1 Ao ngkanne nooria, ngkai e a koro bukina bwa a un riki Reimwanaite akekei ibukina bwa a tia n tiringia tariia; ngaia are a berita bwa a na kataea kaia irouia Nibwaite; ao aikoa manga kataia n tiringia te botanaomata are ^aAentaai-Nibwaai-Riaai man te tai arei.

2 Ma a uota aia taanga ni buaka man riaon tian te aba are Taraemera, ma ni bwakaria aomata ake a mena n te aba are Amonia man ^atiringia.

3 Ao i mwin anne, e a mwaiti aia buaka ma Nibwaite, are a kakioaki man tiringaki iai.

4 Ao mai i buakoia Reimwanaite ake a tiringaki, angiina bon ^akanoan Amuron ma tarina, ake ana ibonga ngkoa Noa, ao a tiringaki ni baia Nibwaite.

5 Ao nikiraia, ngke a tia ni biri nakon te rereua i mainiku, man tia ni karekea te mwaaka ma te kariaiakaki n te aro ni babakanikawai i aoia Reimwanaite, a karekea te anga are a mwaiti iai Reimwanaite ni ^amate n te ai ibukin aia aki kakoaua.

6 Bwa a mwaiti ^ai buakoia, ake a tia ni kainnanoaki ngkai e mwaiti ae bua ma te karawawataki ae bati, ao a moanna n uring ^btaeka ake a kabwarabwaraki nakoia i abaia iroun Aaron ma tarina; ngaia are a kakewea ^ckateia aia bakatibu, ao a kakoaua te Uea, bwa e anga te mwaaka ae korakora nakoia Nibwaite; ao ngaia are a mwaiti mai i buakoia ake a rairaki n te rereua.

7 Ao e koro bukina bwa taan kairiri ake nikiraia natin ^aAmuron a kakaea te anga are a na ^btiringaki iai, eng, ni kabane ake a kakoauai bwaai aikai.

8 Ao ngkanne te tiritiri aei ibukin kakoauan te aro e karekea te anga are a mwaiti tariia are a un nanoia; ao e a waaki te unun n te rereua; ao Reimwanaite a ^akakakaei kanoan Amuron ma tarina bwa ana kamateia; ao a biri nako nakon te rereua i mainiku.

9 Ao nooria a kakioaki n te bong aei irouia Reimwanaite. Ngaia are a koro bukin ana taeka Abinataai, are e taekin ni kaineti ma kanoaia ibonga ake a kariaia bwa e na kainnano ni mate n te ai.

10 Bwa e taku nakoia: Te bwai are kam ^akaraoia nakoiu bon katotongan bwaai aika a na roko.

11 Ao ngkanne Abinataai bon te moan are e kainnano ni ^amate n te ai ibukin kakoauan te Atua; ngkanne aei te bwai are e kananonaa, are a mwaiti ake a na kainnano ni mate n te ai, n aron ae e kainnano iai.

12 Bwa e taku nakoia ana ibonga Noa bwa a na karika mateia aika a mwaiti kanoaia, n aekakin matena, ao a na kamaenakoaki n taabo aika a raroa man tiringaki, n aron te tiibu ae ake ana tia kaawakin tiibu ae kakioaki man tiringaki irouia maan aika a kakang; ao ngkai, nooria, a kakoroaki bukin taeka aikai, bwa a kakioaki irouia Reimwanaite, ao a kakaeaki bwa a na tiringaki, ao a oreaki.

13 Ao e koro bukina bwa ngke Reimwanaite a nooria bwa aki kona n tokanikai i aoia Nibwaite a oki rikaaki nakon abaia; ao a mwaiti i buakoia ake a nako ni maeka n te aba are Itimaera ao te aba are Nibwaai, ao a ikotaki ma ana aomata te Atua, are te botanaomata are ^aAentaai-Nibwaai-Riaai.

14 Ao a bon ^ataunii naba aia bwai ni buaka, n aron are a tia ni karaoi tariia, ao a moanna n riki bwa te botanaomata ae raoiroi; ao a nakonako ni kawain te Uea, ma ni motikia bwa a na kaawakin ana tua.

15 Eng, ao a kawakina ana tua Mote; bwa e bon riai bwa a na kawakina ana tua Mote n te tai aei, bwa a bon tuai ni bane ni koro bukiia. Ma e ngae ngke iai ana ^atua Mote, a bon kariaria rokon Kristo, ibukina bwa a taraa ana tua Mote ^bbwa katotongan rokona, ma ni kakoaua bwa a na riai ni kaawakin mwakuri ake a karaoaki ^citinaniku ni karokoa te tai are e na kaotaki nakoia.

16 Ao ngkanne a aki kataua bwa te ^akamaiuaki e reke man ana ^btua Mote; ma ana tua Mote e kamatoatoa aia onimaki iroun Kristo; ao ngaia are a karekea te ^ckantaninga rinanon te onimaki, nakon te kamaiuaki ae akea tokina, n onimakina tamnein te taeka ni burabeti, are e taekin bwaai aika a na roko.

17 Ao ngkanne nooria, Amon, ao Aaron, ao Aomna, ao Imnaai, ao tariia a bon korakora kimwareireia, ibukin te nakoraoi are a tia ni karekea i buakoia Reimwanaite, ngke a nooria bwa te Uea e a tia n anganiia ni kaineti ma aia ^atataro, ao e a tia naba ni kakoroa bukin ana taeka nakoia n arona ni kabane.