Lesona 9

Ou Te Faafetai Mo Vai

Faamoemoega

Ia fesoasoani ia maua e tamaiti taitoatasi le agaga faafetai i le Tama Faalelagi ma Iesu Keriso mo Vai.

Sauniuniga

1. Ia suesue ma le agaga tatalo le Kenese 1:9–10; Esoto 17:1–6; ma le Mataio 3:13–17.

2. O Mea e faaaogaina:

   1. O se Tusi Paia.

   2. Afai e mafai, ia i ai ni ata o ituaiga vai eseese, pei o vaituloto, vaitafe, ma sami.

   3. Ata 1-8, Tufatufaina o le Faamanatuga (62021); ata 1-11, Tamaitiiti o lo o Papatisoina (62018); ata 1-18, Ioane le Papatiso o lo o Papatisoina Iesu (Taga o Ata o le Talalelei 208;62133).

3. Ia faia sauniuniga e talafeagai ai mo so o se Gaoioiga E Faamauoa Ai e te manao e faaaoga.

Gaoioiga E Aoao Ai

Tofi se tamaitiiti e faia le tatalo amata.

Gaoioiga e faatosina mai ai:

Tofi se tamaitiiti e sau i luma o le vasega. Musumusu i lona taliga se gaoioiga e faaaoga ai le vai, pei o le fufuluina o nifo, fufuluina o lima, po o le fuiina o laau. Fai i le tamaitiiti e fai taga ae mate mai e le vasega. (Atonu e moomia lou faasinoina i tamaiti pe faapefea ona fai taga o mea taitasi.)

Ia tofu uma tamaiti ma le avanoa e fai ai taga.

Faapupula atu o gaoioiga uma lava sa faatinoina, e moomia ai le vai. Tau i tamaiti e tatau ona tatou faafetai atu i le Tama Faalelagi ma Iesu mo le aumaia o vai mo i tatou.

O le vai o se vaega taua o le Foafoaga

Faitau leotele ma faamalamalama le Kenese 1:9–10.

• Aisea e taua tele ai le vai ia i tatou?

• E faapefea ona maua e i tatou le vai?

Fesoasoani i tamaiti ia malamalama e tele ituaiga auala e maua mai ai le vai, e aofia ai vaituloto, vaitafe, sami, timu, ma le kiona. Faamatala o le kiona ma le aisa o vai ua malõ. Faaali atu ata o vai na e aumaia ma talanoa i auala e maua mai ai vai o le tou eria. Tau i tamaiti lou matua faafetai ona o vai o se tasi o vaega o le fuafuaga a le Tama Faalelagi.

Pese:

Usu le pese “Mea Malie E Fai” (Tusi Pese a Tamaiti). Faaaoga i ni fuaiupu ina ia tau ai e tamaiti mea latou te faaaogaina i ai vai; e pei o le tataina o lavalava, taele, po o le fufuluina o nifo.

Faatoa fai taga pe a tau upu.

E malie le tagamea, e malie, malie, malie,

E malie, le tagamea,

Malie, malie, malie!

(Copyright © 1963 by D.C. Heath and Company. Reprinted by permission.)

E tele mea tatou te manaomia ai le vai

• O le a le mea tatou te manaomia ai le vai? O le a le mea e faaaoga i ai?

Faamatala atu o meaola uma lava, e aofia ai tagata, manu, ma laau, e moomia le vai e ola ai. Afai e mafai, avatu i tamaiti sina ipu vai laitiiti e inu. Talanoa pe faapefea ona ola o tatou tino pe a aunoa ma le vai e inu.

• E faapefea ona maua vai e faaaoga e manu ma laau?

Faamatala atu e tatou te moomia foi le vai mo isi mea, e pei o le faamamaina o lavalava ma le faavelaina o meaai.

Sa tuuina atu e Iesu vai ia Mose ma le fanauga a Isaraelu i le toafa.

Tala:

Faamatala le tala ia Mose i lona aumaia o le vai mai le papa, e pei ona maua i le Esoto 17:1–6. Faamatala sa i ai tagata i se toafa matut° ma le vevela. Sa leai se vai iina.

Tala:

• O le a se mea semanu e tupu pe ana le maua ni vai e le fanauga a Isaraelu?

• Ua i ai se taimi e te matua fia inu ai lava? O le a sau faalogona ina ua e inu i se ipu vai malu pe a e fia inu?

E taua le vai i le Ekalesia

Tala:

Faaali le ata 1-18, Ioane le Papatiso o lo o Papatisoina Iesu. Faamatala le tala o le papatisoga o Iesu, e pei ona maua i le Mataio e:13–17.

