1 Koʼág̃a Mosíah léipe heʼi opavave haʼéva léi rehegua hue, térã umi oñehenóiva huerã, ohupytyvaʼerã hepymeʼẽ ára ombaʼapohaguéicha ohusga hag̃ua umi ojeguerúvape chupekuéra ojehusga hag̃ua.

2 Koʼág̃a peteĩ kuimbaʼe odevéramo ambuépe, ha ndohepymeʼẽiramo chupe pe odevéva, oñemombeʼu pe huépe; ha pe hue oiporu autorida, ha omondo tembiguaikuéra ogueru hag̃ua pe kuimbaʼe henondépe; ha haʼe ohusga pe kuimbaʼe léipe heʼiháicha ha umi mbaʼe ojeʼeháicha hese; ha upéicha ojehepymeʼẽuka pe kuimbaʼépe ideveha, térã ojeipeʼa chugui umi mbaʼe oguerekóva, térã oñemosẽ tavayguakuéra apytégui ipokovi ha imondavaramoguáicha.

3 Ha pe hue ohupyty ijehepymeʼẽ ára ombaʼapoháicha—peteĩ árare peteĩ seníne oroguigua, térã peteĩ senum plátaguigua, haʼéva peteĩ seníne oroguiguáicha; ha kóva umi léi oñemeʼẽvaʼekuépe heʼiháicha.

4 Koʼág̃a koʼãva haʼe umi monéda oroguigua, ha plataguigua réra, hepyháicha. Ha umi térã oñemeʼẽ nefita-kuéra rupi, ndoipapáigui hikuái judio-kuéra oikóva Jerusalén-pe ojapoháicha; ni nomedíri hikuái ojapoháicha judio-kuéra; ha katu omoambue hikuái ijeipapa ha iñemedikuéra, umi tavaygua oipota ha oikotevẽháicha, opa ñemoñarépe, huekuéra ñeisãmbyhy peve, oñemoĩvaʼekue rréi Mosíah rupive.

5 Koʼág̃a péicha oipapa hikuái—peteĩ seníne oroguigua, peteĩ seón oroguigua, peteĩ shum oroguigua, ha peteĩ limna oroguigua.

6 Peteĩ senum plataguigua, peteĩ amnor plataguigua, peteĩ ezrom plataguigua ha peteĩ onti plataguigua.

7 Peteĩ senum plataguigua haʼe peteĩ seníne oroguiguáicha, ha peteĩ térã ambuéva haʼe peteĩ cebada medídaicha, ha avei peteĩ medída opaichagua yva raʼỹicha.

8 Koʼág̃a peteĩ seón oroguigua haʼe mokõi seníne repýicha.

9 Ha peteĩ shum oroguigua haʼe mokõi seón repýicha.

10 Ha peteĩ limna oroguigua haʼe opaite umíva repýicha.

11 Ha peteĩ amnor plataguigua haʼe mokõi senumes repýicha.

12 Ha peteĩ ezrom plataguigua haʼe irundy senumes repýicha.

13 Ha peteĩ onti haʼe opaite umíva repýicha.

14 Koʼág̃a kóva haʼe umi michĩvéva jeipapa repymeʼẽ, ijeipapakuéra apytégui—

15 Peteĩ shiblón haʼe peteĩ senum mbytéicha; upévare, peteĩ shiblón haʼe peteĩ cebada medída mbytéicha.

16 Ha peteĩ shiblum haʼe peteĩ shiblón mbytéicha.

17 Ha peteĩ léah haʼe peteĩ shiblum mbytéicha.

18 Koʼág̃a kóva haʼe ijeipapa, haʼekuéra oipapaháicha.

19 Koʼág̃a peteĩ antión oroguigua haʼe mbohapy shiblon repýicha.

20 Koʼág̃a, haʼékuri oñembopirapire hag̃uánte hikuái, ohupytýgui hepymeʼẽ hembiapokuére, upévare, omokyreʼỹ hikuái tavayguakuérape ñembohovái, ha opáichagua joavy ha tekoñañáme g̃uarã, upéicha oguerekove hag̃ua hikuái tembiapo, ohupyty hag̃ua pirapire tembiapo oñemeʼẽháicha chupekuéra; upévare omokyreʼỹ hikuái tavayguakuérape Alma ha Amulek rehe.

