E Mafai Ona Avea Au Ma Se Uo

Faamoemoega

Ia fesoasoani i tamaiti taitoatasi ina ia avea ma se uo lelei.

Sauniuniga

Ia aoao ma le agaga tatalo le Ioane 6:1–13 ma le 11:1–7, 17–44.
O Mea e faaaogaina:
1. O se Tusi Paia
2. Ata 1-3, O Iesu Keriso (Taga o Ata o le Talalelei 240;62572).
Ia faia sauniuniga e talafeagai ai mo so o se Gaoioiga E Faamauoa Ai e te manao e faaaoga.

Gaoioiga e Aoao ai

Tofi se tamaitiiti e faia le tatalo amata.

Gaoioiga e Faatosina Mai Ai:

Tusi lou lima ia te oe ma fesili, “O ai au?” Atonu o le a tau mai e tamaiti lou igoa po o le upu “faiaoga.” Faamatala i ai o oe foi o la latou uo, ma o i latou o au uo. Faamalamalama o uo a tagata e fiafia le tasi i le isi.

Nonofo faataliolio ma tamaiti. Tilotilo i tamaiti taitoatasi ma fai atu, “O (Igoa o le tamaitiiti) o la’u uo.” Feauaua’i tamaiti seia soo, ma ia mautinoa e tau le igoa o le tamaitiiti i taimi taitasi.

E tele a tatou uo

O ai a outou uo?

Tuu le avanoa i tamaiti e talanoa ai e uiga i a latou uo. Faamanino atu o uo e so o se tagata lava e tusa po o le a lona matua. E mafai ona avea tagata o le aiga ma nisi o a tatou uo aupito sili. Faamamafa atu o uso taitoasi uma o le vasega o ni uo.

Faaali le ata 1-3, O Iesu Keriso. Faamatala o le tagata o lo o i le ata o se uo lelei tele a tagata taitoatasi uma o le vasega.

O ai la tatou uo o lo o i le ata?
E faapefea ona outou iloa o Iesu o la outou uo?

Pese

Usu pe tauloto upu o le pese: “Iesu O La Tatou Uo Pele” (Tusi Pese a Tamaiti) Iesu o se uo lelei.

Uo alofa mai.

Na te taitai tatou ia te Ia.

Tala

Faamatala le tala ia Iesu i lona toe faatuina mai o Lasalo mai le oti, o lo o maua i le Ioane 11:1–7, 17–44. Faamamafa atu o Lasalo ma ona tuafafine o uo a Iesu. A o i ai Iesu i Petania, sa nofo o ia i lo latou aiga ma latou taumamafa faatasi ma ia.

Tala

O le a se lagona o Iesu e uiga ia Lasalo? (Tagai i le Ioane 11:3, 35–36.)
O le a se mea na faia e Iesu mo Lasalo? (Tagai i le Ioane 11:43–44.)
O le a so outou mafaufau, o a ni lagona o Lasalo, Maria ma Mareta mo Iesu?

E mafai ona avea i tatou ma ni uo lelei?

E faapefea ona fai a tatou uo?

Faamatala i tamaiti o le avea o i tatou ma uo lelei, o lo tatou fesoasoani foi lena i isi e faia mea lelei. Tatou te alolofa i a tatou uo ma e tatou te mananao ia te i latou ina ia fiafia. Talanoaina le taua o le agalelei atu i isi e pei ona tatou mananao e agalelei mai ia te i tatou. Fesili pe faapefea ona avea tamaiti ma uo lelei i tulaga o lo o taua i lalo:

O lo o oulua taaalo ma se uo, ae tei ua sau se isi tamaitiiti e manao tou te taaalo.
Ua i ai se tamaitiiti fou faatoa sau i le vasega mo le taimi muamua, ae matamuli lava.
O se tamaitiiti ua ulagia ma ua faanoanoa ai lava.

Pese

Usu pe tauloto upu o le pese: “E Amata ia te A’u le Agalelei” (Tusi Pese a Tamaiti).

Ou te fia agalelei mo i latou uma
E sa’o lena ua e iloa
Ou te fai ifo ia te au, “Ia manatua lenei:
Agalelei e amata ia te au.”

Pese

O a ni o outou lagona pe a agalelei atu a outou uo ia te outou?
Faamata o a ni o latou lagona pe a outou agalelei atu ia te i latou?

