Lesona 46
O Le Fanau Mai O Iesu (Kerisimasi)
Faamoemoega
Ia fesoasoani ia maua e tamaiti taitoatasi le agaga faafetai mo le fanau mai o Iesu Keriso.
Sauniuniga
-
Ia aoao ma le agaga tatalo le Mataio 2:1–12 ma le Luka 1:26–35; 2:1–20.
-
Saili ni nai faamatalaga faigofie e uiga i le fananau mai o tamaiti o lau vasega, e pei o:- fea na fananau ai, o a lanu o o latou lauulu sa i ai, ma po o fea na nonofo ai i le uluai vaiaso lava o o latou olaga. Ia faautauta i lagona o ni tamaiti fai.
-
‘Oti ni fasipepa uumi (pe tusa ma le 8” le uumi ae 1” le lautetele) mo filifili o le Kerisimasi. ‘Oti ia lava ni fasipepa mo tamaiti taitoatasi e fai ai se filifili pe a ma ni nai sooga le umi.
-
Tusi sina faamatalaga e faamatala ai le filifili o le Kerisimasi (tagai i le lesona) i matua o tamaiti taitoatasi, ina ia latou uunaia a latou fanau e faia galuega agalelei.
-
O mea e faaaogaina:
-
O se Tusi Paia.
-
Se tamai vaaiga o le fanau mai o Iesu. Atonu e te manao e faaaoga se pepe taalo e afifi i se palanikeke, ae faataoto i se tamai atigi pusa. Oti se fetu mai se pepa e tuu i luga ae o le vaaiga o le fanau mai o Iesu. A le mafai ona fai se vaaiga o le fanau mai o Iesu, faaaoga le ata 1-75, O Le Fanau Mai o Iesu (Taga o Ata o le Talalelei 200;62116).
-
Vali ma se kulū.
-
Ata 1-75, O Le Fanau Mai o Iesu (Taga o Ata o le Talalelei 200;62116); ata 1-76, Leai Se Avanoa I Le Faletalimalo (62115); ata 1-77, O Le Faasilasilaina Atu O Le Fanau Mai O Keriso i le Au Leoleo Mamoe (Taga o Ata o le Talalelei 202;62117); ata 1–78, O Le Au Makoi (Taga o Ata o le Talalelei 203;62120).
-
-
Ia faia sauniuniga talafeagai ai mo so o se Gaoioiga Faaopoopo E Faamauoa Ai e te manao e faaaoga.
Gaoioiga e Aoao ai
Tofi se tamaitiiti e faia le tatalo.
Gaoioiga e Faatosina Mai Ai:
Faatu se tamaitiiti i ou tafatafa a o lo o e tauina atu faamatalaga ua e iloa e uiga i lona fanau mai. Toe saga fai pea seia uma tamaiti o le vasega.
Tatou te faamanatuina le fanau mai o Iesu Keriso i le taimi o le Kerisimasi.
Faamatala atu talu ai o le vaitaimi lenei o le Kerisimasi, o lo o tatou faamanatuina ai le fanau mai o se tasi tatou te alolofa uma lava i ai.
-
O le aso fanau o ai lea o lo o tatou faamanatuina?
Tala
Faamatala le tala o le asiasiga a le agelu ia Maria, e pei ona maua i le Luka 1:26–35. Faamalamalama na ta’u atu e le agelu ia Maria, o le a avea o ia ma tina o le Alo o le Atua, o Iesu.
Tala
Faamalamalama o Iosefa e le o le tama lena o Iesu. O ia o se tagata lelei sa filifilia e tausia Iesu. Sa faaali mai le agelu ia Iosefa i le miti e uiga i le pepe o le a fanau mai ia Maria. Sa tau atu e le agelu ia Iosefa, o Maria o le a avea ma ana ava.
Tala
Faaali le ata 1-76, Leai se Avanoa I Le Faletalimalo, ma faamatala e uiga i le malaga a Iosefa ma Maria mai Nasareta i Peteleema, o lo o maua i le Luka 2:1–7. Faitau leotele le Luka 2:7, ma faamalamalama ni upu atonu e fou i le faalogo a tamaiti.
