Tusi Lesona ma le Taimi o Fetufaaiga a le Peraimeri
Lesona 21: E I Ai O’u Lagona

Lesona 21

E I Ai O’u Lagona

Faamoemoega

Ia fesoasoani i tamaiti taitoatasi ia malamalama ma iloa lagona ma aoao ia iloa ala e maua ai le fiafia.

Sauniuniga

  1. Ia suesue ma le agaga tatalo le Luka 15:11–32.

  2. O Mea e faaaogaina:

    1. O se Tusi Paia

    2. O le Ata o Mata Ataata/Mata Faauu (vaai i le ata o lo o i le faaiuga o le lesona).

    3. Penisina ma le solo.

    4. Ata 1-45 O Lo o Fufuluina Ipu; ata 1-46, Tamaiti o lo o Tuuina Atu Fugalaau ia Tina; ata 1-47, Tamaiti o lo o Tauaimisa; ata 1-48, Tamaiti o lo o Taaalo i Fasi Poloka Laau; ata 1-49, O le Atalii Faamaumau Oa, (Taga o Ata o le Talalelei 220; 62155).

  3. Ia faia sauniuniga e talafeagai ai mo so o se Gaioiga e Faamauoa Ai e te manao e faaaoga.

Gaoioiga E Aoao Ai

Tofi se tamaitiiti e faia le tatalo amata.

Gaoioiga E Faatosina Mai Ai:

Ia faaali atu le ata o Mata Fiafia, Mata Faauu. Ia usuina pe fai foi upu o le pese: “Ataata” (Tusi Pese a Tamaiti), faatasi ma tamaiti, pe faalua, pe faatolu foi.

Afai ua e faauu,

Aua nei tumau ai.

Liliu faavave i le isi itu,

Ma le le toe faauu.

Leai se tasi e fiafia,

I le mata faauu.

Sui i le ata e faalelei ai,

Le lalolagi matagofie.

E faaalia o tatou lagona i o tatou foliga ma mea tatou te fai.

  • O le a le lagona e oo ia te outou pe a outou laumata fiafia?

  • O le a le lagona e oo ia te outou pe a outou foliga faauu?

Faamatala e masani lava ona iloa e tagata lagona ua i ai ia i tatou i foliga tatou te faaalia i o tatou mata. Tuu atu i tamaiti latou te faailoa ane ia te oe o latou mata fiafia.

Gaoioiga

Ia tusi ni lio lapopoa i luga o le laupapa. Ia tusi ai totonu foliga eseese ina ia faaalia ai ituaiga eseese o lagona: fiafia, faanoanoa, ita, ma le fefe (tagai i le ata o lo o i lalo). A o tusia foliga taitasi, fai atu i tamaiti e faailoa ane lagona o lo o faaalia mai i mata, ona fai atu lea ia i latou e tusi a latou lava ata o mata fiafia, faanoanoa, ita ma le fefe.

Ata
different faces

Gaoioiga

  • O a mea e mafua ai ona outou lagona le fiafia?

  • O a mea e mafua ai ona outou lagona le faanoanoa?

  • O a mea e mafua ai ona outou lagona le ita?

  • O a mea e mafua ai ona oo ia te outou le lagona o le fefe?

Ia faamatala atu i tamaiti se taimi na e faanoanoa ai, ita ai, po o le fefe foi, atoa foi ma se taimi na e fiafia ai.

E mafai ona tatou aoao e pulea o tatou lagona.

Faamatala atu, e lelei lo tatou faaalia o ituaiga uma o lagona eseese ua i ai ia i tatou, aepeitai, e tatau ona tatou faailoa atu i le ala sao, aemaise lava i le taimi tatou te ita ai.

Faaali atu le ata 1-47, Tamaiti o lo o Tauaimisa.

  • O le a so outou manatu o le a le lagona ua i ai i nei tamaiti?

  • O le a so outou manatu o a upu o lo o felafoai e i laua o le tasi i le isi?

  • O le a le mea e tatau ona outou fai pe a oo ia te outou le ita?