21 Ha ko Zeezrom oñepyrũ oporandu Amulek-pe, heʼívo: Rembohováitapa chéve mbovymi porandu ajapótava ndéve? Koʼág̃a Zeezrom haʼe peteĩ kuimbaʼe katupyry aña rembiapópe, ohundi hag̃ua mbaʼe iporãva; upévare, haʼe heʼi Amulek-pe: Rembohováita piko chéve porandu ajapótava ndéve?

22 Ha heʼi chupe Amulek: Heẽ, oĩporãramo Ñandejára Espíritu ndive, oĩva che pype; ndaʼemoʼãigui mbaʼeve oñemoĩva pe Ñandejára Espíritu rehe. Ha Zeezrom heʼi chupe: Péina ápe, koʼápe oĩ sei onti plataguigua, ha opa koʼãva ameʼẽmbáta ndéve renegáramo oĩha peteĩ Tekove Ipuʼakapáva.

23 Koʼág̃a Amulek heʼi: O añaretã raʼy, mbaʼére piko cheipyʼaraʼã? Ndereikuaái piko nde umi hekojojáva noñemeʼẽiha umichagua jeipyʼaraʼãme?

24 Reguerovia piko nde ndaiporiha Tupã? Che haʼe ndéve, Nahániri, nde reikuaa oĩha peteĩ Tupã, ha katu rehayhuve chugui pe pirapire.

25 Ha koʼág̃a nde chembotavýkuri Tupã renondépe. Nde erékuri chéve—Péina ápe koʼã sei onti, hepyetéva, ameʼẽta ndéve—ha katu ne korasõme erékuri neremeʼẽmoʼãiha chéve; ha pe nde reipotávante haʼe che anega Tupã añetegua ha oikovévape, reguereko hag̃ua mbaʼérepa cherundi hag̃ua. Ha koʼág̃a péina ápe, ko tuicha mbaʼeñaña rehe rehupytýta nde repymeʼẽ.

26 Ha Zeezrom heʼi chupe: Ere piko nde oĩha peteĩ Tupã añetegua ha oikovéva?

27 Ha Amulek heʼi: Heẽ, oĩ peteĩ Tupã añetegua ha oikovéva.

28 Koʼág̃a Zeezrom heʼi: Oĩve piko peteĩ Tupãgui?

29 Ha haʼe ombohovái, Nahániri.

30 Koʼág̃a Zeezrom heʼi jey chupe: Mbaʼéicha piko reikuaa koʼã mbaʼe?

31 Ha haʼe heʼi: Peteĩ ángel oikuaaukákuri chéve.

32 Ha Zeezrom heʼi jey: Máva piko pe oútava? Haʼe piko Tupã Raʼy?

33 Ha haʼe heʼi chupe, Heẽ.

34 Ha Zeezrom heʼi jey: Osalváta piko haʼe tavayguakuérape iñangaipápe? Ha Amulek ombohovái ha heʼi chupe: Che haʼe ndéve ndojapomoʼãi upéva, ndaikatúigui haʼe onega iñeʼẽ.

35 Koʼág̃a Zeezrom heʼi tavayguakuérape: Pemaʼẽke penemanduʼa hag̃ua koʼã mbaʼére; haʼe heʼíguikuri ndaiporiha ndahaʼéirõ peteĩ Tupã añónte; upevére haʼe heʼi Tupã Raʼy outaha, ha katu ndosalvamoʼãi itavayguakuérape—oguerekoramoguáicha haʼe autorida heʼi hag̃ua Tupãme ojapovaʼerã.

36 Koʼág̃a Amulek heʼi jey chupe: Péina ápe nde ndejapúkuri, erégui añeʼẽhague aguerekoramoguáicha autorida haʼe hag̃ua Tupãme ojapovaʼerã, haʼe haguére haʼe ndosalvamoʼãiha itavayguakuérape iñangaipápe.

