Lesona 3

O Le Fuafuaga A Le Tama Faalelagi Mo I Tatou

Faamoemoega

Ia fesoasoani i tamaiti taitoatasi ia malamalama sa tatou nonofo faatasi ma le Tama Faalelagi, o ni fanau faaleagaga, ae tatou te le i o mai i le lalolagi, ma e mafai foi ona tatou toe nonofo faatasi ma ia pe a mavae lenei olaga.

Sauniuniga

1. Ia suesue ma le agaga tatalo le Aperaamo 3:22–27. Ia tagai foi i le Mataupu Faavae o le Talalelei (31110), mataupu e 2.

2. O mea e faaaogaina:

   1. Seti o tusitusiga paia.

   2. Se pepe taalo po o se ata e ‘oti i se pepa.

   3. Ata 1-1, O Le Lalolagi (62196); ata 1-3, O Iesu Keriso (Taga o Ata o le Talalelei 240; 62572); ata 1-5, O se Aiga E I Ai Se Pepe (62307); ata 1-6, O Se Afiafi Faaleaiga (62521); ata 1-7, O se Aiga Fiafia; ata 1-8, O le Tufatufaina o le Faamanatuga (62021); ata 1-9, Tatalo i le Taeao (62310); ata 1-10, Tatalo Faaleaiga (62275); ata 1-11, O Se Tamaitiiti o lo o Papatisoina (62018); ata 1-12, O Se Teineitiiti o lo o Faamauina (62020); ata 1-13, Iosefa Samita (Taga o Ata o le Talalelei 400; 62449).

3. Ia faia sauniuniga e talafeagai ai mo so o se Gaioiga E Faamauoa Ai e te manao e faaaoga.

Gaoioiga E Aoao Ai

Tofi se tamaitiiti e faia le tatalo amata.

Gaoioiga e Faatosina Mai Ai:

Tuu le pepe taalo po o le ata na ‘oti mai i se pepa i luga o se nofoa i tafatafa o tamaiti. Fai i tamaiti e tutu i luga, liliu, ma toe nonofo i lalo.

Gaoioiga e Faatosina Mai Ai:

• Aisea na le tu ai i luga le pepe taalo?

• Aisea e mafai ai ona outou tutu i luga?

Talanoa i eseesega o tamaiti ma le pepe taalo. Fesoasoani i tamaiti ia malamalama o latou o lo o ola. Ua tofu i latou ma le agaga i totonu o o latou tino e mafai ai ona ola ma mafai ai ona vaai, lagona, tutu, gaoioi, mafaufau, ma tautala.

O i tatou o fanau faaleagaga a le Tama Faalelagi

Toe talatalanoa ma tamaiti i le ituaiga olaga sa tatou i ai ma le Tama Faalelagi o ni ana fanau faaleagaga ae tatou te le i fananau mai i le lalolagi. Sa tatou fiafia, ma sa tatou fiafia foi e nonofo faatasi ma le Tama Faalelagi. Sa leai ni o tatou tino faitino e pei ona i ai nei, ae ua na o agaga. Faamatala atu o se agaga e pei lava o se tino faitino ae leai ni aano ma ni ponaivi.

• O fea sa outou nonofo ai ae tou te le i fananau mai i le lalolagi?

Pese:

Usu faatasi ma tamaiti le pese “O Au o se Atalii o le Atua” (Tusi Pese a Tamaiti). Faamanatu i tamaiti o le Atua o le tasi lea suafa o le Tama Faalelagi.

O au se atalii o le Atua,

Ua na auina mai au nei,

Ia ou nofo ai i lenei lalolagi

Ma matua agalelei.

Tago mai, savali mai i ou tafatafa

Ina nei ou sese

Aoao mai i mea e ao ona fai

Ia ou toe foi atu ai.

Gaoioiga:

Faatu se tamaitiiti i ou tafatafa. Faaaoga le igoa o le tamaitiiti, ma faamatala atu sa la nonofo faatasi ma le Tama Faalelagi a o le i fanau mai o ia i le lalolagi, ma o ia o se atalii/afafine faaleagaga e alofagia e le Tama Faalelagi. Ia fai pea lena gaoioiga ma tamaiti taitoatasi uma lava.

Faamatala atu, talu ai e alofa le Tama Faalelagi ia i tatou, ua ia faia ai se fuafuaga mo i tatou. A o le i faia le lalolagi, sa faapotopotoina e le Tama Faalelagi ana fanau uma lava ma faamalamalama atu i ai lana fuafuaga. O i tatou uma lava, o o tatou matua, ma o tatou uso ma tuagane sa i ai iina.

Ua auina mai i tatou e le Tama Faalelagi ina ia tatou nonofo i le lalolagi.

