Ou Te Alofa I Lo’u Aiga Atoa

Faamoemoega

Ia fesoasoani i tamaiti taitoatasi ia maua le lagona alofa mo tagata uma o lona aiga.

Sauniuniga

Ia suesue ma le agaga tatalo le Luka 1:36–44, 56.
O Mea e faaaogaina:
1. O se Tusi Paia
2. Ata 1-7, O Se Aiga Agaalofa; ata 1-18, O Ioane le Papatiso O Lo o Papatisoina Iesu (Taga Ata o le Talalelei 208, 62133); ata 1-54, O le Malumalu I Sate Leki (Taga Ata o le Talalelei 502; 62433), po o se ata o se malumalu i lo outou atunuu.
Ia faia sauniuniga e talafeagai ai mo so o se Gaoioiga E Faamauoa ai e te manao e faaaoga.

Gaoioiga E Aoao Mai Ai

Tofi se tamaitiiti e faia le tatalo amata.

Gaoioiga e Faatosina Mai Ai:

Usu faatasi ma tamaiti le pese “O Se Aiga Fiafia” (Tusi Pese a Tamaiti)

Ou te alofa ia tina, faapea foi ma tama.
Fealofani matou uma, matou o se aiga fiafia.
Ou te alofa i ou uso, tuafafine po o tuagane,
Fealofani matou uma, matou o se aiga fiafia.

Tuu le avanoa i tamaiti e talanoa ai i mea sa latou faia ma o latou aiga i le vaiaso ua te’a. Ia taitoatasi le tamaitiiti ma tau mai se igoa o se tagata o lona aiga e pei o le tama, tina, uso, po o se tuafafine.

Gaoioiga e Faatosina Mai Ai:

O ai isi vaega o lou aiga?

O matua o matua, uso o tina po o tuafafine o tama, uso o tama po o tuagane o tina, fanau a uso ma tuagane o le tina, po o fanau a uso ma tuafafine o le tama o ni vaega taua o o tatou aiga

Faaali atu ata 1-7, O Se Aiga E I Ai Le Alofa.

E faapefea ona tutusa lenei aiga ma lou aiga?
E faapefea ona eseese lenei aiga ma lou aiga?
O le fea o nei tagata o lo o i le ata o le tina matua ma le tama matua?

Faamatala atu o tama matutua ma tina matutua, o matua ia o o tatou matua. E tofu uma i tatou ma tama ma tina matutua, e ui lava o nisi taimi tatou te le iloa lelei i latou talu ai ua maliliu po o le mamao foi o le mea e nonofo ai.

E toafia outou e iloa o outou tama ma tina matutua?
E nonofo latalata atu o outou tama ma tina matutua ia te outou pe nonofo mamao?
O le a se mea tou te mananao e fai faatasi ma i latou?

Gaoioiga

Fai upu o fuaiupu muamua e lua o le pese: “Tina matua” (Children’s Songbook, p.200), ma faaaoga ai taga nei: Toe fai pe a manaomia, faaaoga le igoa tama matua e sui ai le upu tina matua i le laina mulimuli o fuaiupu taitasi.

E te aumaia se kisi mo a’u (tuu tamatamailima i laugutu, ma toe ave ese)
E te opoopo mai foi ia te a’u (fusi atu ou lima ia te oe).
E te soisoi pe a e vaai mai (ataata)
Maimau pe ana tofu tamaiti uma i lenei atulaulau (tatala i tua lima)
Ma se tina matua e pei o oe le alofa naunau(tusi le lima).

E te faitau mai ia te a’u se tusi (faafoliga o lo o e faitau se tusi)
E te usu mai foi se pese (faamaga le gutu e pei o la e pese).
E te musumusu mai foi e te alofa ia te a’u (faaofuofu lima i le gutu).
Maimau pe ana tofu tamaiti uma i lenei atulaulau (tatala i tua lima)
Ma se tina matua e pei o oe le alofa naunau(tusi le lima).

Gaoioiga

O ai isi tagata e i ai i o outou aiga? (uso o le tina po o tuafafine o le tama, uso o le tama po o tuagane o le tina, ma fanau a uso ma tuagane/tuafafine o le tina ma le tama)

Tuu atu i tamaiti se i faamatala mai uso o o latou tina, tuafafine o o latou tama, uso o tama po o tuagane o tina, ma fanau a uso ma tuagane o tina, po o fanau a uso ma tuafafine o tama. (aunts, uncles, and cousins).

Tala

Faaali atu le Tusi Paia ma faamanatu i tamaiti e mafai ona tatou faitau e uiga i le soifuaga o Iesu i lenei tusi. Su’e le Luka 1:36–44, 56 ma faamatala atu a o lei fanau mai Iesu, sa asiasi atu Maria ia Elisapeta, le tama a le uso o lona tina, lea foi o lo o faatalitali i le fanau mai o sana pepe. Sa faaigoaina le pepe a Elisapeta o Ioane, ma e tausoga o ia ma Iesu ma o se uo foi. Ina ua matutua Ioane ma Iesu, sa papatisoina e Ioane ia Iesu. Faaali atu le ata 1-8, O Ioane le Papatiso O Lo o Papatisoina Iesu, ma fai i tamaiti e faasino mai Iesu ma Ioane.

O tagata o le aiga o a tatou uo lelei

Faamatala e mafai ona avea tagata o o tatou aiga ma a tatou uo lelei. Afai o i ai se tagata o lo outou aiga e te vavalalata i ai, ta’u i tamaiti ou lagona i lena tagata.

