Tusi Lesona ma le Taimi o Fetufaaiga a le Peraimeri
Lesona 43: E I Ai Lo Tatou Perofeta Soifua

Lesona 43

E I Ai Lo Tatou Perofeta Soifua

Faamoemoega

Ia fesoasoani ia malamalama tamaiti, e manuia i tatou pe a tatou mulimuli i le perofeta.

Sauniuniga

  1. Aoao ma le agaga tatalo le 1 Samuelu 3:1–10, 19–20. Ia vaai foi le Mataupu Faavae o le Talalelei(31110), mataupu e 9.

  2. Ia tusi i ni fasipepa eseese aoaoga a le perofeta soifua mai lauga o konafesi po o tusitusiga i mekasini o le Ekalesia. Ia saunia ni fasipepa e tofu ai tamaiti o le vasega. Gaugau fasipepa ona tuu lea i totonu o se pesini po o se ato. O aoaoga e aofia ai-

    • Aoao mai tusitusiga paia i aso uma.

    • Ia faapaiaina le Aso Sapati.

    • Ia tatalo i aso uma.

    • Ia tatou o i sauniga o le faamanatuga ma Peraimeri.

    • Ia faamaoni.

  3. O Mea e faaaogaina:

    1. O se Tusi Paia.

    2. Ata 1-4, O Le Uluai Faaaliga (Taga o Ata o le Talalelei 403;62470); ata 1-29, O Le Fauina O Le Vaa (Taga o Ata o le Talalelei 102;62053); ata 1-42, O Le Tama o Samuelu Ua Valaauina e le Alii (Taga o Ata o le Talalelei 111;62498); ata 1-66, O Mose ma le Laau Na Mu (Taga o Ata o le Talalelei 107;62239); o se ata o le perofeta soifua.

  4. Ia faia sauniuniga uma e talafeagai ai mo so o se Gaoioiga E Faamauoa Ai e te manao e faaaoga.

Gaoioiga e Aoao Ai

Tofi se tamaitiiti e faia le tatalo amata.

Gaoioiga e Faatosina Mai Ai:

Ia faaali auaua’i ata ia, faaali le ata o Noa (ata 1-29), Mose (ata 1-66), ma Iosefa Samita (ata 1-4). Valaaulia tamaiti e faamatala mea latou te iloa i ata taitasi.

A uma ona talanoaina mea e iloa e tamaiti e uiga i ata, ona faamatala otooto lea sa faatonuina e Iesu ia Noa e fau se vaa ina ia faasaoina ai o ia ma lona aiga mai le lolo. Sa ta’u atu e Iesu ia Mose e faasaolotoina mai le fanauga a Isaraelu mai le nofo pologa. Sa ta’u atu e Iesu ia Iosefa Samita e le tatau ona auai atu i se lotu sa i ai i lena taimi i luga o le fogaeleele.

E talanoa perofeta ma le Tama Faalelagi ma Iesu

Ia faamatala atu o Noa, Mose, ma Iosefa Samita o perofeta uma lava i latou. O le perofeta o se tagata e talanoa ma le Tama Faalelagi ma Iesu. Talu ai e le o i ai i le lalolagi le Tama Faalelagi ma Iesu e aoao i tatou, o le ala lea ua i ai a la perofeta e fesoasoani ia te i la’ua. E aoaoina e le Tama Faalelagi ma Iesu le perofeta, ae aoaoina i tatou e le perofeta i mea e tatau ona tatou faia ina ia tatou manuia ma fiafia ai.

Tala

Faaali le ata 1-42, O Le Tama o Samuelu Ua Valaauina E Le Alii, ma faamatala le tala ia Samuelu sa valaauina e fai ma perofeta, e pei ona maua i le 1 Samuelu 3:1–10, 19–20. Faitau le 1 Samuelu 3:10 i tamaiti.

Tala

  • O ai lea sa valaau ia Samuelu a’o moe? (O Iesu. Vaai le 1 Samuelu 3:4.)

  • O ai lea na manatu Samuelu sa valaau ia te ia? (Vaai le 1 Samuelu 3:5.)

  • O le a le mea na ta’u atu e Eli ia Samuelu e fai? (Vaai le 1 Samuelu 3:9.)

  • O le a le tali a Samuelu ia Iesu? (Vaai le 1 Samuelu 3:10.)

Faamalamalama a o avea Samuelu ma se tama talavou, sa talanoa mai i ai Iesu i le taimi muamua lava. Ina ua matua o ia, sa ia aoao atu i tagata mea sa finagalo le Tama Faalelagi ma Iesu latou te faia.

Gaoioiga

Tofi ni tamaiti se toatolu e faapea o le isi o Samuelu, Eli, ma Iesu latou te faatinoina le tala. Ia toe fai le mea lava lea e tasi ae sui tamaiti e faatinoina pe a manaomia.

O lo o i ai lo tatou perofeta i le fogaeleele i aso nei

Faaali le ata o le perofeta soifua. Faamatala i tamaiti se mea e te silafia e uiga i le perofeta.

Faatutu i luga tamaiti ma fai, “O (Igoa o le perofeta soifua) o se perofeta a le Atua.”

  • Aisea tatou te moomia ai se perofeta soifua? ( Ina ia tatou iloa ai mea o lo o finagalo le Tama Faalelagi ma Iesu tatou te fai.)