Faaali atu le ata 1-1, O Le Lalolagi. Faamatala atu o le lalolagi o se vaega o le fuafuaga a le Tama Faalelagi. I lalo o le taitaiga a le Tama Faalelagi, sa fausia ai e Iesu Keriso le lalolagi mo i tatou. Sa auina mai i tatou ina ia tatou fananau iinei ma maua ai o tatou tino faitino.

Faaali le ata 1-5, O Se Aiga E I Ai Se Pepe. Tuu tamaiti e talatalanoa e uiga i le ata. Tau i ai, sa tatou naunau lava tatou te o mai i le lalolagi e aoao ma ola ai. Sa tatou o mai i le lalolagi o ni pepe i ni aiga o le a alolofa ma tausi i tatou.

Tau i tamaiti, ina ua tatou o mai i le lalolagi, sa aumaia ia i tatou ni tino faitino ma ni pau, musele, toto, ma ni ponaivi. Fai i tamaiti e fetagofi i o latou lava lima.

• O mafai ona outou tau atu i ponaivi o o outou lima?

• O mafai ona outou iloa ma pa’i i o outou pau?

• O mafai ona outou pa’i atu i o outou musele?

Faamanatu i tamaiti o agaga i totonu o o tatou tino o lo o maua ai e i tatou le ola, ae peitai e le mafai ona tatou iloa pe pa’i i o tatou agaga. E mafai ona vaaia ma pa’i i o tatou tino faitino. Tau i tamaiti, o se faamanuiaga tele le maua o se tino faitino.

Gaoioiga:

Fai faatasi ma tamaiti le solo lea. Ia tusi i vaega taitasi o le tino pe a tau.

Ou Te Faafetai Mo Ou Mata

Ou te faafetai mo ou mata,

Lou isu, lou gutu ma ou taliga;

Ou te faafetai mo ou vae, ogavae ma tamatamai vae,

Ou ogalima, ou lima ma ou tamatamai lima.

(Na aumai i se solo a Lucy Picco.)

Faamatala atu a o tatou i ai i lenei lalolagi, tatou te tuputupu ae ma aoao le tele o mea. Pe a tatou aoao e filifili le mea sao e fai, e mafai ona tatou faapei o lo tatou Tama Faalelagi ma Iesu. O se tasi lenei o vaega o le fuafuaga a le Tama Faalelagi.

E finagalo le Tama Faalelagi tatou te toe foi atu ia te ia i se aso.

Ia faailoa atu lou alofa i le Tama Faalelagi. Tau i tamaiti, e i ai se aso e te manao e te toe foi atu ai i le Tama Faalelagi ina ia mafai ona e vaai ia te ia ma toe mau faatasi ma ia. Faamalamalama atu o se tasi foi lena o vaega o le fuafuaga a le Tama Faalelagi. E finagalo o Ia ina ia toe foi atu i tatou uma taitoatasi e mau ma ia pe a uma lo tatou taimi e ola ai i le lalolagi. E finagalo o ia ia tatou foi atu, o o tatou matua, ma o tatou aiga uma lava tatou te toe mau faatasi ma ia.

Ia faamalamalama atu, ina ia tatou toe mau faatasi ma le Tama Faalelagi ma Iesu, e tatau ona tatou papatiso ma tausia poloaiga uma. Faaali atu le seti o tusitusiga paia. Faamatala atu o tusitusiga paia ua aoao mai ai i tatou e uiga i le Tama Faalelagi ma Iesu ma mea o lo o finagalo tatou te faia.

Faaaoga ata o lo o i le vaega o “Sauniuniga”, talanoa i mea o lo o finagalo le Tama Faalelagi tatou te aoaoina ma faia i lenei lalolagi. E finagalo o ia ina ia tatou alolofa i o tatou aiga, aua le manatu faapito, ia tatou o i le lotu, talia le faamanatuga, tatalo i le taeao ma le afiafi, faia tatalo faaleaiga ma afiafi faaleaiga, ia papatiso, ia faamauina ma ia maua le Agaga Paia, ia faaipoipo i le malumalu, aoao e uiga i perofeta, ma ia faapei o le Tama Faalelagi ma Iesu.

Molimau:

Ia faaali atu lou agaga faafetai i le Tama Faalelagi ma lana fuafuaga mo i tatou. Ia uunai tamaiti ina ia latou faia pea lava pea mea latou te iloa e sa’o ina ia i ai se aso e mafai ai ona toe foi atu ma mau faatasi ma le Tama Faalelagi ma Iesu.

O Isi Gaoioiga E Faamauoa Ai

Filifili nisi o nei gaoioiga e faaaoga i le taimi o le lesona.

