Lesona 38
E Mafai Ona Ou Faaaloalo
Faamoemoega
Ia uunaia tamaiti taitoatasi ina ia faaalia le alofa i le Tama Faalelagi ma Iesu e ala i le faaaloalo.
Sauniuniga
-
Aoao ma le agaga tatalo le Esoto 20:15–16; Alema 53:16–22; 56:44–57; ma le Mataupu Faavae o le Faatuatua 1:13. Tagai foi i le Mataupu o le Talalelei (31110), mataupu e 31.
-
O Mea e faaaogaina:
-
O se Tusi Paia.
-
Ata 1-19, O Iesu ma Tamaiti (Taga o Ata o le Talalelei 216;62467); ata 1- 66, O Mose ma le Laau Talatala O Lo o Mumu (Taga o Ata o le Talalelei 107;62239); ata 1-67, O se Vasega Faaaloalo.
-
-
Ia faia sauniuniga talafeagai mo Gaoioiga E Faamauoa Ai e te manao e faaaoga.
Gaioioga e Aoao Ai
Tofi se tamaitiiti e faia le tatalo amata.
Gaoioiga E Faatosina Mai Ai:
Fai i tamaiti e nonofo filemu ma piilima lelei a o e usuina i se leo malie pe tauloto upu o le pese “Ia Migao, Filemu” (Tusi Pese a Tamaiti). Afai e iloa e tamaiti le pese, e mafai foi ona latou usu ai.
Ia migao, filemu, ma manatu ia Iesu;
Ia migao, filemu, vivii ma faamanu;
Ia migao, filemu, tatalo lemu,
Ia i ai lou Agaga Sa, ia i matou uma.
A uma, faafetai atu i tamaiti mo le nonofo filemu.
E mafai ona tatou faaaloalo i le lotu
Faaali le ata 1-67, O Se Vasega Faaaloalo.
-
O fea lea e i ai nei tamaiti?
-
O a a latou mea o fai?
-
Faamata o a ni mea o mafaufau i ai?
-
O a ni amio tou te faaalia pe a o mai i le Peraimeri?
Faamatala atu a tatou o mai i le lotu, e tatau ona tatou faia se amio faapitoa. E taua lea o le faaaloalo.
Ia tau soo e tamaiti le upu faaaloalo.
-
Faamata o le a le uiga o le upu faaaloalo?
Faamatala i tamaiti o le faaaloalo o le faia lea o mea e faaalia ai lo tatou alofa ma le migao i le Tama Faalelagi ma Iesu. E mafai ona tatou faaalia lo tatou alofa ia te i laua i auala ia o lo o taua i lalo (fai i tamaiti latou te fa’ata’ita’ia nisi o nei mea a o e talanoa i ai):
-
Savavali lemu ma talanoa lemu.
-
Nonofo filemu ma faalogologo i tatalo ma lesona.
-
Sii o tatou lima pe a mananao e tau atu se mea.
-
Piilima.
-
Tausi le mama o le falelotu.
Faamalamalama afai tatou te faia nei mea, o le a silafia e le Tama Faalelagi ma Iesu tatou te alolofa ia te i laua ma e tatou te fiafia ina ua tatou o mai i le lotu.
Gaoioiga
Fai faatasi ma tamaiti upu o le pese “Ou te Fia Faaaloalo” (Children’s Songbook, p.28). Toe fai pe a manaomia.
Ou te fia faaaloalo,
E faailoa atu ai lou alofa mo oe.
O le a ou faalogo ma le filemu,
Aua o le faaaloalo e amata ia te au.
Gaoioiga
-
Aisea e tatau ai ona tatou faaaloalo i le Peraimeri?
Faamanatu i tamaiti afai tatou te faaaloalo, o le a mafai ona tatou faalogo i o tatou faiaoga ma aoao e uiga i le Tama Faalelagi ma Iesu. A tatou faaaloalo, o la tatou fesoasoani foi lena i isi ina ia faaaloalo.
Gaoioiga
-
O le a le fale lea o lo o tatou i ai nei?
-
O le fale lenei o ai?
