Tusi Lesona ma le Taimi o Fetufaaiga a le Peraimeri
Lesona 2: E I Ai Le Tino O Le Tama Faalelagi

Lesona 2

E I Ai Le Tino O Le Tama Faalelagi

Faamoemoega

Ia fesoasoani i tamaiti taitoatasi ia malamalama o le Tama Faalelagi o se tagata moni lava, o lo o i ai se tino mama atoatoa o aano ma ivi, ma ua faia i tatou i lona faatusa.

Sauniuniga

  1. Ia suesue ma le agaga tatalo le Ioane 14:9; Mataupu Faavae ma Feagaiga 130:22; Mose 2:27; ma le Iosefa Samita-Talafaasolopito 2:14–17. Tagai foi i le Mataupu Faavae o le Talalelei (31110), mataupu 1.

  2. O mea e faaaogaina:

    1. O se Tusi Paia ma se Penina Tau Tele

    2. Pepa ma penivali mo tamaiti taitasi.

    3. Se fa’aata laitiiti.

    4. Ata 1-3, O Iesu le Keriso (Taga o Ata o le Talalelei) 240; 62572); ata 1-4, O Le Uluai Faaaliga (Taga o Ata o le Talalelei 403; 62470).

  3. Ia faia sauniuniga e talafeagai ai mo so o se Gaoioiga E Faamauoa Ai e te manao e faaaoga.

Gaoioiga E Aoao Ai

Tofi se tamaitiiti e faia le tatalo amata.

Gaoioiga e Faatosina Mai Ai:Tufatufa pepa ma penivali, ma fai i tamaiti e tusi lava le ata o le tagata ia. A maea, ona faaali mai lea o a latou ata, ma fesili po o fea tamaiti e moni, po o ata po o e o lo o uuina pepa. Fesili i ai pe faapefea ona latou iloa.

Faamatala atu e pei lava ona moni i latou ona e i ai o latou tino, e moni foi le Tama Faalelagi ma e i ai lona tino. E mafai ona tatou vaavaai i ata o le Tama Faalelagi, ae peitai e le o le Tama Faalelagi moni lena. O le Tama Faalelagi e i ai se tino o aano ma ivi.

O Iesu Keriso E Foliga I Le Tama Faalelagi.

Fesili i tamaiti pe sa i ai se tasi na fai atu ia i latou e foliga uma lava i o latou matua. Faaali atu le Ata 1-3, Iesu le Keriso, ma faamatala atu o Iesu Keriso o le Alo o le Tama Faalelagi. O lo o tau mai i tusitusiga paia o Iesu e foliga i le Tama Faalelagi. Faaali atu le Tusi Paia ma faamatala atu le Ioane 14:9 i tamaiti.

  • O ai e soo i ai Iesu?

Gaoioiga:

Faatutu i luga tamaiti. Fesoasoani atu i ai ia tauloto le vaega muamua o le mataupu faavae o le faatuatua: “Matou te talitonu i le Atua, le Tama Faavavau, ma Lona Alo, o Iesu Keriso.”

Tatou Te Foliga I Le Tama Faavavau Ma Iesu

Ia faamatala atu, talu ai o tatou o fanau faaleagaga a le Tama Faalelagi, e faapena foi ona tatou foliga ia te ia. E i ai o tatou tino e pei o ia. Faamatala atu le Mose 2:27 i tamaiti. Faamatala atu o le foafoaina o i tatou i le faatusa o le Tama Faalelagi, o lona uiga tatou te foliga ia te ia.

Gaoioiga:

Ia auauai tamaiti e tilotilo i le fa’aata po o le tilotilo foi i se isi tamaitiiti. Ia tau mai e tamaiti taitoatasi se vaega o le tino o lo o ia vaaia, e pei o lima, vae, mata, po o taliga. Ia faamatala atu e i ai foi na vaega o le tino i le Tama Faalelagi ma Iesu.

Gaoioiga:

  • E i ai ni o outou tino e pei foi o le Tama Faalelagi ma Iesu?

Faamatala atu ua tatou iloa foliga o le Tama Faalelagi ma Iesu aua ua i ai ni perofeta (taitai o le Ekalesia) ua latou vaai i le Tama Faalelagi ma Iesu ma ua latou tusia ni faamatalaga e uiga ia te i laua i tusitusiga paia.

Tala:

Faaali atu Ata 1-4, O Le Uluai Faaaliga. Faamatala atu le tala i le Uluai Faaaliga, o lo o maua i le Iosefa Samita 2:14–17.

Tala:

  • Na faapefea ona iloa e Iosefa Samita foliga o le Tama Faalelagi ma Iesu?

  • O a ituaiga tino e i ai tino o Iesu ma le Tama Faalelagi?

Molimau:

Ia tuuina atu lau molimau i lou agaga fiafia ma le faafetai ina ua e maua se tino sa faia i foliga o le Tama Faalelagi. Ia faaali atu foi lou agaga faafetai ona o mea matagofie e tele e mafai e lou tino ona fai.

O Isi Gaoioiga E Faamauoa Ai

Filifili nisi o gaoioiga e fai i le taimi o le lesona.

