1 Ha ojehu osẽ hikuái, ha oñepyrũ omboʼe tavayguakuérape Tupã ñeʼẽ, oikévo isinagogakuérape, ha hogakuérape; heẽ, ha jepe hapekuérape omboʼe hikuái pe ñeʼẽ.

2 Ha ojehu ombaʼapo heta rire hikuái ijapytepekuéra, oñepyrũ ohupyty hikuái poʼa umi imboriahúva apytépe; péina ápe, koʼãva oñemosẽgui umi sinagógagui ijao vai haguére—

3 Upévare ndojehejái chupekuéra oike isinagogakuérape otupaitũ hag̃ua Tupãme, oñemaʼẽgui hesekuéra mbaʼekyʼáicha; upéicha imboriahu hikuái; heẽ, ijoykeʼykuéra ohecha chupekuéra ytýicha; upévare imboriahu hikuái mbaʼe yvoraguápe; ha avei imboriahu hikuái ikorasõme.

4 Koʼág̃a, Alma omboʼe ha oñeʼẽ jave tavayguakuérape yvyty Onida ári, ou hendápe peteĩ tuicha atyguasu, haʼéva umi ñañeʼẽhague hína, umi imboriahúva ikorasõme, imboriahu haguére umi yvorapegua mbaʼépe.

5 Ha ou hikuái Alma rendápe; ha peteĩ tuichavéva ijapytepekuéra heʼi chupe: Péina ápe, mbaʼépa ojapóta koʼã che joykeʼykuéra, ojehayhuʼỹva opa yvypórare imboriahu haguére, heẽ, ha avei ojehayhuʼỹve umi ore sacerdote-kuérare; oremosẽgui hikuái ore sinagogakuéragui hetaite mbaʼapópe romopuʼãvaʼekue ore pópe; ha oremosẽ hikuái oremboriahu haguére; ha ndoroguerekói peteĩ tenda rotupaitũ hag̃ua ore Tupãme; ha péina ápe, mbaʼe piko rojapóta?

6 Ha koʼág̃a ohendúvo Alma upéva, ojere, ha omoĩ hova hesete, ha omaña tuicha vyʼápe; ohechágui ijehasaʼasykuéra añetehápe omomirĩha chupekuéra, ha oĩmaha hikuái ohendu hag̃uáicha pe ñeʼẽ.

7 Upévare ndeʼivéima mbaʼeve pe ambue atyguasúpe; ha katu oipyso ipo, ha heʼiʼasy umi ohechávape, umi añetehápe oñembyasyvaʼekuépe, ha heʼi chupekuéra:

8 Che ahecha penemarangatuha pene korasõme; ha péicharamo, pejehovasapyréva.

9 Péina ápe pende joykeʼy heʼíkuri, mbaʼépa rojapóta?—roñemosẽgui ore sinagogakuéragui, upévare ndaikatúi rotupaitũ ore Tupãme.

10 Péina ápe che haʼe peẽme, peimoʼã piko ndaikatuiha petupaitũ pende Tupãme ndahaʼéirõ pene sinagogakuérape añónte?

11 Ha avei, che aporanduse peẽme, peimoʼã piko petupaitũvaʼerã Tupãme peteĩ ára añónte?

12 Che haʼe peẽme, oĩporã peñemosẽ pende sinagogakuéragui, peñemomirĩ hag̃ua, ha peikuaa hag̃ua arandu; tekotevẽgui peikuaa arandu; ha peñemosẽ haguére, pende joykeʼykuéra napenderayhúi haguére pene mboriahuetereígui, upévare peg̃uahẽ pe korasõ ñemomirĩme; peñemomirĩmantevaʼerãgui.

13 Ha koʼág̃a, pejegueraha haguére peñemomirĩ hag̃ua pejehovasapyre; oĩgui ára pe yvypóra, ojegueraháramo oñemomirĩ hag̃ua, oheka pe arrepentimiénto; ha koʼág̃a añetehápe, opa oñearrepentíva ojuhúta poriahuvereko; ha pe ojuhúva poriahuvereko ha oñehaʼãmbaitéva ipahaite peve ojesalváta.

14 Ha koʼág̃a, che haʼe haguéicha peẽme, pejegueraha haguére peñemomirĩ hag̃ua pejehovasákuri, napeimoʼãi piko ojehovasaveha umi oñemomirĩva añetehápe pe ñeʼẽ rupi?

15 Heẽ, pe añetehápe oñemomirĩva, ha oñearrepentíva iñangaipágui, ha oñehaʼãmbaitéva ipahaite peve, ojehovasáta—heẽ, ojehovasavéta umi ojeguerahávagui oñemomirĩ hag̃ua imboriahuetereígui.

16 Upévare, ojehovasapyre umi oñemomirĩva ojeguerahaʼỹre oñemomirĩ hag̃ua; térã, ambue ñeʼẽme, ojehovasapyréva pe ogueroviáva Tupã ñeʼẽ, ha oñemongaraíva omohatãʼỹre ikorasõ, heẽ, ojeguerahaʼỹre chupe oikuaa hag̃ua pe ñeʼẽ, térã jepe ojeikuaauka chupe, oguerovia mboyve.

