1 Ao e koro bukina bwa ni moan waakinan aia kanimaua n ririki n tautaeka ao e a waaki te itabaraara i buakoia aomata; bwa iai temanna te mwaane ae arana Ameriti, ae te aomata ae kamwamwane, eng, te aomata ae wanawana n aron rabakaun te aonaba, ao bon kaain te botaki are e kaainna te mwaane are e tiringa ^aKiteon n te kabaang, are e bon tiringaki ni kaineti ma te tua.

2 Ao ngkai Ameriti aio e a tia, n arona ni kamwamwane, ni kairia aomata aika a mwaiti bwa a na iria; n te aro are a bon mwaiti ao a moanna ni korakora; ao a moanna ni kataia ni karika Ameriti bwa te uea iaoia aomata.

3 Ao aio e bon kakamaku nakoia aomata ake kaain te ekaretia, ao nakoia naba ake a bon tuai ni kairaki nako n ana waaki ni kairoro Ameriti; bwa a ataia bwa ni kaineti ma aia tua bwaai aikai a riai ni kateaki n ^ananoia aomata.

4 Mangaia ae ngke arona bwa e kona Ameriti ni karekea aia kariaia aomata, ibukina bwa bon te aomata ae buakaka, e na bon ^aaki anganiia inaomataia ao bwaai ake a na kona n reke irouia man te ekaretia; bwa bon nanona bwa e na kamauna ana ekaretia te Atua.

5 Ao e koro bukina bwa aomata a ikotaki ni kabane ni kabuta te aba, ni kabane te aomata n oin nanona, tao n tei ibukin ke ni kaitaraa Ameriti, n rabwata aika a kakaokoro, ao a mwaiti unraaia ma aia ^akauntaeka aika a kamimi imarenaia.

6 Ao a bon ikotiia ni kabane bwa a na rinerine ni kaineti ma te bwai arei; ao a kawenei imataia tan moti.

7 Ao e koro bukina bwa nanoia aomata a kaitaraa Ameriti, ao e aki karikaki bwa te uea iaoia aomata.

8 Ao aio are e a karika te kimwareirei ae bati inanoia naake a kaitaraa, ma Ameriti e bon kauerakea nanoia ake a boutokaaia ni kaaitaraia ake aki boutokaaia.

9 Ao e koro bukina bwa a ikotiia ni kabane, ao a katabua Ameriti bwa aia uea.

10 Ao ngke Ameriti e a uea iaoia e anga te kaetieti nakoia bwa a na riai n anai aia bwai ni buaka ma ni kaaitaraia tariia; ao e karaoa aio bwa aonga ni mena i aana.

11 Ngkai ana aomata Ameriti a bon kaokoroaki n te ara ae Ameriti, ao a bon aranaki bwa ^aAmeritinaite; ao nikiraia a bon aranaki bwa ^bNibwaite, ke ana aomata te Atua.

12 Mangaia ae aomata ake Nibwaite a bon ataa aia iango Ameritinaite, ao mangaia ae a bon katauraoia bwa a na kaaitaraia, eng a bon katauraoia ma kabaang, ao ma kabaang aika a uarereke, ao ma kainikatebe, ao ma kanoa ni katebe, ao ma atibu, ao ma baana, ao ma ^abwaai ni buaka ni kabane, n aekaia nako.

13 Ao ibukin aei a bon tauraoi ni kaaitaraia Ameritinaite n aia tai n roko. Ao a bon rineaki mataniwi, ma mataniwi aika a ririeta, ao mataniwia mataniwi, ni kaineti ma mwaitia.

14 Ao e koro bukina bwa Ameriti e bon katauraoia ana aomata ma aekakin bwaai ni buaka n aekaia nako; ao e rineia taan babaire ao taan kairiri iaoia ana aomata, bwa a na kairia nakon te buaka ni kaaitaraia tariia.

15 Ao e koro bukina bwa Ameritinaite a roko nako aon te tabuki are Ameniu, are bon i mainikun te ^akaranga are Tiitan, are e mena i rarikin te ^baba are Taraemera, ao ikekei are a buaka iai ma Nibwaite.

16 Ngkai Aramwa bon te ^amataniwi iaoia taan moti ao bon aia tia babaire ana aomata Nibwaai, mangaia ae e a waaki rake ma ana aomata ma ana mataniwi, ao mataniwia, eng ma i moaia ana taanga ni buaka, ni kaaitaraia Ameritinaite n te buaka.

17 Ao a waaki n tiringia Ameritinaite iaon te tabuki i mainikun Tiitan. Ao Ameritinaite a bon un ma Nibwaite ma te korakora ae bati, n te aro are a mwaiti Nibwaite ake a bwaka irouia Ameritinaite.

18 Ma e ngae n anne te Uea e bon kakorakoraia Nibwaite n te aro are a tiringia Ameritinaite n te tiritiri ae korakora, n te aro are a waaki ni birinako ma i mataia.

19 Ao e koro bukina bwa Nibwaite a kakioia Ameritinaite ni kabanea te bong arei, ao a bon tiringia n te tiritiri ae korakora, n te aro ae ake a ^amate mai irouia Ameritinaite tebwi ma uoua tenga tebubua tenibwi ao uoman aomata; ao a mate mai irouia Nibwaite, onoua tenga nimabubua onongaun ma uoman te aomata.

