E Mafai Ona Tatou Tatalo Faatasi Ma O Tatou Aiga

Faamoemoega

Ia fesoasoani ina ia malamalama tamaiti taitoatasi, o tatalo masani faaleaiga, e fesoasoani e aumai ai le aiga ia vavalalata le tasi i le isi faapea foi i le Tama Faalelagi.

Sauniuniga

Ia aoao ma le agaga tatalo le Alema 34:19–27 ma le 3Nifae 18:17–21. Tagai foi i le Mataupu Faavae o le Talalelei (3lll0), mataupu e 8.
O Mea e faaaogaina:
1. O se Tusi a Mamona.
2. Ata tipitipi 1-26, o le Tama; ata tipitipi 1-27, o le Tina; ata tipitipi 1-28, o se teine talavou, ata tipitipi 1-29, o se tama-ua oo i tausaga ua fetaui mo se misiona (e mafai foi ona maua ni ata tipitipi e foliga tutusa i le seti 1 Ata Tipitipi O Fesoasoani Vaaia a le Peraimeri.
3. Ata 1-10, Tatalo Faale-aiga (62275); ata 1-15, Faamanuiaina o Mea’ai; ata 1-44, O Iesu O Lo o Aoao Atu I Le Itu Lalolagi I Sisifo (Taga o Ata o le Talalelei 316; 62380).
Ia faia sauniuniga e talafeagai ai mo soo se Gaoioiga E Faamauoa Ai e te manao e faaaoga.

Gaoioiga E Aoao Ai

Tofi se tamaitiiti e faia le tatalo amata.

Gaoioiga e Faatosina Mai Ai:

Fai i tamaiti e faamatala mai se mea latou te faia faatasi ma o latou aiga. Tuu le avanoa e tali mai ai tamaiti taitoatasi. Ona faaali atu lea o le ata 1-10, O le Tatalo Faaleaiga.

Gaoioiga e Faatosina Mai Ai:

O le a le mea o lo o fai e lenei aiga?

Faamatala atu a tatou tatalo faatasi ma o tatou aiga, o lo o tatou faia se mea o lo o finagalo le Tama Faalelagi ma Iesu tatou te faia. O le tatalo faatasi o se aiga, ua taua o le tatalo faaleaiga.

E finagalo le Tama Faalelagi ma Iesu Keriso ina ia tatou tatalo faatasi ma o tatou aiga

Tala

Faaali atu le ata 1-44, O Iesu O Lo o Aoao Atu i le Itu Lalolagi I Sisifo. Faamatala e uiga ia Iesu Keriso ma lana asiasiga i sa Nifaē lea na ia poloaiina ai i latou ina ia latou tatalo, e pei ona faamatalaina i le 3 Nifae 18:17–21. Faaali atu i tamaiti le Tusi a Mamona ma faitau leotele le 3 Nifae 18:21. Fesoasoani i tamaiti ia malamalama e finagalo Iesu tatou te tatalo faatasi ma o tatou aiga. O le auala lava lea e tasi na faamanuiaina ai fanau a sa Nifaē e ala i tatalo faaleaiga, e mafai ai foi ona tatou manuia ai e ala i tatalo faaleaiga.

E mafai ona faia a tatou tatalo faaleaiga i aso uma

Faamalamalama e finagalo le Tama Faalelagi ma Iesu ina ia tatou tatalo ma o tatou aiga i taeao uma ma po. E masani lava, o le tama po o se tagata foi o lo o vaaia le aiga na te tofiaina se tasi e tatalo. So o se tasi lava o le aiga e mafai ona faia se tatalo faaleaiga.

O a taimi e tatau ai ona tatou tatalo faatasi ma o tatou aiga?
O ai e mafai ona faia se tatalo faaleaiga?

Pese

Usu pe faitau upu o le pese “Tatalo Faaleaiga” (Tusi Pese a Tamaiti).