Gaoioiga
Faanonofo pe faatootutuli tamaiti i le fola i luma o le vaaiga o le fanau mai o Iesu. E mafai foi ona aveane se palanikeke e nonofo ai. Pasi faasolo i le vasega le ata 1-75, O Le Fanau Mai o Iesu, ma fai i tamaiti taitoatasi e tau mai se mea se tasi o lo o ia vaaia i le ata.
Gaoioiga
Pese
Fesoasoani i tamaiti e usu pe tauloto upu o le pese: “Mamao I Se Fale O Manu” (Tusi Pese a Tamaiti). Fai ni gaoioiga po o ni taga i lima e fetaui ma upu.
I se fale o manu, leai se moega,
Le pepe o Iesu taoto filemu;
O fetu o le lagi tepa ifo ia,
Le pepe o Iesu, o moe filemu.
Tala
Faaali le ata 1-77, O Le Faasilasilaina Atu O Le Fanau Mai O Keriso i le Au Leoleo Mamoe, ma faamatala le asiasiga a leoleo mamoe, e pei ona faamatala mai i le Luka 2:8–20.
Tala
-
Aisea na fefefe ai leoleo mamoe? (Tagai i le Luka 2:9.)
-
O le a se mea na tau atu e agelu i leoleo mamoe? (Tagai i le Luka 2:10–12.)
-
O le a se mea sa fai e leoleo mamoe ina ua uma ona latou asiasi atu i le pepe o Iesu? (Tagai le Luka 2:17, 20.)
Tala
Faaali le ata 1-78, O Le Au Makoi, ma faamatala le asiasiga a le au makoi, e pei ona faamatala mai i le Mataio 2:1–12.
Gaoioiga
Faatutu tamaiti ma faafoliga o lo o tietie i ni kamela faataamilo i le potu, ma mulimuli i le fetu agai atu i le pepe o Iesu.
A maea ni faataamilosaga i le potu, ia feosofi i lalo tamaiti mai a latou kamela ae toe foi mai i le vaaiga o le fanau mai o Iesu. Faamatala e oo ane i le taimi na maua ai e le au makoi le pepe o Iesu, ua maua e Iosefa se nofoaga lelei atu nai lo le fale o manu e nonofo ai le aiga. Faamanatu i tamaiti na aumaia e le au makoi o meaalofa o le auro, pulu lipano, ma le pulu muro. Fai i tamaiti taitoatasi e tau mai pe o le a lana meaalofa lea e faapea o le a ave, pe o se auro, pulu lipano, po o se pulu muro ona alu lea e ave i le pepe o Iesu.
O la tatou meaalofa ia Iesu o le avea lea e faapei o ia
Faamalamalama o Kerisimasi uma lava tatou te faamanatuina ai le aso soifua o Iesu, e mafai ona tatou tuuina atu meaalofa ia te ia. E le mafai ona tatou tuuina atu ni meaalofa o auro, pulu lipano, ma pulu muro e pei ona faia e le au makoi, ae peitai e mafai ona tatou tuuina atu se isi ituaiga meaalofa. Tatou te tuuina atu se meaalofa ia Iesu pe a tatou taumafai ia faapei o ia. Tatou te faapei o Iesu pe a tatou agalelei atu i o tatou aiga ma uo.
Gaoioiga
Fesoasoani i tamaiti taitasi e faia ni a latou filifili o le Kerisimasi i ni nai sooga. Fai i tamaiti e vali a latou sooga ona kulu faatasi lea o sooga (vaai i le ata o lo o i le faaiuga o le lesona). Fai i tamaiti e ave a latou filifili i le fale ma tuu i se mea e mafai ai ona faamanatu atu latou te faia galuega alofa i isi e fai ma a latou meaalofa ia Iesu. Tuu atu se lu’i i tamaiti ia le itiiti ifo i le tasi se galuega alofa latou te faia i aso taitasi seia oo lava i le Kerisimasi.
