Tusi Lesona ma le Taimi o Fetufaaiga a le Peraimeri
Lesona 18: Ou Te Faafetai Mo O’u Taliga

Lesona 18

Ou Te Faafetai Mo O’u Taliga

Faamoemoega

Ia fesoasoani i tamaiti taitoatasi ia fiafia ma faafetai mo ona taliga ma mea e mafai ona latou faia.

Sauniuniga

  1. Ia suesue ma le agaga tatalo le Mareko 7:32–35 ma le Talafaasolopito—Iosefa Samita 1:17.

  2. O Mea e faaaogaina:

    1. O se Tusi Paia ma se Penina Tau Tele

    2. Ata 1-4, o le Uluai Faaaliga Vaaia (Taga Ata o le Talalelei 403; 62470); ata 1-41, Tamaitiiti ma le Mea Faalogo Mo Ona Taliga; o se ata o le perofeta soifua.

  3. Ia faia sauniuniga e talafeagai ai mo so o se Gaoioiga e Faamauoa Ai e te manao e faaaoga.

Faaaliga i le Faiaoga: Ia mataalia i lagona o so o se tamaitiiti e i ai i lau vasega o lo o i ai ni mea e faaletonu i o latou tino. Ia tulimatai i mea e mafai ona faia e o latou tino, ae le o mea e le mafai ona latou faia.

Gaoioiga E Aoao Ai

Tofi se tamaitiiti e faia le tatalo amata.

Gaoioiga E Faatosina Mai Ai:

Ia fai gaoioiga o lo o i lalo e ala i lou musumusu atu:

Ia faafeiloai tamaiti taitoatasi. Ia faatonu tamaiti e faia nisi o gaoioiga, e pei o le nofo i lalo, sii i luga o latou lima, tuu i lalo o latou lima, ma faatutu i luga tamatamai lima e lua.

Ia fai atu i tamaiti i lou lava leo e masani ai, pe na faapefea ona latou lagona mea e tatau ona fai ae sa e musumusu atu ia i latou.

Gaoioiga E Faatosina Mai Ai:

  • O le a le vaega o lou tino sa e faaaogaina e iloa ai le mea sa ou fai atu ai?

Ua avea o tatou taliga ma se faamanuiaga ia i tatou.

Pese

Ia usuina faatasi ma tamaiti pe taulotoina foi upu o fuaiupu e 1 ma le 2 o le pese: “Faafetai i lo Tatou Tama” (Tusi Pese a Tamaiti ).

Ia tatou faafetai i le Tama,

Mo mea uma ua ia foai mai.

Mata ma taliga lima ma vae,

Ofu e oofu ai faapea ma meaai.

Pese

  • O le a le mea o ta’u mai e lenei pese, ua foai mai e le Tama Faalelagi ia i tatou?

  • O le fea o nei mea e fesoasoani ia i tatou e faalogo ai? (O o tatou taliga.)

Fai atu i tamaiti e fetagofi i o latou taliga. Faamatala atu, o le vaega o o latou taliga o lo o i fafo o o latou ulu, e le o le mea lena o lo o latou faalogo ma lagona ai mea. O le vaega lenei e fesoasoani i le auina atu o le leo i totonu o o latou taliga ma oo atu ai i le talipalau o le taliga, atoa ma isi vaega o le taliga lea e fesoasoani ia i latou e lagona ai mea.

Pese

  • E mafai faapefea ona tatou faaeteete i o tatou taliga?

Faamatala atu, e tatau ona tatou puipuia o tatou taliga mai le faalogo i pa’o po o leo tetele, atoa foi ma isi mea e ono faaleagaina ai.

Faamatala atu, e tele mafuaaga ua ala ai ona faale lelei taliga o nisi tagata, ma ua le mafai ai ona latou lagona mea uma lea e mafai ona lagona ma faalogo i ai le toatele o tagata. Afai e i ai se tagata e iloa e tamaiti e faaletonu lana faalogo, ona mafai lea ona e faamalamalamaina atu le mea o lo o faaaogaina e lena tagata e faalogo ai. Faaali atu le ata 1-41, Tamaitiiti ma le Mea Faalogo Mo Ona Taliga ao e faamatalaina atu. Fesoasoani i tamaiti ia malamalama, o le tele lava o taimi, o tagata e faale lelei la latou faalogo, e faale lelei foi la latou tautala, aua e iloa e tagata ona tautala mai le faaleoina o leo o lo o lagona ma faalogo i ai.

Gaoioiga

Fai faailoga o le gagana e faaaoga ai lima mo le pese: “Ou te alofa ia te oe” (Tagai i le lesona 17.)

Gaoioiga

  • Tou te manatua le uiga o lenei mea?

