Lesona 19
Ou Te Faafetai Mo O’u Mata
Faamoemoega
Ia fesoasoani i tamaiti taitoatasi ia fiafia ma faafetai mo ona mata ma mea e mafai ona latou faia.
Sauniuniga
-
Ia suesue ma le agaga tatalo le Ioane 9:1–7 ma le 3 Nifae 11:1–17.
-
O Mea e faaaogaina:
-
O se Tusi Paia ma se Tusi a Mamona
-
Atigi filo e i ai se pu lapo’a ma se nonoa seevae po o se fasi manoa. (Afai e toatele lau vasega, ona aumai lea o mea e pei ona taua i luga ia sili atu i le tasi.)
-
O se solosolo po o se fasi ie e fusi ai mata.
-
Ata 1-43, Iesu o lo o Faamaloloina le Tauaso (Taga Ata o le Talalelei 213; 62145); ata 1-44, Iesu o lo o Aoao Atu i le Itu lalolagi i Sisifo (Taga o Ata o le Talalelei 316; 62380).
-
-
Ia faia sauniuniga e talafeagai ai mo so o se Gaoioiga e Faamauoa Ai e te manao e faaaoga.
Faaaliga i le Faiaoga: Ia mataalia i lagona o so o se tamaitiiti o lo o i ai i lau vasega e i ai mea e faaletonu i o latou tino. Ia tulimatai atu i mea e mafai e o latou tino ona fai, ae le o mea e le mafai ona latou faia.
Gaoioiga E Aoao Ai
Tofi se tamaitiiti e faia le tatalo amata.
Gaoioiga E Faatosina Mai Ai:
Ia faaali atu i tamaiti le faigofie tele o le tuiina o le nonoa o le seevae po o le manoa, i le atigi filo, a o pupula lelei mata. Ona e moeiini lea ma taumafai e tui le nonoa o le seevae i le atigi filo. Tuu atu i tamaiti taitoatasi le avanoa e taumafai ai ona fai lea gaoioiga.
O o tatou mata, o se faamanuiaga ia i tatou.
Faamatala atu, ua i ai o tatou mata ina ia mafai ai ona tatou faitau ma aoao, galulue ma taaalo, ma vaai i le lalolagi matagofie. Ia talanoaina ma tamaiti le tulaga ese ma le faigata semanu e i ai o latou olaga, pe ana fai e le mafai ona vaai.
Discuss with the children how their lives would be different if they could not see.
-
E faapefea ona ai a outou meaai?
-
E faapefea ona outou iloa ofu e faaaoga?
-
E faapefea ona e iloa lou ala e te savali ai i totonu o le potu?
Pese
Fesoasoani i tamaiti e fai upu o le pese: “E Lua Tamai Mata” (Children’s Songbook, p.268).
E lua tamai mata e emo, emo mai,
E lua tamai mata e vaai ai;
Ulu ma tauau, tulivae ma tamai vae;
Ma le tele o isi vaega o lo’u tino ua pae.
Tra la la la la la e,
E lua tamai mata e vaai ai,
E lua tamai mata, e emo, emo mai,
Ma le tele o isi vaega o a’u ua mafai.
(Mai le Merrily We sing, pule taofi @ 1948, 1975 Pioneer Press, Inc. O se vaega o le Jackson Music. Ua faaaogaina e tusa ma le faatagaga.)
Gaoioiga
Tuu atu i tamaiti e vaavaai atu i fafo i le faamalama (po o se ata matagofie) ma fai faapea o le taimi muamua lava lea faatoa mafai ona vaai ai. Ia valaauina i latou e talanoa e uiga i mea o lo o latou vaai i ai. Ia talanoa e uiga i lanu ma foliga. Fesoasoani i tamaiti ia latou iloa, o se faamanuiaga taua le mafai ona vaai.
Gaoioiga
-
O a nisi o mea e sili ona outou fiafia e vaai i ai?
Faamatala atu, o nisi tagata e le lelei tele o latou mata i le vaai. O tagata ia latou te faaaogaina tioata e fesoasoani ia i latou e vaai ai. O nisi tagata e tauaso ma e matua le mafai lava ona vaai i latou.
Gaoioiga
Ia talanoaina le tulaga e mafai ai e tagata tauaso ona feoa’i solo e aunoa ma le faaaogaina o tootoo po o taifau e taitaiina i latou. Ia fusi mata o se tamaitiiti e toatasi ona faatino lea o oe o le taifau leoleo. Ia tuu atu lou lima e pipii mai i ai le tamaitiiti e faapei o le fusipau o lo o i le ua o le taifau. Ia taitai le tamaitiiti faataamilo i totonu o le potu. Ia tuu atu i tamaiti e feauauai ane ia tofu ma le avanoa e fai ai ma tauaso po o le taifau.
Tala
Faaali atu le ata 1-43, Iesu o lo o Faamaloloina le Tauaso, ma faamatala atu le tala o Iesu o lo o ia faamaloloina le tagata tauaso, e pei ona i ai i le Ioane 9:1–7.
Tala
Ou te faafetai i le Tama Faalelagi mo o’u mata.
Gaoioiga
Ia faatutu i luga tamaiti ma ia outou toe faia faatasi le solo o lo o i lalo, ma ia tusi i vaega taitasi o le tino a o ta’ua:
Ou Te Faafetai Mo O’u Mata
Ou te faafetai mo o’u mata,
Lo’u isu, lo’u gutu ma o’u mata.
Ou te faafetai mo o’u vae ma ogavae,
O’u ogalima, ou lima ma o’u tamatamai lima.
(Siitia mai le solo sa saunia e Lucy Picco.)
