Tusi Lesona ma le Taimi o Fetufaaiga a le Peraimeri
Lesona 29: E Mafai Ona Ou Fai Atu Ua Ou Sese

Lesona 29

E Mafai Ona Ou Fai Atu Ua Ou Sese

Faamoemoega

Ia fesoasoani ina ia malamalama tamaiti taitoatasi, afai tatou te faia se mea sese, e tatau ona tatou faapea atu ua tatou sese ma taumafai e faasao le mea sese ua tatou faia.

Sauniuniga

  1. Ia aoao ma le agaga tatalo le Mosaea 27:8–37.

  2. O Mea e faaaogaina:

    1. O se Tusi a Mamona.

    2. O se mea taalo laitiiti e mafai ona ofi i totonu o se taga o se ofu.

  3. Ia faia sauniuniga e talafeagai ai mo so o se Gaoioiga E Faamauoa Ai e te manao e faaaoga.

Gaoioiga E Aoao Ai

Tofi se tamaitiiti e faia le tatalo amata.

Gaoioiga e Faatosina Mai Ai:

A o ulufale mai tamaiti pe faapotopoto mai mo le lesona, ia fai fuafua lelei ni mea sese i le faatulagaina o le potu aoga po o le sauniuniga mo le lesona. Pe ete—

Gaoioiga e Faatosina Mai Ai:

  • Faapau se mea i le fola o le fale.

  • Faatu se nofoa ma le papatua o lo o faasaga mai i luma.

  • Faaali atu se ata ae faasaga i luga le pito i lalo.

  • Amata ona tusi se upu po o se ata i luga o le laupapa po o se fasi pepa ona toe tape lea.

A uma ona fai taitasi o nei mea sese, ona e fai atu lea, “Faamolemole ua ou sese; E sese le mea ua ou faia.” Ona faasao lea o le mea ua sese.

Fesili i tamaiti pe na latou maitauina au mea sese uma sa faia. Faamanino atu e tofu lava le tagata ma le mea sese na te fai.

O nisi o taimi tatou te faia mea e sese

Faamalamalama atu a o tatou tutupu ae ma aoao e filifili le mea sao, o nisi o taimi e sese ai a tatou filifiliga. O nei mea e le na o ni mea sese e pei o le fefaaua’i o se ata; o taimi ia pe a tatou faia se mea e sese, o se mea e le finagalo lo tatou Tama Faalelagi ma Iesu ma o tatou matua tatou te faia. Pe a tatou faia ni filifiliga sese, o le a avea foi i tatou ma ni tagata le fiafia.

Tala:

Faamatala i au lava upu le tala lea, faaaoga se mea taalo laitiiti e faatino ai:

Sa malie lava le taaalo o Talavisi ma Mati i le fale o Mati. Sa fiafia lava Talavisi i mea taalo a Mati ma sa ia moomoo maimau pe ana o ni ana mea. Sa tonu ia Talavisi o le a na aveina nisi o mea taalo na te faaaogaina, ma sa ia tuuina loa i totonu o lana taga e aunoa ma le faanoi ia Mati.

A o taalo Talavisi i nei mea taalo i lona aiga, sa leai se malie. Sa fesili lona tina pe aisea ua le fiafia ai. Sa tau atu e Talavisi i lona tina, sa na ia aumaia mea taalo a Mati e aunoa ma lona faanoi atu ia te ia, ma o lea ua lagona ai lava lona faanoanoa.

Sa tau atu e le tina o Talavisi ia te ia e le o se mea sao le aveina o se mea a se tasi tagata. Sa ia fesili ia Talavisi pe o le a se mea e tatau ona ia faia ina ia faasao ai lana filifiliga sese. Sa manao Talavisi e toe faafoi mea taalo, ae peitai, sa fefe ina nei ita ia Mati ia te ia. Sa fai atu le tina o Talavisi, e tusa lava pe ita Mati, ae o le toe faafoiina atu o mea taalo o le mea sao lea e tatau ona fai. Sa ia fai atu foi ia Talavisi, o lona fai atu ia Mati faamolemole o ia ua sese, o le a aveeseina ai le lagona le fiafia ua ia te ia talu ai se mea sese ua ia faia.