Fesoasoani i tamaiti ia malamalama afai latou te mananao i ni uo, e ao ona avea i latou lava ma uo lelei.

O uo e fetufaai ma isi

Afai o e taalo i se (ta’u se igoa o se mea taalo po o se isi mea patino), ae sau se uo e fia taalo ma oe, o le a se mea e tatau ona e fai?

Faamalamalama atu, a tatou faatagaina se isi tagata e taalo faatasi ma i tatou, pe tatou te avatu foi sina vaega o a tatou mea o i ai i se isi tagata, o lona uiga, o lo o tatou fetufaai ma isi. O nisi taimi e le mafai ona tatou vaevaeina a tatou mea o i ai, ona tatou feauauai lea i ai. O le fetufaai foi lena.

Afai e fia ‘ai se tasi o au uo ae o lo o i ai ni au meaai, o le a se mea e tatau ona e faia?

Tala

Faaali atu le Tusi Paia ma faamatala le tala ia Iesu o lo o fafaga le lima afe o tagata, o lo o maua i le Ioane 6:1–13. Faamamafa atu talu ai ina ua tufa atu e le tamaitiiti ana meaai sa i ai, o le ala lea na mafai ai e Iesu ona faaaoga lona mana e fai ai ia lava meaai e fafaga ai tagata uma.

Faamanatu i tamaiti le tala ia Elia ma le fafine ua oti lana tane i Sarefata (lea sa ta’ua i le lesona 32). Sa faamanuiaina le fafine ua oti lana tane aua sa ia tufa atu ana meaai e ui lava ina sa itiiti sina meaai sa ia te ia.

Tala

O a ni mea e mafai ona tatou fetufaai ai ma a tatou uo?
O a ni mea e mafai ona tatou fetufaai ai ma o tatou aiga?

Pese

Faatutu i luga tamaiti ma usu le pese: “Mea Malie E Fai” (Tusi Pese a Tamaiti). Faaaoga fasi fuaiupu, “E malie le tufa (o meataalo, tusi, po o so o se mea lava e mananao ai tamaiti).” Fai i tamaiti e fai ni taga e o faatasi ma upu.

E malie le tufa o meataalo,
e malie, e malie
E malie le tufa o meataalo,
malie, malie, malie!

Faamanatu i tamaiti o uo e fesoasoani le tasi i le isi, ma uunai i latou e fesoasoani i le faamamaina o le potu aoga i so o se mea lava e manaomia.

Molimau

Tuuina atu lau molimau i le taua o le avea ma se uo lelei. E mafai foi ona e faamatalaina atu se mea e uiga i sau uo ma se mea na e oo i ai. Faamanatu i tamaiti o le Tama Faalelagi ma Iesu o a tatou uo ma e alolofa i la’ua ia te i tatou. U’una’i tamaiti ia agalelei i a latou uo i lenei vaiaso.

O Gaoioiga E Faamauoa Ai

Filifili nisi o nei gaoioiga e faia i le taimi o le lesona.

Usu pe tauloto upu o le pese: “Foai O A si Auvai Lea” (Tusi Pese a Tamaiti) po o le “Fetalai Mai Iesu E Alofa Atu I Tagata Uma” (Tusi Pese a Tamaiti).
Faatutu i luga tamaiti ma fai taga o le fuaiupu lea e fai ai taga “Uo Pele Laitiiti”:

Ua ou maua se uo pele laitiiti, (fusi oe lava)

Ou te vaai ia te ia i aso uma.

Ou te alofa i lau uo pele laitiiti.

E faapenei ona ma taaalo:

Ma te taaalo i pepe (faafoliga o lo o e luelueina se pepe i ou lima)

E togi ma sapo le polo (faafoliga o loo togi ma sapo se polo);

Ma savavali faafitafita, (savavali filemu faafitafita i o outou tulaga).