Ia faamatala atu, e ui lava ina oo mai ia i tatou le lagona o le fia pai atu, ee, po o le faamanuaina o se tasi i le taimi tatou te ita ai, ae mafai lava ona tatou aoao e faailoa atu o tatou lagona i le tulaga faaaloalo ma le agalelei. Afai tatou te pai atu, pe ee foi, e na o le ita tele lava le mea e maua mai ai, ae a tatou faaalia le agalelei, o le a mafai ona fesoasoani lea tatou te maua ai lagona lelei.

Gaoioiga

Ia tuu atu i tamaiti e auauai e avea faapei o tamaiti o lo o i ai i le ata. Fesoasoani i tamaiti ia latou manatu i mea lelei sa tatau ona fai atu ai tamaiti o lo o i le ata, o le tasi i le isi, nai lo le ee atu po o le faaoo lima, e pei o le “Faamolemole e mafai ona tuu mai le avanoa ia te a’u i le taimi nei?” “Tatou feauaua’i,” “Ua ou faanoanoa lava ina ua e fai mai ni faaupuga le manuia ia te a’u,” po o le “Ou te le fiafia lava pe a e faia le mea lena.”

Faaali le ata 1-48, Tamaiti o lo o Taaalo i Fasi Poloka Laau. Ia tau atu o nei tamaiti o loo lelei le faiga o a latou taaloga ma faaalia le laumata fiafia, aua o lo o latou fetufaai ma tautala faaaloalo atu le tasi i le isi.

Gaoioiga

  • O ai e mafai ona fesoasoani atu ia te oe ia maua le lagona lelei pe afai e te lagona le faanoanoa, ita, po o le fefe foi?

Faamatala atu, afai tatou te talanoa atu i o tatou tina, tama, ma isi tagata o e alolofa ia i tatou, e mafai ona latou fesoasoani ia i tatou ia malamalama i le mafuaaga ua ala ai ona oo ia i tatou lena ituaiga o lagona. Afai tatou te tatalo atu i le Tama Faalelagi, o le a mafai e le Agaga Paia ona fesoasoani mai ia i tatou ia maua le lagona lelei. O le a fesoasoani le Agaga Paia ia i tatou ia iloa le mea e tatau ona fai, ina ia mafai ai ona toe maua e i tatou le fiafia.

Gaoioiga

Faatutu tamaiti i luga ma fai faalua pe faatolu le gaoioiga o lo o i lalo, e fai ai taga.

O O’u Lagona

O nisi taimi pe a ou faanoanoa, (Faaali atu foliga faanoanoa)

Ona fusi lea o a’u e lo’u tina, ma ou maua ai le fiafia. (Fusi oe lava ma faaali atu le laumata fiafia).

O nisi taimi pe a ou ita tele, (Faaali atu foliga ita ).

Ou te alu ese atu ma talanoa ma tama pele. (Savalivali i le mea o tu ai ma lue le ulu faapei o lo o tautala).

Afai lava e i ai se mea ou te fefe ai (Faaali atu foliga fefe).

Ou te tatalo ina ia ou toa ai ( Piilima).

A ou alu la ou te taalo i fafo,

O le a ou matua fiafia i lea aso ma lea aso (Faaali atu foliga fiafia).

Tatou te fiafia pe a tatou fesoasoani atu i isi.

Faaali le ata 1-46, Tamaiti o lo o Foaiina Atu Fugalaau ia Tina.

  • O le a so outou manatu i le lagona o lo o faaalia e tagata o lo o i ai i lenei ata?

  • Aisea ua outou manatu ai o le lagona lena o lo o i ai ia i latou?

  • O le a se lagona e oo ia te outou pe a outou foaiina atu se mea i se tagata?

Faaali le ata 1-45, Ipu o lo o Fufuluina.

  • O le a le mea o lo o faia e lenei teine?

  • O le a so outou manatu o le a le lagona o lo o i ai i le teine o lo o faaalia i lenei ata?

  • O le a le lagona e oo ia te outou pe a outou fesoasoani atu i se tasi?

