Lesona 26

E Mafai Ona Toe Faatasia Aiga E Faavavau

Faamoemoega

Ia fesoasoani i tamaiti taitoatasi ina ia malamalama o malumalu o nofoaga paia ia e mafai ai ona faamauina faatasi aiga mo le faavavau, ma ia uunaia ai tamaiti taitoatasi e sauniuni e ulu atu i le malumalu.

Sauniunig

1. Ia aoao ma le agaga tatalo le Mataupu Faavae ma Feagaiga 97:15–17 ma le 124:37–41. Tagai foi i le Mataupu Faavae o le Talalelei (31110), mataupu e 36.

2. O Mea e faaaogaina:

   1. O se kopi o le Mataupu Faavae ma Feagaiga.

   2. Ata 1-5, O se Aiga o lo o i ai se Pepe (62307); ata 1-7, O Se Aiga Fiafia; ata 1-54, O Le Malumalu i Sate Leki (Taga o Ata O Le Talalelei) 502; 62433); ata o isi malumalu o lo o maua (Taga o Ata O Le Talalelei 505; 62434-62448, 62566-62569, 62583-62601, 62614-62619); le pepa o ata tusi o lo o i le faaiuga o le lesona.

3. Ia faia sauniuniga e talafeagai ai mo so o se Gaoioiga E Faamauoa Ai e te manao e faaaoga.

Gaoioiga E Aoao Ai

Tofi se tamaitiiti e faia le tatalo amata.

Gaoioiga e Faatosina Mai Ai:

Faaali atu le ata 1-54, O le Malumalu i Sate Leki, ma ata o nisi malumalu, ia aofia ai ma le malumalu i lo outou atunuu, pe afai e i ai. Fai i tamaiti e faamatala mai mea ua latou iloa e uiga i malumalu.

Gaoioiga e Faatosina Mai Ai:

• Ua outou vaai i se malumalu?

• O le a se mea tou te mafaufau i ai pe a outou vaai i se malumalu?

Talanoaina le matagofie o malumalu, faasino le tumutumu, faamalama, ma faitotoa. Faamatala atu o fafo o le tino o malumalu taitasi, o lo o tusia ai upu, O Le Fale O Le Alii. O tagata o le Ekalesia, latou te o atu i le malumalu e aoao ai e uiga i le Tama Faalelagi ma Iesu ma lo laua alolofa mo i tatou.

Gaoioiga

Fai i tamaiti e tuu o latou lima i luga ae o o latou ulu e fai se tumutumu o se malumalu. Faatonu e tutu faasasao i luga ma mafaufau o latou o se malumalu matagofie. A uma ona fai lea i ai e nonofo filemu i lalo.

O le malumalu o se nofoaga paia

Faamatala o le malumalu o se nofoaga pa’ia (tagai MFF 97:15–17). Fai i tamaiti e toe fai le upu pa’ia. O lona uiga, o le malumalu o se nofoaga faapitoa o lo o i ai mea uma e faamanatu mai ai ia te i tatou le Tama Faalelagi ma Iesu.

Tau i tamaiti afai latou te tausia poloaiga a le Tama Faalelagi, o le a mafai ona latou ulu i le malumalu pe a matutua. Faamatala o totonu o le malumalu tatou te faia ai folafolaga faapitoa i le Tama Faalelagi tatou te usiusitai i ana poloaiga. E mafai foi ona tatou faaipoipo i le malumalu, ma e mafai foi ona tatou papatiso mo tagata e le i papatisoina a o i ai i latou i luga o le fogaeleele.

Fai i tamaiti e tuu i luga tamatamai lima e tolu ma toe tau mai mea e tolu e mafai ona latou faia i le malumalu pe a matutua:

“I totonu o le malumalu, e mafai ona ou faia folafolaga faapitoa i le Tama Faalelagi.”

“I totonu o le malumalu, e mafai ona ou faaipoipo ai.”

“I totonu o le malumalu, e mafai ona ou sui papatiso ai mo isi.”

Pese

Faatutu i luga tamaiti ma usu pe tauloto upu o le vaega muamua o le pese “Ou Te Fia Vaai I Le Malumalu” (Tusi Pese a Tamaiti) ma faaaoga ai taga o lo o i lalo:

Ou te fia vaai i le malumalu (Faapipii faatasi tamatama’i lima ma faamomoe i lalo ae faatutu i luga lima tusi e lua e fai ai se tumutumu).