Tuu atu i tamaiti latou te faia ia faailoga.

Faamanatu atu i tamaiti, o le vaiaso talu ai sa outou talanoaina ai le ala e mafai ai e lima ona tautala e ala lea i le gagana e faatino i taga po o faailoga. Ia fesoasoani foi i tamaiti ia malamalama, o tagata e le mafai ona lagona mea, e i ai isi auala e mafai ona latou fesootai ai, e pei o le gagana e faatino i faailoga, tusitusi, atoa ma le matauina lelei o laugutu o lå o lo o tautala.

Tala

Faamatala atu le tala e uiga ia Iesu ma le tagata tutuli, e pei ona i ai i le Mareko 7:32–35.

Tala

  • O le a so outou manatu i le lagona na oo i le tagata tutuli ina ua ona iloa, ua mafai ona ia lagona mea?

Ia faamamafa atu i tamaiti, e taua tele le faamanuiaga o le mafai ona faalogo.

E mafai ona tatou lagona mea i o tatou taliga.

Gaoioiga

Tau atu i tamaiti o le a latou faataitaiina ma faatinoina le faaaogaina o o latou taliga. Ia avane auaua’i tamaiti taitoatasi i luma o le vasega. Ia musumusu atu i le taliga o le tamaitiiti le igoa o se manu e masani ai po o se mea e mafai ona i ai se leo. Ia tuu atu i le tamaitiiti na te faia le leo o lea mea mo le vasega, ma ia mate ane e isi tamaiti po o le a le mea e ona lea leo. (E mafai ona aofia ai i ia leo se povi o lo o tagi, se maile o lo o ou, telefoni o lo o tatagi, po o le pu o le taavale o lo o faaee.)

Ia talanoaina faatasi ma tamaiti nisi o leo taua e mafai ona latou lagona ma faalogo i ai o latou taliga, e pei o le valaau mai a o latou matua, atoa foi ma leo o mea o lo o lapataiina mai ai i tatou e aua le latalata atu i ai nei faamanu’aina ai i tatou.

Gaoioiga

  • O a leo e sili ona outou fia faalogologo i ai?

E mafai ona tatou faalogo i aoaoga a le Tama Faalelagi ma Iesu Keriso.

Ia faanonofo filemu tamaiti ma faalogologo lelei.

  • O le a le mea o lo o outou lagona ma faalogo i ai?

Ia talanoaina leo eseese e mafai ona latou lagona, e pei o le tatala ma le tapuniina o faitotoa, tagata o lo o talanoa i le potu faafiafia, pese o lo o taina i le okeni, po o le agi a le matagi.

  • O a isi leo e mafai ona tatou lagona ma faalogo i ai i le lotu?

Faamatala atu, tatou te faalogo i o tatou faiaoga, matua, faiaoga o le Peraimeri, epikopo, atoa ma isi taitai o le lotu.

  • Aisea e taua tele ai ia i tatou le faalogo i nei tagata?

Faamatala atu, e fesoasoani nei tagata ia i tatou ia iloa mea e finagalo le Tama Faalelagi ma Iesu Keriso tatou te faia.

Tala

Faaali atu le ata 1-4, O le Uluai Faaaliga Vaaia, ma tuu atu i tamaiti e faamatala ane ia te oe mea e mafai ona latou manatua e uiga i le ata. Ia susue le Penina Tau Tele ma faitau leotele le mea na ta’u atu e le Tama Faalelagi ia Iosefa Samita, o lo o i ai i le Tala Faasolopito Iosefa Samita 1:17: “O lo’u Atalii Pele Lenei, Ia Faalogo Ia Te Ia.”

Tuu atu i tamaiti e toe faitau faatasi ma oe lea lava fuaitau pe faalua pe faatolu. Faamatala atu, e finagalo le Tama Faalelagi tatou te faalogo i mea o lo o fetalai mai ai o ia ma Iesu. Fesoasoani i tamaiti ia malamalama, e le o tagata uma e fetalai sao mai i ai le Tama Faalelagi ma Iesu, ae e mafai ona tatou faalogo i o tatou matua, faiaoga, ma taitai o le Ekalesia. E mafai ona latou tau mai ia i tatou mea e finagalo le Tama Faalelagi ma Iesu e ao ona tatou malamalama i ai.E mafai foi e le Agaga Paia ona fesoasoani mai ia i tatou ia iloa mea e finagalo le Tama Faalelagi ma Iesu e tatau ona tatou faia. Faaali atu le ata o le perofeta soifua.

Tala

  • O ai lenei tagata?

Faamatala atu, e talanoa mai le Tama Faalelagi ma Iesu ia i tatou e ala mai i taitai o le Ekalesia, aemaise lava lo tatou perofeta ma lo tatou Epikopo. O taitai nei latou te tau mai ia i tatou mea e finagalo le Tama Faalelagi ma Iesu tatou te faia. E tatau ona tatou faalogologo lelei ia i la’ua.

