1 Ao ngkai e koro bukina bwa ni moan waakin aia kauabwi ma ruaiwa n ririki taan moti, ao ^aAmoron e kananako nakon Moronaai bwa e tangiria bwa a na kaibibiti aia bure.

2 Ao e koro bukina bwa Moronaai e bon rootia angin te kukurei ae rianako n ana bubuti, bwa e bon tangiri bwaai ake a na kainnanoi ake a tia ni kanakoaki ibukin boutokaakia bure ake Reimwanaite ibukin boutokaakia oin ana botanaomata; ao e bon tangiriia naba oin ana botanaomata ibukin kakorakoraia ana taanga ni buaka.

3 Ao ngkai a bon tia Reimwanaite n anaia aine aika a mwaiti ma ataei, ao bon akea naba temanna te aine ke te teei i buakoia ana bure Moronaai, ke bure ake e a tia n anaia Moronaai; ngaia are Moronaai e kakaea te kawai are e na kona ni karekei bure aika a mwaiti aika Nibwaite mai irouia Reimwanaite ngkana e kona.

4 Ngaia are e korea te reta n angan ana toro Amoron, are bon ngaia naba are e uota te reta nakon Moronaai. Ao ngkanne aikai taeka ake e koroi nakon Amoron ni kangai:

5 Nooria, Amoron, I a tia ni koroboki nakoim ibukin te bwai ae kaineti ma te buaka aei ae ko kateirakea ni kaaitaraia au botanaomata, ke ae e a tia ni kateirakea ^atarim ni kaaitaraia, ao are ko bon kamatoa inanom bwa ko na reitia nako i mwin matena.

6 Nooria, N na tuangko te bwai teuana ni kaineti ma ana ^amomotiraoi te Atua, ma korakoran unna ae kanga te kabaang, ae tinetine i aomi ni karokoa ae kam rairananomi ma ni kakerikakia ami taanga ni buaka nakon oin abami, ke te aba are kam bwaibwai iai, are bon te aba are Nibwaai.

7 Eng, I kan tuangko bwaai aikai ngke arona bwa ko kona n ongeaba nako iai; eng, I kan tuangko aron ^amoone are e kakamaku are tataningaia taan ^btiriaomata n ai arom ma tarim, ma ti ngkana kam rairinanomi ma ni katoka ami waaki n tiriaomata, ao ma n oki ma ami taanga ni buaka nakon oin abami.

8 Ma ngkai kam a tia ngkoa n aki butimwaei bwaai aikai, man tia ni buakaniia ana botanaomata te Uea, ao I kataua bwa kam na manga karaoia riki.

9 Ao ngkai nooria, ti a tauraoi ni butimwaeingkami; eng, ma ngkana kam aki katoka ami waaki, nooria, kam na karuoa i aomi unin te Atua are kam a tia n aki butimwaea, ao kam na bon kamaunaki.

10 Ma, ngkai e maiu te Uea, ao a na roko ara taanga ni buaka nakoimi ngkana kam aki kerikaaki, ao kam na bon mate, bwa ti na bon kaoki ara kaawa ma abara; eng, ao ti na kawakina ara aro ma ana waaki Atuara.

11 Ma nooria, I taku inanou bwa e matebuaka taetaeu nakoimi ni kaineti ma bwaai aikai; bwa I taku inanou bwa ^aataein moone ngkami; ngaia are N na kaina au reta aei man tuangko bwa I aki kan kaibibiti ara bure, ma ti ngkana ko kainaomata te mwaane ma buuna ma natina, ibukin temanna te bure; ngkana e kona n riki aei ao ko na karaoia, ao N na kaibibiti.

12 Ao nooria, ngkana ko aki karaoa aio, N na roko ni kaaitarako ma au taanga ni buaka; eng, ao N na katokai naba aia bwai ni buaka au aine ma au ataei, ao N na roko ni kaaitarako, ao N na rimwiko nakon oin abam, are bon te aba are ^ati moan bwaibwai iai, eng, ao e na kangai te raraa ibukin te raraa, eng, te maiu ibukin te maiu; ao N na buakaningkami eng, ni karokoa ae kam kamaunaki mai matan te aonaba.

13 Nooria, I a un, ao au botanaomata naba; kam a tia n ukoukora tiringakira, ao ti a bon tia ni kataia ni kamaiuira. Ma nooria, ngkana kam a manga ukoukora riki kan tiringara ao ti na ukoukora naba tiringami; eng, ao ti na ukoukora naba abara, te aba are ti moan bwaibwai iai.

14 Ngkai e a toki au reta. Ngai Moronaai; Ngai te tia kairiri irouia te botanaomata ae Nibwaite.

15 Ngkai e koro bukina bwa Amoron, ngke e reke irouna te reta aio, e a bon un; ao e korea riki teuana te reta nakon Moronaai, ao aikai taeka ake e koroi ni kangai:

16 Ngai bon Amoron, aia uea Reimwanaite; Ngai bon tarin Amarakaai are kam a tia n ^atiringnga. Nooria, N na kabooa mwiin raraana iaomi, eng, ao N na roko nakoimi ma au taanga ni buaka bwa I aki maakui am taeka ni kakamaku.

17 Bwa nooria, a bon kairua ami bakatibu nakoia tarira, n te aro are a bon anaa ^ainaomataia nakon te tautaeka ngke bon aia bwai n etina.

18 Ao ngkai nooria, ngkana kam kawenei ami bwai ni buaka, ma ni kariaia bwa kam na tautaekanaki irouia naake bon aia bwai te tautaeka n etina raoi, ao ngkanne N na tuangiia au botanaomata bwa a na kawenei aia bwai ni buaka ao e na manga akea riki te buaka.

19 Nooria, ko a tia n taekin taian taeka ni kakamaku aika a mwaiti nakoiu ma au botanaomata; ma nooria, ti bon aki maaka ami taeka ni kakamaku.

20 Ma e ngae n anne, N na kariaia bwa ti na kaibibiti ara bure n aron are am bubuti, ni kukurei, bwa e aonga n ae I kawakina te amwarake ibukiia au koraki ni buaka; ao ti na kateirakea te buaka ae akea tokina, are a na kona iai n tautaekanaki Nibwaite iroura ke ana kamaunaki n akea tokina.

21 Ao ni kaineti ma te Atua are ko taku bwa ti a tia n totokoia, nooria, ti bon aki ataa te Atua anne, ao ngkami naba; ma ngkana arona bwa bon iai te Atua anne, ti bon aki ataia ma tao e a tia ni karikira ma ngkami naba.

22 Ao ngkana arona bwa iai te riaboro ao moone, nooria tiaki bwa e na kanakoko nako ikekei bwa ko na maeka ma tariu are ko a tia n tiringnga, are ko taku bwa e a tia n nako nakon te tabo arei? Ma nooria akea bongan bwaai aikai.

23 Ngai bon Amoron, are kanoan ^aTioram, are e kairoroaki irouia ami bakatibu ma ni kairaki nako mai Ierutarem.

24 Ao nooria ngkai, Ngai bon te Reimwanaite ae ninikoria; nooria, e kateirakeaki te buaka aei bwa e na kabooi mwiin aia bure, ao bwa e na kateimatoa ma ni kawakina inaomataia nakon te tautaeka; ao I a katoka au reta nakon Moronaai.