Faamatala i ai o le Tama Faalelagi ma Iesu e ona le falelotu. O se nofoaga tatou te o mai tatou te aoao ai e uiga ia te i laua ma mea la te finagalo tatou te faia.
Gaoioiga
Fai faatasi ma tamaiti le gaoioiga lea e faaaoga ai tamatamai lima. Fai ni taga i lima e faailoa ai vaega o le falelotu.
O Le Falelotu
O puipui nei o se fale ua matagofie mai,
O lona ‘olo umī o lo o tu mai ai.
O faamalama nei e susulu mai ai le malamalama
Ma ona faitotoa e matala mo so o se tagata.
O lenei fale sa fausia e lima agalelei
E avea ma nofoaga e pepese ma tatalo ai nei
Ia tatou piilima ma punonou o tatou ulu (piilima ma punonou),
Ma tatou faafetai atu mo lenei fale i le aso.
Gaoioiga
-
O a ni mea e tatau ona tatou faia i le falelotu?
-
O a ni mea e le tatau ona tatou faia i le falelotu?
Fesoasoani ia malamalama tamaiti e i ai vaega o le falelotu ma taimi e taufetuli ai ma taaalo ai, ae peitai, o le tele lava o le fale ma Aso Sa e tatau ona tatou faaaloalo ai. Ia faamanino foi e le gata i le na o le nofo filemu i le Peraimeri ma totonu o le falesa, a e tatou te savavali ma talanoa lemu foi i fale faafiafia.
Tala
Faamatala se tala e uiga i tamaiti o lau vasega pe a o mai i le Peraimeri. Ia aofia ai lo latou fiafia tele a o taufetuli ma tafue mai aga’i i le fale, po o lo latou savavali filemu mai i totonu, ma a latou mea e fai i le taimi o le lotu faamanatuga ma le Peraimeri ma pe a o mai i le fale faafiafia. Faamamafa le faaaloalo o tamaiti pe a o mai i le lotu.
Gaoioiga
Faitau upu o le pese “O Tamai Vae Fiafia E Lua” (Children’s Songbook, p.270) a o savavali lemu lava faataamilo tamaiti i totonu o le potu ma le faaeteete ina ia aua ne’i pa’ō o latou seevae.
E i ai ou tamai vae fiafia laiti e lua
E aveina au i luma po o tua.
La te faamusa ma faatafue ia te au,
O lo la pa’ō e iloa lelei e a’u.
Peitai, i le fale o lo’u Tama,
E filemu e leai se pa’ō po o se mea e gapā.
Tusa pe ou te savali, e te le lagonaina lava,
O o’u vae laiti e lua o le a le gagana.
Gaoioiga
-
O le a lau mea e fai i ou vae i le fale faafiafia i le lotu? I totonu o le falesa? I totonu o le vasega?
-
O le a lau mea e fai i ou lima?
-
O le a lau mea e fai i lou leo?
E mafai ona i ai o tatou lagona faaaloalo
Faaali le ata 1-19, O Keriso ma Tamaiti, ma faaali atu ou lagona e uiga ia Iesu ma le tele o lona alofa ia te i tatou. Faamatala atu o ni lagona faaaloalo nei. Valaaulia tamaiti e faamatala o latou uiga ia Iesu.
Tala
Faaali le ata 1-66, O Mose ma le Laau Talatala o Lo o Mumu, ma faamatala le tala o lo o maua i le Esoto 3:1–10. Faamamafa lagona faaaloalo o Mose ina ua fetalai atu le Alii ia te ia mai le laau talatala o lo o mumu ma valaauina o ia e taitai ese mai le fanauga a Isaraelu mai Aikupito. Faitau leotele mai le Tusi Paia ma faamalamalama le vaega o le fuaiupu 5: “ina to ese ia ou seevae i ou vae, aua ua sa lava le eleele o lo o e tu ai nei.”
Tala
-
Aisea na tatala ese ai e Mose ona seevae?
Faamatala o le faaalia lea o le faaaloalo. Ia mautinoa ua malamalama tamaiti, e le tau aveeseina fua o tatou seevae e faaalia ai lo tatou faaaloalo. E tele lava isi auala e faaalia ai lo tatou faaaloalo.
