1 Ao nooria, ngkai e koro bukina bwa ara kantaninga are i mwina bon anakin te kaawa are Maentaai; ma nooria, bon akea te anga are ti kona ni kairia nako man te kaawa irouia ara koraki ae uarereke. Bwa nooria, a bon uringa are ti a tia ni karaoia mai i mwaaina; ngaia are ti bon aki kona ni ^akamwaneia nako man aia tabo ni kamanomano.

2 Ao a bon rang mwaiti riki nakon ara taanga ni buaka n te aro are ti rawa n nako n ekianako n aia tabo ni kamanomano.

3 Eng, ao e bon riai bwa ti na kabonganaia ara koraki ni kaawakin mwakoron te aba are bon ara bwai are ti a tia ni manga karekea; ngaia are e bon riai bwa ti na tataninga, bwa ti na kona ni manga karekea kakorakorakira man te aba are Taraemera ao bwaunara ae boou ni bwaai ake ti kainnanoi.

4 Ao e koro bukina bwa I bon kanakoa ara tia tei tabemwaang nakon te kowana n abara, bwa a na kaongoraea aroia ara botanaomata. Ao e koro bukina bwa ti bon tataninga reken bwaai ake ti kainnanoi ma kakorakorakira man te aba are Taraemera.

5 Ma nooria, e bon raoiroi aio nakoira teutana; bwa Reimwanaite a bon karekea naba korakoraia ae bati man te bong teuana nakon te bong teuana, ao bwaai ake a kainnanoi aika a mwaiti; ao ngaia are aio arora n te tai aei.

6 Ao Reimwanaite a bon otinako ni kaaitaraira n te tai teuana ao teuana, ni kataua bwa a na tiringira n te aro ni kamwane; ma e ngae n anne ao ti bon aki roko ni buaka mangaia, ibukin aroia ni kerikaaki ao aia tabo ni kamanomano.

7 Ao e koro bukina bwa ti tiku n tataninga n taai ni kaangaanga aikai i nanon te maan ae namwakaina aika a mwaiti, ni karokoa ae ti a kuri ni mate ibukin tangiran te amwarake.

8 Ma e koro bukina bwa e bon reke kanara, are e tararuaki man uotaki nakoira irouia uoua te ngaa mwaane ake a roko ni buokiira; ao bon ti aio te buoka are ti a karekea, ibukin tararuakira ma abara bwa ti na aki bwaka i nanon baia ara kairiribai, eng, bwa ti na buaka ma ara kairiribai ae koro mwaitia.

9 Ao ti bon aki ataa bukin karawawatakira aio, ke teraa bukin ae a aki kanakomaia riki kakorakorakira, ngaia are ti a bon nanokawaki man onrake n te maaku, bwa mwiina ao e roko ana motikitaeka te Atua iaon abara, ao ti kabwakaki man tiringaki.

10 Ngaia are ti bon bunra nako tamneira n te tataro nakon te Atua, bwa e na kakorakoraira ma ni kainaomataira mai nanon baia ara kairiribai, eng, ao bwa e na anganiira naba te korakora bwa ti na tauii ara kaawa, ma abara, ma ara bwai nako, ibukin boutokaakia ara botanaomata.

11 Eng, ao e koro bukina bwa te Uea ae Atuara e bon kawarira ma te karaunano bwa e na bon kainaomataira; eng, n te aro are e bon taekina te rau nakon tamneira, ao man anganiira te onimaki ae korakora, ma ni karekea ae ti na kantaninga te kainaomataki irouna.

12 Ao ti bon kaninikoriaira ma ara taanga ni buaka ae uarereke are ti a tia ni karekea, ma ni katikua ni kamatoatoa inanora bwa ti na tokanikai i aoia ara kairiribai, man ^atauii abara, ma ara bwai nako, ma buura, ao natira, ma ara waaki n ^binaomata.

13 Ao ngaia are ti a waaki ma korakorara ni kabane ni kaaitaraia Reimwanaite, ake a mena n te kaawa are Maentaai; ao ti katei ara umwanrianna i rarikin te rereua, are e kaan ma te kaawa.