20 Ao e koro bukina bwa ngke Aramwa e aki kona ni kakioia riki Ameritinaite e a baireia bwa ana aomata a na katea aia umwanrianna n te ^amwarua ae arana Kiteon, te mwarua are e bon aranaki i mwin Kiteon are e tiringaki iroun ^bNeooa n te kabaang; ao n te mwarua aio Nibwaite a bon katei aia umwanrianna ibukin te tairiki.

21 Ao Aramwa e kanakoia ana tia kamwane bwa a na iriia nikiraia Ameritinaite n te aro are e na kona n ataa aia waaki ma aia babaire, bwa e aonga ni kona ni kawakinna mai irouia, n te aro ae e na kona ni kamaiuia ana aomata man te tiringaki.

22 Ngkai naake e a tia ni kanakoia bwa a na taataraa aia tabo n tataninga Ameritinaite bon araia Teram, ao Amanoa, ao Maentaai, ao Rimee, ao aikai ake a nako ma aia aomata bwa a na taataraa aia tabo Ameritinaite.

23 Ao e koro bukina bwa n te ingabong a oki nakon aia tabo Nibwaite ma te ienikuri ao a bon rangi ni mimi, ao man korakora maakuia, man taku:

24 Nooria, ti ririmwia aia taanga n tautia ^aAmeritinaite, ao bon te kubanako ngaira, n aban Mwaina, i etan Taraemera, n te kawai are e kaineta aban ^bNibwaai, ti a nooria Reimwanaite aika a mwaiti ao nooria, Ameritinaite a bon ikotaki mangaia.

25 Ao a bon buaka ma tarira n te aba arei; ao a bon birinako mai irouia ma aia nanai ni man, ma buuia aine, ao natia, nakon ara kaawa; ao ngkana ti aki kawaekoaira ana bon reke irouia ara kaawa, ao tamara, ao buura aine, ma natira a na bon tiringaki.

26 Ao e koro bukina bwa ana aomata Nibwaai, a anai umwaianrianna, ao a kitana te mwarua are Kiteon man kaineta aia kaawa, are bon te kaawa are ^aTaraemera.

27 Ao nooria, i nanon aia tai n rinanon te karanga are Tiitan, Reimwanaite ao Ameritinaite a bon mwaiti n aiaron ^amwaitin tanon taari, a roko iaoia bwa a na tiringia.

28 Ma e ngae n anne, Nibwaite a bon ^akakorakoraki ni bain te Uea, bwa a tia n tataro ma te korakora nakoina bwa e na kainaomataia ma i nanon baia aia kairiribai, mangaia ae te Uea e bon ongo tangiia, ao e bon kakorakoraia, ao Reimwanaite ma Ameritinaite a bwaka i mataia.

29 Ao e koro bukina bwa Aramwa e un ma Ameriti n te kabaang, ni kaaitara; ao e korakora uniia, imarenaia.

30 Ao e koro bukina bwa Aramwa, ana aomata te Atua, e bon roko irouna korakoran te ^aonimaki ae mwaiti, e tang man taku, O te Uea, nanoangaai ao anganai te maiu, bwa N na riki ngai bwa te bwai ni mwakuri i nanon baim ni kamaiuia ao man kawakinia aomata aikai.

31 Ngkai ngke e tia Aramwa n taekin taeka aikai e a manga un riki ma Ameriti; ao e a kakorakoraki, n te aro are e a tiringa Ameriti n te kabaang.

32 Ao e bon un naba ma aia uea Reimwanaite; ma aia uea Reimwanaite e birinako ma i matan Aramwa ao e kanakoia ana tautia bwa ana un ma Aramwa.

33 Ma Aramwa ma ana tautia, a un ma ana tautia aia uea Reimwanaite ni karokoa e tiringia ao e kakioia ni kaokia.

34 Ao ngaia are e a kaitiaka te tabo, ke rarikin te karanga, are e mena i maeaon te karanga are Tiitan, man karenakoi rabwataia Reimwanaite are a tia n tiringaki n ranin Tiitan, bwa e aonga n ae ana aomata e na reke nneia ni mwananga n un ma Reimwanaite ao Ameritinaite a mena n iteran mainikun te karanga are Tiitan mai maeao.

35 Ao e koro bukina bwa ngke a bane n tia n rinanon te karanga are Tiitan ao Reimwanaite ma Ameritinaite a waaki ni birinako mai irouia, e ngae ngke a bon rangi ni mwaiti ao a bon aki kona ni warekaki.

36 Ao a birinako imwaia Nibwaite nakon te rereua i maeao meang, riaon tian te aba, ao Nibwaite a bon kakioia ma korakoraia, ao a bon tiringia.

37 Eng, a bon kaaitaraki man iteraia nako, man tiringaki ao man kakioaki, ni karokoa ae a maenako i maeao ao i meang, ni karokoa ae a roko n te rereua ae arana Emaunga; ao bon mwakoron te rereua are e onrake irouia maan aika a kakang ma ni korakora bakiia.

38 Ao e koro bukina bwa a mwaiti aika a mate n te rereua man ikoakiia, ao a bon kanaki irouia maan akekei ma maniin karawa; ao riia a bon tia ni kuneaki, ao a bon bwarikoriko iaon te aba.