Gaoioiga

Fesoasoani i tamaiti e faatinoina le gaoioiga e fai ai taga o lo o i lalo:

O Le Fesoasoani Atu E Maua Ai E A’u Le Fiafia

Ou te fiafia lava e fesoasoani i lo’u tina, (Fai taga o lo o faapiipii le talieleele)

E matua tele naua ana galuega.

Ou te fesoasoani ia te ia i le soloina o ipu, (Ia faafoliga o lo o soloina faamamago ipu)

Ma fafagaina le pepe o lo o i le isi itu. (Ia fai taga faafoliga o lo o faasusu le pepe i le fagu susu)

Ou te fiafia lava e fesoasoani i lo’u tamā, (Ia faafoliga o lo o faamaulu totigi lima faigaluega)

E matua tele na’ua ana galuega. (Ia faafoliga o lo o tipi le pa pe o vele le vao)

Ou te fesoasoani ia te ia i le faiga o le togalaau, (Faafoliga o lo o fui vai mea toto)

Seia oo lava ina uma lana galuega sa fai ma faaauau.

O le fesoasoani atu e maua ai e a’u le fiafia, (Faasino atu le laumata fiafia)

E maua ai foi e a’u le lagona lelei sa natia. (Tau fai tuu lima i tauau e lua ma faafoliga o lo o fusi oe lava)

A ou fesoasoani atu la i isi tagata, (Ia faaloloa i autafa lima)

O lo o ou faia le mea e tatau ona ou fai, i aso uma. (Lue le ulu ma piilima)

E finagalo le Tama Faalelagi ma Iesu ia tatou fiafia.

Faamatala atu, e finagalo le Tama Faalelagi ma Iesu ia tatou maua le fiafia. E silafia e i la’ua e maua e i tatou le fiafia pe a tatou faia mea e tau mai e i la’ua e ao ina tatou fai.

Tala

Faaali le ata 1-49, Le Atalii Faamaumau Oa, ma faamatala atu le tala o lo o maua i le Luka 15:11–32. Ia faailoa atu lagona eseese o lo o faaalia e le tama ma ona atalii. A o faaalia lagona taitasi, tofi se tamaitiiti na te faasino mai foliga tonu e talafeagai ai o lo o i ai i le laupapa. Mo se faataitaiga, e mafai ona e faapea atu: O lo o manao le tama e tuua lona aiga ma malaga atu i se atunuu mamao. Ina ua malaga ese atu o ia, sa matua faanoanoa lava le tama. Ina ua mavae sina taimi, sa tuua loa le tama e ana uo. Sa matua faanoanoa foi o ia. Sa lei umi lava se taimi, ae uma loa ana tupe. Sa oo ia te ia le fefe aua sa fia ai tele o ia ma e leai lava se tagata na foaiina atu ni meaai ia te ia … ma faapena ai lava.

Tala

  • O le a so outou manatu i le lagona na oo i le atalii ina ua toe foi mai o ia i lona aiga?

  • Aisea na fiafia ai le tama ina ua toe foi mai lona atalii? (tagai i le Luka 15:24).

  • Aisea na ita ai le uso matua ina ua toe foi mai lona uso laitiiti? (tagai i le Luka 15:28–30.) O le a le mea sa mafai ona ia fai e toe maua ai le fiafia?

Molimau

Tau atu i tamaiti e i ai taimi e oo ai i tagata le lagona fiafia, faanoanoa, ita, po o le fefe foi. E tatau ona tatou iloa ma faaali atu ia lagona i le ala sao. Tau atu i tamaiti, e finagalo le Tama Faalelagi ma Iesu ia tatou maua le fiafia. Tau atu i tamaiti le lagona fiafia e oo ia te oe pe a e faia mea e finagalo le Tama Faalelagi ma Iesu tatou te faia.

O Isi Gaoioiga E Faamauoa Ai

Filifili nisi o nei gaoioiga e faaaoga i le taimi o le lesona.

