Lesona 35

E Mafai Ona Ou Agalelei I Manu

Faamoemoega

Ia fesoasoani i tamaiti taitoatasi ia malamalama i le taua o le agalelei i manu.

Sauniuniga

1. Ia aoao ma le agaga tatalo le Kenese 2:19–20; 6–8.

2. O Mea e faaaogaina:

   1. O se Tusi Paia.

   2. Ata 1-28, O Le Foafoaga-O Meaola (Taga Ata o le Talalelei 100;62483); ata 1-30, O Noa ma Manu i le Vaa (Taga Ata o le Talalelei 103; 62305).

3. Ia faia sauniuniga e talafeagai ai mo so o se Gaoioiga E Faamauoa Ai e te manao e faaaoga.

Gaoioiga e Aoao ai

Tofi se tamaitiiti e faia le tatalo amata.

Gaoioiga e Faatosina Mai ai

Ia e faafoliga e pei o se manu e masani ai tamaiti. Ia mate mai e tamaiti po o le a le manu. Ia tofu le tamaitiiti ma le avanoa e faafoliga ai e pei o se manu ae mate mai e isi tamaiti po o le a le manu.

Sa faaigoaina e Atamu manu taitasi

Faamanatu i tamaiti sa fuafuaina e le Tama Faalelagi ae foafoa e Iesu manu uma ma i’a, manu felelei, ma iniseti i le fogaeleele. Faaali atu i ai le Tusi Paia ma faamalamalama o lo o tau mai i Tusitusiga Paia na faaigoaina manu uma e Atamu (tagai i le Kenese 2:19–20). Faaali le ata 1-28, O le Foafoaga-O Meaola.

• O a igoa o manu o lo o i le ata? (Auauai tamaiti e faasino se manu o lo o i le ata ma ta’u le igoa).

E finagalo le Tama Faalelagi ma Iesu ina ia tatou agalelei i manu

Tala

Faaali le ata 1-30, O Noa ma Manu i le Vaa, ma toe faamanatu le tala ia Noa ma le Vaa, o lo o maua i le Kenese 6–8. Faamamafa e le itiiti ifo i le lua manu o le ituaiga sa faasaoina. E alolofa le Tama Faalelagi ma Iesu i manu ma e finagalo laua ia i ai i le fogaeleele.

Tala

• Aisea na tuu ai e Noa manu i le vaa?

• O a manu o lo o tumu ai oe i le agaga faafetai ia Noa ina ua ia tuuina i luga o le vaa?

• O le a sou manatu i le auala o lo o finagalo le Tama Faalelagi ma Iesu tatou te tausia ai manu?

Tala

I au lava upu, faamatala le tala lea e uiga ia Peresitene Spencer W. Kimball, le Peresitene lona sefululua o le Ekalesia.

A o avea Peresitene Spencer W. Kimball ma se tama talavou, o lana galuega o le ave lea o povi i se laufanua pe tusa ma le maila le mamao ese mai lona aiga. I se tasi aso, sa ia faia sana fana memei, o se mea taalo e mafai ona ia faaaogaina e tafana ai ma’a i pou o pa ma ogalaau. Na oo ina matua lelei tele lana fana ma mafai ai ona ia fanaina se laau po o se pou o se pa e mamao ese ma ia.

E i ai laau uumi sa ola i tafatafa o le ala i le mea sa ia aveina atu i ai povi. Sa vaaia e Spencer le tele o manulele laiti i luga o na laau. Ina ua ia vaaia manulele, sa faaosoosoina o ia e tafana ia manulele ia iloa ai e matua lelei lava lana fana. Peitai, sa ia manatua se pese sa ia aoaoina i le Peraimeri. E faapea upu, “Aua le fasi matea tamai manulele….O le lalolagi o a le Atua ia, ma e maua mai ai meaai mo e iti ma e matutua.” Sa mafaufau Spencer i na upu sa ia peseina. Sa tonu ia te ia e taua manu felelei i le Tama Faalelagi, ma e le o se mea sao lena mea. O lea sa ia matua faaeteete ai lava i le mea na te fanaina i ai lana fana memei ina ia aua nei lavea se manulele (tagai i Lipoti o le Konafesi, Aperila 1978 po o le Liahona, Me 1978).

Tala

• Na faapefea ona faaalia e Spencer W. Kimball lona agalelei i manulele?

Faamatala i tamaiti e finagalo le Tama Faalelagi ma Iesu ia tatou agalelei i manu.

Pese

Usu pe tauloto upu o le pese: “E Amata Ia Te A’u Le Agalelei” (Tusi Pese a Tamaiti).

O le a ou agalelei i so o se tagata lava,

Aua e amata ia te au le agalelei atu.

Pese

• E i ai ni au fagafao?

Gaoioiga

Fai i tamaiti e faamatala a latou fagafao ma pe faapefea ona latou tausia. Faitau faamatalaga ia o lo o i lalo ma faatonu tamaiti e tuu i luga o latou lima matua pe afai o le faamatalaga o se auala agalelei e tausia ai fagafao ae tuu i lalo lima matua pe afai o se auala le alofa.

Gaoioiga

• Ia fafaga i latou i meaai lelei i aso uma.

• Ua galo ona fafaga.

• Ua galo ona fa’ainu.

• E i ai pea vai mama mo latou e feinu ai.

• Ia fai lelei se nofoaga saogalemu mo i latou e momoe ai.

• Ia loka i se nofoaga vevela i le aso atoa.

