Na Aumaia IaTe ITatou E LeTama Faalelagi Ma IesuTusitusiga Paia

Faamoemoega

Ia fesoasoani ia malamalama tamaiti, o tusitusiga paia o lo o i ai saunoaga a le Tama Faalelagi ma Iesu Keriso, ma e mafai ona tatou aoao e uiga i le Tama Faalelagi ma Iesu Keriso e ala i le faitauina o tusitusiga paia.

Sauniuniga

Ia aoao ma le agaga tatalo le Luka 22:19–20; 3 Nifae 18:21; Mataupu Faavae ma Feagaiga 59:6; ma le Mose 7:11. Ia vaai foi Mataupu Faavae o le Talalelei (31110), mataupu 10.
Sauni e faamatala se tasi o tala e sili ona e fiafia i ai mai tusitusiga paia, ia faaaoga ai se ata pe a talafeagai.
O mea e faaaogaina:
1. O se seti o tusitusiga paia (Tusi Paia, Tusi a Mamona, Mataupu Faavae ma Feagaiga, ma le Penina Tautele).
2. O se fasi ie e ufiufi ai tusitusiga paia po o se fasipepa e afifi ai.
3. Ata 1-3, O Iesu Keriso (Taga o Ata o le Talalelei 240;62572); ata 1-18, O Ioane Le Papatiso O Lo o Papatisoina Iesu (Taga o Ata o le Talalelei 208;62133); ata 1-44, O Iesu O Lo o Aoao Atu i le Itu Lalolagi i Sisifo (Taga o Ata o le Talalelei 316;62380); ata 1-70, O Le Talisuaga Mulimuli (Taga o Ata o le Talalelei 225;62174).
Ia faia sauniuniga talafeagai ai mo so o se Gaoioiga E Faamauoa ai e te manao e faaaoga.

Gaoioiga e Aoao Ai

Tofi se tamaitiiti e faia le tatalo amata.

Gaoioiga e Faatosina Mai Ai:

A o le i amataina le vasega, ia ufiufi tusitusiga paia i se fasi ie pe afifi foi i se pepa. Tuu tusitusiga paia i luga o se laulau po o se nofoa i se mea e mafai ona iloa mai e tamaiti. Fai i tamaiti o lo o i ai se mea e taua ia te oe ma tagata uma ua e ufiufiina. Tuu i tamaiti latou te mateina mai pe o le a lena mea ua e ufiufiina.

A mae’a ni nai mate, tuu lea i tamaiti e o ane e tagotago i le afifi. A mate mai se tamaitiiti faapea o se tusi po o ni tusi, fai atu i ai e sa’o ona tatala lea o le afifi. Ta’u i tamaiti o nei tusi ua ta’ua o tusitusiga paia. Fai i tamaiti e fai faatele le upu tusitusiga paia.

O tusitusiga paia o tusi e paia.

Faamalamalama o tusitusiga paia o tusi taua, e ese lava mai lo isi tusi. O tusi e paia. Faamanatu i tamaiti o se mea e paia, e fesoasoani tatou te mafaufau ai i le Tama Faalelagi ma Iesu. Faamalamalama o lo o tau mai i tusitusiga paia le alofa tele o lo tatou Tama Faalelagi ma Iesu ia te i tatou. O lo o tau mai ai mea e finagalo le Tama Faalelagi ma Iesu tatou te faia ina ia mafai ai ona tatou fiafia.

Faaali taitasi atu ma tau igoa o tusi faavae e fa. Afai o tuu faatasi nisi i se tusi e tasi, faasino atu igoa o lo o i le tua o le tusi, pe susue foi i itulau faaulutala o tusitusiga paia taitasi.

Gaoioiga

Fai i tamaiti e tatau ona tatou tausia lelei a tatou tusitusiga paia ma su’e ma le faaeteete itulau. Ia auaua’i mai tamaiti i luma o le vasega, e faaali mai lo latou uuina ma su’eina ma le faaeteete itulau o tusitusiga paia.

Faamatala atu o lo o i ai i tusitusiga paia tala moni. E fesoasoani nei tala tatou te iloa ai mea o lo o finagalo le Tama Faalelagi ma Iesu tatou te faia. E mafai ona fesoasoani tala mai tusitusiga paia i o tatou olaga.

Tala

Faamatala i tamaiti se tala se tasi mai tusitusiga paia, o tala e fiafia lava i ai ma ia faaaoga ai se ata pe a talafeagai. Faamamafa pe na faapefea ona fesoasoani lenei tala mai tusitusiga paia ia te oe. Faaali atu lou matua fiafia tele i le faitauina o tala mai tusitusiga paia.

