1 Ao e koro bukina bwa ni moan waakinan aia katenibwi ma onoua n ririki n tautaeka taan moti i aoia ana botanaomata Nibwaai, ^aTiburon e a kaawakini bwaai aika a ^btabu ake e a tia n anganaki Ereman iroun Aramwa.

2 Ao bon te aomata ae momotiraoi, ao e nakonako n ae eti imatan te Atua; ao e bon taraia bwa e na karaoa ae raoiroi n aki toki, bwa e na kawakina ana tua te Uea ae Atuana; ao tarina naba.

3 Ao e koro bukina bwa e a mate naba Moronaai. Ao ikai are e a toki iai aia katenibwi ma onoua n tautaeka taan moti.

4 Ao e koro bukina bwa n aia katenibwi ma itiua n ririki n tautaeka taan moti, bon iai te koraki ni mwaane ae mwaiti, ae mwaitia nimaua te nga ao abubua mwaane, ma buuia ma natiia, ake a kitana te aba are Taraemera nakon te aba are ^anako meang.

5 Ao e koro bukina bwa Akota, kioina bwa bon te aomata ae rang kan atai bwai, ngaia are e a mwananga nako ma ni kabaa ana kaibuke ae rianako buburana, n tian te aba ni Mari, i rarikin te Aba are Kamaroa, ma ni kabutianako nakon taari are i maeao, n te tabo ae ^awariki are e kaineti nakon te aba are e nako meang.

6 Ao nooria, a bon mwaiti Nibwaite ake a toka iai ma ni boraunako ma bwaai aika a na kainnanoi aika a mwaiti, ma aia aine ma natia; ao a toua nako kawaia nako meang. Ao ikai are e a toki iai te katenibwi ma itiua n ririki.

7 Ao n te katenibwi ma waniua n ririki, ao te mwaane aio e a manga kabai riki taian kaibuke. Ao te moan kaibuke are e kabaia e a bon karairaki naba, ao a bon mwaiti riki aomata ake a manga toka riki iaona; ao a manga uoti riki bwaai ake a na kainnanoi aika a mwaiti, ma ni borau nako riki nakon te aba are i meang.

8 Ao e koro bukina bwa bon akea riki rongorongoia ae manga ataaki. Ao ti kataua inanora bwa a bon bwabwa i kabin marawa. Ao e koro bukina bwa teuana te kaibuke e borau nako; ao ti bon aki ataia bwa e nakea.

9 Ao e koro bukina bwa n te ririki aio ao a bon mwaiti aomata ake a mwananga nakon te aba are i ^ameang. Ao ikai are e a toki iai te katenibwi ma waniua n ririki.

10 Ao e koro bukina bwa n aia katenibwi ma ruaiwa n ririki n tautaeka taan moti, e mate Tiburon naba ao Korianton e nakon te aba are i meang n te kaibuke, bwa e na uoti bwaai ake a kainnanoaki nakoia aomata ake a tia n nakon te aba anne.

11 Ngaia are, e bon riai bwa Tiburon e na anganako bwaai ake a tabu akekei, i mwaain matena, nakon natin ^aEreman, te mwaane are e bon aranaki bwa Ereman i mwin tamana.

12 Ngkai nooria, ni kabane ^ataian koroboki akekei ake a mena iroun Ereman a bon koreaki ma ni kanakoaki i buakoia natia aomata ni kabuta te aba, ma a ti tauaki mwakoro ake e tua Aramwa bwa a na ^baki kanakoaki.

13 Ma e ngae n anne, a na bon riai n rang kaawakinaki tabun bwaai aikai, ao a na ^akaruoaki man te roro teuana nakon te roro teuana; ngaia are, n te ririki aei, e a bon anganaki Ereman, i mwaain maten Tiburon.

14 Ao e koro bukina bwa n te ririki naba anne ao iai taan biri nako ake a tia n nakoia Reimwanaite; ao a bon kakiriweaki riki nanoia bwa a na un irouia Nibwaite.

15 Ao n te ririki naba anne ao a roko ma te taanga ni buaka ae mwaiti bwa a na buaka ni kaaitaraia ana botanaomata ^aMoronaaia, ke ana taanga ni buaka Moronaaia, are a bon konaki iai ma ni kakioaki rikaaki nakon oin abaia, ni korakai ibukin korakoran mateia raoia.

16 Ao ikai are e a toki iai aia katenibwi ma ruaiwa n ririki n tautaeka taan moti i aoia ana botanaomata Nibwaai.

17 Ao ikai are e a toki iai ana rongorongo Aramwa, ma Ereman are natina, ao Tiburon are bon natina.