• Ia vaaia lelei ma alofa ia i latou.

Molimau

Faamanatu i tamaiti sa foafoaina e Iesu manu ma o se vaega o le fuafuaga a le Tama Faalelagi. E finagalo le Tama Faalelagi ma Iesu ia tatou agalelei i manu. Faamatala atu ou lagona e uiga i fagafao po o manu.

O Gaoioiga e Faamauoa ai

Filifili nisi o nei gaoioiga e faaaoga i le taimi o le lesona.

1. Fai ni kopi o le lapiti o lo o i le faaiuga o le lesona mo tamaiti taitasi, ona tuu lea i tamaiti e valivali a latou ata. Faapipii sina tama’i polo vavae laiitiiti i le si’usi’u o le lapiti ina ia fefete ai.

2. Usu pe tauloto upu o le pese: “E Alofa Mai Lou Tama Faalelagi” (Tusi Pese a Tamaiti).

3. Ia tofu tamaiti ma le avanoa e fagota ai mo se manu, ae faaaoga ai le ofe fagota mai le lesona 11 ma ata tipitipi o manu mai le tusi lesona. A maua le manu a le tamaitiiti, ia auauai e faaali atu a latou manu ma faamatala po o a mea latou te iloa e uiga i a latou manu.

4. Fai ni pine mo tamaiti taitoatasi e ave i o latou aiga, e tusia ai upu ia, O le a ou agalelei i manu.

5. Fesoasoani i tamaiti e fai taga o le gaoioiga lea e faaaoga ai tamatamai lima:

   O La’u Pusi Laiitiiti

   Sa ae lau pusi laiitiiti i luga o le laau (“faatolotolo” tamaitamai lima taumatau agai i luga o le lima agavale)

   Ma nofo i luga o se lãlã laau e tilotilo mai ai ia te au (tuu le lima taumatau i luga o le tauau agavale).

   Sa ou fai atu, “Sau, pusi,” ona sau ai lea i le atoa (faatolotolo tamaitamai lima agai mai i lalo o le lima)

   Ma ai uma meaai sa ou sasaaina i lana ipu (faaofuofu le lima agavale; faafoliga faapea o lou lima taumatau o le pusi o lo o aia meaai).

6. Faatutu i luga tamaiti tou te faia faatasi taga a o e faia faatauloto le fuaiupu lea o lo o i lalo:

   O Noa

   Na fau e Noa se vaa tele (faaloaloa i luma lima);

   Sa na ia iloa le mea e ao ona fai (tuu le limatusi i le muaulu)

   Sa tu’itu’i, ‘ili, ma taufuafua (fai taga o mea e pei ona taua)

   E pei ona faatonuina ai (lue le ulu).

   Sa valaau Noa i lona aiga (tuu le lima i le gutu pe a valaau)

   E o i le vaa e faatalitali ai (savavali filemu i le mea o i ai).

   O manu ua taitoalua ma o mai, (tuu i luga tamatamai lima e lua).

   I le vaa e faatafetafea ai. (fai taga o galu o le sami.)

   O ao lapopoa o le lagi ua faapotopoto ai (tuu lima i luga o le ulu),

   O le timu ua mamafa mai. (faatetete mai i lalo tamatamai lima)

   O le lalolagi ua ufitia, (fai taga o le saluina o le otaota);

   O le eleele ua natia (faliu i le isi itu ma le isi itu).

   Sa opeopea le vaa, (fai taga o le opeopea)

   I le tele o ao ma po (faasavali tamatamai lima e lua i luga o le isi alofilima).

   Seia oo ina toe susulu mai le la (faalapotopoto lima i luga o le ulu);

   Ua mafanafana ma malamalama naua.

   Ua matutu uma le vai (piilima);

   O le eleele ua aliali mai (tatala lima ma faaloaloa).

   O Noa ma lona aiga ua faafetai (piilima ma punonou i lalo ulu)

   Aua o le Atua sa faatasi ai.

   (Sii mai se solo na tusia e Beverly Spencer.)

Gaoioiga Faaopoopo mo Tamaiti Laiti

1. Tuu le avanoa i tamaiti e faamatala ai ni a latou fagafao o i ai pe mananao foi i ai. Talanoaina ma tamaiti le auala e tausia ai ma vaaia ai a latou fagafao.

2. Faitau upu o le pese: “Ua Tele Naua le Lalolagi” (Children’s Songbook, p.235). Fai taga ia o lo o faatonuina i lalo:

   Ua tele na’ua le lalolagi, ioe, e lapotopoto (fai se li’o lapo’a i ou lima),

   O lo o maua ai foafoaga a le Atua;

   O Mauga (tuu lima i luga a’e o le ulu a e faafoliga i se mauga)

   Ma Vanu (faafao le lima ma tuu i lalo i luma)

   Ma laau ua soona uumi (faasasa’o i luga lima),

   O manu tetele (tutete’e i luga)

   Ma manu laiti (fa’ano’uno’u)

   Ua tele naua le lalolagi ma lapotopoto (fai se li’o tele i ou lima).

   E alofa le Atua ia te i tatou uma; o o tatou faamanuiaga ua tele naunau (fusi mau oe lava).

3. Faaali atu nisi o ata tipitipi, ia auauai, ma tuu i tamaiti latou te faamatala mai mea latou te iloa e uiga i manu taitasi, e pei o le mea e nofo ai, e faapefea lana tagi, ma po o le a foi le mea e ala ai ona mananao i ai.