Faamatala e aoaoina i tatou e le perofeta pe a saunoa mai i konafesi. O konafesi o ni sauniga tetele e auai tagata e toatele. E mafai foi ona tatou faalogo i lo tatou perofeta i le televise, leitio, po o lipine. E lomia foi ana saunoaga i mekasini a le Ekalesia ma e mafai e o tatou matua ma isi ona faitau mai ia te i tatou.

Gaoioiga

Tago le tamaitiiti e piki mai sana fasipepa se tasi mai le pesini po o le ato sa e saunia. Faitau le savali o lo o i fasipepa taitasi ma talanoaina otooto ma tamaiti. Ta’u i tamaiti o savali uma nei o mea ua poloaiina ai i tatou e le perofeta tatou te faia.

Gaoioiga

Fai i tamaiti e mafaufau i se auala e mafai ai ona latou mulimuli i le perofeta. Togi pe tuu atu foi se taga o fatu pi po o se mea galemulemu i tamaiti taitoatasi ma fai atu, “O le a ou mulimuli i lo tatou perofeta e ala.” Ia faauma e le tamaitiiti le fuaiupu i se auala o le a mafai ai ona ia mulimuli i le perofeta.

O le a faamanuiaina i tatou pe a tatou mulimuli i le perofeta

Toe vaai i ata o Noa, Mose, Iosefa Samita, ma le perofeta soifua. Faamatala, atu talu ai sa mulimuli le aiga o Noa ia te ia, sa faasaoina i latou mai le lolo. Talu ai ona sa mulimuli le fanauga a Isaraelu ia Mose, sa taitaiina ese atu i latou mai Aikupito i se nuu sili atu. Talu ai ua mulimuli tagata ia Iosefa Samita, ua avea nei i latou ma uso o le Ekalesia a Iesu Keriso o le Au Paia o Aso e Gata Ai.

Faamalamalama ua faamanuiaina nei tagata aua ua latou mulimuli i perofeta. O le a faamanuiaina foi i tatou pe a tatou mulimuli i le perofeta.

Pese

Fesoasoani i tamaiti e usu pe tauloto upu o le tali o le pese: “Mulimuli ile Perofeta” (Tusi Pese a Tamaiti). Faamalamalama o le taase, o lona uiga o le faia lea o mea sese. Ia uu e se tamaitiiti i luga le ata o le perofeta soifua ao outou usuina le pese.

Mulimuli i le perofeta, mulimuli i le perofeta, mulimuli i le perofeta; aua le taase.

Mulimuli i le perofeta, mulimuli i le perofeta, mulimuli i le perofeta; na te iloa lelei.

Molimau

Tuuina atu lau molimau e uiga i le perofeta soifua. Tau i tamaiti ua e iloa afai tatou te mulimuli i le perofeta, o le a manuia i tatou ma fiafia.

O Isi Gaoioiga e Faamauoa Ai

Filifili nisi o nei gaoioiga e faaaoga i le taimi o le lesona.

  1. Aumai se kaseti faalogologo po o se kaseti vitio o le perofeta soifua e tata mo tamaiti, pe faaali atu foi ni ona ata mai mekasini a le Ekalesia.

  2. Usu pe tauloto mo tamaiti upu o le pese: “Ia viia Oe le Atua, mo le Perofeta lelei” (Viiga Nu.129,O Viiga I Le Atua).

  3. Toe faamatala le tala i le faaaliga o le Faaola ia Peresitene Lorenzo Snow (tagai i le lesona 26). Faamatala na faaali Iesu ia Peresitene Snow, e tau atu ia te ia le mea e ao ona ia fai e taitai ai le Ekalesia. Sa tau atu e Iesu ia Peresitene Snow mea e aoao i tagata o le Ekalesia.

  4. Mafaufau i ni nai tulaga e mafai ai e tamaiti ona mulimuli i aoaoga a le perofeta. Faamalamalama tulaga taitasi i le vasega, ma ia ta’u mai e tamaiti pe faatino foi i taga mea o le a latou faia i tulaga taitasi e mulimuli ai i le perofeta. Mo se faataitaiga: “Ua e vaaia se tupe i le umukuka. Ua e manao nei i ai, ae peitai ua e iloa o le tupe a lou tina. O le a se mea e te faia ina ia e mulimuli i aoaoga a le perofeta ia faamaoni?”

O Gaoioiga Faaopoopo mo Tamaiti Laiti

  1. Faaali le ata o le perofeta soifua i le taimi atoa o le lesona. Faaalu sina taimi e faamatala ai i tamaiti po o ai o ia. Faamalamalama e alofa o ia ia te i latou ma e finagalo o ia e fesoasoani ia te i latou ina ia toe foi atu i le Tama Faalelagi ma Iesu. Ia fai faalua pe faatolu lenei mea i le vasega.

  2. Fai faatasi ma tamaiti le taaloga o le “Mulimuli i le Taitai”. Faatutu tamaiti i se laina. O le tamaititi o lo o pito i luma o le laina e tamoe, musa, tafue pe fai foi se isi taga i le isi itu o le potu. Ia mulimuli isi tamaiti uma i le tamaitiiti o loo muamua, ma fai le mea sa ia fai. Ona alu lea o le tamaitiiti na muamua i le siusiu o le laina, ae avea ma taitai le isi tamaitiiti lona lua. Ia faaauau seia tofu avea ma taitai tamaiti uma.

    A uma le taaloga, faamalamalama o le perofeta o le taitai o le Ekalesia. Afai tatou te mulimuli i mea o lo o ia tau mai e fai, o le a ia toe taitaiina atu i tatou i lo tatou Tama Faalelagi ma Iesu.