Tusi Lesona ma le Taimi o Fetufaaiga a le Peraimeri
Lesona 31: Ou Te Faafetai Mo Lo’u Nofoaga

Lesona 31

Ou Te Faafetai Mo Lo’u Nofoaga

Faamoemoega

Ia faamalosia tamaiti taitoatasi ia maua le agaga faafetai mo le mea o lo o nofo ai ma ia fesoasoani e tausia lelei.

Sauniuniga

  1. Ia aoao ma le agaga tatalo le 1 Nifae 2:2-6; 17:7-8; ma le 18:6, 23.

  2. O Mea e faaaogaina:

    1. O se Tusi a Mamona

    2. O se apa o lo o i ai ni vai, o se apa o lo o i ai ni palapala, ma se lala laau laitiiti. Afai e te manao ai, aumai ni ata o se vaituloto, palapala ma se laau.

    3. Pepa ma peni vali po o penitala.

    4. Ata 1-60, O Liae ma Lona Aiga Ina Ua Taunuu i le Nuu Na Folafolaina (Taga o Ata o le Talalelei 304;62045); ata 1-61, O Le Malaga Mai Navu (Taga o Ata o le Talalelei 410; 62493).

    5. Ia faia sauniuniga e talafeagai ai mo so o se Gaoioiga E Faamauoa Ai e te manao e faaaoga.

Gaoioiga E Aoao Ai

Tofi se tamaitiiti e faia le tatalo amata.

Gaoioiga e Faatosina Mai Ai:

Faaali atu le apa po o le ata o vai ma fesili i tamaiti po o a iniseti po o meaola e fai i le vai mea e nonofo ai. Fesoasoani i tamaiti ia tele ni mea e mafaufau i ai. Faaali atu le palapala ona faaali atu ai lea o le lala laau, ma fesoasoani i tamaiti e mafaufau i meaola ma iniseti e faia mea e nonofo ai i le eleele ma luga o laau.

Gaoioiga e Faatosina Mai Ai:

  • O le a sou mafaufau pe ana fai o lou nofoaga e i totonu o le vai?

  • Faamata o le a se mea e tupu pe ana faapea o lou nofoaga e i luga o se laau?

E tele ituaiga o mea e nonofo ai

Faamalamalama atu o manu ma iniseti e nonofo i ituaiga nofoaga eseese. E oo foi i tagata e eseese ituaiga nofoaga e nonofo ai.

Tala

Faaali atu le ata 1-60, O Liae ma Lona Aiga Ina Ua Taunuu i le Nuu Na Folafolaina, ma faaali atu le Tusi a Mamona a o e faamatala atu e uiga ia Liae ma lona aiga ma ituaiga nofoaga sa nonofo ai (tagai i le 1Nifae 2:2-6; 17:7-8; ma le 18:6, 23). Sa i ai se fale manaia o Liae ma lona aiga i Ierusalema, ae peitai, ina ua faatonuina i latou e le Alii e tuua Ierusalema, sa latou faimalaga loa i le toafa ma nonofo i faleie. Ina ua mavae le tele o tausaga, sa faatonuina e le Alii ia Nifae, le atalii o Liae, e fau se vaa. Sa nonofo Liae ma lona aiga i le vaa a o faimalaga atu i le nuu na folafolaina, o se nofoaga sa saunia e le Tama Faalelagi ma Iesu mo latou e mau ai. Ina ua latou taunuu atu i le nuu na folafolaina, sa toe nonofo Liae ma lona aiga i faleie seia oo ina mafai ona latou fausia nisi fale tumau.

Tala

  • O a ituaiga nofoaga eseese sa nonofo ai Liae ma lona aiga?

Tala

Faaali le ata 1-61, O Le Malaga Mai Navu. Faamatala e uiga i uluai uso o le Ekalesia o e sa latou fausia le aai e taua o Navu. Sa latou galulue malosi e fausia o latou fale ma se malumalu matagofie. Ae peitai, sa i ai nisi tagata i le talafatai o Navu sa le fiafia i tagata o le Ekalesia ma sa latou tutulieseina faamalosi i latou. Sa faimalaga tagata o le Ekalesia ma ni nai mea laiti sa mafai ona ofi i taavale solofanua e tapunipuni. Talu ai e laitī taavale solofanua tapunipuni, o le tele o tamaiti sa tuua a latou mea taalo. O nisi o tagata sa nonofo i taavale solofanua e tapunipuni ma faleie mo se taimi umi lava.

