Lesona 42

O Au O Se Tasi O Le Ekalesia a Iesu Keriso o le Au Paia o Aso e Gata Ai

Faamoemoega

Ia fesoasoani ina ia malamalama tamaiti taitoatasi o ia o se tasi o le Ekalesia a Iesu Keriso o le Au Paia o Aso e Gata Ai.

Sauniuniga

1. Aoao ma le agaga tatalo le Mareko 1:9–11; Mataupu Faavae ma Feagaiga 115:4; ma le Iosefa Samita 1:5, 10–19. Toe vaai foi i le Mataupu Faavae o le Talalelei (31110), mataupu 17.

2. ‘Oti’oti se pepa tele po o se (posterboard) i ni tama’i ‘otiga pepa teuteu pe faamatipitipi foi ia tusa ma le toatele o le vasega (tamaiti ma faiaoga). Tusi igoa o tamaiti taitoatasi i luga o fasi pepa o le paso.

3. O mea e faaaogaina:

   1. O se seti o tusitusiga paia.

   2. Ata 1-4, O le Uluai Faaaliga (Taga o Ata o le Talalelei 403;62470); ata 1-8, O le Tufatufaina Atu o le Faamanatuga (62021); ata 1-12, O Se Teine O Lo o Faamauina (62020); ata 1-18, O Ioane le Papatiso O Lo o Papatisoina Iesu (Taga o Ata o le Talalelei 208;62133); ata 1-39, O Le Faamanuiaina o se Pepe; ata 1-40, O Le Faauuina o se Ma’i (62342); o se ata o le perofeta soifua.

4. Ia faia sauniuniga talafeagai ai mo so o se Gaoioiga e Faamauoa Ai e te manao e faaaoga.

Gaoioiga e Aoao Ai

Tofi se tamaitiiti e faia le tatalo amata.

Gaoioiga e Faatosina Mai Ai:

‘U’u i luga le fasipepa o le paso o lo o i ai lou igoa. Fai i tamaiti o se vaega o le paso. Tufa isi fasipepa o le paso ma fesoasoani i tamaiti e tuu faatasi. Faitau i tamaiti igoa taitasi a o lo o tusi i ai lou lima. Faamalamalama e pei lava ona avea fasipepa taitasi ma vaega o le paso, e faapena foi ona avea tamaiti taitoatasi ma vaega o lenei vasega.

Gaoioiga e Faatosina Mai Ai:

• O a isi mea o lo o avea ai oe ma vaega?

Faamalamalama o lo o avea foi i tatou ma vaega o isi faalapotopotoga, e pei o se aiga po o se tuaoi. O i tatou foi o vaega o le ekalesia a Iesu.

Faaali le ata 1-39, O le Faamanuiaina o se Pepe.

Gaoioiga e Faatosina Mai Ai:

• O le a le mea lea e tupu i lenei ata?

Faamalamalama i tamaiti o le toatele lava o i latou sa maua se igoa ma se faamanuiaga a o pepe. Talu ai lenei faaigoaina ma le faamanuiaina, sa tuuina ai o latou igoa i faamaumauga a le Ekalesia ma ua mafai ai ona latou faapea, “ O au o se tasi o le Ekalesia a Iesu Keriso o le Au Paia o Aso e Gata Ai.”

Fesoasoani ia faifai pea e tamaiti le “O au o se tasi o le Ekalesia a Iesu Keriso o le Au Paia o Aso e Gata Ai.”

Gaoioiga

Fai faatasi ma tamaiti le fuaiupu faagaoioiga lea, “Ua Ou Fiafia Lava Ina Ua Ou Sau I Le Lotu I Lenei Aso Sa”:

Ua ou fiafia lava ina ua ou sau i le lotu i lenei aso (ia fai le tumutumu o le falelotu i le faapipii faatasi lea o tumutumu lima o tamatamai lima o lima uma e lua).

Ou te aoao ai ina ia iloa ona faalogo (faaofuofu le lima ma faataamilo i le taliga.)

Ma ia faapea ona tatalo (piilima ma punou le ulu).

Ou te aoao ia Iesu i luga (tusi i luga).

Ou te mafaufau ia Iesu ma lona alofa (fusi oe lava).

Faamalamalama i tamaiti, tatou te o mai i sauniga faalelotu e aoao atili ai ia Iesu ma mea e finagalo tatou te faia. Tau i ai, o le a tatou aoaoina nisi o mea taua i lenei lesona, o se vaega o le ekalesia a Iesu.

