1 Ao ngkai e koro bukina bwa n te tai naba are e reke iroun Amarakaai te abanuea e waaki ni kauni nanoia Reimwanaite ni kaaitaraia ana aomata Nibwaai; eng, e bon rineia mwaane bwa a na taetae nakoia Reimwanaite man aia taua, ni kaaitaraia Nibwaite.

2 Ao ngaia are e kaungai nanoia ni kaaitaraia Nibwaite n te aro are ni banen aia katebwi ma ruaiwa n ririki n tautaeka taan moti, ngkai e a bon tia ni koro bukin ana babaire n te tai aei, eng, ngkai e a tia ni karikaki bwa te uea i aoia Reimwanaite, e bon ukoukora naba te kan tautaeka iaon te aba ni kabuta, eng, ao aomata ni kabane ake a mena n te aba, Nibwaite ao Reimwanaite.

3 Ngaia are e a koro bukin ana babaire, bwa e a tia ni kamatoai nanoia Reimwanaite ma ni kamataki aia iango, ma ni kakiriweia bwa a na un, n te aro are e a ikota te koraki ae rang mwaiti bwa a na buaka ni kaaitaraia Nibwaite.

4 Bwa e bon nanomatoa ibukin korakoran mwaitia ana aomata, ake a na tokanikai i aoia Nibwaite ma ni kairia nakon te tautoronaki.

5 Ao ngaia are e a rineia ^amataniwia aia mataniwi Tioramwaite, ngkai a bon rang ataa raoi korakoraia Nibwaite, ma nneia, ma mwakoron aia kaawa ake a mamaara; ngaia are e rineia bwa a na riki bwa mataniwia mataniwi i aoia ana taanga ni buaka.

6 Ao e koro bukina bwa a kairia aia tautia, ma ni mwananga nakon te aba are Taraemera n te rereua.

7 Ngkai e koro bukina bwa i nanon ana tai Amarakaai ni karekea korakorana man ana anga ni kewe ma ni mwaamwana te aba, Moronaai n te itera are teuana, e a bon tia ni ^akatauraoa aia iango aomata bwa a na kakaonimaki nakon te Uea ae Atuaia.

8 Eng, e a bon tia ni kamatoaia aia taanga ni buaka Nibwaite, ma ni katei taabo ni kamanomano aika a uarereke, ke tabo ni karaba; ni kawaerakea te tano ni katobibia ana taanga ni buaka, ma ni katei naba taian oo aika a atibu ni katobibia, n otabwaninia aia kaawa ma tian abaia; eng, ni katobibia te aba.

9 Ao n te tabo ni kamanomano are e aki rang matoatoa riki ao e katikuia angiia mwaane; ao ngaia are e a kamatoa ma ni kamatoatoa te aba are e bwainaki irouia Nibwaite.

10 Ao ngaia are e a bon katauraoi ni ^aboutokaa inaomataia, abaia, buuia, ma natia, aia rau, ao bwa aonga ni maeka ni irira nanon te Uea ae Atuaia, ao bwa e aonga n teimatoa te bwai ae e aranaki irouia aia kairiribai bwa te waaki ni Kiritian.

11 Ao Moronaai bon te mwaane ae aintoa ma ni korakora; ao bon te mwaane ae kororaoi ana ^aatatai; eng, te aomata ae aki kukurei ni kawawaean nako te raraa; te mwaane ae tamneina e bon kimwareirei n te kainaomataki ma inaomatan abana, ma tarina man te tautoronaki ao te toronaki;

12 Eng, te mwaane ae onrake nanona n te karabwarabwa nakon te Atua, ibukin aanga aika a raka ma kakabwaia ake e katokai i aoia ana aomata; te mwaane ae korakora ana beku ibukin ^amweraoia ma kawakinakia ana botanaomata.

13 Eng, ao bon te mwaane ae matoatoa n ana onimaki iroun Kristo, ao e a bon tia ni ^aberita n te berita bwa e na tei ibukiia ana botanaomata, inaomatana, ma abana, ma ana aro, e ngae ngke e na bwaro raraana.