14 Ao e koro bukina bwa n te ingabong, ngke a nooria Reimwanaite bwa ti mena n te tia i rarikin te rereua are e kaan ma te kaawa, ao a kanakoia taan kareke rongorongo ni katobibira bwa aonga n ataa mwaitia ma korakoran ara taanga ni buaka.

15 Ao e koro bukina bwa ngke a nooria bwa ti bon aki korakora, n aron mwaitira, ma a maaku bwa mwiina ti kamaenakoia ma boutokaakia ngkana aki otinako ni buaka mangaira man tiringira, ao a taku naba inanoia bwa e beebete aron tiringakira bwa aia taanga ni buaka a mwaiti, ngaia are e katauraoi bwa a na otinako ni kaaitaraira ni buaka mangaira.

16 Ao ngke ti nooria bwa a waaki ni katauraoi bwa a na otinako ni kaaitaraira, nooria, I tua bwa Kite, ma ana koraki tabeman, a na karabaia n te rereua, ma Teaomna naba ma ana koraki tabeman a na karabaia naba n te rereua.

17 Ngkai Kite ma ana koraki a mena n te angatai ao ake tabemwaang a mena n te anga maing; ao ngke a tia ni karabaia, nooria, I tiku ma nikiraia au taanga ni buaka, n te tabo naba are ti bon moan katei ara umwanrianna ni katauraoi nakon te tai are a na roko Reimwanaite ni buaka.

18 Ao e koro bukina bwa a otinako Reimwanaite ma aia taanga ni buaka ae mwaiti ni kaaitaraira. Ao ngke a roko ma ni moanna ni bwaka iaora ma te kabaang, I tua bwa au koraki, ake raou, a na kerikaaki nakon te rereua.

19 Ao e koro bukina bwa a kawaekoaia Reimwanaite n rimwira, bwa e korakora nanoia ni kan karekeira bwa aonga n tiringira; ngaia are a bon irira nakon te rereua; ao ti bon rinukaia Kite ma Teomna ma aia koraki n te aro are a bon aki nooraki irouia Reimwanaite.

20 Ao e koro bukina bwa ngke a bwakanako Reimwanaite, ke ngke e a bwakanako te taanga ni buaka, a teirake Kite ma Teaomna man aia tabo ni karaba, ma ni kamaenakoia aia tia uarongorongo Reimwanaite mai irouia n te aro are a na aki oki nakon te kaawa.

21 Ao e koro bukina bwa ngke a kamaenakoia, a biri nakon te kaawa ma ni bwaka i aoia taan tararua ake a katukaki bwa a na taraa te kaawa, n te aro are a tiringia man taua te kaawa.

22 Ao ngkai e riki aio ibukina bwa Reimwanaite a kariaia bwa a na nako aia taanga ni buaka ae bwanin, nakon te rereua, ao ti tabeman taan tararua aika a tiku

23 Ao e koro bukina bwa Kite ma Teaomna a tauii aia tabo ni kamanomano n te aro aio. Ao e koro bukina bwa ngke ti a waakina mwanangara, i mwin mwaamwanangara ae bati i nanon te rereua nakon te aba are Taraemera.

24 Ao ngke a noorira Reimwanaite bwa ti mwananga nakon te aba are Taraemera, e bon korakora maakuia bwa mwiina ao iai te babaire ae kaweneaki bwa kairaia nakon te tiringaki; ngaia are a waaki ni kerikaaki riki nakon te rereua, eng, n oki rikaaki n te kawai are a bon roko iai.

25 Ao nooria, e a bon bong ao a katei umwaianrianna, bwa aia mataniwi mataniwia Reimwanaite a taku inanoia bwa a kua Nibwaite ibukin mwanangaia; ao a taku inanoia bwa a mwananga ma aia taanga ni buaka ae bwanin ngaia are a aki tabe n iangoa te kaawa are Maentaai.

26 Ao ngkai e koro bukina bwa ngke e a bong, I tua bwa a na aki matu au koraki, ma a na waakina mwanangaia nakon te aba are Maentaai n te kawai ae kaokoro.

