E Mafai Ona Ou Faamaoni

Faamoemoega

Ia faamalosia tamaiti taitasi ia naunau e faamaoni.

Sauniuniga

Aoao ma le agaga tatalo le Esoto 20:15–16; Alema 53:16–22; 56:44–57; ma le Mataupu o le Faatuatua 13. Tagai foi i le Mataupu Faavae o le Talalelei (31110), mataupu 31.
Fai ni nai fusi pepa po o ni fasi ieie e fusi ai ulu o tamaiti. Tusi i fusi taitasi, E Mafai Ona Ou Faamaoni.
O mea e faaaogaina:
1. O se Tusi Paia ma se Tusi a Mamona.
2. O se faamau po o se isi mea laitiiti.
3. Ata 1-13, O Iosefa Samita (Taga Ata o le Talalelei 400; 62449); ata 1-65, O Tagata Tau Talavou e Lua Afe (Taga Ata o le Talalelei 313;62050).
Ia faia sauniuniga talafeagai mo so o se Gaoioiga E Faamauoa Ai e te manao e faaaoga.

Gaoioiga e Aoao Ai

Tofi se tamaitiiti e faia le tatalo amata.

Gaoioiga e Faatosina Mai ai:

Fai i se tamaitiiti e sau i luma o le vasega. Oomi faatasi ou alofilima ma le faamau po o se isi mea laitiiti. Ia oomi faatasi foi e isi tamaiti o latou lima. Alu atu mai le tasi tamaitiiti i le isi tamaitiiti, faapasi atu ai ou lima i le va o o latou lima. Faapau le faamau i se lima o se tamaitiiti. Faaauau pea le oomi mau o lima o isi tamaiti, faafoliga faapea o la e i ai le faamau. Ia e fai atu, “Faamau, faamau, o ai la e i ai le faamau?” Taumafai le tamaitiiti la e i luma e mate po o ai la e i ai le faamau i lona fesili atu, “(Igoa), o ia te oe le faamau?” Faatonu tamaiti e tatau ona faamaoni i a latou tali. “E leai, e le o ia te a’u le faamau” po o le “Ioe, o lo o ia te a’u.”

Ia fai soo le taaloga lea, ma tofi nisi tamaiti e mate ma pasi le faamau. Faamalo atu i tamaiti i lo latou faamaoni.

E finagalo le Tama Faalelagi ma Iesu ina ia tatou Faamaoni

Faaali le ata 1-13, O Iosefa Samita. Faamatala i tamaiti sa tusia e Iosefa Samita faapea, “Matou te talitonu ia faamaoni” i le lona sefulutolu o mataupu faavae o le faatuatua. Fesoasoani i tamaiti e tauloto nei upu.

O le a le uiga o le, “ia faamaoni”?

Faamatala atu, o le faamaoni e aofia ai le tautala i le mea sao, o le le tago fua i mea a isi tagata, ma le faatutusa ona fai o tagata.

Faamatala i tamaiti na aumaia e Mose Tulafono e Sefulu i ona tagata (tagai i le Esoto 20). Faamatala atu e lua tulafono o le faamaoni na tuuina atu e le Tama Faalelagi ma Iesu ia Mose: “Aua e te gaoi” ma le “Aua e te molimau pepelo.” Faitau leotele le Esoto 20: 15–16.

O le a le uiga o le gaoi?

Faamalamalama o le faia o se molimau pepelo, o lona uiga o le faia lea o se faamatalaga le sao.

Pese

Fai upu nei “Ou Te Talitonu i le Faamaoni” (Children’s Songbook, p.149).

Ou te talitonu i le faamaoni;
Ou te talitonu i le fai o mea tonu,
Ou te talitonu i le fai o mea sao.
O le faamaoni e amata ia te a’u.
I upu uma ou te fai, i mea uma ou te fai.

Gaoioiga

Faamatala ni nai taga i tamaiti. Fai i tamaiti e tutu pe afai o se gaoioiga e faamaoni ae nonofo i lalo pe afai o se gaoioiga le faamaoni. Faaaoga faataitaiga o lo o i lalo pe fai ni au lava taga.

Gaoioiga

Ua e aina se mea na faatonu atu e lou tina e aua e te tago i ai.
Ua e faamatala le mea sao e te faia.
Ua e avea se mea a e le o sau mea totino.
Ua e faaali atu ua e faia se mea sese.
Ua e tuuaiina se tasi i se mea sese na e faia.
O le mauaina o se tupe po o so o se mea ma le toe faafoiina lea i le e ona lea mea.

Faatonu tamaiti e faamatala ni mea na oo i ai ina ua latou faaalia lo latou faamaoni.

Gaoioiga

O le a sou lagona pe a e faamaoni?
O le a sou lagona pe a e le faamaoni?
Aisea e te fefe ai e te faamaoni i nisi taimi? (Nei tei ua faasala oe pe le fiafia ai se tasi ia te oe.)

Fesoasoani i tamaiti ia malamalama tatou te maua lagona lelei pe a tatou faamaoni, e ui lava ina faigata i nisi taimi.

E manuia i tatou pe a tatou faamaoni

Tala

Faaali le ata 1-65, O Tagata Tau Talavou E Lua Afe. Faamatala le tala o le au tau talavou e lua afe, o lo o maua i le Alema 53:16–22 ma le Alema 56:44–57, aemaise le Alema 53:20–21. Faamatala atu o le tasi mafuaaga o le tulaga ese o nei taulelea o lo latou faamaoni. Faitau leotele le vaega mulimuli o le Alema 53:20 (Amata mai le …o tagata faamaoni i latou…). Faamatala atu o le faia o le mea sa’o o le faamaoni lena. Talu ai o nei taulelea tau talavou o ni tagata faamaoni, sa malu puipuia i latou i le taua. Sa faamanuiaina i latou ona o lo latou faamaoni, faatuatua, ma le loto toa. O le a faamanuiaina foi i tatou pe a tatou faamaoni.