O le ekalesia a Iesu e i ai le perisitua

Faaali le ata 1-8, O Le Tufatufaina Atu o le Faamanatuga; ata 1-12, O se Teine O Lo o Faamauina; ma le ata 1-40, O Le Faauuina o e Mamai. Fai i tamaiti e faamatala mai pe latou te iloa mea o lo o tutupu i ata taitasi. Faamalamalama e manaomia le perisitua e faia ai mea taitasi o nei mea. O le perisitua o le mana lea o lo o i le Tama Faalelagi ma Iesu. La te faasoaina mai lenei mana i alii amiotonu ina ia mafai e nei alii ona fesoasoani i le faia o le galuega a le Tama Faalelagi ma Iesu i le fogaeleele. Tusi lou lima i le tagata o lo o umiaina le perisitua i ata taitasi. Fai i tamaiti e faifai pea le upu perisitua.

• O ai e te iloa o lo o umiaina le perisitua?

Fesoasoani ia malamalama tamaiti o i latou o e umia le perisitua, e mafai ona latou faamanuiaina ma tufatufaina le faamanatuga, papatiso, tuuina atu faamanuiaga i tagata, ma latou faia isi mea taua. Toe faaali le ata 1-39, O Le Faamanuiaina o se pepe, ma faamatala i tamaiti o pepe e faamanuiaina e i latou o lo o umia le perisitua.

Tala

Faaali le ata 1-18, O Ioane le Papatiso O Lo o Papatisoina Iesu. Tuu e faamatala mai e tamaiti mea o lo o latou manatua e uiga i le ata. Faamanatu otooto le tala e pei ona maua i le Mareko 1:9–11.

Tala

• O ai o lo o papatisoina Iesu? (Tagai i le Mareko 1:9.)

• O le a le mana sa tatau ona maua e Ioane e mafai ai ona ia papatiso Iesu? (O le perisitua.)

Faamalamalama atu o le papatisoina e se tasi ua i ai le perisitua, o se vaega taua lea o le i ai i le ekalesia a Iesu. Fai i tamaiti afai e valu loa o latou tausaga, o le a mafai loa ona papatisoina e avea ma uso o le ekalesia a Iesu.

O le ekalesia a Iesu e i ai se perofeta

Tala

Faaali le ata 1-4, O Le Uluai Faaaliga, ma faamatala le tala ia Iosefa Samita ma le Uluai Faaaliga, o loo maua i le Iosefa Samita 1:5, 10–19.

Tala

• O ai na o mai e talanoa ia Iosefa Samita i le togalaau? (Tagai i le Iosefa Samita 1:17.)

Faamatala atu talu ai o le Tama Faalelagi ma Iesu sa talanoa ma Iosefa Samita, tatou te taua Iosefa Samita o se perofeta. O se perofeta na te tauina mai mea e finagalo le Tama Faalelagi ma Iesu tatou te faia.

Pese

Fesoasoani i tamaiti e usu le pese pe tauloto upu o le tali o le pese: “Mulimuli i le Perofeta” (Tusi Pese a Tamaiti). Faamalamalama o le ta’ase, o lona uiga o le faia o mea sese. Ia ‘u’u e se tamaitiiti i luga le ata o le perofeta soifua a o usuina le:

Mulimuli i le perofeta, mulimuli i le perofeta, mulimuli i le perofeta; aua le taase.

Mulimuli i le perofeta, mulimuli i le perofeta, mulimuli i le perofeta; na te iloa lelei.

O le ekalesia a Iesu e i ai tusitusiga paia

Tuu i luga tusitusiga paia.

• O a nei mea e i lo’u lima?

Tuu i tamaiti latou te faamatala mai ni mea latou te iloa e uiga i tusitusiga paia. Faamanatu atu ia te i latou o tusitusiga paia o lo o i ai aoaoga a le Tama Faalelagi ma Iesu. E tele tala moni o lo o i ai i tusitusiga paia e uiga ia Iesu, o perofeta, ma isi tagata. O tusitusiga paia o se vaega taua o le ekalesia a Iesu.

O i tatou o nisi o le Ekalesia a Iesu Keriso o le Au Paia o Aso e Gata Ai

• O le ekalesia a ai tatou te i ai?

• O le a le igoa o le ekalesia tatou te i ai?

Faitau le Mataupu Faavae ma Feagaiga e 115:4 i tamaiti. Faamalamalama o le uiga o lenei igoa, o le ekalesia a Iesu i le taimi lenei o lo o tatou ola ai. Fesoasoani ia malamalama tamaiti e tele naua tagata i le lalolagi atoa e auai i le Ekalesia a Iesu Keriso o le Au Paia o Aso e Gata Ai.

Atonu e te manao e faamalamalama atu e i ai isi ekalesia i le fogaeleele i aso nei o lo o latou aoao atu e uiga ia Iesu ma o lo o latou aoao atu foi tagata ia ola i ni olaga lelei, ae peitai, e le o ia te i latou le perisitua, se perofeta soifua, po o tusitusiga paia uma.