Pese

Fesoasoani i tamaiti e usu pe tauloto upu o le pese: “Tau Mai Tala Ia Iesu” (Tusi Pese a Tamaiti). Faamanatu i tamaiti o tala o lo o latou aoaoina mai i tusitusiga paia i le Peraimeri o tala moni.

Faamatala mai tala ia Iesu
Mea na fai ou te fesili ai ia te Ia
Ala na ui ai, Tala i le vasa,
Faamatala Tala ia Iesu.

O lo o i ai i tusitusiga paia aoaoga a Iesu

Faamatala o nisi o tusitusiga paia sa tusia e tagata sa latou ola ma latou iloa Iesu a o soifua o ia. O i latou o tagata sa vaai ma faalogo ia Iesu a o ia aoao atu. Sa tusia e nei tagata tusitusiga paia ina ia mafai ona aoao tagata e uiga ia Iesu ma ana aoaoga ma latou iloa o Ia o le Alo o le Tama Faalelagi.

Faaali le ata 1-70, O Le Talisuaga Mulimuli. Fai i tamaiti e faamatala se mea ua latou iloa e uiga i le ata. Faaali atu le Tusi Paia ma ia ta’u faatasi e tamaiti le igoa. Tagai i le Luka e 22. Faamalamalama na aoao mai Iesu i le Tusi Paia, e tatau ona tatou ‘a’ai i le faamanatuga ina ia manatua ai o ia. Sa tago Iesu i le areto ma faamanuia ona ia tufaina atu lea i ona soo (fesoasoani). Sa ia tago foi i le ipu ma tuuina atu foi ia te i latou e feinu ai. Faitau le vaega o le fuaiupu e 19 i le mea o lo o fetalai mai ai Iesu, “Ia outou faia lenei mea ma faamanatuga ia te a’u.” Faamanino i ai o upu nei a Iesu.

Faaali le ata 1-44, O Iesu O Lo o Aoao Atu I Le Itu Lalolagi i Sisifo, ma faamanatu i tamaiti le mea o lo o tupu i le ata. Faaali atu le Tusi a Mamona ma fai i tamaiti e ta’u faatasi le igoa. Su’e le Tusi a Mamona i le 3 Nifae 18. Faamatala e tele mea sa aoaoina atu e Iesu i tagata. Faitau le vaega o le fuaiupu e 21 o lo o fetalai mai ai Iesu, “Ia tatalo i o outou aiga.”

O le a le mea o lo o tau mai e Iesu tatou te faia ma o tatou aiga?

Faaali le ata 1-3, O Iesu Keriso. Faaali atu le Mataupu Faavae ma Feagaiga ma fai i tamaiti e tau le igoa. Su’e le Mataupu Faavae ma Feagaiga e 59. Faamatala o se tasi o mea na aoao mai e Iesu o le, e tatau ona tatou fealofani. Faitau le vaega o le fuaiupu e 6 o lo o faapea mai ai Iesu, “Ia e alofa atu i le lua te tuaoi.”

O le a le mea o lo o fetalai mai Iesu e fai?
O ai lou tuaoi?
O le a sou lagona pe a e agalelei atu i isi ma faaali atu lou alofa ia te i latou?

Pese

Fesoasoani i tamaiti e usu pe tauloto upu o le pese: “Fetalai Mai Iesu E Alofa Atu I Tagata Uma” (Tusi Pese a Tamaiti)

Fetalai mai o Iesu (fofola i luma lima);
Ia e alofa atu (lue i luga ma lalo lou ulu).
E alofagia ai oe (tuu ou lima i luga o lou fatu),
E tagata uma (fusi oe lava).

Faaali le ata 1-18, O Ioane le Papatiso O Lo o Papatisoina Iesu. Fai i tamaiti e faamatala le ata. Faamamafa sa papatisoina Iesu, ma e finagalo o ia ina ia papatisoina tagata uma. Faaali le Penina Tautele ma fai i tamaiti e ta’u le igoa. Susu’e le Penina Tautele i le Mose 7 ma faamatala le auala na aoao ai e Iesu se tagata e igoa ia Enoka ina ia alu atu ma papatiso i tagata. Faitau le vaega o le fuaiupu e 11 o lo o faapea mai ai Iesu, “Papatiso i le suafa o le Tama, ma le Alo…. ma le Agaga Paia.”

Tu’u i luga tusi faavae e fa. Ia faamamafa atu o lo o i ai aoaoga a Iesu i tusi uma nei.

Pese

O a nei tusi?
O aoaoga a ai o lo o maua i totonu o nei tusitusiga paia?
Aisea na tusia ai nei tusitusiga paia?
O le a sou lagona ina ua e iloa e alolofa le Tama Faalelagi ma Iesu ia te i tatou ma ua aumai ai nei tusitusiga paia?

