1 Ao e koro bukina bwa e koroboki riki nakon te kowana n te aba, are bon Bwaoraan, ao aikai taeka ake e koroi, ni kangai: Nooria, I korea au reta nakon Bwaoraan, n te kaawa are Taraemera, are bon ^amataniwia taan moti ao te kowana n te aba, ao nakoia naba ake a tia n rineaki irouia te botanaomata aio bwa a na tautaeka man tabeakina waakin te buaka aio.

2 Bwa nooria, iai te bwai ae I kan taekinna nakoia n te aro ni kabuakaka; bwa nooria, kam ataia ngkami bwa ti a tia n ikotiia mwaane, man anganiia bwaai ni buaka te kabaang, ma kabaang aika uarereke, ma aekan nako bwaai ni buaka, ma ni kanakoia ni kaaitaraia Reimwanaite, ni mwakoro nako ake a kaoti iai i abara.

3 Ao ngkai nooria, I taku nakoimi bwa ngai, ma au koraki, ma Ereman ma ana koraki, ti a tia ni kainnano n te kainnano ae rangi ni korakora; eng, n te baki, te taka, ma te kua, ma aekan nako taian karawawata.

4 Ma nooria, ngke arona bwa bon ti aei are ti kainnano iai ti na bon aki ngurengure ke n tangitang.

5 Ma nooria, e korakora te tiritiri nakoia ara botanaomata; eng, ngaa ma ngaa ake a bwaka n te kabaang, are tao e na bon aki riki ngke arona bwa ti anganiia ara taanga ni buaka te korakora ae tau ma te boutoka nakoia. Eng, e bon rangi ni korakora aki tabeakinakira iroumi.

6 Ao ngkai nooria, ti tangiria ni kan ataa bukin te aki tabeakinaki ae korakora aei; eng, ti tangiria ni kan ataa bukin aromi n aki tabeakinira.

7 Kam kona n tekateka iaon ami kaintokanuea n iango, ngkai akea kanoan ami iango, ao ami kairiribai a kabuta te mwakuri ni kamamate ni katobibingkami? Eng, ngkai a tiringia ngaa ma ngaa aika tarimi—

8 Eng, ao naake a tia n tararake nakoimi ibukin kawakinakia, eng, a tia ni kamenai ngkami n te tabo are kam na kona iai ni buokiia, eng, are kam na kona ni kanakoia taanga ni buaka nakoia, ni kakorakoraia, ma ni kamaiuia ngaa ma ngaa bwa a na aki bwaka n te kabaang.

9 Ma nooria, tiaki ti aei—kam tauii bwaai ake a kainnanoi, mai irouia, n te aro are a buaka ma ni mate ibukin banen raraaia ibukin korakoran nanoia are a tangira mweraoia te botanaomata aio; eng, ao aio are a tia ni karaoia ngke a kuri ni ^amate n te baki, ibukin korakoran aki tabeakinakia iroumi.

10 Ao ngkanne, tariu aika kam tangiraki—bwa kam bon riai n tangiraki; eng, ao kam riai ni kamarurungi riki ngkami ni botumwaaka riki ibukin mweraoia te botanaomata aio; ma nooria, kam a tia n aki tabeakinia n te aro are e na mena iaon atuumi raraaia ngaa ma ngaa bwa te irantaanga; eng, bwa e ataa tangiia ni kabane te Atua, ma kainnanoia ni kabane—

11 Nooria, kam taku bwa kam kona n tekateka iaon ami kaintokanuea, ao ibukin raoiroin te Atua ae korakora ao akea te bwai ae kam na karaoia ao e na kainaomataingkami? Nooria, ngkana kam taku aio inanomi ao e matebuaka are kam taku inanomi.

12 Kam ^ataku inanomi bwa, ibukina bwa a tia ni mate tarimi aika mwaiti bwa bon ibukin buakakaia? I taku nakoimi, ngkana kam iangoa aio inanomi ao e matebuaka ami iango are kam iangoia; bwa I taku nakoimi, a mwaiti ake a bwaka n te kabaang; ao nooria kam bon kabuakakaki iai.

13 Bwa te Uea e kariaia bwa a na tiringaki aika a ^araraoi bwa e aonga n roko ana momotiraoi ma ana motikitaeka i aoia ake a buakaka; ngaia are kam aki riai n taku bwa a bua ake a raraoi ibukina bwa a tiringaki; ma nooria, a bon rin i nanon ana rau te Uea ae Atuaia.

