O Musika Ou Te Fiafia I Ai

Faamoemoega

Ia fesoasoani ia malamalama tamaiti taitoatasi e mafai ona fesoasoani musika lelei e faafiafia ai i tatou ma faamanatu mai ai ia te i tatou le Tama Faalelagi ma Iesu.

Sauniuniga

Ia aoao ma le agaga tatalo le 1 Samuelu 16:19–23; Eteru 6:2–12; ma le Mataupu Faavae ma Feagaiga 25:12.
O Mea e faaaogaina:
1. Se Tusi Paia, Tusi a Mamona, ma se kopi o le Mataupu Faavae ma Feagaiga.
2. Ata 1-61, O le Malaga mai Navu (Taga o Ata o le Talalelei 410;62493); ata 1-68, O Tavita o lo o Taina le Napeli mo Saulo; ata 1-69, O Vaa o Sa Iaretō.
Ia faia sauniuniga talafeagai mo Gaoioiga E Faamauoa Ai e te manao e faaaoga.

Faaaliga i le faiaoga: Atonu e te manao e valaaulia le taitai musika o le Peraimeri e fesoasoani ia te oe i lenei lesona.

Gaoioiga e Aoao ai

Tofi se tamaitiiti e faia le tatalo amata.

Gaoioiga E Faatosina Mai Ai:

Ia fai se li’o e tamaiti ma usu faatele le pese “Afai Ua E fiafia” (Tusi Pese a Tamaiti), faaaoga fasi fuaitau e pei o le “pati ou lima,” “tātā tama’ivae,” ma emoemo ou mata.” Fai ni taga e pei ona taua i le pese.

Afai ua e fiafia pati ou lima.
Afai ua e fiafia pati ou lima.
Afai ua e fiafia e iloa i ou foliga,
Afai ua e fiafia pati ou lima.

Gaoioiga E Faatosina Mai Ai:

O le a se tou faalogona ina ua outou usuina lenei pese?

E mafai ona fesoasoani se pese lelei e faafiafia ai i tatou

Faamalamalama o musika malie, fiafia, ma le manaia e mafai ona fesoasoani tatou te maua ai lagona lelei. A tatou faanoanoa, feita, pe fefefe, e mafai ona tatou toe maua lagona fiafia i musika lelei.

Tala

Faaali le ata 1-68, O Tavita O lo o Ta le Napeli Mo Saulo. Faamatala le tala ia Tavita i le taina o le napeli mo le Tupu o Saulo ina ua vaivai o ia ma lē fiafia, o lo o maua i le 1 Samuelu 16:19–23.

Tala

Faamata aisea na avea ai musika a Tavita ma auala e faafiafiaina ai le Tupu o Saulo?
O le a se mea fai musika e te fia faalogo i ai?

Fai ni taga pupuu faagugu o mea fai musika pe a ta’u.

Gaoioiga

Ia faafoliga o lo o taina e tamaiti taitasi se mea faimusika, e pei o se piano, vaiolini, kitara, po o se fagufagu a o e hamuina se pese masani a le Peraimeri po o se pese lotu.

Faamalamalama e mafai ona tatou maua le fiafia i pesega.

Gaoioiga

O a pese a le Peraimeri e te maua ai le fiafia?

Pese

Fai i tamaiti e filifili se pese e fiafia i ai, ona outou usu faatasi ai lea ma tamaiti.

Tala

Faaali le ata 1-61, O le Malaga Mai Navu, ma faamatala le tala lea i au lava upu:

Ina ua tuua e paionia o latou aiga ma aga’i atu i sisifo, sa latou teuina uma mea sa mafai ona latou teuina i taavale solofanua e fai pupuni ma taavale toso. Sa le mafai ona latou aveina uma a latou mea aua e le ofi. E matua faigata tele femalaga’iga, ma e masani lava e oo ifo i le afiafi ua matua le lavavā paionia.

A oo i le po ona faapotopoto ai lea e paionia a latou manu ma a latou taavale toso i se li’o ma fausia se afi tele i le ogatotonu o le li’o. Sa silafia lelei e le perofeta o Polika Iaga, o le a fiafia tele tagata i la latou faigamalaga pe a i ai ni musika. Sa ia faamalosia i latou ina ia sisiva ma pepese. O paionia sa aumai a latou la’au ‘ili, pu, ma talipalau sa latou faaaogaina e fai ai musika. Sa pepese ma sisiva faataamilo tagata uma i le afi. O se tasi o a latou pese sa sili ona fiafia i ai o le “O mai! O mai! Ia Galulue Nei.” Sa aveina atu i nei musika le malosi ma le lototele i paionia. A oo i le taimi e momoe ai paionia i po pe a uma ona pepese ma sisiva, ua fiafia lava i latou.

Pese

Fai i tamaiti e nonofo fa’ata’ali’oli’o ma manatu faapea o latou o paionia o lo o nonofo fa’ata’ali’oli’o i le afi o tolauapiga. Usu faatasi ma tamaiti le “Tamaiti Paionia” (Tusi Pese a Tamaiti) po o se isi lava pese o le Peraimeri e fiafia i ai tamaiti.