17 Heẽ, oĩ heta heʼíva: Rehechaukáramo oréve peteĩ techauka yvágagui, upéicha añetehápe roikuaáta; ha upéicharamo rogueroviáta.

18 Koʼág̃a che aporandu peẽme, péva piko haʼe jerovia? Péina ápe, che haʼe peẽme, Nahániri; pe kuimbaʼe oikuaáramo peteĩ mbaʼe, ndoguerekói mbaʼérepa ogueroviávo, oikuaámagui.

19 Ha koʼág̃a, mboʼýpa oñemoñeʼẽngaive pe oikuaáva Tupã rembipota ha ndojapóiva, pe ogueroviávaguinte, térã oguerekónteva mbaʼérepa ogueroviávo, ha hoʼáva tembiapovaípe?

20 Koʼág̃a ko mbaʼépe peẽ pehusgáta. Péina ápe, che haʼe peẽme, péicha haʼe peteĩme ambue mbaʼépeicha; ha opa yvypórape ojejapóta hembiapokuéicha.

21 Ha koʼág̃a che haʼe haguéicha pe jerovia rehe—Jerovia ndahaʼéi jaguereko peteĩ jeikuaa porã umi mbaʼégui; upévare peguerekóramo jerovia peguereko ñehaʼarõ umi mbaʼe ndojehecháiva rehe, ha haʼéva añetegua.

22 Ha koʼág̃a, péina ápe, che haʼe peẽme, ha che aipota penemanduʼa, Tupã oiporiahuverekoha opa ogueroviáva hérape; upévare haʼe oipota, peteĩháme, peguerovia, heẽ, jepe iñeʼẽ.

23 Ha koʼág̃a, haʼe omombeʼu iñeʼẽ yvyporakuérape umi ángel rupi, heẽ, ndahaʼéi kuimbaʼépe añónte ha katu kuñáme avei. Koʼág̃a ndahaʼéi pévante; heta jave oñemeʼẽ mitãme ñeʼẽ, omoypytũva iñarandu ha oikuaapávape.

24 Ha koʼág̃a, che joykeʼykuéra ahayhuetéva, peikuaaségui chehegui mbaʼépa pejapovaʼerã peñembohasaʼasy ha peñemosẽgui—koʼág̃a che ndaipotái peimoʼã pohusgase ndahaʼéirõ pe añeteguapeguáicha—

25 Ndaʼeséigui opavave peẽ pejeguerahahague peñemomirĩ hag̃ua; añetehápe agueroviágui oĩha pende apytépe oñemomirĩneva, oimeháicha.

26 Koʼág̃a, che haʼe haguéicha pe jerovia rehe—ndahaʼeiha peteĩ jeikuaa porã—péicha haʼe che ñeʼẽ ndive avei. Ndaikatúi peikuaa añeteguaha iñepyrũme, jeikuaa porã reheve, upe jerovia ndahaʼeiháicha peteĩ jeikuaa porã.

27 Ha katu péina ápe, pepáy ha pemokyreʼỹramo pene apytuʼũ, jepe pemoĩ peve che ñeʼẽ pyʼaraʼãme, ha pemombaʼapóramo michĩmi jerovia, heẽ, tahaʼe jepe pegueroviasénteva, peheja ko potapy tombaʼapo pendepype, jepe peguerovia peve ha péicha pemeʼẽ peteĩ tenda che ñeʼẽ pehẽnguépe.

28 Koʼág̃a, ñambojojáta pe ñeʼẽ peteĩ yvaraʼỹire. Koʼág̃a, pemeʼẽramo tenda oñeñotỹ hag̃ua peteĩ yvaraʼỹi pene korasõme, péina ápe, haʼéramo peteĩ yvaraʼỹi añetegua, térã yvaraʼỹi iporãva, ha napemombóiramo pende jeroviaʼỹ rupi, peñemoĩvo Ñandejára Espíriture, péina ápe, oñepyrũta okakuaa pene korasõme; ha peñandúvo upe kakuaa, peñepyrũta peje pende pype—Kóva haʼéne peteĩ yvaraʼỹi porã, térã pe ñeʼẽ iporã, oñepyrũgui ombotuicha che ánga; heẽ, oñepyrũ omyesakã che apytuʼũ, heẽ, oñepyrũ heterei chéve.

29 Koʼág̃a péina ápe, kóva piko nomombaretemoʼãi pende jerovia? Che haʼe peẽme, Heẽ; upevére ndahaʼéi gueteri peteĩ jeikuaa porã.