14 Ao ngkai nooria, I taku nakoimi, e korakora maakan ana motikitaeka te Atua are e na roko nakoia te botanaomata aio irou, ibukin korakoran taningarotia, eng, taningarotin naba te tautaeka, ma rianakon aki tabeakinakia tariia ae korakora, eng, nakoia ake a tia n tiringaki.

15 Bwa ngke arona bwa akea te ^abuakaka are e moan waaki mai irouia ara taan kairiri, ao ti na bon kona ni kaaitaraia ara kairiribai n te aro are a na bon aki tokanikai iaora.

16 Eng, ngke arona bwa akea te ^abuaka are e reke i marenara; eng, ngke arona bwa akea ana ^baomata te uea, ake a karika kawawaean te raraa ae korakora i buakora; eng, ngke arona bwa ti katiteuana korakorara n te tai are ti itabaraara i marenara, n aron are ti a tia ni kakaraoia; eng, ngke arona bwa akea tangiran te mwaaka ma te kan tautaeka iaora irouia ana aomata te uea; ngke arona bwa a kakaonimaki nakon te waaki n inaomata, ma ni katiteuanaki ma ngaira, man nako ni kaaitaraia ara kairiribai, man aki kaaitaraira ma aia kabaang, are e karika kawawaean te raraa ae rang korakora i buakora; eng, ngke arona bwa ti mwananga ni kaaitaraia ni korakoran te Uea, ti na bon tia ni kamaenakoia ara kairiribai, bwa e na karaoaki n aron kakoroan bukin ana taeka.

17 Ma nooria, ngkai a roko iaora Reimwanaite, man tauii abara, ao a tiringia ara botanaomata n te kabaang, eng, ara aine ma natira, ma ni kairia nako ni kabureia ma ni karawawataiia n aekan karawawata n aekaia nako, ao aio ibukin korakoran buakakaia naake a ukoukora te mwaaka ma te kan tautaeka, eng, naake ana aomata te uea.

18 Ma e aera ngkai e na bati au taeka ibukin aei? Akea te bwai ae ti ataia ma tao kam ukoukora te kan tautaeka. Akea te bwai ae ti ataia ma tao taan kamwanea abami ngkami.

19 Ke tao kam aki tabeakinira ibukina bwa kam mena inukan te aba ao kam otabwaniniaki n te aro n tararua, n te aro are kam aki kanakoa te amwarake nakoira, ma mwaane ake a na kamatoatoa ara taanga ni buaka.

20 Kam a mwaninga ana tua te Uea ae Atuami? Eng, kam a mwaninga aron kabureakia ara bakatibu? Kam a mwaninga taekan taai ake a mwaiti are ti a tia ni kainaomataki iai mai nanon baia ara kairiribai?

21 Ke tao kam taku inanomi bwa e na bon teimatoa ni kainaomataira te Uea, i nanon ami tai n tekateka iaon ami kaintokanuea man aki kabonganai bwaai ake e a tia te Uea ni karekei ibukira?

22 Eng, e aera bwa kam na tiku n aoriori i nanon te tai are kam a otabwaniniaki irouia ngaa ma ngaa nakekei, eng, ma tebwina te ngaa ma te ngaa, ake a tekateka n aoriori, I nanon te tai are iai naba ngaa ma ngaa ake a mena n taabo ake a uakaan ake a bwaka n te kabaang, eng, n ikoaki man raraabuabua?

23 N ami iango te Atua e kona n taraingkami bwa akea ami bure ngkai kam tekateka n aki kakamwakuri man taratarai bwaai aikai? Nooria I taku nakoimi, E aki. Ngkai I tangiria bwa kam na uringnga bwa te Atua e a tia n taku bwa e na itiaki moa are ^ai nanon te aomata, ao ngkanne e a itiaki naba tinanikun te aomata.

24 Ao ngkai, ngkana kam rairinanomi man te bwai ae kam a tia ni karaoia aei, man teirake ni kakamwakuri, ma ni kanakomaia te amwarake ao mwaane, ao nakon Ereman naba, bwa e na boutokaai mwakoron abara ake e a tia ni manga kaoki, ao bwa ti aonga naba ni manga anai nikiran ara bwai ni mwakoro aikai, nooria, e bon riai bwa ti na aki manga oki n itabaraara ma Reimwanaite ni karokoa moa ae ti kaitiaka moa nanora, eng, ao riki atuun ara tautaeka ae korakora.