Tala

  • Aisea e faigata ai ona nonofo i se taavale solofanua tapunipuni po o se faleie?

Gaoioiga

Faatutu i luga tamaiti ma faitau le fuaiupu lea ma fai taga:

O tamaiti paionia sa savavali ma talatalanoa (savavali i tulaga);

Sa latou taaalo ma tafue ma musa faasoloatoa (musamusa ma osooso i le tulaga).

Ina ua oo mai le po, sa fepulafi fetu ma feilafi mai (tapuni ma tatala lima);

O totonu o taavale solofanua e momoe ai ma fai ai a latou miti (moeiini mata, ae faataoto le ulu i luga o lima).

O le mea e nonofo ai o se nofoaga e alofagia ai i tatou

Faamatala e le taua po o a ituaiga fale tatou te nonofo ai. Atonu tatou te nonofo i se fale tele, se faleoo, se fale totogi, se faleie, po o se vaa. O le mea taua, o o tatou fale o ni nofoaga e maua ai le alofa i tagata o le aiga, o le tasi i le isi. Faamatala atu e uiga i lou lava fale ma mea e te faia ina ia avea o se nofoaga fiafia.

  • Aisea e te manao ai ia e i ai i lou fale?

  • E faapefea ona e iloa e alolofa lou aiga ia te oe?

  • Ua i ai se aso ua e moe ese ai mai lou aiga?

  • O fea sa e moe ai?

  • O le a sou lagona ina ua e toe foi mai i lou aiga?

Faamanatu i tamaiti le lelei o le toe foi mai i o latou aiga ma o latou lava moega.

Pese

Faatutu i luga tamaiti ma faalogologo a o e faia upu o le pese “Aiga” (Children’s Songbook, p. 192). Fai i tamaiti e fusi e le tagata ia lava i so o se taimi e faalogo ai i le upu aiga. Afai e te manao ai, toe faitau le fuaiupu ma fai i tamaiti e usu pe fai faatasi ma oe upu.

O le aiga o le mea lea e te faananau i ai

O le alofa ma le filemu e fusia ai

O le aiga e i ai le mafanafana, ae lio e lima alofa

E aofia ai tagata uma o le aiga atoa.

(Copyright © 1975 by Sonos Music, Orem, Utah. All rights reserved. Used by permission.)

E mafai ona tatou fesoasoani i o tatou aiga e tausia lelei o tatou fale

Faamatala atu e tatau ona tatou tausia lelei o tatou fale ina ia avea ma nofoaga lelei e nonofo ai. E tatau i uso taitasi o le aiga ona fesoasoani e tausia ma faamama le fale.

Gaoioiga

Fai i tamaiti e faatino i taga e aunoa ma se leo nisi o mea e mafai ona latou faia e fesoasoani ai i le tausia o o latou fale ia manaia ma mama, e pei o le faaputuputuina ma teu mea taalo, saluina o le otaota, ma le gaugauina ma teu lavalava.

Valaaulia tamaiti e auauai mai i luga ma tutu i ou tafatafa. Faamalamalama i tamaiti taitoatasi se tulaga e mafai ai ona avea o ia ma se fesoasoani lelei i le fale. Fesili i le tamaitiiti pe o le a se mea na te faia e fesoasoani ai i lea tulaga. Faaaoga faataitaiga o lo o i lalo pe fai lava ni au gaoioiga e fetaui ma tamaiti o le vasega.

Gaoioiga

  • Ua masaa faafuasei ia te oe se ipu vai i luga o le fola o le fale. O le a se mea e tatau ona e faia?

  • Sa e taalo i au poloka i le aoauli atoa. Ua oo mai nei le taimi e aai ai. O le a se mea e tatau ona e faia i au poloka?

  • O lo o pisi lava lou tina i le tau tapenaina o le aiga o le afiafi i luga o le laulau. O lo o ia manaomia se tasi na te setiina le laulau a o le i aai le aiga. O le a se mea e mafai ona e faia?