27 Ao ibukin mwanangara n te tairiki aio, nooria, ngke e a ingabong ti a bon raroanako ma Reimwanaite, n te aro are ti bon roko rimoaia n te kaawa are Maentaai.

28 Ao e koro bukina bwa n te kawai ni kamwane aio ao ti a bon taua te kaawa are Maentaai n akea kawawaean te raraa.

29 Ao e koro bukina bwa ngke a roko n uakaan ma te kaawa are bubura aia taanga ni buaka Reimwanaite, man nooria bwa ti a tauraoi ni kaitibo mangaia, e bon korakora kubanakoia ao a taonaki n te maaku ae korakora, n te aro are a bon biri nako nakon te rereua.

30 Eng, ao e koro bukina bwa aia taanga ni buaka Reimwanaite a bon biri nako ma ni mwakoron te aba aio. Ma nooria, a bon uotia nako aine ma ataei n otinako man te aba.

31 Ao ^ataian kaawa ake a bubura akekei, are a bon tia n tauaki irouia Reimwanaite, n te tai aei ao a bane ni mena i nanon baira; ao tamara ma ara aine ma natira a bon oki nakon mwengaia, ni kabane ma ti naake a bon tia n tauaki bwa bure man uotaki nako irouia Reimwanaite.

32 Ma nooria, e bon uarereke ara taanga ni buaka ibukin kawakinaia kaawa aika a mwaiti ma aaba ni bwaibwai aika a korakora.

33 Ma nooria, ti bon onimakina te Atua are e a tia n anganiira te tokanikai iaon aaba aikai, n te aro are ti a karekei kaawa ma aaba, ake bon ara bwai.

34 Ngkai ti bon aki ataa bukina bwa e aera te tautaeka ngkai e aki manga anganiira riki kakorakorakira; ao mwaane ake a roko nakoira aki naba ataia bwa bukin teraa ngkai ti aki manga karekea riki kakorakorakira.

35 Nooria, ti taku bwa e aki nakoraoi ami waaki, ao kam a tia ni kairia nako te taanga ni buaka nakon mwakoron te aba anne; ngkana eng, ao ti bon aki tangiria n ngurengure.

36 Ao ngkana ti aki ngaia anne, nooria, ti maaku bwa tao iai te ^aunraa n te tautaeka, ngaia are aki manga kanakoia riki mwaane bwa buokara; bwa ti ataia bwa a bon mwaiti riki nakoia ake a kanakomaia.

37 Ma, nooria, e aki kakawaki—ti onimakinna bwa te Atua e na ^akainaomataira, e ngae ngke e mamaara ara taanga ni buaka, eng, ma ni kainaomataira mai nanon baia ara kairiribai.

38 Nooria, aio bon te kauabwi ma ruaiwa n ririki, ngke e a kan toki, ao tia tauii abara; ao a tia Reimwanaite ni biri nako man te aba are Nibwaai.

39 Ao natia mwaane ana botanaomata Amon, are I a tia n taekinna ni kamoamoa, bon raou n te kaawa are Maentaai; ao te Uea e boutokaaia, eng, ni kawakinia bwa a na aki bwaka n te kabaang, n te aro are bon akea ^atemanna ae e tiringaki.

40 Ma nooria, a bon korakora ikoakiia; ma e ngae n anne a bon teimatoa n te ^ainaomata are e a tia ni kainaomataingkami iai te Atua; ao a bon kakaonimaki n uringa te Uea ae Atuaia n te bong teuana nakon te bong teuana; eng, a bon kaawakin ana kaetieti ma ana moti nako, ma ana tua n aki toki; ao e matoatoa aia onimaki n te taeka ni burabeti are e kaineti ma te bwai are e na roko.

41 Ao ngkai, tariu ae moan te tangiraki, ae Moronaai, ke te Uea ae Atuara, are e a tia ni kabooira ma ni kainaomataira, e na kawakiniko n aki toki; eng, ao ke e karaka tangirakiia te botanaomata aio, n te aro are kam na tokanikai ni karekei bwaai ake a tia Reimwanaite n anai mai iroura, ake boutokaakira. Ao ngkai, nooria, I a kaina au reta. Ngai bon Ereman, are natin Aramwa.