E i ai se aso o iina ou te alu i ai (savali i le mea o loo tu ai)

Ia ou maua le Agaga (tuu le lima i luga o le fatu),

Ia ou faalogo ma tatalo atu ai (tuu le lima i tua o le taliga, ona pi’ilima ai lea).

(Copyright © 1980 by Janice Kap Perry. Used by Permission.)

Faamatala atu talu ai o le malumalu o se nofoaga paia tele, tatou te faaaogaina ofu papae i totonu. O laei papae e faamanatu mai ai ia te i tatou e finagalo le Tama Faalelagi ma Iesu ina ia tatou mama a’ia’i ma ia tatou filifili pea lava pea e fai le mea sao.

Pese

• O a lanu o outou ofu o lo o faaaogaina nei?

• O a lanu o outou ofu o le a outou faaaogaina i totonu o le malumalu?

Faamatala atu talu ai o le malumalu o se nofoaga paia, tatou te faaaloalo pe a tatou i ai i totonu. Ia tatou musumusu pe tautala lemu. Fai i tamaiti e musumusu, “Ou te alofa i le Tama Faalelagi ma Iesu.” Faamatala atu e mafai ona tatou maua le lagona fiafia ma le toafilemu i le malumalu aua ua tatou latalata atu i le Tama Faalelagi ma Iesu.

Tala

Faamatala atu i au lava upu le tala lea e uiga ia Peresitene Lorenzo Snow:

Sa silafia e Lorenzo Snow e le o toe mamao ae avea o ia ma perofeta o le Ekalesia. Sa ia malaga atu i le malumalu, faamaulu ona laei papae, ma tootuli ifo i se potu faapitoa ma tatalo ai. Sa manao o ia e faaali mai e le Tama Faalelagi ia te ia po o le a le mea na te faia mo le taitaiina o le Ekalesia. Sa tatalo ma saga tatalo, ae na te le i maua se tali. Ae ina ua tuua e Peresitene Snow le potu sa tatalo ai, sa faaali mai Iesu ia te ia. Sa laeiina e Iesu se ofu talaloa matagofie paepae ma sa matua malamalama ma susulu manaia naua, ma na matua faigata ai ia Peresitene Snow ona pupula atu ia te ia. Sa foliga mai sa tu Iesu i ni auro mao’i. Sa tau atu e Iesu ia Peresitene Snow o mea sa ia tatalo atu ai na te fia iloa (vaai LeRoi C. Snow, “An Experience of My Father’s,” Improvement Era, Sept 1933, p. 677).

Tala

• O ai tagata e i ai i o outou aiga?

• O a ni o outou lagona pe a outou faatasi ma o outou aiga?

• E mafai faapefea ona faatasia se aiga e faavavau?

Tautino atu i tamaiti ia mautinoa e alolofa le Tama Faalelagi ma Iesu i aiga taitasi ma e finagalo i laua ina ia faamauina faatasi aiga taitasi mo le faavavau. Faamatala atu o aiga e le i faamauina i le malumalu, e mafai ona saunia i latou e ala i le usiusitai i poloaiga a le Tama Faalelagi. E mafai ona o i le malumalu ina ia faamauina ai se aiga.

Pese

Usu pe fai faatasi faatele ma tamaiti upu o le tali o le pese “E Mafai Ona Faatasia Aiga E Faavavau” (Tusi Pese a Tamaiti)

E mafai ona faavavau aiga

I le fuafuaga a le Tama

Ou te manao e faatasi ma lou aiga

O le Alii na te faailoa mai le ala

O le Alii na te faasino mai ia te au.

E mafai ona ou saunia ou te alu i le malumalu

Ia faamanatu i tamaiti e mafai e tagata uma lava e usiusita’i i poloaiga a le Tama Faalelagi ona o i le malumalu. Faaali i ai le itulau o ata tusi o lo o i ai i le faaiuga o le lesona ma tuu i tamaiti e talanoaina tulafono o lo o tau mai i ata. Faamatala atu o le usiusitai i nei tulafono o le a fesoasoani lea i tamaiti ina ia agavaa e o i le malumalu pe a matutua.

• Tatalo.

• Usitai i matua.

• Alofa le tasi i le isi.

• Alu i le lotu.

• Totogi sefulua’i.

• ‘Ai meaai lelei (usita’i i le Upu o le Poto).

• Faamaoni.

Molimau

Faamatala atu ou lagona e uiga i le taua o aiga pe a faatasia e faavavau ma faamatala e uiga i faamanuiaga o le malumalu. Faamanatu i tamaiti o le usiusitai i o latou matua ma le usiusitai i tulafono a le Tama Faalelagi o mea taua ia e sauniuni ai e ulu atu i le malumalu.