  1. Faatutu i luga tamaiti ma fai faatasi faatele le solo lea, ma fai taga e pei ona faamatala atu:

    E i ai lo’u tino manaia

    E i ai lo’u tino manaia (tuu lima i le fatafata)

    O le Tama o i le Lagi na ia faia

    O taliga e faalogo ai (faaofuofu lima i taliga)

    Ma mata e vaai ai (tusi lima i mata)

    O lima e lua e patipati ai (patipati lima)

    Ma vae e lua e feliuliuai ai (liliu faataamilo)

    A ou manaomia, e mafai ona ou tago

    I ou tamai vae i lalo(punou i lalo ma tago i tamatamai vae).

    A ou mafaufau i lo’u tino (tuu le lima i le ulu)

    O le mea sili ona tupito(nofo filemu i lalo)

    O le Tama Faalelagi lava na Ia fai

    Ina ia ou foliga i ai.

  2. Fesoasoani i tamaiti e usu pe fai foi upu o le “Ulu, Tauau, Tulivae, Tamaivae” (Tusi Pese a Tamaiti). Ia faamanatu atu i tamaiti ua tuuina mai e le Tama Faalelagi ia te i tatou tino e pei o ia ma e mafai e nei tino matagofie ona faia mea e tele.

  3. Ia auauai tamaiti e faaaoga ata 1-4, O Le Uluai Faaaliga, ia faamatala atu le tala o le Uluai Faaaliga i le vasega.

  4. Faamatala atu le tala ia Maki ma le gaoioiga a lo latou aiga:

    Na maliu le tama o Maki a o pepe o ia. E masani ona tau manatunatu Maki pe faapeī foliga o lona tama. Sa o atu i laua ma lona tina i se gaoioiga faaleaiga, o le a mafai ai ona feiloai ma talanoa atu i uso ma tuafafine o lona tama latou te iloa lelei lava lona tama.

    Ina ua taunuu, sa faafeiloaia i laua e Uncle Joe. Sa ia tilotilo atu ia Maki ma faapea, “E le faigata ona ou iloa oe. E pei uma lava o mata o lou tama ou mata.” Sa faapea mai foi Aunty Elisapeta, “E te iloa Maki, e faapena uma lava le isu o lou tama e pei o lou isu.” Sa fai mai Aunty Mary, “Maki, ou te manatua lava lou tama pe a e ata.”

    A o la agai atu i le fale, sa fai atu le tala a Maki i lona tina, “E ese lo’u fiafia i lenei aso. Ua tele mea ua ou aoaoina e uiga i lo’u tama i le asō. Sa ou aoaoina i le asō, ou te soo uma lava i lo’u tama, ma o le mea lena ua ou fiafia ai lava! O le mea lea, o le a ou manatua lava o ia pe a ou tilotilo i le fa’aata, ma o le a le galo ia te au. Sa tago atu lona tina ma popo le lima o Maki ma faapea atu, “O lou i ai faatasi ma au, o le a le galo ai lava ia te au o ia.”

    Faamatala atu i tamaiti, e pei lava ona iloa e Maki e foliga o ia i lona tama e tusa lava pe le o mafai ona vaai ia te ia, e faapena foi ona tatou iloa tatou te foliga i lo tatou Tama Faalelagi e tusa lava pe le o mafai ona tatou vaai i ai.

Gaoioiga Faaopoopo Mo Tamaiti Laiti

  1. Faaali atu le ata 1-4, O Le Uluai Faaaliga. Faamatala atu i ni upu faigofie le tala o le Uluai Faaaliga. Ia faamamafa atu o Iesu Keriso ma le Tama Faalelagi o ni tagata moni lava ma o lo o faafofoga mai i a tatou tatalo.

  2. Faaaoga le ata 1-4, O Le Uluai Faaaliga, e faailoa atu ai e tutusa lelei o tatou tino ma tino o le Tama Faalelagi ma Iesu. A o e tusi atu lou lima i se vaega o le tino o lo o i le ata, ia faapena foi ona tusi lima o tamaiti i vaega lava na o o latou lava tino. Mo se faataitaiga, a e tusi i le lima (aao) o le Tama Faalelagi, ia tusi foi lima o tamaiti i o latou lava lima.

  3. Fesoasoani i tamaiti e fai taga i le gaoioiga lea a o e faia upu:

    Sa tootuli Iosefa i le togavao (tootuli i lalo ma piilima)

    Ma sa ia faia se tatalo, (tuu le limatusi i laugutu)

    Sa ia vaaia le Alo ma le Tama (tilotilo i luga, tuu le lima i luga e faamalumalu i luga ae tonu o mata)

    Ma ia faalogologo ai ia te i laua iina. (faaofuofu lima i taliga)

  4. Tusi i lou gutu ma fai upu ia, “O lo’u gutu lea.” Ona e fesili atu lea, “E mafai ona outou faasino mai o outou gutu?” ma fesoasoani i tamaiti e faasino o latou lava gutu. Fesili, “E i ai se gutu (fofoga) o le Tama Faalelagi? Toe fai ae faaaoga ma taliga, lima, ma vae. Ona tusi lea i vaega eseese o le tino e aunoa ma le taua o le igoa ae tau mai e tamaiti.