Molimau

Faaali atu lou agaga faafetai ma le alofa mo tusitusiga paia. Tuuina atu lau molimau, o tusitusiga paia, o saunoaga a le Tama Faalelagi ma Iesu, ma e mafai ona tatou aoao ai mea o lo o finagalo i la’ua tatou te faia e ala lea i le aoaoina o tusitusiga paia.

O Isi Gaoioiga e Faamauoa Ai

Filifili nisi o nei gaoioiga e faaaoga i le taimi o le lesona.

Ta’i gaulua ni fasipepa se fa e fai ma kopi o faavaa o tusi faavae e fa, ia tofu le tamaitiiti ma le seti. Lolomi igoa o tusi faavae e fa i faavaa. Faapu le pito i luga o faavaa taitasi ona faaaoga lea o se fasi manoa e nonoa faatasi ai faavaa e fa a le tamaitiiti.

I totonu o faavaa taitasi, lolomi ai le mau sa aoaoina i le lesona:

Tusi Paia: Sa aoao mai Iesu ia te i tatou e uiga i le faamanatuga (Luka 22:19).

Tusi a Mamona: Sa aoao mai Iesu ina ia tatou tatalo i o tatou aiga (3 Nifae 18:21).

Mataupu Faavae ma Feagaiga; Sa aoao mai Iesu ina ia tatou alolofa i o tatou tuaoi (MFF 59:6).

Penina Tautele: Sa aoao mai Iesu ina ia tatou papatiso (Mose 7:11).

Tufa ia tofu tamaiti ma le seti o faavaa e ave i le fale. A o e faia, faamanatu aoaoga a Iesu sa talanoaina i le lesona.
Fesoasoani i tamaiti e tauloto le vaega o le mataupu lona valu o le faatuatua: “Matou te talitonu o le Tusi Paia o le afioga a le Atua” ma le “matou te talitonu foi o le Tusi a Mamona o le Afioga ia a le Atua.”
Aumai nisi o ata o tala i le Tusi a Mamona mai ata o lo o i tua o lenei tusi lesona pe aumai foi ni ata mai le potu tusi. Faaali atu ata taitasi ma faamatala otooto le tala o lo o faaalia. Faamanatu i tamaiti o tusitusiga paia o lo o i ai tala moni. Ia usu e tamaiti le pese “Tala O Le Tusi A Mamona” (Tusi Pese a Tamaiti).
Ta’u i tamaiti se taimi na matua taua ai lava tusitusiga paia i lou olaga. Faamatala pe na faapefea ona fesoasoani tusitusiga paia ia te oe ae pe o le a foi sou lagona na e maua.
Saili ni mau pupuu o lo o i ai saunoga a Iesu e pei o saunoaga o lo o i le lesona. Fai faatauloto mau taitasi, amata i upu na fetalai ai Iesu. Mo se faataitaiga, “Na fetalai mai Iesu, “Mulimuli mai ia te au.” Togi pe tuu atu foi se taga o fatu pi po o se isi mea galemulemu i se tamaitiiti ona toe fai mai lea e ia le mau lea sa e fai atu ai. Faaauau le togiina o le taga fatu pi seia soo uma tamaiti.

O Gaoioiga Faaopopo mo Tamaiti Laiti

Usu pe tauloto upu o le pese: “Tau Mai Tala Ia Iesu” (Tusi Pese a Tamaiti) a o tuuina i luga se Tusi Paia, pe usuina foi le pese: “Tala O Le Tusi a Mamona” (Tusi Pese a Tamaiti), a o tuuina i luga se kopi o le Tusi a Mamona.
Faamatala otooto le tala i lepela e toasefulu (vaai le Luka 17:11–19), ona fai faatasi ai lea ma tamaiti o le gaoioiga lea e faaaoga ai tamatamai lima.

E toasefulu i latou na mamai (tuu i luga tamai lima e sefulu);

Sa faamalolo i latou e Keriso i se aso e tasi.

Sa na ona ia fetalai, ona malolo ai lea (fai ni taga talo ese ai le mai)!

E uiga ese, aea? E mata’utia lea mea (tuu le limatusi i le isi itu o le ulu ma pupula pei ua e le mautonu)

Na o le toatasi le tagata (tuu i luga le tamaiti lima e tasi)

Na faafetai atu ia te ia

Ma vivii atu i le Atua (sisii uma i luga lima)?

(Adapted from Jean Shannon in Bible Story Finger Plays and Action Rhymes [cincinnti, Ohio: Standard Publishing Co., 1964]. p.27.)

Faaali i tamaiti le vaega o le Tusi Paia o lo o maua ai le tala.
Fesili i tamaiti pe o le a le tala e aupito sili ona fiafia i ai mai tusitusiga paia. Afai e mafai, faaali atu i ai vaega o tusitusiga paia e maua ai lea tala.