Tala

Na faapefea ona faamanuiaina lenei lua afe o tagata tau talavou i lo latou faamaoni? (Tagai i le Alema 56:54–56.)

Gaoioiga

Tuu fusi i ulu o tamaiti. Fai i ai e mafaufau faapei o i latou o le au tau talavou e lua afe ona savavali faafitafita lea faataamilo i le potu ae fuafua lelei le patipati o ou lima ia fetaui. Taofi foi le savali pe a tuu le pati, ma fesili i se tamaitiiti pe faapefea ona faamaoni. Toe patipati ou lima, ma toe faaauau le gaoioiga seia soo uma tamaiti.

Molimau

Tuuina atu lau molimau e finagalo le Tama Faalelagi ma Iesu ia tatou faamaoni ma o le a tatou maua le fiafia pe a tatou faamaoni.

O Isi Gaoioiga e Faamauoa Ai

Filifili nisi o nei gaoioiga e faaaoga i le taimi o le lesona.

Faamatala i au lava upu le tala lea ia Iakopo Amelini ma lona atalii. O Iakopo Amelini o se tasi o uluai paionia na o i Iuta. Sa alofa lava o ia i Initia sa nonofo ai iina, ma sa ia aoao foi e tautala i la latou gagana. Sa faamaoni lava o ia i Initia, ma sa latou faatuatuaina foi o ia. I se tasi aso, sa auina atu ai e Iakopo lona atalii e faafesuiai lana solofanua laiitiiti mo ni nai palanikete mai se tagata Initia. Sa siakiina ma le faaeteete e le Initia le solofanua ona ia tuuina atu lea o se faaputuga palanikete. Sa fai atu le atalii o Iakopo, “E le lava.” Sa toe saga faaopoopo atu e le Initia palanikete i le faaputuga. Ina ua mafaufau atu le atalii o Iakopo ua lava, sa foi loa i lo latou aiga ma le mimita ua tele naua ana palanikete ua maua mai lana solofanua laiitiiti. Ae ina ua vaai atu Iakopo i le tele naua o palanikete ua aumai e lona atalii, sa le fiafia o ia. E le taitai ona tutusa le solofanua laiitiiti e tasi ma nei mau palanikete ua aumai. Sa faatonu e Iakopo lona atalii e alu e toe faafoi le isi afa o palanikete. Ina ua toe foi atu le tama i le Initia, sa ata le Initia ma faapea mai, “Na ou iloa lava o le a toe faafoi mai oe e Iakopo” (tagai i le Jacob Hamblin, Jr., e pei ona faamatala ia Louise Lee Udall, i le A Story to Tell [Salt Lake City: Deseret Book Co., 1945], 359-60).

Faamatala atu na iloa lelei lava e le Initia o Iakopo Amelini o se tagata faamaoni ma o lea na ia toe faafoi atu ai palanikete na sili. Sa mafai e le Initia ona faatuatuaina Iakopo aua o ia o se tagata faamaoni tele. Fai i tamaiti e toe faamatala le tala pe faatinoina i taga.
Usu pe tauloto upu o le pese: “Sa tamaitiiti o Iesu” (Tusi Pese a Tamaiti).
Faaaoga ni papeti (puppets) faigofie, e pei o totini po o tagapepa, e fai ai taga o tulaga e fai ai e se tagata se filifiliga i le faamaoni ma le le faamaoni. Faaaoga faataitaiga o lo o i lalo pe fai ni au lava faataitaiga.
- Ua e tataeina se ipu ona fesili atu ai lea o lou tina po o ai na ta’e ai.
- O lo o e fesoasoani e taetae ni tupe sa toulu, ma ua faaosoosoina oe e te tago e ave nisi ma oe.
- Ua e aina ni keke se lua ina ua uma ona fai atu lou Tama e ‘aua. Ua fesili atu lou tama ia te oe pe sa e aina kuki.
Ia tofu le tamaitiiti ma le avanoa e faaaoga ai papeti ma faamatala mai pe o le a le latou mea e fai i tulaga taitasi.

O Gaoioiga Faaopoopo Mo Tamaiti Laiti

Fesili i tamaiti po o i ai se solofanua i totonu o le potu. Tau i tamaiti, e tusa lava pe latou te sailia ma le faaeteete, e le mafai lava ona latou maua se solofanua i le potu aua e leai se mea o i ai. O le a le faamaoni pe a faapea mai o lo o i ai se solofanua i le potu. Fesili po o latou vaai i se (ta’u se igoa o se mea e faigofie ona iloa e tamaiti). Faamalamalama atu afai latou te tau maia se mea e sao pe moni, o lona uiga ua latou faamaoni.
Faatonu tamaiti e sii uma lima i luga pe a e ta’uina atu se mea e moni ae tuu i lalo pe a e tauina atu se mea e le moni. Fai ni faamatalaga faigofie ma iloa gofie e pei o le, “O lo o i ai so’u sei,” “O lo o fai lou ofu,” “E mumu le ofuvae o Ioane,” po o le “O lo o e nofo i luga o se nofoa.”
Usu pe tauloto upu o le pese: “Fai Le Mea Tonu” (Tusi Pese a Tamaiti).