Tala
Ia faasolo faataamilo le ata 1-44, Iesu o lo o Aoao Atu i le Itu Lalolagi i Sisifo, ma fai atu i tamaiti taitoatasi e faamatala ane se mea e tasi o lo o latou vaai i ai i le ata. Ia faamatala atu le tala o le asiasiga a Iesu i le itu lalolagi i sisifo, e pei ona i ai i le 3 Nifae 11:1–17.
Tala
-
O ai sa vaai i ai tagata?
-
O le a le lagona na oo i tagata ina ua latou vaai ia Iesu? (Tagai i le 3 Nifae 11:16–17.)
-
O le a le lanu o le ofu talaloa o Iesu? (Tagai i le 3 Nifae 11:8.)
Faamatala atu, atonu o le a le mafai ona tatou vaai ia Iesu i le tino e pei ona sa faia e le nuu o Nifae, e so o se taimi lava tatou te vaai ai i le lalolagi matagofie, ona mafai lea ona tatou manatua lona alofa ia i tatou.
Molimau
Ia faaali atu i tamaiti lou agaga faafetai mo ou mata. Ia faamatala atu le ala e mafai ona avea ai mea matagofie na foafoaina o lo o e vaai i ai i aso taitasi, e fai ma mea e te manatua ai le alofa o le Tama Faalelagi ma Iesu mo oe. Faamanatu atu i tamaiti e faafetai atu i le Tama Faalelagi mo o latou mata.
O Isi Gaoioiga E Faamauoa Ai
Filifili nisi o nei gaoioiga e faaaoga i le taimi o le lesona.
-
Ia fai atu i tamaiti e matua vaai lelei atu i mata o isi tamaiti taitoatasi, laumata, fulufulu mata, fulu mata. Faamatala atu, o laumata, fulufulu mata, ma fulu mata, e fesoasoani i le taofia mai o le pefu, palapala, ma le afu mai le oo ifo i o tatou mata.
-
A o lei amataina le vasega, ia faaaoga se pine maamaai e tui faapupu ai se li’o ma se sikuea i se pepa. Ia feauauai ane tamaiti taitoatasi o le vasega e fusi o latou mata, ma fai atu ia i latou e tago i pupu po o mea patupatu o le pepa, ma tau ane po o a foliga o na pupu o lo o i le pepa. Faamatala atu, e faapena uma lava tusitusiga patupatu, e faasolosolo ai luga tamatamai lima o tagata tauaso pe a latou faitau.
-
Ia faaaoga ni taga pepa e fai ai mata o loo pupula ma moeiini (vaai i le ata o lo o i ai i le faaiuga o le lesona) mo tamaiti taitoatasi. Ia tusi i luga o taga pepa taitasi upu nei. “Ou te matua faafetai mo o’u mata.” Tuu atu i tamaiti e vali mata ma tusi ata o lauulu i a latou taga pepa. Ia faaaoga mata ua i ai i taga pepa e fai ai faatasi ma tamaiti taga o taimi uma e pupula ma moeiini ai o tatou mata, e pei ona i ai i le taimi tatou te momoe ai, pe a tatou tatalo, ma le taimi pe a tatou fefefe foi.
-
Afai e mafai, ia ave tamaiti e faasavavali i fafo. Fai atu i tamaiti e piilima ma aua le pisa, ina ia latou tulimatai atu i le faaaogaina o latou mata. A oo ina toe foi ane i totonu o le vasega, ona tofi auauai ane lea o tamaiti e faamatala mea na latou vaai i ai.
Gaoioiga Faaopoopo Mo Tamaiti Laiti
-
Ia usu pe tauloto upu o le pese: “Saga o loo Papa” (Tusi Pese a Tamaiti.) Faamatala atu, o fuga mananaia o le laau o le moli e foliga mai o ni saga po o ni popikoni (popcorn).
-
Afai tou te vaai i fafo o le faamalama e pei ona ta’u mai i le pese, e mafai ona outou vaai i ni saga o lo o papa mai i luga o le laau o le moli? O a mea o lo o outou iloa atu pe a outou vaai atu i fafo o le faamalama? Ia fai atu i tamaiti e vaavaai atu i fafo o le faamalama, po o le ave foi i latou i fafo mo sina taimi puupuu. Ia toe foi ane i le vasega ma iloiloina mea na latou vaai i ai.
-
O a mea na outou faaaogaina e iloa ma vaai ai i ia mea? (Mata.)
Faamatala atu, e tatau ona tatou faafetai atu i le Tama Faalelagi mo o tatou mata.
-
-
Ia faatutu tamaiti i luga ma fai upu o le pese: “Tago I Ou Mata,” ma fai taga e pei ona tau mai i upu.
Tago i mata,
Tago i le isu,
Tago i taliga,
Tago i tamatamaivae,
Faaloloa ou lima.
I luga lava,
Faamaualuga atu,
Agai i le lagi.
Tuu ou lima
I luga o lou ulu.
Nofo filemu i lalo,
I lou nofoaga.
-
Ia faaali atu i tamaiti se mea itiiti. Fai atu i ai o le a e tuuina lena mea i totonu o se vaega o le potu, ona faaaoga lea o o latou mata e saili ai lea mea. Fai atu i tamaiti e moeiini, ona tuu lea o lea mea i se mea e mafai ona iloa atu ai ae aua foi nei aliali tele mai i fafo. Fai atu i tamaiti e pupula o latou mata ma ia saili lea mea e aunoa ma le pisapisao. Fai atu ia i latou e piilima pe a oo ina latou iloa lea mea. Faamanatu i tamaiti e tatau ona filemu lelei, ae sei tuu atu le avanoa i isi e saili ai lea mea i le faaaogaina o o latou mata. Ia fai pea lenei gaoioiga pe a manaomia.