Tala
-
E mafai faapefea ona e faaaloalo?
E mafai ona tatou faaaloalo i o tatou aiga
Faamatala i tamaiti e le na o le falelotu tatou te faaaloalo ai.
-
O le a lau mea e fai i le fale pe a tatalo se tasi?
-
O le a lau mea e fai i le taimi o le afiafi faaleaiga?
Faamatala atu o lou faalogo ma le filemu i le taimi o le tatalo ma lesona i le aiga, o le faaalia lava lea o lou faaaloalo. E tau atu ai i le Tama Faalelagi ma Iesu tatou te alolofa ia te i la’ua.
Molimau
Faaali atu lou alofa i le Tama Faalelagi ma Iesu ma lou agaga faafetai talu ai e mafai ona e faaalia lea alofa pe a e faaaloalo. Uunai tamaiti e faaali atu lo latou alofa mo le Tama Faalelagi ma Iesu e ala i le faaaloalo i le Peraimeri, i sauniga faamanatuga, ma le taimi o tatalo ma afiafi faaleaiga.
O Isi Gaoioiga e Faamauoa Ai
Filifili nisi o nei gaoioiga e faaaoga i le taimi o le lesona.
-
Ave tamaiti mo se savalivaliga faaaloalo i faapaologa o le falelotu. A talafeagai, o i le falesa. A outou toe foi i le potu aoga, vivii ma faamalo i tamaiti e tusa ai ma la latou amio faaaloalo ma talanoa atu ua avea lo latou faaaloalo ma ala ua fesoasoani ai i isi tagata e faaaloalo ia latou vasega.
-
Usu pe tauloto upu o le pese “O le a Ou Taumafai Ia Faaaloalo” (Tusi Pese a Tamaiti) po o le “Tama o le a Ou Filemu” (Tusi Pese a Tamaiti).
-
Lolomi ata o vae o tamaiti i luga o ni laupepa o loo tusi ai le fuaiupu o le “O Vae Laiti Fiafia E Lua” (Tagai i le itulau 126). Ia valivali e le tamaitiiti ia ata o ona vae ma ave i le fale.
-
Ia auaua’i tamaiti e faamatala se auala e mafai ai ona faaaloalo i le vasega, e pei o le nofo filemu, piilima, po o le tuu i luga o le lima pe a manao e fai atu se mea. Talanoa e uiga i le tatau ona faaaloalo i le fale o le Tama Faalelagi.
-
Fesoasoani i tamaiti e fai upu o se fuaiupu se tasi po o fuaiupu uma. Ia fai ni taga e pei ona tau mai i upu:
Tatala, Faamomoe (Lima)
Tatala, Faamomoe;
Patipati lemu
Tatala, faamomoe;
Tatala, faamomoe;
Faataoto lelei i ou vae.
Ou te lulu ou lima.
Ou te lola ou lima.
Ou te faapati ou lima.
Ou te sii ae lou lima,
Ona tuu mai ai lea i lalo
Ma piilima i luga o ou vae.
Ou te faafilemu ou vae.
Ou te faamalolo ou vae.
Ou te nofo sa’o i lou nofoa.
Ou te ifo ma punou.
Ou te moeiini ou mata.
Ua ou saunia mo le tatalo.
O Gaoioiga Faaopoopo Mo Tamaiti Laiti
Faatonu tamaiti e moeiini mata. Fai i ai e sii o latou lima i luga pe a faalogo i le pa’ū o se tupe siliva po o se faamau. Faapa’ū se tupe siliva po o se faamau i luga o le fola po o se laulau. Ona afifi lea o le faamau po o le siliva i se solosolo po o se fasi ieie. Faatonu tamaiti e moeiini o latou mata, faalogologo lelei, ma sii o latou lima pe a faalogoina le siliva po o le faamau i le taimi lenei. Faapa’ū le faapona o le faamau po o le tupe siliva i luga o le fola po o le laulau. Fesoasoani i tamaiti ia malamalama e tele na’ua mea e tatou te lagonaina pe a tatou faalogo lelei.