Tatou tatalo atu
Tatalo faaleaiga
Faafetai i le Atua
Mo o tatou manuia.

Pese

O a a tatou upu e fai i tatalo faaleaiga?

Faamalamalama atu e tutusa lava mea tatou te fai atu ai i a tatou tatalo faaleaiga ma mea tatou te tau atu i a tatou lava tatalo i le taeao ma le po. Ae peitai, o tatalo faaleaiga, tatou te talanoa ai e uiga i mea tau le aiga atoa, ae le na o i tatou lava ia.

Toe vaavaai i mea o lo o tatou taua pe a tatou tatalo e ala i le faia o upu o le pese: “Ou te Tatalo ma le Faatuatua” (Children’s Songbook, p.14).

Ou te amata i le fai atu “Lo’u Tama e, oi le Lagi”;
Ou te faafetai ia te ia mo faamanuiaga ua ia aumai;
Ona ou aioi atu ai lea ma le faamaualalo mo mea ou te manaomia,
I le suafa o Iesu Keriso, Amene.

O a tatou upu e fai i le amataga o se tatalo?
O a tatou upu e fai i le faaiuga o se tatalo?
O le a se mea e tatau ona fai e tagata uma lava a o faia le tatalo?

Faamalamalama atu o le faia o le “amene” i le faaiuga o le tatalo, o lona uiga ua tatou ioe uma lava i mea sa taua i le tatalo.

Faaali atu le ata 1-15, O le Faamanuiaina o Meaai. Faamalamalama foi tatou te tatalo faatasi ma o tatou aiga pe a faamanuia a tatou meaai.

O upu tatou te faia pe a tatou talosia se faamanuiaga mo meaai? (Tatou te faafetai atu i le Tama Faalelagi mo meaai ma tatalo atu na te faamanuiaina meaai.)
O ai e mafai ona tatalo i le Tama Faalelagi e faamanuia meaai?

Toe faitau upu o le pese “Ou te Tatalo ma le Faatuatua”.

Tatou te maua faamanuiaga e tele e ala i le tatalo faatasi ma o tatou aiga

Tala

Faaaoga ata tipitipi 1-26 e oo i le 1-29, faamatala se tala e uiga i se aiga sa tatalo faatasi mo se tasi uso o le aiga o lo o faia sana misiona. E mafai ona e faaaogaina manatu o lo o i lalo:

O Katerina o se tamaitai talavou. Sa alofa tele o ia i lona aiga ma sa ia iloa foi e alolofa lona aiga ia te ia. O nisi o taimi e faamatala atu ai e lona tuagane matua o Paulo ni tala mai le Tusi Paia ma le Tusi a Mamona. Sa aoaoina e Paulo nei tusi aua sa manao o ia e alu i lana misiona ma faamatala atu ai i tagata.

I se tasi aso sa maua ai e Paulo se tusi. Ina ua ia tatalaina le tusi, sa fiafia tele o ia. “O le a ou alu i la’u misiona!” o lana tala lea. I ni nai vaiaso mulimuli ane, sa saunia lelei Paulo o le a alu. A o le i alu ese atu, sa tootutuli le aiga e faia la latou tatalo faaleaiga. Sa faafetai atu le tama o Katerina i le Tama Faalelagi mo faamanuiaga e tele ua maua e lo latou aiga ma le avanoa ua maua e Paulo e alu atu ai e fai lana misiona. Sa ia tatalo i le Tama Faalelagi e faamanuia Paulo, ia puipuia lelei o ia, ma ia fesoasoani ia te ia ina ia avea o se faifeau talai lelei. Sa maua e Katerina se lagona fiafia ona o le tatalo. Sa ia iloa o le a fesoasoani le Tama Faalelagi i le misiona a Paulo. Sa tatalo Katerina ma lona aiga mo Paulo i aso uma a o i ai o ia i le misiona.

