Lesona 28

E Mafai Ona Ou Usiusitai

Faamoemoega

Ia faamalosia manaoga naunautai o tamaiti taitoatasi e usiusitai i le Tama Faalelagi ma Iesu Keriso ma ia usiusitai foi i ona matua.

Sauniuniga

1. Ia aoao ma le agaga tatalo le Tanielu 3; Ioane 14:15; ma le Efeso 6:1. Tagai foi i le Mataupu Faavae o le Talalelei (31110), mataupu e 35.

2. O Mea e faaaogaina:

   1. O se seti o tusitusiga paia.

   2. Ata 1-5, O se Aiga O Lo o i ai se Pepe (62307); ata 1-8, O le Tufatufaina Atu o le Faamanatuga (62021); ata 1-9, O le Tatalo i le Taeao (62310); ata 1-46, O Tamaiti O Lo o Tuuina Atu Fugalaau Matala i le Tina; ata 1-55, O le Lauga i luga o le Mauga (Taga o Ata o le Talalelei 212;62166); ata 1-56, O Alii e Toatolu i totonu o le Afi Musaesae (Taga o Ata o le Talalelei 116;62093).

3. Ia faia sauniuniga e talafeagai ai mo so o se Gaoioiga E Faamauoa Ai e te manao e faaaoga.

Gaoioiga E Aoao Ai

Tofi se tamaitiiti e faia le tatalo amata.

Gaoioiga e Faatosina Mai Ai:

Faatonu i le agaga o le faaaloalo tamaiti e fai le mau taga nei, e pei o le tutu i luga, liliu faataamilo, aapa i luga, tago i tamatamai vae, ma nonofo i lalo. Faafetai ia te i latou i le faia o mea na e fai atu ai. Faamalamalama i ai o la e sa latou faaalia le usiusitai. Sa latou usiusitai i au faatonuga.

E finagalo le Tama Faalelagi ma Iesu ina ia tatou usiusitai i o tatou matua.

Faaali le ata 1-5l, O se Aiga O lo o i ai se Pepe.

• O le a se mea o lo o faaali mai i lenei ata?

Tusi i le pepe o lo o i le ata ma talanoa e uiga i le ala na tatou o mai ai i le lalolagi o ni pepe. Faamanatu i tamaiti talu ai ona o le matua laitī tele o pepe ma e latou te le mafaia ni mea, latou te manaomia ni tagata matutua ma le malolosi e vaaia i latou.

• O ai na tausia oe a o e pepe?

• O ai o lo o tausia nei oe?

Faamatala i tamaiti, o tagata o lo o tausia i latou e pei o o latou matua ma isi tagata o le aiga, e alolofa tele ia te i latou ma e latou te mananao ina ia latou saogalemu ma fiafia.

• O a mea e aoao atu e o outou matua ina ia aua tou te faia?

Talanoa e uiga i mea e fai e tamaiti e faaono afaina ai latou pe lagona ai foi e i latou le faanoanoa, e pei o le taaalo i luga o le auala tele, fetagofi i se ogaumu aasa, faaaogaina o se naifi maai, taufetuli i lalo o se aega tafato, po o le tauaimisa ma o latou uso ma tuagane.

• Aisea e le mananao ai o outou matua e tou te faia nei mea?

• Aisea e tatau ai ona outou usiusitai i o outou matua?

Talanoa e uiga i mea e mafai ona saogalemu ma fiafia ai pe a latou faia, e pei o le taaalo i a latou mea taalo, malaga atu ma o latou matua i isi nofoaga, ma le agalelei atu i o latou uso ma tuagane.

• Aisea e faataga ai outou e o outou matua e faia nei mea?

Faamalamalama e alolofa o tatou matua ia te i tatou ma, latou te mananao tatou te faia mea tatou te saogalemu ma fiafia ai.

Gaoioiga

Faatutu i luga tamaiti ma fai taga o le fuaiupu lea:

E fia tamomoe ou vae (tamoemoe lemu i le mea o lo o tutu ai)

E fia taaalo ou lima (faagaoioi lima),

Ae a fai mai loa Tina (po o Tama), “Sau” (fai ni taga i lima e valaau atu ai e sau)

Ua faavave loa ona ou usitai lelei.

Gaoioiga

• O le a sou lagona pe a e usitai i ou matua ma e sau pe a valaau atu?

• O le a sou lagona pe a e faia isi mea e faatonu atu e ou matua e fai?

Faamalamalama atu afai tatou te usiusitai i o tatou matua, e mafai ona tatou lagona le fiafia. E fiafia foi o tatou matua pe a tatou usiusitai.

Faamatala i tamaiti e finagalo le Tama Faalelagi ma Iesu tatou te usiusitai i o tatou matua. Faitau ma faamalamalama le Efeso 6:1.

Pese

Usu pe tauloto upu o fuaiupu uma e tolu o le pese “Ou te Usitai Vave” (Tusi Pese a Tamaiti)

Pe a valaau mai lou tina,

Ou te usitai vave ia te ia.

Ou te manao e fai le mea sili

I aso uma taitasi.

Pe a valaau mai lou tama,

Ou te usitai vave ia te ia.

Ou te manao e fai le mea sili

I aso uma taitasi.

E alofa lou Tama Faalelagi ia te au,

E faamanuia au i aso taitasi.