14 Ngkai a bon reireinaki Nibwaite bwa a na rabakau ni katokai kaia mai irouia aia kairiribai, e ngae ngkana e na bwaro te raraa ngkana e bon riai; eng, ao a bon reireinaki naba bwa a na ^aaki kaunun, eng, ao a na aki naba tabeka rake aia kabaang ni kaaitaraia aia kairiribai, ma ti ngkana a na kaawakin maiuia.

15 Ao bon aio aia onimaki, bwa ngkana a karaoia ao te Atua e na kanakoraoa aroia n te aba, ke n taeka riki tabeua, ngkana a bon kakaonimaki ni kaawakin ana tua te Atua ao e na kanakoraoa aroia n te aba; eng, e na anganiia te kauring bwa a na biri nako, ke a na katauraoi nakon te buaka, ni kaineti ma te kaangaanga.

16 Ao riki, bwa te Atua e na kaota nakoia bwa a na nako ke a na aki un ni kaaitaraia aia kairiribai, ao ngkana a karaoia, ao te Uea e na kainaomataia; ao aio ana onimaki Moronaai, ao nanona e kimwareirei iai; ^atiaki ni kawawaeanako te raraa ma ni karaoan ae raoiroi, ni kawakinan ana botanaomata, eng, ni kawakinan ana tua te Atua, eng, ao totokoan te buakaka.

17 Eng, e koaua, e koaua ae I a taekinna nakoim, bwa ngke arona bwa aomata ngkai, ao ngkoa, ao n taai aika a na roko a bane ni katotonga Moronaai, nooria, a na bon mamaara mwaakan moone n aki toki; eng, ao te ^ariaboro e na bon akea korakorana i aoia nanoia natia aomata.

18 Nooria, bon te aomata n aekan Amon, are natin Motiaea, eng, ao aron naba natin Motiaea ake tabemwaang, eng, ao Aramwa naba ma natina, bwa naakai bon ana aomata naba te Atua.

19 Ngkai nooria, Ereman ma tarina bon aomata naba aika a rang manena nakoia aomata n aron Moronaai; bwa a kabwarabwara ana taeka te Atua nakoia aomata, ao a bwabetitoia nakon te rairannano aomata ni kabane ake a kan ongo n aia taeka.

20 Ao a bon waaki, ao aomata a bon ^akananorinanoia ibukin aia taeka, n te aro are e a bon ^bkorakora nanonakia iroun te Uea, ao ngaia are a bon inaomata man taian buaka ao itabaraara i marenaia, eng, i nanon te maan ae aua te ririki.

21 Ma, n aron are I a tia n taku, ni kabanean te katebwi ma ruaiwa n ririki, eng, e ngae ngke e korakora te rau i buakoia, ao a bon kairoroaki bwa a na itabaraara ma tariia, ake Reimwanaite.

22 Eng, ni kakimototoa, e aki toki aia buaka i nanon te maan ae ririki aika a mwaiti ma Reimwanaite e ngae ngke a rawa.

23 Ngkai, a bon ^ananokawaki n tabeki bwaai ni buaka ni kaaitaraia Reimwanaite, ibukina bwa aki kukurei ni kawawaean te raraa; eng, ao tiaki ti aei—a bon nanokawaki n riki bwa te anga are a na kitana iai te aonaba aio tariia nakon te aonaba are akea tokina, n aki tauraoi ni kaitibo ma Atuaia.

24 Ma e ngae n anne, ao a bon aki kariaia bwa a na mate, ao bwa ^abuuia ma natia a na tiringaki n te aro ae aki riai ni korakoran buakakaia naake bon tariia ngkoa, eng, ao a tia ni ^bmwaawa man aia ekaretia, ao a moana kamaunakia ngkai a bon itoman naba ma Reimwanaite.

25 Eng, a bon aki kona moan ae tariia a na kimwareirei iaon raraaia Nibwaite, ngkana arona bwa iai ake a kawakina ana tua te Atua, bwa ana berita te Uea bwa, ngkana a kawakina ana tua ao e na nakoraoi aroia iaon te aba.