Faamatala atu e mafai ona tatalo faatasi aiga mo se tasi o lo o mai, mo se fesoasoani i se faafitauli a le aiga, mo se faifeau talai o lo o manaomia le fesoasoani a le Tama Faalelagi, ma isi lava mau mafuaaga. Faamatala atu e mafai ona tatou tatalo atu mo so o se mea lava e taua ia te i tatou. Faaaoga le Alema 34:19–27 e fesoasoani ai i tamaiti ia malamalama i taimi e tatau ai ona tatalo.

Toe faitau leotele le 3 Nifae 18:21. Faamanatu i tamaiti sa folafola mai e Iesu o le a manuia i tatou pe afai e faia a tatou tatalo faaleaiga.

Molimau

Tuuina atu lau molimau e uiga i tatalo faaleaiga. E mafai ona e faamatalaina atu se taimi na faamalosia ai lou aiga ona o tatalo faaleaiga.

O Isi Gaoioiga E Faamauoa Ai

Filifili nisi o nei gaoioiga e faia i le taimi o le lesona.

Fai faatasi ma tamaiti le gaoioiga lea e fai ai taga:

O lo’u tina lenei, e fesoasoani ma te taaalo (tuu i luga le tamatamailima muamua);

O lo’u tama lenei, e galue faasoloatoa i le aso (tuu i luga le tamatamailima lona lua).

O lo’u tuagane lenei, e umī ma malosi (tuu i luga le tamatamailima lona tolu);

O lo’u uso lenei, e fiafia ma te saposapo faatasi (tuu i luga le tamatamailima lona fa).

A o au lenei, ou te fiafia e fai atu (tuu i luga le lima matua)

E tootutuli faatasi lo matou aiga ma tatalo atu (tapuni lima).
Togi pe tuu atu foi se mea galemulemu pei o se taga fatu pi, po o se polo i tamaiti. Ia togi auauai i tamaiti taitoatasi. A uma ona sapo e tamaiti le mea, fesili atu i ai e tau mai se mea e mafai ona latou faafetai atu ai i le Tama Faalelagi pe a faia sa latou tatalo faaleaiga. A soo uma tamaiti, ia toe fai lea lava gaoioiga, ae tau mai e tamaiti ni mea e mafai ona latou aioi atu ai i le Tama Faalelagi pe a fai sa latou tatalo faaleaiga.
Tufa atu i tamaiti taitasi ni fasipepa ma ni vali po o ni penitala. Fai i tamaiti e tusi ni ata o o latou aiga o lo o tatalo. Ia tusia upu nei i lalo o ata taitasi, Ou te fiafia lava pe a tatalo faatasi lo’u aiga.

Gaoioiga Faaopoopo Mo Tamaiti Laiti

Fesosoani i tamaiti e toe faitau le fuaiupu lea, fai laina taitasi:

Tatou te alolofa i le Tama Faalelagi;

Tatou te faafetai ia te ia pe a tatou tatalo i aso taitasi.

O i tatou e alofa mai le Tama Faalelagi i ai;

E faafofoga mai foi o ia i mea tatou te fai atu ai.
Faamatala se tala i se aiga sa tatalo faatasi ma latou maua le mea sa ole atu ai. Mo se faataitaiga: o se aiga na se ae iu ina latou toe maua le auala; se aiga sa leiloa se mea ae na toe maua; po o se tasi i le aiga sa mai ae na toe manuia. Tau i ai, e le gata ina tatalo mo se fesoasoani, ae e tatau ona manatua e le aiga e faia se tatalo faafetai pe a uma ona latou maua o le fesoasoani sa latou manaomia. Faamanatu i tamaiti e fiafia le Tama Faalelagi pe a tatou faafetai atu ia te ia mo faamanuiaga na te tuuina mai mo i tatou.
Usu pe tauloto upu o le fuaiupu muamua ma le tolu o le pese “Faafetai Lo Tatou Tama” (Tusi Pese a Tamaiti).