E fesoasoani musika tatou te manatua ai le Tama Faalelagi ma Iesu

Faamalamalama e faamanatu mai i musika i le lotu le Tama Faalelagi ma Iesu ia te i tatou. Fai i tamaiti e moeiini mata ae mafaufau faapea o lo o latou faalogoina musika o lo o tataina i le falesa ae le i amataina le lotu.

E faapefea ona fesoasoani musika ina ia outou faaaloalo i le lotu?

Faamatala e fiafia tele le Tama Faalelagi ma Iesu e faafofoga mai pe a tatou pepese. Faitau leotele ia fasi fuaitau muamua e lua o le Mataupu Faavae ma Feagaiga 25:12 (faagata i le o le tatalo lea ia te au). Faamalamalama o le usuina o pese faalelotu, e pei lava o le tatalo i le Tama Faalelagi. O lo o tatou faafetai atu i le Tama Faalelagi mo faamanuiaga ua ia tuuina mai ia te i tatou. O le usuina o pese e uiga i le Tama Faalelagi ma Iesu, e faamanatu mai ai e alolofa i la’ua ia te i tatou ma e fia fesoasoani mai foi ia te i tatou. Faamalamalama o pese tatou te usuina i le sauniga o le faamanatuga ua ta’ua o pese lotu.

Aisea tatou te usuina ai pese ma viiga i le lotu?

Tala

Faaali le ata 1-69, O Vaa o Sa Iaretō, ma faamatala le tala i le malaga mai o Sa Iaretō i le nuu folafolaina, o lo o maua i le Eteru 6:2–12. Faamatala sa usuina e Sa Iaretō pese, o viiga i le Tama Faalelagi ma Iesu a o i ai i latou i totonu o o latou va’a.

Tala

Faamata aisea na usuina ai e Sa Iaretō pese a o faia le latou folauga?
Faamata o a ni lagona o Sa Iaretō a o felafoa’iina o latou vaa e matagi ma galu?
E faapefea ona fesoasoani a latou pesega pe a fefefe i latou?
Ua e usuina se pese pe a e fefe? Na faapefea ona fesoasoani lena pese ia te oe?

Molimau

Faamatala se taimi na faafiafiaina ai oe e musika. Faamanatu i tamaiti e fiafia tele le Tama Faalelagi ma Iesu e faafofoga mai a o latou usuina pese lelei. Afai latou te pepese, e mafai ona latou maua le fiafia ma manatua e alolofa le Tama Faalelagi ma Iesu ia te i latou.

O Isi Gaioiga E Faamauoa ai

Filifili nisi o nei gaoioiga e faaaoga i le taimi o le lesona.

Usu le “Mea Malie E Fai” po o le “Ou Te Manatu E Manaia Le Lalolagi” (Tusi Pese a Tamaiti).
A toaitiiti le vasega, ia tofu le tamaitiiti ma lana pese o le Peraimeri e fiafia i ai e filifili, ona usu faatasi ai lea ma tamaiti a latou pese filifilia.
Fai ni lūlū ipu pepa mo tamaiti e faaaoga e fua i ai le musika. Tuu ni nai fatu araisa po o ni oneone i totonu o se ipu pepa. Faapulou se isi ipu pepa i ai ona teipi (tape) la’ia lea ne’i toulu araisa po o oneone. Usu se pese Peraimeri a’o luluina e tamaiti a latou lūlū. E mafai ona aumai foi nisi mea e faaaoga e fua i ai le musika, e pei o logo, ni fasi laau e tata, po o ni fasi poloka laupapa e faafeto’ai.
Faamatala i au lava upu le tala i le Perofeta o Iosefa Samita ma isi taitai o le Ekalesia a o i ai i le Falepuipui i Karetasi. Sa tuuina i latou i le falepuipui e tagata amio leaga e ui lava ina e le’i i ai se mea sese sa latou faia. Sa silafia e le Perofeta ua lamatia lona soifua, ma sa faanoanoa ai tele o ia. Sa ia talosaga atu i lana uo o Ioane Teila e pese atu mo ia. Sa faanoanoa tele foi Ioane, ma sa ia fai atu ia Iosefa e le o maua sona agaga e pese ai, ae peitai sa u’una’iina lava o ia e Iosefa. A o usuina e Ioane se pese e uiga ia Iesu, sa maua e tagata uma sa i ai i le falepuipui ni lagona lelei. Sa faamanatu atu ai ia te i latou i lena pese e alolofa le Tama Faalelagi ma Iesu ia te i latou. Na avatu ai ia te i latou le malosi ma le loto tele.

O Gaoioiga Faaopoopo mo Tamaiti Laiti

Usu faatasi ma tamaiti nisi o a latou pese e fiafia i ai. Patipati lemu lima o tamaiti a o pepese. Talanoa ma tamaiti i auala e faafiafiaina ai i latou e musika.
Pu’e ni pese e eseese lo latou faiga mo tamaiti e faalogologo i ai. Ia e mautinoa e talafeagai ma le Sapati.
Faamatala i tamaiti e tele ituaiga musika ua aumaia e le Tama Faalelagi mo i tatou. O nisi musika e faia e tagata, a o isi musika e faia i mea o lo o siomia ai i tatou i lenei lalolagi. Ta’u ni igoa o ni mea o le natura e maua mai ai leo pei o musika, e pei o le matagi, timu, manu, pi, ma faititili. Fai i tamaiti e faataitai leo taitasi.