1. Ia tufatufa ia tofu le tamaitiiti ma le fasipepa ua e tusia ai le “O au o se atalii/afafine o le Atua”, ma ia tusia ai e le tamaitiiti/teineitiiti lona ata. Ia faaali atu e le tamaitiiti lana lava ata i le vasega. Uunai tamaiti taitoatasi e tau atu pe fai atu se faamatalaga lelei e uiga ia te ia lava a o faaali atu le ata.

2. Fesoasoani i tamaiti e fai le solo lea ma fai taga o lo o faatonuina:

   O Mea Na Faia E Le Atua:

   Na faia e le Atua le masina (fai se li’o i lima)

   Ma fetu e fepulafi (faamatala ma faamomoe lima)

   Ma tuu i le lagi. (faaloloa i luga lima)

   Sa na faia le la (faalapotopoto lima i luga a’e o le ulu)

   Ma laau (faasasao i luga lima)

   Ma fugalaau (faaofuofu lima)

   Ma manu laiti e felelei (talotalo lima).

   (Mai le Fascinating Finger Fun, by Eleanor Doan. Copyright © 1951. Used by permission.)

3. Tusi fesili nei i se isi fasipepa. Toe vaavaai i le lesona e ala i le tuuina atu i tamaiti taitoatasi e filifili se fasi pepa. Faitau le fesili ma tuu i le tamaitiiti e tali i ai. Toe fai le gaoioiga pe a talafeagai e tuuina atu i tamaiti taitoatasi le avanoa.

   1. O ai se atalii o le Atua? (O au; o tagata uma lava)

   2. O fea na tatou nonofo ai ae tatou te le i fananau mai i le lalolagi? (I le lagi ma le Tama Faalelagi ma Iesu)

   3. Aisea na poloaiina ai Iesu e le Tama Faalelagi e faia le lalolagi mo tatou? (Ina ia mafai ona maua o tatou tino faitino ma aoao mea e tatau ona tatou faia ina ia tatou toe mau faatasi ma le Tama Faalelagi ma Iesu.)

   4. O a mea e tatau ona tatou faia ina ia tatou toe nonofo faatasi ai ma le Tama Faalelagi ma Iesu? (Usitai i poloaiga, aua le manatu faapito, ia papatiso, alu i le malumalu, ma isi mea. Fai i tamaiti e faaali ata e fetaui a o latou taliina nei fesili.)

   5. O ai e mafai ona tatou nonofo faatasi pe a uma lenei olaga? (O le Tama Faalelagi ma Iesu ma o tatou aiga.)

Gaoioiga Faaopoopo Mo Tamaiti Laiti

1. A maua mai se faatagaga mai le peresitene o le Peraimeri, valaaulia se tama e aumai sona atalii pepe i le vasega. Talanoa i le alolofa o tama i a latou fanau. Tau i tamaiti e toalua o latou tama e alolofa ia i latou: o lo latou tama i le lalolagi ma lo latou Tama Faalelagi. A o le i fananau mai pepe i le lalolagi, sa nonofo ma le Tama Faalelagi. (Faaaliga: Ia faaeteete i tulaga o tamaiti i lau vasega, o nisi o i latou atonu e leai ni tama i o latou aiga.)

2. Aumai se pea po o ni pea seevae o “seevae o Papa” i le vasega. Talanoa po o ai e faaaogaina nei seevae lapopoa. Ia faatusatusa e tamaiti o latou lava seevae po o vae i seevae lapopoa. Ia tofu faataitai ona savavali tamaiti taitoatasi i “seevae o Papa.”

3. Fai laina e lua ia o le “Sa Ou Nofo I Le Lagi”.(Children’s Songbook, p.4)

   Ua leva ona ou nofo i le lagi i aso ua mavae, ioe;

   Nofo ai ma alofagia e tagata ou te iloa. Faapena foi ma oe.

   (Copyright © 1987 by Janeen Jacobs Brady. Used by permission.)

   • O ai na tatou mau faatasi i le lagi? (O le Tama Faalelagi ma Iesu ma tagata uma)

4. Fesoasoani i tamaiti e fai taga i le gaoioiga lea a o e faia upu. Pule oe pe faafia ona fai.

   Ia tutu tagata uma i se lio, ma uu lima. Ia uu lima i le gaoioiga atoa.

   Sa tatou nonofo faatasi ma le Tama Faalelagi (ia savavali agai i totonu uma tagata ma uu mai lima agai i le ogatotonu).

   Na ia auina mai i tatou e ola i le lalolagi (toe o agai i tua i se lio lapoa).

   Na ia aumaia ni aiga e alolofa ma tatou aoao ai (toe faapotopoto mai i totonu).

   O le a fesoasoani ia i tatou ina ia tatou toe nonofo faatasi ai (toe o agai i tua i se lio lapoa).