Aisea e te manao ai e te faatasi ma lou aiga?

Toe usu faatasi ma tamaiti le pese “O se Aiga Fiafia”. O le taimi lenei tuu i ai ma ni fuaiupu mo le uso o le tina, tuafafine o le tama, tuagane o le tina, uso o le tama, tausoga, ma matua o matua.

O a ni mea tou te faia faatasi ma tuafafine o lou tama po o uso o lou tina, uso o lou tama po o tuagane o lou tina, tausoga ma matua o ou matua?

Faamatala i tamaiti e uiga i se tuufaatasiga po o se taimi na potopoto faatasi ai lo outou aiga mo se tulaga faapitoa. Tuu le avanoa i tamaiti e faamatala ai ni fiafia po ni talatalanoaga a o latou aiga o lo o latou manatuaina.

Faamalamalama atu sa fuafuaina e le Tama Faalelagi ma Iesu Keriso ina ia tatou faatasi ma o tatou aiga e faavavau. Faaali atu le ata 1-54, O Le Malumalu i Sate Leki, po o se ata o se malumalu o lo outou atunuu. Faamatala otooto atu pe afai tatou te faaipoipo i le malumalu ma ola amiotonu, e mafai ona tatou toe mau faatasi ma o tatou aiga e faavavau.

Molimau

Faamatala atu i tamaiti lou alofa i tagata o lou aiga. Faamamafa atu i ai o aiga o ni faamanuiaga mo i tatou. Uunai tamaiti ia alolofa ma agalelei i tagata o o latou aiga.

O Isi Gaoioiga E Faamauoa Ai

Filifili nisi o nei gaoioiga e faaaoga i le taimi o le lesona.

Valaaulia se tama po o se tina matua o se tasi o tamaiti, po o se isi i le uarota e i ai se tama po o se tina matua, e asiasi atu i le vasega, ae ia mautinoa ua faatagaina mai e le peresitene o le Peraimeri. Fai atu i le ua valaaulia e faamatala i tamaiti lona alofa i fanau a ana fanau. (Pe valaaulia foi se uso o se tina, tuafafine o se tama, uso o se tama po o se tuagane o se tina, po o se tausoga o se tasi o tamaiti e tuuina atu se tautalaga e uiga i le alofa mo tagata uma o le aiga.)
Aumai se ata se tasi po o le sili atu foi o lou aiga, aemaise lava ata o lo o i ai ma tina ma tama matutua, uso o tina, tuafafine o tama, uso o tama po o tuagane o tina, ma tausoga. Fai i tamaiti e faasino mai oe po o se isi latou te iloa (pei o lou toalua po o lau fanau) i le ata. Faamatala i tamaiti e uiga i isi tagata o lo o i le ata.
Tufa i tamaiti taitoatasi se pine o lo o i ai se igoa o se tagata o le aiga, e pei o le “Tina,” “Tama,” “Tuagane,” “Uso,” “Tina Matua,” “Tama Matua,” “Tuagane o le Tina,” “Uso o le Tama,” “Uso o le Tina,” “Tuafafine o le Tama,” po o le “Tausoga.” (Afai e na o ni nai tamaiti toaitiiti e i ai i lau vasega, faaaoga na o nisi o nei igoa; ae afai e toatele tamaiti i lau vasega, e mafai ona faaaogaina le igoa e tasi e tamaiti e toalua po o le sili atu foi.) Ia o mai tamaiti ta’itoatasi i luma o le vasega pe a e tauina le igoa o lo o i lana pine. Faamatala atu e taua aiga ma e tatau ona faatasia. Ia faia e tamaiti se lio ma uu lima. Faatonu i latou e faia ni taga eseese a o uu lima, e pei o le suigi o o latou lima, savavali faataamilomilo, po o le usuina foi o le pese “O Se Aiga Fiafia.”
Ia tusia e tamaiti taitoatasi se ata o matua o ou matua po o isi tagata o le aiga. Ia faaigoaina le ata O Matua o Ou Matua po o so o se igoa lava e fetaui lelei.

O Gaoioiga Faaopoopo Mo Tamaiti Laiti

Fai se pusa po o se taga ma tuu ai i ona luga se ata o se fatu o se faatusa o le alofa. Oti ni ata faigofie po o ni ata tusi o ni faatusa o tausoga vavalalata o aiga. Fesili i tamaiti, “O ai e alofa ia te outou?” A tali mai tamaiti, tuu le ata fetaui i totonu o le pusa po o le taga. A uma loa ata i totonu uu loa i luga le pusa po o le taga ma fai i tamaiti, “E alolofa tele nei tagata uma ia te outou.”
Fola ata tipitipi o tagata o aiga (vaai le gaoioiga 1 o lo o i luga) i luga o le laulau po o le fola o le fale. Faafaasaga i tua tamaiti pe moeiini foi o latou mata a o e toeseina se ata tipitipi se tasi. Tuu i tamaiti e mate po o ai lea ua misi. Pule oe pe fai faafia. Toe tuu faatasi ata tipitipi ma tau atu i tamaiti e finagalo le Tama Faalelagi ina ia toe faatasi aiga ma ia, a ia aua ne’i misi se tasi.
Usu le pese “Pe a Tatou Fesoasoani” (Tusi Pese a Tamaiti) e faaaoga ai igoa o tagata o le aiga lautele e sui ai le tina. Fai i tamaiti e faia taga le leoa o mea e mafai ona latou fai e fesoasoani ai i tagata nei o o latou aiga.