Molimau

Faailoa atu lau faafetai mo ou taliga atoa foi ma le meaalofa o le mafai ona faalogo.

O Isi Gaioiga E Faamauoa Ai

Filifili nisi o nei gaoioiga e faaaoga i le taimi o le lesona.

  1. Tuu atu i tamaiti e moeiini ma ufiufi o latou mata i o latou lima. Ia pa’i atu i le ulu o le tamaitiiti e toatasi. Ona tatau lea ona faapea ane lena tamaitiiti, “Ou te faafetai mo o’u taliga.” Ona mate mai lea e isi tamaiti po o le leo o ai lea na latou faalogo i ai. Ia faaauau ona faia lea gaoioiga seia tofu oo uma tamaiti i le avanoa e tautala ai.

  2. Ia fai faatasi ma tamaiti le gaoioiga o lo o i lalo e fai ai taga.

    E I Ai Lo’u Tino Manaia

    E i ai lo’u tino manaia (Tuu lima i le fatafata.)

    O le Tama o i le Lagi na ia faia

    O taliga e faalogo ai (Faaofuofu lima i taliga.)

    Ma mata e vaai ai (Tusi lima i mata.)

    O lima e lua e patipati ai (Patipati lima.)

    Ma vae e lua e feliuliuai ai (Liliu faataamilo.)

    A ou manaomia, e mafai ona ou tago

    I ou tamaitamaivae i lalo (Punou i lalo ma tago i tamatamai vae.)

    A ou mafaufau i lo’u tino (Tuu le lima i le ulu.)

    O le mea sili ona tupito (Nofo filemu i lalo.)

    O le Tama Faalelagi na ia fai

    Ina ia ou foliga i ai.

  3. Ia faasasaga uma tamaiti i le itu e tasi, a o e tu i o latou tua. Ia faapao ou lima ma avane nisi mea e fai ai ni leo, ona tuu atu lea i tamaiti e mate po o a au mea o fai o lo o sau ai ia leo po o le pa’o. E mafai ona patipati ou lima, faapao ou tamatamai lima e lua, po o le taina foi o se logo. Tuu atu i tamaiti e faataitai ona fai mai ni leo po o ni pa’o.

  4. Ia pueina i se lipine ni leo mai lo outou tuaoi, e pei o le tagi o se taifau, pesega a manu felelei po o le talie foi o ni tagata. Ia taina lena lipine i totonu o le vasega ma ia faalogologo lelei i ai tamaiti, ona latou mateina mai lea po o a ia leo.

  5. Ia aoao atu i tamaiti se pese faigofie po o se solo, ae faatino i le gagana e faaaoga ai faailoga. Afai e te iloa se tasi e atamai i le faia o ia faailoga, ona mafai lea ona e valaauina e malaga mai i le vasega ma tuu atu latou te faatino mai le pese: “O A’u O Se Atalii O Le Atua” a o usuina e tamaiti.

  6. Ia nonofo faatasi ma tamaiti i se lio. Ia musumusu atu se savali puupuu i le tamaitiiti o lo o pito mai ia te oe. Ona musumusu atu lea o le tamaitiiti lea i le isi o lo o la sosoo ma tau atu i ai le savali, ma faia pea seia soo le lio. O le tamaitiiti mulimuli lava na te tauina mai faaleotele le savali. Ia tau atu i le vasega le savali sa e tuuina atu i le tamaitiiti muamua, ina ia iloa ai le suiga ua oo i ai le savali. A mavae le gaoioiga, fai atu i ai po o le a le mea na latou faaaogaina e faalogo ai i le savali. (Taliga.) Faamanatu i ai ia latou faafetai i le Tama Faalelagi mo o latou taliga.

Gaoioiga Faaopoopo Mo Tamaiti Laiti

  1. Afai e mafai, ia ave tamaiti i fafo. Ia uunaia i latou e faalogologo lelei o latou taliga. O a leo na mafai ona outou faalogo i ai? A oo ina outou toe fo’i i totonu o le potu, ona iloiloina lea o leo na latou faalogo i ai.

  2. Ia faatūtū i luga tamaiti ma fai le solo o lo o i lalo, ma faia taga e pei ona ta’ua i upu:

    Tago I Mata

    Tago i mata,

    Tago i le isu,

    Tago i taliga,

    Tago i tamatamai vae.

    Faaloloa ou lima

    I luga lava,

    Faamaualuga atu

    Agai i le lagi.

    Tuu ou lima,

    I luga o lou ulu,

    Nofo filemu i lalo,

    I lou nofoaga.