Sa toe faafoi e Talavisi mea taalo ia Mati. Sa ia fai atu ua sese o ia i lona aveina o mea taalo e aunoa ma se faanoi ma na te folafolaina atu na te le toe faia lava. Sa fiafia lava Mati ina ua toe faafoi mai e Talavisi ana mea taalo. Sa fiafia foi Talavisi ina ua ia tau le sao ma toe faasao lana filifiliga sese (na sii mai ia Pat Graham, “Travis Repents,” Friend, Mar. 1987, pp.40-41).

Tala:

  • O le a le mea a Talavisi na fai na sese?

  • O le a se lagona na oo ia Talavisi ina ua ia aveina mea taalo a Mati?

Faamatala atu a tatou faia ni mea sese, tatou te lagona le faanoanoa. O se tasi nei o auala e fesoasoani mai ai le Tama Faalelagi ina ia tatou iloa ua tatou faia se mea sese.

Tala:

  • O le a le mea na faia e Talavisi ina ia aveesea ai le lagona faanoanoa?

  • O le a se lagona o Talavisi ina ua ia toe faafoi mea taalo a Mati ma fai atu o ia ua sese?

E tatau ona tatou fai atu ua tatou sese

  • O a ni ou lagona pe a e faia se mea sese?

  • O le a se mea e mafai ona e faia e aveese ai le lagona le fiafia?

Fesoasoani i tamaiti ia malamalama, afai e iloa e se tasi ua na faia se mea sese, e tatau ona ia faaali atu. Ona ia fai atu lea “Ua ou sese.” E tatau foi ona tatou taumafai e faasao mea sese sa tatou faia ma folafola atu tatou te le toe faia.

Gaoioiga:

Faatutu tamaiti i luga ma fai faatasi ma oe taga o le fuaiupu lea:

A ou faia se mea sese (lulu le tamatamai lima mai le tasi itu i le isi itu),

Ou te fai atu “Ua ou sese”

Ou te lagona le matua le fiafia (toso i lalo si’ugutu i ou tamatamai lima, ia foli ga faauu)

Ona o le mea na ou fai i le aso.

O le a ou faia le mea sili (tuu lima i puimanava ma lue i luga ma lalo le ulu);

O le a ou taumafai malosi.

O le a ou fiafia (ataata)

Pe a ou faia le mea sao (piilima ma luelue le ulu).

E tatau ona tatou faia le mea sili e faasao ai le sese

Tala

Faaali i tamaiti le Tusi a Mamona. Faamatala i ai o le Tusi a Mamona o lo o tau mai ai se tagata sa faia se mea sese.

Tatala le Tusi a Mamona ma faamatala le tala ia Alema, e pei ona maua i le Mosaea 27:8–37. Faamatala atu sa le faalogo Alema i lona tama. Sa ia le usitai i le Tama Faalelagi ma Iesu. E tele mea sese na ia faia. Sa ia tau atu i tagata mea sese. Sa ia tau atu i tagata mea e le sa’o e uiga i le Ekalesia. E toatele tagata sa talitonu ia te ia ma o lea sa le faalogo ai i taitai o le Ekalesia.

Faamatala atu sa suia Alema mai lona faia o mea sese i le faia o mea sao. Sa ia taumafai e faasao mea sese sa ia faia e ala i lona aoaoina atu lea o le mea moni i tagata.

Tala

  • O le a sou manatu i se lagona o Alema ina ua ia iloaina e sese mea sa ia faia? (Tagai i le Mosaea 27:29.)

  • Na faapefea ona taumafai Alema e faasao mea sese na ia faia? (tagai i le Mosaea 29:32, 35:36.)

  • O le a sou manatu i se lagona o Alema ina ua amata ona ia aoaoina atu le mea moni i tagata?

  • Pe a e faia se mea sese, aisea e tatau ai ona e taumafai e faasao?

Faamatala atu se mea faatauvaa na e oo i ai ma sa e tau atu ai o oe ua e sese. Faamatala i tamaiti ou lagona ma pe na faapefea foi ona e taumafai e faasao le mea sese sa fai.

Toe faamanatu mea e tatau ona tatou faia pe a tatou iloa ua sese se mea sa tatou faia:

Tala

  1. Faaali atu ua sese se mea na tatou faia.

  2. Fai atu “Ua ou sese.”

  3. Folafola atu e le toe faia.

  4. Ia fai le mea sili e faasao ai le mea sese sa faia.

Faamalamalama atu o nei vaega uma ua taua o le salamo. E fiafia le Tama Faalelagi ma Iesu pe a tatou salamo i mea sese tatou te faia.