37 Ha che haʼe jey ndéve ndaikatuiha osalva chupekuéra iñangaipápe; che ndaikatúigui anega iñeʼẽ, ha haʼe heʼíkuri mbaʼeve ipotĩʼỹva ndaikatumoʼãiha ohupyty yvága rréino; upévare, mbaʼéicha piko pejesalváta, ndapehupytýiramo pe yvága rréino. Upévare, ndaikatúi pejesalva pene angaipápe.

38 Koʼág̃a Zeezrom heʼi jey chupe: Haʼe piko Tupã Raʼy pe Tupã Ijapyraʼỹvaite?

39 Ha Amulek heʼi chupe: Heẽ, haʼe niko haʼe pe Túva Ijapyraʼỹvaite yvága ha yvy, ha opa mbaʼe ipype oĩvapegua; haʼe iñepyrũmby ha ipaha, peteĩha ha ipaháva;

40 Ha oúta yvórape orredimi hag̃ua itavayguakuérape; ha ojagarráta hiʼári umi hérare ojeroviáva rembiapovaikuéra; ha koʼãva haʼe umi ohupytýtava tekove opaveʼỹva, ha avavépema ndoúi upe salvasiõ.

41 Upévare umi iñañáva opyta ndojejapoiramoguáicha mbaʼevéichagua rredensiõ, ndahaʼéiramo umi ñemano sãnguéra jejoránte; ha péina ápe, ou ára opavave opuʼãtaha omanovakuéra apytégui ha oñemboʼýta Tupã renondépe, ha ojehusgáta chupekuéra hembiapokuérare.

42 Koʼág̃a, oĩ peteĩ ñemano hérava yvyʼarigua ñemano; ha Cristo ñemano ojoráta ko yvyʼarigua ñemano sã, opavave oñemopuʼã hag̃ua ko yvyʼarigua ñemanógui.

43 Pe espíritu ha pe tete ojoaju porãmbaite jeýta; umi tete pehẽngue ha kangue joajuha oñemoĩjeýta oĩhaguéicha voi, jepe koʼág̃a ñaimeháicha; ha jajegueraháta ñañemboʼy hag̃ua Tupã renondépe, jaikuaávo koʼág̃a jaikuaaháicha, ha ñanemanduʼa porãvo opa ñane rembiapovaikuérare.

44 Koʼág̃a, kóva ko ñemoĩjey oúta opavavépe, ituja ha imitãva, ojejokua ha isãsóva, kuimbaʼe ha kuña, iñaña térã hekojojávape; ha ni peteĩ akãrague jepeve nokañymoʼãi iñakãgui; ha katu opa mbaʼe oñemoĩporãmba jeýta, koʼág̃a oĩháicha, térã pe tetépe, ha ojegueraháta chupekuéra oñemboʼy hag̃ua Cristo pe Taʼýra trivunal renondépe, ha Tupã pe Túva, ha pe Espíritu Santo, haʼéva peteĩ Tupã Opaveʼỹva, ojehusga hag̃ua hembiapokuére, tahaʼe iporã térã ivaíva.

45 Koʼág̃a, péina ápe, añeʼẽkuri ndéve pe tete omanokuaáva ñemano rehe, ha avei pe tete omanokuaáva jeikovejey rehe. Che haʼe ndéve ko tete omanokuaáva oñemopuʼãha tete omanokuaaʼỹvaicha, kóva haʼe ñemanógui, jepe ñemano peteĩhágui jeikovépe, ndaikatuvéi hag̃uama omano; ijespiritukuéra ojoajúta hetekuéra ndive, anivéma hag̃ua ojei ojuehegui; ha upéicha ko joaju haʼe espíritu rehegua ha omanoveʼỹva, anive hag̃uáma oñembyai.

46 Koʼág̃a, Amulek oñeʼẽmbávo koʼã ñeʼẽ tavayguakuéra oñepyrũ jey oñemondyieterei, ha avei Zeezrom oñepyrũ oryrýi. Ha péicha opa Amulek ñeʼẽ, térã koʼãvante haʼe umi che ahaivaʼekue.