Fesoasoani i tamaiti e mafaufau i ituaiga galuega alofa e mafai ona latou faia. Faamanatu i ai a latou faia galuega alofa, o lo latou tuuina atu foi lea o ni meaalofa matagofie ia Iesu. Tufa ia tofu le tamaitiiti ma le fasipepa o lo o i ai se faamatalaga e uiga i le filifili e ave i ona matua.
Molimau
Faamatala o le fanau mai o Iesu o se tasi lea o mea aupito i taua sa tupu i le fogaeleele. Faaali atu lou alofa mo Iesu ma lou naunauta’iga ia pei o ia, e le na o le taimi o le Kerisimasi, ae o le tausaga atoa.
O Isi Gaoioiga e Faamauoa ai
Filifili nisi o nei gaoioiga e faaaoga i le taimi o le lesona.
-
Toe faamatala le tala i le fanau mai o Iesu ae faatino e tamaiti vaega a Iosefa, Maria, le pule o le faletalimalo, ma le au makoi. Faaaoga mea e pei o se pepe taalo, se tamai palanikeke, ma se pulupulu, pe afai o i ai. Tuu le avanoa i tamaiti uma e auai. Atonu e moomia le toe fai o le gaoioiga, ina ia maua e tamaiti le avanoa e toe faatino ai se isi vaega e ese mai le mea na ia faia muamua.
-
Fesoasoani i tamaiti e ‘oti pe tusia foi ni fetu faigofie e teuteu ai. Fai i tamaiti e valivali a latou fetu, ma faapipii se manoa i fetu taitasi ina ia mafai e tamaiti ona tautau i se mea i lona fale.
-
Talanoaina nisi o sauniuniga faapisinisi mo le Kerisimasi ua iloa e tamaiti. Fesoasoani ia latou malamalama o mea e pei o meaalofa ma pati o ni mea fiafia, ae peitai, o le aano moni o le Kerisimasi o le soifua mai o Iesu Keriso ma le taua o le taulai atu ia te ia ma lona soifuaga.
-
Talanoaina ni tu faaleaganuu o Kerisimasi e faa-autu ia Keriso e te iloa ma fiafia i ai. Valaaulia tamaiti e talanoa e uiga i ni tu masani a o latou aiga e faa-autu ia Keriso i le taimi o le Kerisimasi.
Gaoioiga Faaopoopo mo Tamaiti Laiti
-
Fai i tamaiti e manatu faapea o i latou o leoleo mamoe o lo o malolo i le laufanua. Fesoasoani i ai latou te faatinoina le fefefe na i ai leoleo mamoe ina ua latou vaaia le agelu, ma le fiafia na oo i ai ina ua latou malamalama i le tala. Fesoasoani i ai e manatu faapea ua latou faalogoina pesega a agelu ma ua latou vaaia le matagofie o ao o le lagi i le po, atoa foi ma le fetu. Savalivali faatasi faataamilo i le potu e saili le pepe. Tootutuli i luma o le pepe o Iesu o lo o taoto i le moega vaovao, ma usu se pese faamanū.
-
Fesoasoani i tamaiti e fai taga o le fuaiupu o lo o i lalo a o lo o faia upu:
O totonu o se moega vaovao o lo o i ai se pepe (luelue lima e pei o lo o faamoemoe se pepe),
O ona tafatafa o lo o i ai se tina alofa tele (fofola i luma lima).
Ua pupula mai se fetu i le lagi i luga (tusi le lima i le vanimonimo ma le ofo),
Ua iinei le Alo o le Atua (patipati lima ona o le fiafia tele)!
-
Usu pe tauloto upu o le pese: “Fetalai Mai Iesu E Alofa Atu I Tagata Uma” (Tusi Pese a Tamaiti). Faamanatu i tamaiti tatou te faamanatuina le fanau mai o Iesu i le taimi o le Kerisimasi.
-
Fai ni ata tipi faigofie o Iesu o lo o aui i se ie. Ao mai ni vaovao mamago ma aumai mo tamaiti e kulu i se moega vaovao (se pepa faasikuea). Ia kulu foi e tamaiti le ata tipi o Iesu i luga o le moega o vaovao mamago.