  • Ua uma ona tatā ou ofu ma gaugau. O le a se mea e tatau ona e faia i ai?

  • Sa e taalo i fafo ma ua palapala uma ou seevae. O le a se mea e tatau ona e faia ae e te le i sau i totonu o le fale?

  • Ua gaogaosa solo lou moega ina ua e ala i le taeao. O le a se mea e tatau ona e faia i ai?

Uunai tamaiti e talanoa e uiga i mea latou te faia e fesoasoani ai i le tausia mama lelei o o latou fale. Faamatala i tamaiti pe faapefea ona e galue e tausia mama lelei lou fale.

Gaoioiga

Tufa pepa ma penivali po o penitala ma fai i tamaiti e tusi se ata o se mea o le a na faia i le vaiaso e fesoasoani ai i le fale. Ia tusia i ata taitasi upu ia, Ua tumu au i le agaga faafetai mo lou fale.

Molimau

Faamatala atu ou lagona e uiga i lou fale ma faaali atu lou agaga faafetai i le Tama Faalelagi ma Iesu mo le faamanuiaina o oe i se nofoaga e te nofo ai.

O Isi Gaoioiga E Faamauoa Ai

Filifili nisi o nei gaoioiga e faaaoga i le taimi o le lesona.

  1. Aumai i se taga ni nai mea e masani ona faaaoga i le fale (pe tofu le tamaitiiti ma ia mea). Ia tofu le tamaitiiti ma le mea e tasi e filifili mai i totonu o le taga ma faamatala pe faapefea ona faaaoga lena mea a o e fesoasoani i le fale. Mo se faataitaiga, e mafai ona faaaoga se fasi ieie e solo ai le pefu pe solo ai foi ipu, e mafai ona faaaoga se sipuni mo se taumafataga, e mafai foi ona teu se mea taalo pe a faamama se potu.

  2. Usu pe tauloto upu o le pese “Mea Malie E Fai” (Tusi Pese a Tamaiti), faaaoga ai fasi fuaiupu e pei o le “E malie le teu o le moega” po o le “E malie le seti o le laulau” a o faatinoina le gaoioiga.

  3. Lolomi ata o lima o tamaiti taitasi i luga o se fasipepa e ave i le fale. Faaigoa pepa taitasi, E i ai ou lima fesoasoani. Talanoa e uiga i mea e mafai e lima o tamaiti ona fai e fesoasoani ai.

  4. Fai i tamaiti e manatu faapea o o latou nofoa o ni taavale solofanua tapunipuni. Tulei o latou nofoa i se lio e pei ona faia e paionia i po ina ia puipuia i latou mai tagata leaga ma manu feai. Fai i ai e faatino taga o le faiga o se afi o le tolauapiga ma le kukaina o le aiga o le afiafi, pepese ma sisiva pe a uma le meaai o le po, ma feaei i totonu o taavale solofanua (nofoa) e momoe.

  5. Aumai ata o ni ituaiga fale eseese, pe tusia foi ata i luga o le laupapa po o se fasi pepa. Talanoaina ma tamaiti po o a mea o lo o faia ai fale taitasi ma pe faapefea foi pe afai ae nonofo ai. E lelei foi le faaopoopo i ai ma se faleie, se fale e fau i poloka aisa malo (igloo), se maota o se tupu, se potu (o se vaa), ma se faleoo.

Gaoioiga Faaopoopo Mo Tamaiti Laiti

  1. Usu pe tauloto upu o le pese “Pe a Tatou Fesoasoani” (Tusi Pese a Tamaiti). Fai i tamaiti e fai taga o mea e mafai ona latou faia e fesoasoani ai i le fale.

  2. Fesoasoani i tamaiti e fai taga o le tala lea e faaaoga ai tamatamai lima:

    O tamatamai lima pisi laiti (tuu i luga se moto),

    O ai e fesoasoani mai ina ia tatou usiusitai?

    “O au.” “O au.” “O au.” “O au.” “O au.” (Ia auauai i luga tamatami lima pe a fai le “O au” seia uma i luga tamatamai lima),

    O le tali mai lea a tamatamai lima pisi.