Gaoioiga

Fai atu i tagata uma e auai i le ekalesia a Iesu e tutu i luga. Faamanatu i tamaiti e tatau ona tutu uma lava i luga. Ia toe fai faatasi e tamaiti le faaupuga lea, “O au o se tasi o le Ekalesia a Iesu Keriso o le Au Paia o Aso e Gata Ai.”

Faaaoga ata ma tusitusiga paia e toe faamanatu otooto ai o le perisitua, se perofeta soifua, ma tusitusiga paia o vaega taua o le ekalesia a Iesu.

Molimau

Tuuina atu lau molimau i le moni o le talalelei. Fesoasoani i tamaiti ia latou lagona le taua ma le matagofie o le auai i le ekalesia moni a Iesu.

O Isi Gaoioiga e Faamauoa Ai

Filifili nisi o nei gaoioiga e faaaoga i le taimi o le lesona.

1. Fai ni pine e tusia ai faaupuga ia, O au o se tasi o le Ekalesia a Iesu Keriso o le Au Paia o Aso e Gata Ai, e faapipii i ofu o tamaiti pe a o i le fale. Fai i tamaiti e valivali a latou pine.

2. Fai faatasi ma tamaiti le tala lea e faaaoga ai tamatamai lima:

   O le Fale Lotu Lenei

   Fale lotu lenei, (faafelavesai ou tamatamai lima ma tapuni ou alofi lima.)

   Fale logo lena (faapipii faatasi tumutumu o limatusi).

   Tatala faitotoa (tatala ou alofilima ae felavesai ou tamatamai lima.)

   Ma vaai i tagata (faatetetete ou tamatamai lima).

3. Faamatala se tala e uiga i se tamaitiiti o le Ekalesia a Iesu Keriso o le Au Paia o Aso e Gata Ai o lo o alu i le lotu. Ia aofia ai gaoioiga e faamata e fai e tamaiti o lau vasega e pei o le, nonofo faatasi ma o latou aiga i le sauniga o le faamanatuga, tago atu i le faamanatuga, nonofo filemu i le Peraimeri, tatalo, ma le usuina o pese.

   E mafai foi ona mafaufau tamaiti i nei mea e ala i lou fai atu o fesili e pei o le, “O a mea e tatau ona fai e tamaiti o le Ekalesia i Aso Sa?” “O a mea e tatau ona latou faia i sauniga o le faamanatuga? I le Peraimeri? “O a mea e tatau ona latou faia i le Aso Sa?” “O a mea e tatau ona latou faia i afiafi faaleaiga?” “O a amio e tatau ona latou faia i o latou aiga? a latou uo?” Fesoasoani i tamaiti ia malamalama i mea e ao i tamaiti ma teineiti o le ekalesia a Iesu ona latou faia.

4. Ia mafaufau tamaiti i faalapotopotoga latou te auai, e pei o le aiga, po o se vasega o le Peraimeri. Fai i tamaiti e faamatala mai pe o le a se mea e fiafia ai i faalapotopotoga taitasi. Ia faauma lenei talanoaga i mea tou te fiafia ai i le avea ai lea outou ma uso o le Ekalesia a Iesu Keriso o le Au Paia o Aso e Gata Ai.

5. Usu pe tauloto upu o le “O le Ekalesia a Iesu Keriso” (Tusi Pese a Tamaiti).

O Gaoioiga Faaopoopo mo Tamaiti Laiti

1. A o le i amataina le vasega, tusi ni ata faigofie se fa-se mata, se lima, se taliga, ma se gutu-i ni fasipepa eseese.

   Fai i tamaiti e tele mea e mafai ona tatou faia i le lotu. (Faapipii i luga le ata o le mata.) E mafai ona tatou faitauina tala mai tusitusiga paia. (Faapipii le ata o le lima.) E mafai ona tatou taaalo lelei ma a tatou uo. (Faapipii le ata o le taliga.) E mafai ona tatou faalogologo ma le faaeteete i o tatou faiaoga. (Faapipii le ata o le gutu.) E mafai ona tatou talanoa lemu a o tatou i ai i totonu o le fale lotu. Auaua’i mai tamaiti e faasino se ata se tasi. A o tusi le lima o le tamaitiiti i le ata, toe ta’u atu i ai le mea o lo o ta’u mai i lena ata.

2. Fesoasoani i tamaiti e usu le pese: “Tala o le Tusi a Mamona” (Tusi Pese a Tamaiti), ma faia ni taga e pei ona ta’u mai i upu. Pe savavali faafitafita faataamilo tamaiti i le potu a o usuina le pese.