Ia talanoaina e tamaiti pe mafai faapefea ona tatou mulimuli i nei vaega o le salamo i tulaga o lo o taua i lalo:

Tala

  • O le a le mea e tatau ona e faia pe a fai sa e aveina se mea a se isi tagata?

  • O le a le mea e tatau ona e faia pe a fai sa e faia se faamatalaga le lelei i se isi tagata?

  • O le a le mea e tatau ona e faia pe a fai e te le i tautala sao i ou matua?

  • O le a le mea e tatau ona e fai pe a fai na e tuleiina se isi i lalo?

Molimau:

Faaali atu lau molimau e alolofa le Tama Faalelagi ma Iesu ia te i tatou tusa lava pe tatou te faia mea sese. Faamatala i tamaiti e te iloa o le a tatou fiafia pe a tatou fai atu ua tatou sese mo mea sese ua tatou faia, ma, pe a fai tatou te taumafai e aua nei toe faia lea mea sese.

O Isi Gaoioiga E Faamauoa Ai

Filifili nisi o nei gaioiga e faaaoga i le taimi o le lesona.

  1. Tufa ia tofu le tamaitiiti ma le fasi kelei po o se paluga falaoa taalo. Faasino i tamaiti le oloina o le kelei po o le paluga i se polo ona faamafolafola ai lea. Fesoasoani ia i latou e fai se foliga fiafia i le kelei po o le paluga e faamanatu atu ai ia te i latou afai latou te fai atu “Ua ou sese” o le a maua lagona fiafia. (E mafai ona maua le fua o le paluga i le itulau xv o lenei tusi lesona.)

  2. Tufa ia tofu le tamaitiiti ma le fasi pepa ma se vali po o se penitala. Fai i tamaiti e tusi se foliga fiafia. Faaigoa le ata E Mafai Ona Ou Fiafia Pe A Ou Fai Atu Ua Ou Sese.

  3. Usu pe tauloto upu o le pese “Ou Te Fia Ola I Le Talalelei” (Tusi Pese a Tamaiti).

Gaoioiga Faaopoopo Mo Tamaiti Laiti

  1. “Fai o se mea na tupu faafuase’i” sasaa se pusa peni vali po o nisi mea laiti i luga o le fola o le fale. Fai i tamaiti ua e sese ua e sasaaina peni vali, ona e fesili lea pe o le a se mea e tatau ona e fai ina ia faaleleia ai lea tulaga. A o e tago e faamama, fai i tamaiti o le a e fiafia pe a toe lelei ma mama le fola o le fale. Valaau atu i tamaiti e fesoasoani atu mo le faamamaina.

    Faamalamalama atu o nisi o taimi tatou te faia mea e faanoanoa ai i tatou po o nisi foi tagata. Afai e tupu lea mea, e tatau ona tatou fai atu, “Ua ou sese” ma taumafai e toe faaleleia. Faafetai i tamaiti mo le fesoasoani atu ia te oe e faamama le fola o le fale, ma faamanatu i ai, latou te fiafia foi pe a latou fesoasoani i isi.

  2. Usu pe tauloto upu o le pese “Fetalai Mai Iesu E Alofa Atu I Tagata Uma” (Tusi Pese a Tamaiti)

  3. Fai se upu faigata e tau e tamaiti, e pei o le “hipopotamusi.” Faamatala i ai o nisi taimi e faigata ona tau nisi upu. Faamatala i ai atonu e faigata ona fai atu “Ua ou sese” pe a tatou faia se mea sese. Faamalamalama i ai e tusa lava pe faigata ona fai le upu “Ua ou sese”, e mafai ona fesoasoani e liua ai ni lagona faanoanoa i ni uiga fiafia.

  4. Faamatala se tala puupuu e uiga i ni tamaiti se toalua sa taaalo faatasi. Ina ua feto’ai i laua, sa faapea atu le tamaitiiti muamua, “Ua ou sese” ma taumafai e fesoasoani i le ua tiga ina ia toe fiafia. Ia faaopoopo i ai sa liua foi se lagona faanoanoa i le fiafia. Atonu e te manao e faaaoga le Foliga Fiafia/Faauu mai le lesona 21. Fai i se tamaitiiti e uu le ata ma feliuliuai e faaali atu ai lagona o tamaiti i le tala.