  1. Ia faatutu i luga tamaiti i se lio. Fai atu i ai e faafetaui lelei o latou laugutu ae aua nei ataata. Ona amata lea ona ataata faataamilo i le lio i le faaalia lea o laumata fiafia, ma ta’ua upu ia o lo o i lalo:

    “O le a ou faailoa atu le laumata fiafia ia (igoa o le tamaitiiti).” O le tamaitiiti la e te ta’ua lona igoa, e ataata o ia ma ta’u le fuaitau e pei ona faaalia i luga, ma tuu i ai le igoa o le tamaitiiti e sosoo ai. Ia faaauau pea lea gaoioiga seia tofu oo uma tamaiti o lo o i ai i le lio i le faaalia o le laumata fiafia.

    Faamanatu atu i tamaiti, afai tatou te faailoa atu i isi tagata le laumata fiafia, o le a faapea foi ona faaali mai e i latou ia i tatou le laumata fiafia. Afai tatou te faaalia le laumata fiafia, e faigata lava ona oo ia i tatou le faanoanoa, ita, po o le fefe foi.

  2. Usu le pese: “Pe a Tatou Fesoasoani” (Tusi Pese a Tamaiti), po o le “Manao Iesu Ia Ou Fai Ma Sulu” (Tusi Pese a Tamaiti).

  3. Tuu atu i tamaiti e mafaufau i se mea e mafai ona latou fai e maua ai le fiafia. Togi atu se taga fatu pi i le tamaitiiti ma faapea atu, “O (Igoa o le tamaitiiti) e fiafia tele pe a ____________.” Tuu atu i le tamaitiiti na te tau mai se mea e maua ai e ia le fiafia, ona toe faafoi ane lea ia te oe o le taga fatu pi. Ia faaauau pea ona fai lea gaoioiga seia tofu maua e tamaiti uma le avanoa.

  4. Ia faamatala atu se tala e uiga i se tamaitiiti na ia fai se mea lelei mo lona tina, e pei o le faia o se galuega i totonu o le fale. E le i iloa e tina po o ai na fesoasoani ia te ia, ona ia fesili lea i tamaiti uma lava i lona aiga, po o ai na fesoasoani atu ia te ia. Ina ua oo atu lana fesili i le tamaitiiti sa ia faia lea galuega lelei, sa iloa lelei lava e tina o ia lea na faia lea galuega aua sa faaali e lea tamaitiiti le laumata fiafia. Sa lagona e le tamaitiiti le fiafia aua sa faia e ia se galuega lelei.

Gaoioiga Faaopoopo Mo Tamaiti Laiti

  1. Ia taitaiina tamaiti i le faiga o taga, a o e taulotoina atu le solo o lo o i lalo. Ia faia pea lea gaoioiga pe a mananao i ai tamaiti.

    Saunia Aso Fiafia

    Lua mata e vaai, i mea lelei e fai. (Tusi le tamatamai lima i mata)

    Lua laugutu e ataata, i le aso atoa lava (Faaalia le laumata ataata)

    Lua taliga e faalogo, i isi tagata e taulogologo (Faaofuofu lima ma tuu i tua o taliga)

    Lua lima e faaaoga, e teu ai mea taalo uma (Faafoliga o lo o faaputuputu meataalo ma teuina)

    O le laulaufaiva e tautala ai, i mea lelei i aso taitasi le pogai (Tusi le lima i le gutu)

    O le loto ia fiafia ma mama, e galue ma taalo ai i aso uma (Ia piilima ma tuu i le mea e i ai le fatu)

    Lua vae e tamoe ai ma le fiafia ua ala ai (Tusi lima i vae)

    Saunia ai aso fiafia mo tagata uma, o lena le taunuuga.

  2. Usu le pese: “Pe A E Fiafia” (Tusi Pese a Tamaiti) ma faia taga e pei ona faaalia mai i upu. Ia faifai pea ae faaopoopo i ai fuaiupu e pei o ia o lo o fautuaina mai i le pito i lalo o le itulau o le tusipese.

  3. Tuu atu i tamaiti e faaalia se foliga fiafia, foliga faanoanoa, foliga ita, ma se foliga o se tagata ua le lava. Faamatala atu, e mafai ona latou faamatalaina i upu o latou lagona, nai lo le fetagisi po o le matanana foi. So o se taimi lava tatou te talanoa ai e uiga i o tatou lagona tatou te maua ai foi le fiafia.

Ata
happy and sad face