Ma te taupe i le taupega (faafoliga o lo o taupe);

Ma te talanoa ma pepese;

E pei ona tatau ona faia e uo lelei uma (piilima ma luelue le ulu i luga ma lalo).
Aumai sina mea e tufatufa mo le vasega (siaki i matua o tamaiti ina ia mautinoa e leai se tamaitiiti e afaina i se mea o le a e aumaia). Tuu i se nofoaga e mafai ona iloa atu ai e tamaiti. Ia e taua le manaia o ona foliga mai ma fesili i tamaiti pe mananao e te tago e faasoasoa mo i latou uma. Fesili i tamaiti pe o a ni o latou lagona pe ana faapea e te faasoasoaina na o nisi o tamaiti. Talanoaina po o a lagona o isi pe a le oo atu i ai le faasoa. Faasoa laia ma outou ma tamaiti le mea na e aumaia.
Fai i tamaiti e tusi o latou ata ma ata o a latou uo o lo o la fetufaa’i. Ia tusia upu nei i ata taitasi, E mafai ona ma fetufaa’i ma la’u uo.
Faamatala le tala moni lea i a oe lava upu:

O Seevae Kopa

Ina ua oo mai Paionia i Iuta, o le toatele lava o i latou e matitiva. Sa faaaluina uma a latou tupe i le faatauina o mea sa latou faaaogaina i la latou malaga umi, ma mea faigaluega sa latou manaomia e fau ai fale ma toto ai togalaau.

Talu ai e leai ni tupe tele a tagata, o le tele o tamaiti e taitasi a latou pea seevae, sa faaaogaina i Aso Sa. O le tele lava o taimi e savavali i lalo i aso o le vaiaso.

O se tasi teine paionia e igoa ia Melinda, sa i ai sana pea seevae kopa mamafa ma le mataga sa na ia faaaogaina i le taimi o le taumalulu. I le taimi o le taumafanafana, sa faatau e lona aiga sana pea seevae manaia mo le Aso Sa, ma sa faamoemoe o ia na te faaaogaina i la latou solo.

O le uo aupito sili a Melinda o Amanda, e matua leai lava se seevae. Sa alofa Melinda ia Amanda ma sa ia maua se faatagaga mai lona tina e ave ai le isi ana pea seevae e faaaoga e Amanda i le solo. Ina ua siiina i luga e Melinda lona pea seevae kopa mamafa ma le mataga o le a ave i lana uo, sa fai atu lona tina, “Afai o le a e tufatufaina atu, e tatau ona e ave atu se mea e te mana’o e te maua mo oe lava.”

Sa mafaufau loloto Melinda mo sina taimi. Sa ia mafaufau i le mea e faaono fai e Iesu. Sa ia mafaufau po o le a le pea seevae e manao e fai, ona maua ai lea o lana faaiuga. Sa ia aveina atu lana pea seevae fou e faaaoga e lana uo, ae alu o ia i le solo ma ona seevae kopa mamafa ma le mataga. Peitai, sa matua fiafia Melinda! Sa ia iloa ua ia fetufaai e pei lava o le ala e finagalo ai Iesu.

O Gaoioiga Faaopoopo Mo Tamaiti Laiti

Vaai ni mea taalo mo tamaiti e taaalo ai. Talanoaina le taua o le fai atu “faamolemole” ma le “faafetai.” Uunai tamaiti e fetufaai mea taalo pe a taaalo ma fesoasoani le tasi i le isi e toe teu faalelei pe a uma.
A o outou faia le fuaiupu lea, taitai tamaiti i le faiga o taga. Toe fai pe a mananao ai tamaiti.

Saunia Aso Fiafia

Lua mata e vaai, i mea lelei e fai (tusi le tamatamai lima i mata)

Lua laugutu e ataata, i le aso atoa lava (faaalia le laumata ataata)

Lua taliga e faalogo, i isi tagata e taulogologo (faaofuofu lima ma tuu i tua o taliga)

Lua lima e faaaoga, e teu ai mea taalo uma (faafoliga o lo o faaputuputu mea taalo ma teuina).

O le laulaufaiva e tautala ai, i mea lelei i aso taitasi le pogai (tusi le lima i le gutu)

O le loto ia fiafia ma mama, e galue ma taalo ai i aso uma (piilima ma tuu i le mea e i ai le fatu).

Lua vae e tamoe ai ma le fiafia ua ala ai (tusi lima i vae)-

Saunia ni aso fiafia mo tagata uma, o lena le taunuuga.
Usu pe tauloto upu o le pese: “E I Ai O’u Lima Laiti E Lua” (Tusi Pese a Tamaiti).