Tala:

• O fea na papatiso ai Iesu?

• Na faapefea ona papatiso Iesu?

Faaali le ata 1-11, O Le Tamaitiiti O Lo o Papatisoina.

Tala:

• O fea e papatiso ai i tatou pe a atoa le valu o o tatou tausaga?

• Ua e vaai i se tasi o papatisoina?

Faataga tamaiti e talanoa e uiga i se mea e tupu pe a vaaia se tasi o papatisoina. Faamatala e tatau ona i ai se vai e papatiso ai.

Faaali le ata 1-8, O le Tufatufaina Atu o le Faamanatuga.

Tala:

• E faapefea ona tatou faaaogaina le vai i le sauniga o le faamanatuga?

Faaali atu lou agaga faafetai mo le vai ina ia mafai ai ona tatou papatiso ma talia le faamanatuga.

Molimau:

Faailoa atu lau molimau i le fuafuaga a le Tama Faalelagi ma lona alofa mo i tatou i lona aumaia lea o vai. Tau atu i tamaiti lou agaga faafetai i le Tama Faalelagi ma Iesu mo lenei meaalofa matagofie.

O Isi Gaoioiga E Faamauoa Ai

Filifili nisi o nei gaoioiga e faaaoga i le taimi o le lesona.

1. Faitau faatauloto faatasi ma tamaiti le fuaiupu lea, ma fai taga o lo o faatonuina:

   O Le Timu

   A fia feinu fugalaau

   Ma mamago lau (tatala lima ma sisii i luga ogalima)

   Ia toulu ane ia se timu

   I nai laau e faasusu ai (tuu mai i lalo lima ma faatetetete tamatamai lima)

   Ia toulu ifo i o (faatetetete mai lea itu i le isi itu)

   Ia toulu lata mai

   E susulu loa le la (sii ae ogalima i luga ae o le ulu ma faalapotopoto i se lio)

   Ua le toe i ai (tuu i tua o le tua lima).

2. Fesoasoani i tamaiti e usu pe fai upu o le pese: “Ua Timu Faasoloatoa” (Tusi Pese a Tamaiti) po o le “‘Foai, O A Si Auvai Lea” (Tusi Pese a Tamaiti)

3. Ia tusi e tamaiti taitasi se ata o se vai, pei o se vaituloto, vaitafe, po o se timu. Tusi i pepa a tamaiti taitasi, Ou te matua faafetai mo vai.

4. Faamatala mai e tamaiti pe faaaoga foi taga faag°g°, auala e mafai ai ona taaalo i le vai, e pei o le feausi, faasee i luga o le aisa, faia o se tagata kiona, po o le faapisipisi foi i vaivai.

5. Fesoasoani i tamaiti ia malamalama e fesoasoani le vai mo tatou e faamama ai mea. Ia faaaoga e tamaiti taga faagugu ae leai ni tala e faatino ai ni gaoioiga faamama e faaaoga ai le vai, e pei o le faia o se tagamea po o le fufuluina o lima.

Gaoioiga Faaopoopo Mo Tamaiti Laiti

1. Fai nisi o nei gaoioiga, pe fai uma foi, e fesoasoani ai i tamaiti e aoao auala eseese tatou te faaaoga ai vai:

   1. Ave sina vai laitiiti e faafeinu ai tamaiti taitoatasi. A o feinu tamaiti, faamatala i ai o le vai o se tasi lea o vaega o le fuafuaga a le Tama Faalelagi mo le lalolagi. E mafai ona tatou inuina vai pe a tatou fia feinu.

   2. Tuu sina vai laitiiti i se pesini ma fesoasoani i tamaiti taitoatasi e fufulu o latou lima. Toe faamanatu i ai sa fuafuaina e le Tama Faalelagi ma Iesu ia i ai vai mo i tatou. Faamatala e mafai ona tatou faaaogaina vai e faamama ai mea.

   3. Afai e mafai, ave i fafo tamaiti e tofu latou ma le laau e fui. A le o lena, aumai se laau i totonu o le vasega ma tuu i tamaiti taitoatasi e saasaa sina vai laitiiti i le laau. Faamatala e moomia foi e laau le vai e ola ma tupu ai.

2. Fai le gaoioiga lea a o mafaufau tamaiti faapea o la e timu-maamaa muamua, ona mamafa ai lea mulimuli.

   1. Popo faafetaui tumutumu o tamatamai lima.

   2. Popo faatasi lima.

   3. Popo tulivae, feauauai lima.

   4. Tatū vae i le fola o le fale.