25 Ao ti ngkana kam ira nanon au reta, man otinako ni kaota nakoiu ^atamnein te inaomata ni koaua, ma ni botumwaaka ni kakorakora ma ni kamatoa ara taanga ni buaka, man anganiia te amwarake ibukin boutokaakia, nooria N na katuka mwakoroia au aomata aika a inaomata bwa a na kawakina mwakoron te aba aei, ao N na katuka ana korakora ao ana kakabwaia te Atua i aoia naba, bwa akea riki te mwaaka teuana ae kona ni manga mwakuri ni kaaitaraia—

26 Ao aio ibukin aia onimaki ae korakora, ao ibukin taotaonan nanoia i nanon katakia—

27 Ao N na roko nakoimi, ao ngkana iai i buakomi ae iai nanona n tangira te inaomata eng, ngkana iai naba mwakaron naba te inaomata teutana ae tiku, nooria N na kauerakea te kaiangatoa i buakomi, ni karokoa ae naake iai nanoia ni kan ana te mwaaka ma te kan tautaeka n te aro ae aki riai a na bua.

28 Eng, I aki maaka mwaakami ma ami tautaeka, ma bon ti ^aAtuau ae I maakua; ao bon ti ni kaineti ma ana tua are I a ana au kabaang iai bwa N na tei ibukin ana waaki abau, ao ibukin buakakami are e a rang korakora ae bua.

29 Nooria e a roko te tai, eng, e a kaan te tai, are ngkana kam aki kakamwakuri ibukin abami ma ami ataei, ao te ^akabaang ni motiraoi e na tinetine iaomi; eng, ao e na bwaka iaomi man roko nakoimi n tiringingkami.

30 Nooria, I tataninga te ibuobuoki mai iroumi; ao ngkana kam aki mwakuria te ibuobuoki nakoira, nooria, N na roko nakoimi, nakon naba te aba are Taraemera, man oroingkami n te kabaang n te aro are e na manga akea korakorami ni katoka rikirakeia te botanaomata aei ibukin waakinan te inaomata.

31 Bwa nooria, te Uea e aki kariaia bwa kam na maiu ma ni matoatoa i nanon buakakami bwa kam na tiringia ana botanaomata ae a raoiroi aikai.

32 Nooria, kam kona n iangoia bwa te Uea e na kamaiungkami man roko ni motikitaeka ni kaaitaraia Reimwanaite, ngkai bon kateia aia bakatibu ae karika te kairiribai irouia, eng, ao e a tia ni manga kauataoaki irouia ake a biri nako mai iroura, ao kam riki ni buakaka ibukin tangiran te mimitong ma bwain te aonaba ae akea manenaia.

33 Kam ataia bwa kam urua ana tua te Atua, ao kam ataia bwa kam bon toubekaia i aan waemi. Nooria e taku te Uea nakoiu: Ngkana naake kam a tia n rineia bwa ami kowana aki rairinanoia man aia bure ao buakakaia, ao kam na nako ni buaka ni kaaitaraia.

34 Ao ngkai nooria, Ngai, ae Moronaai, I kairoroaki bwa, ni kaineti ma te berita ae tabu are I a tia ni karaoia bwa N na kawakina ana tua Atuau; ngaia are I tangiria bwa kam na taua ana taeka te Atua, ma ni kawaekoa nakoiu ami bwai ake ti kainnanoi ma ami mwaane, ao nakon Ereman naba.

35 Ao nooria, ngkana kam aki karaoa aio ao N na waekoa n roko iroumi; bwa nooria, te Atua e aki kariaia bwa ti na mate ni baki; ngaia are e na bon anganiira kanami, e ngae ngkana ti angan karekeana te kabaang. Ngkai taraia bwa kam na kakakoroa bukin ana taeka te Atua.

36 Nooria, Ngai bon Moronaai, mataniwia ami mataniwi. I aki ^aukoukora te mwaaka ma I kan kamauna. I aki ukoukora ana karinerine te aonaba, ma mimitongin Atuau, ao inaomatan ma mweraoin abau. Ao ikai are I a katoka au reta.