O Isi Gaoioiga E Faamauoa Ai

Filifili nisi o nei gaoioiga e faaaoga i le taimi o le lesona.

1. Fesoasoani i tamaiti ia malamalama o le “faavavau” o se taimi umi tele. Atonu e te faamatalaina foi i ai, e umi atu nai lo le taimi e faatalitali ai mo le isi o latou aso fanau po o le isi foi tuuaga; e sili atu le umi nai lo le taimi sa ola ai se tagata aupito matua latou te iloa; e sili atu le umi nai lo le amata atu nei e oo i le taimi na soifua mai ai Atamu ma Eva. Faamalamalama o le “faavavau” o lona uiga e le uma.

   Fesoasoani i tamaiti e fai taga o le fuaiupu lea a o e taulotoina upu:

   O le a le Umi o le Faavavau?

   O le a le umi o le faavavau (tusi i le ulu, e pei o la e mafaufau)?

   E umi atu nai lo se tausaga (tuu le moto i lalo o le auvae, ae tuu le tulilima i luga o le isi lima)

   E umi atu nai lo le taimi (tuu le isi moto i lalo o le auvae, ae tuu le tulilima i luga o le isi lima)

   E oo mai ai le Kerisimasi.

   O le a le umi o le faavavau (tusi le lima i le ulu, e pei o la e mafaufau)?

   E le lava le umi e faaalu (lulu i luma ma tua tamai lima)

   E faatasia ai ma aiga e te alofa i ai (fusi oe),

   Aua o le a le uma lava!

2. Valaaulia ni matua o se tamaitiiti o lau vasega, pe a faatagaina mai e le peresitene o le Peraimeri, e faamatala atu o laua lagona i le taua o le faamauina i le malumalu.

3. Fai ni kopi o le itulau o lo o i ai ata i le faaiuga o le lesona mo tamaiti taitasi. Tuu i tamaiti e valivali ata.

4. Valaaulia se aiga i la outou uarota e le i leva ona ulu i le malumalu e faamauina, pe a faatagaina mai e le peresitene o le Peraimeri, e faamatala atu i le vasega lea tulaga.

Gaoioiga Faaopoopo Mo Tamaiti Laiti

1. Fesoasoani i tamaiti e fai taga o le fuaiupu lea a o e faia upu:

   O Au o se Fesoasoani

   Ona ua ou tino lapoa ma maualuga, (tu tetee i ou tamatamaivae ma sii maualuga ou lima),

   O le a avea au ma fesoasoani lelei naua.

   O se fesoasoani ia tamā (faatu i luga le tamailima muamua),

   O le e agalelei ma alofa;

   Ia faia foi i lou tina (faatu i luga le tamailima lona lua)

   Ma ana aoaoga.

   O se fesoasoani i ou uso, (faatu i luga le tamailima lona tolu),

   Ma ou tuagane foi (faatu i luga le tamailima lona fa);

   O se fesoasoani i au uo faamaoni (faatu i luga le lima matua).

   Ou te fia fesoasoani i le Atua

   I lou alofa i isi e pei ona alofagia au (piilima).

   Ou te fia fesoasoani i so o se tagata (fofola faalautele ou lima i luma),

   Ona ua ou tino lapoa ma maualuga lava (tu tete’e i ou tamatamaivae ma sii maualuga i luga ou lima).

2. Fesoasoani i tamaiti e fai taga i le fuaiupu faagaoioiga lea a o e usuina pe fai upu nei. Pule oe pe fai faafia.

   Tutu uma i luga ma fai se lio, ma uu lima. Ia uu lima i le gaoioiga atoa.

   Sa tatou nonofo faatasi ma le Tama Faalelagi (ia savavali agai i totonu uma tagata ma uu mai lima i le ogatotonu).

   Na ia auina mai i tatou e mau i le lalolagi (toe o agai i tua i se lio lapoa)

   Na ia aumaia ni aiga e alolofa ma tatou aoao ai (toe faapotopoto mai i totonu).

   O le a fesoasoani ia i tatou ina ia tatou toe nonofo faatasi ai (toe agai i tua i se lio lapoa).

3. Saunia sina auivi faigofie o se malumalu i ni pepa e valivali e tamaiti.

prepare

E Mafai Ona Ou Sauni e Alu i le Malumalu

Tatalo

Alu i le Lotu

Ai i Meaai Lelei

Alofa Le Tasi i le Isi

Usitai i Matua

Totogi Sefuluai

Ia Faamaoni