30 Ha katu péina ápe, pe yvaraʼỹi oñembotuichávo, hoky, ha oñepyrũ okakuaa, upéicharamo pejétamante pe yvaraʼỹi iporãha; péina ápe oñembotuicha, ha hoky, ha oñepyrũ okakuaa. Ha koʼág̃a, péina ápe, kóva piko nomombaretemoʼãi pende jerovia? Heẽ, omombaretéta pende jerovia: pejétagui aikuaa kóva haʼeha peteĩ yvaraʼỹi porã; péina ápe hokýgui ha oñepyrũgui okakuaa.

31 Ha koʼág̃a, péina ápe, peikuaa porãmapa koʼág̃a haʼeha yvaraʼỹi iporãva? Che haʼe peẽme, Heẽ; opa yvaraʼỹi omeʼẽgui ambue haʼeichagua.

32 Upévare, peteĩ yvaraʼỹi okakuaáramo haʼe yvaraʼỹi iporãva, ha katu ndokakuaáiramo, péina ápe naiporãi, upévare oñemombo.

33 Ha koʼág̃a, péina ápe, pejapo haguére pe ñehaʼã, ha peñotỹ haguére pe yvaraʼỹi, ha kóva oñembotuichágui, ha hoky, ha oñepyrũ okakuaa, peikuaátamante pe yvaraʼỹi iporãha.

34 Ha koʼág̃a, péina ápe, peikuaa porãmapa? Heẽ, peikuaa porãma koʼã mbaʼe, ha pende jerovia nombaʼapovéima; ha kóva peikuaágui, peikuaágui pe ñeʼẽ ombotuichahague pene ánga, ha avei peikuaa hokyhague, pende kuaapy oñepyrũha hesakã, ha pene apytuʼũ oñepyrũ ojeipyso.

35 Upéicharamo, ndahaʼéi piko kóva añetegua? Che haʼe peẽme, Heẽ, haʼégui tesape; ha haʼéva tesape, iporã, ikatúgui ojehesaʼỹijo, upévare peikuaavaʼerã iporãha; ha koʼág̃a péina ápe, peikuaa porãmapa peñandu rire ko tesape?

36 Péina ápe che haʼe peẽme, Nahániri; ni ndapehejareírivaʼerã pende jerovia, pemombaʼapo hagueréntekuri pende jerovia peñotỹ hag̃ua pe yvaraʼỹi pejapo hag̃ua pe ñehaʼã peikuaa hag̃ua pe yvaraʼỹipa iporã.

37 Ha péina ápe, pe yvyramáta oñepyrũ vove okakuaa, pejéta: Ñañangareko porã hese, oñembohapo hag̃ua, okakuaa hag̃ua, ha tomeʼẽ ñandéve yva. Ha koʼág̃a péina ápe, peñangareko porãramo hese oñembohapóta, ha okakuaáta, ha omeʼẽta yva.

38 Ha katu pehejareíramo pe yvyramáta, ha ndapejesarekóiramo peñangarekóvo hese, péina ápe ndahapomoʼãi; ha kuarahy aku og̃uahẽ vove ha ohapy, ipirúta ndahapóigui, ha pehekýita ha pemombóta okápe.

39 Koʼág̃a, kóva ndahaʼéi pe yvaraʼỹi naiporãigui, ni pe hiʼa ndahéigui ipotapyrãva; ha katu haʼe pende yvy hatãgui, ha napeñangarekoséigui pe yvyramáta rehe, upévare ndaikatúi pehupyty pe hiʼa.

40 Ha upéicha, napeñangarekóiramo pe ñeʼẽre, pemaʼẽvo tenonde gotyo tesa jeroviápe hiʼa rehe, arakaʼeve napemonoʼõmoʼãi pe yva yvyramáta tekove reheguágui.

41 Ha katu peñangarekóramo pe ñeʼẽre, heẽ, ha peñangarekóramo pe yvyramáta rehe oñepyrũ jave okakuaa, tuicha jesarekópe pende jerovia rupive, ha ñehaʼarõme, pemaʼẽvo tenonde gotyo hiʼa rehe, oñembohapóta; ha péina ápe haʼéta peteĩ yvyramáta hokýva tekove opaveʼỹvape g̃uarã.

42 Ha pende jesareko, ha pende jerovia ha ñehaʼarõ rupi peñangarekóvo pe ñeʼẽre, oñembohapo hag̃ua pendepype, péina ápe, pyaʼe pemonoʼõta hiʼa, iporãitereíva, ha heʼẽvéva opa mbaʼe heʼẽvagui, ha morotĩvéva opa mbaʼe morotĩvagui, heẽ, ha ipotĩvéva opa mbaʼe ipotĩvagui; ha peʼúta ko yvágui penerenyhẽ meve, upéicha napeneñembyahyimoʼãi ni napendeʼyʼuheimoʼãi.

43 Upéicha, che joykeʼykuéra, pemonoʼõta pende jerovia, ha pende jesareko, ha ñehaʼarõ, ha pende gueropuʼakakuaa repymeʼẽ, pehaʼarõvo pe yvyramáta omeʼẽ peẽme hiʼa.