibukin kainaomatakia man te tautoronaki.

22 Nooria, e koro bukina bwa ngke e tabe ^aMoronaai ni katoki taian buaka ma itabaraara i buakoia ana botanaomata, man kairia bwa ana rau man riki rake, ao ma ni karaoi babaire ibukin te katauraoi nakon te buaka ni kaaitaraia Reimwanaite, nooria, a roko Reimwanaite n te aba are Moronaai, are e mena n te tia are i mataniwin taari.

23 Ao e koro bukina bwa e aki bati n tau korakoraia Nibwaite n te kaawa are Moronaai; ngaia are Amarakaai e bon kakionakoia, man tiringia aika a mwaiti. Ao e koro bukina bwa Amarakaai e taua te kaawa anne, eng, e tauii aia bwaai ni kabane ake a kamatoatoaia iai.

24 Ao naake a biri nako man te kaawa are Moronaai a roko nakon te kaawa are Nibwaaia; ao kaain naba te kaawa are Riaai a ikotiia, ma ni waakina aia katauraoi ao a tauraoi ni butimwaia Reimwanaite nakon te buaka.

25 Ma e koro bukina bwa Amarakaai e aki tangiriia Reimwanaite bwa a na buaka ni kaitaraa te kaawa are Nibwaaia, ma e tauiia i rarikin taari, ma ni katikuia mwaane ni kaawa nako aika a bubura bwa a na kaawakin man tei ibukiia.

26 Ao ngaia are e a waaki nako, n tauii kaawa aika a mwaiti, te kaawa are Nibwaaia, ao te kaawa are Riaai, ao te kaawa are Morianton, ao te kaawa are Aomna, ma te kaawa are Kiite, ao te kaawa are Mureki, ake a bane ni mena n te tia are i mainiku i rarikin taari.

27 Ao ngaia are Reimwanaite a karekei, man ana kawai ni babakanikawai Amarakaai, aia kaawa, irouia aia taanga ni buaka aika a mwaiti, ake a bon korakora kamatoatoakia mai mwiin ana waaki ni ^akamatoatoa Moronaai; are a bane n reke iai kamatoatoakia Reimwanaite.

28 Ao e koro bukina bwa a mwananga nakon tian te Aba ni Mari, ni kakionakoia Nibwaite mai mataia man tiringia.

29 Ma e koro bukina bwa a bon kaitibo ma Teaenikam, are e a tia n ^atiringa Morianton ma ni katoka mwanangaia ana botanaomata n aia tai ni biri nako.

30 Ao e koro bukina bwa e katoka naba mwanangan Amarakaai, ngke e mwananga ma ana taanga ni buaka ae korakora bwa e na taua te Aba ni Mari, ma te aba are n nako meang.

31 Ma nooria e kaitibo ma te nanokawaki ngke e a totokoaki iroun Teaenikam ma raona, bwa bon taan buaka aika a koro aroia; bwa ni kabane ana aomata Teaenikam a rianako korakoraia ma rabakauia ni buaka nakoia Reimwanaite, n te aro are a bon reke rakaia i aoia Reimwanaite.

32 Ao e koro bukina bwa a bon aki karauia, n te aro are a bon tiringia n uaa e a roo. Ao e koro bukina bwa Teaenikam ma ana koraki a bon katei aia umwanrianna n tian te Aba ni Mari; ao Amarakaai e katei ana umwanrianna n te tia iaon te bike i rarikin taari, ao aio aron kakioakia.

33 Ao e koro bukina bwa ngke e a roko te bong, Teaenikam ma ana toro a iraa n otinako n te bong, man nakon ana tabo Amarakaai; ao nooria, a matunako ibukin kuaia, man aia mwakuri ao kabuebuen te ngaina.

34 Ao e koro bukina bwa Teaenikam e iraa n rin n ana umwanrianna te uea, ma n ewara buroona n te kai ni karetei; ao e a bon karika maten te uea n te tai ae waekoa n te aro are a bon aki uti ana toro.

35 Ao e iraa n okirikaki nakon ana tabo, ao nooria, a bon matu ana koraki, ao e kautia man tuangiia bwaai ni kabane ake e a tia ni karaoi.

36 Ao e tua bwa ana taanga ni buaka ana tei n tauraoi, mwiina a uti Reimwanaite man roko nako aoia.

37 Ao ngaia are e a toki aia kauabwi ma nimaua n ririki n tautaeka taan moti i aoia ana botanaomata Nibwaai; ao a bane ana bong Amarakaai.