Ou te manao e fai le mea sili

I aso uma taitasi.

E finagalo le Tama Faalelagi ma Iesu ia tatou usiusitai i poloaiga

Faaali le ata 1-55, O le Lauga i Luga o le Mauga.

• O ai o lo o i ai i lenei ata?

Faamalamalama a o i ai Iesu i le fogaeleele, sa ia aoao atu tagata i mea sa finagalo le Tama Faalelagi latou te faia. O nei aoaoga ua taua o poloaiga. Uu i luga tusitusiga paia. Faamatala i tamaiti o poloaiga o lo o tusia i tusitusiga paia.

Gaoioiga

Susu’e le Tusi Paia ma faitau le Ioane 14:15. Faamalamalama atu o upu nei sa saunoa mai ai Iesu. Faamalamalama atu foi o le tausia o lona uiga o le usitai. Ia toe fai soo faatasi e outou ma tamaiti le mau lenei.

Gaoioiga

• O a nisi o poloaiga e finagalo le Tama Faalelagi ma Iesu ina ia tatou usitai i ai?

I le faaaogaina o mau o lo o taua i lalo, talanoa e uiga i nisi o poloaiga e mafai ona usitai i ai tamaiti:

Gaoioiga

• Ata 1-5, O se Aiga o lo o i ai se Pepe-alolofa i o tatou aiga

• Ata 1-8, O le Tufatufaina atu o le Faamanatuga-auai i Sauniga lotu

• Ata 1-9, O le Tatalo i le Taeao-tatalo i le Tama Faalelagi

• Ata 1-46, O Tamaiti o loo Tuuina atu ni Fugalaau Matala i le Tina-ia agalelei atu i isi

Gaoioiga

• O le a le mea e fai e le Tama Faalelagi pe a tatou usiusitai i ana poloaiga?

E faamanuia i tatou e le Tama Faalelagi pe a tatou usiusitai

Tala

Faamatala otooto le tala ia Sataraka, Mesako ma Apeteniko, e pei ona maua i le Tanielu 3. Faaali atu le ata 1-56, O Alii e Toatolu i totonu o le Afi Musaesae, i se taimi e talafeagai ai. Faamalamalama atu o se tasi o poloaiga a le Tama Faalelagi o lo o tatou iloa, e na o ia lava tatou te tatalo atu i ai. Tatou te le tatalo atu i nisi tagata po o ni tupua, o mea e pei o ni faatagata. Faamatala atu sa iloa lelei e Sataraka, Mesako, ma Apeteniko poloaiga a le Tama Faalelagi ma sa latou mananao e usitai i ai. Sa puipuia e le Tama Faalelagi nei alii mai le afi aua sa latou usiusitai ia te ia. E le i mu i latou i le afi.

Tala

• Aisea na le faaleagaina ai e le afi Sataraka, Mesako, ma Apeteniko?

• Pe o le a sou manatu o le a se lagona na oo ia Sataraka, Mesako, ma Apeteniko ina ua faasaoina i latou e le Tama Faalelagi mai le afi?

Molimau

Faaali atu ou lagona e uiga i le taua o le usitai i ou matua ma le Tama Faalelagi ma Iesu. Fesili i tamaiti pe faapefea ona fesoasoani le usiusitai i poloaiga ina ia maua ai le fiafia.

O Isi Ogaioiga E Faamauoa Ai

Filifili nisi o nei gaoioiga e faaaoga i le taimi o le lesona.

1. Usu pe tauloto upu o le fuaiupu muamua o le pese “Tausi Poloaiga” (Tusi Pese a Tamaiti) po o le fuaiupu lona lua o le pese “E I Ai Ou Lima Laiti E Lua” (Tusi Pese a Tamaiti).

2. Auauai tamaiti e tuuina atu ni nai faatonuga e pei o le, “tutu i luga” ma “tuu o outou lima i luga o o outou ulu.” Ia usiusitai isi tamaiti uma i faatonuga.

3. Ia faaaoga le ofe fagota mai le lesona 11 ma saunia ni nai i’a pepa o lo o tusia ai ni faatonuga faigofie, e pei o le “piilima,” “toe fai sa fetalai mai Iesu, Afai tou te alolofa mai ia te au, tausi au poloaiga,’” “savali lemu faataamilo i le potu,” “ataata i isi tamaiti,” ma “fesoasoani i tamaiti e usu le pese ‘O A’u o se Atalii o le Atua.’ “ Tuu le avanoa i tamaiti taitoatasi e pue ai se i’a pepa ma ia usitai i le faatonuga o lo o tusia i le i’a.

4. Toe faamanatu le tala ia Noa, ma faamamafa atu na faasaoina Noa ma lona aiga mai le lolo ona sa latou usiusitai i poloaiga.

5. Tufa ia tofu le tamaitiiti ma le fasipepa ua e tusia ai se foliga fiafia ma lolomi ai upu ia Ou te fiafia pe a ou usitai. Fai i tamaiti e valivali ia ata o foliga.

Gaoioiga Faaopoopo Mo Tamaiti Laiti

1. Fesoasoani i tamaiti e fai taga o le tala o lo o i lalo e faatino i tamatamai lima.

   O tamatamai lima laiti (tuu i luga se moto ),

   O ai e fesoasoani mai ina ia tatou usiusitai?

   “O au.” “O au.” “O au.” “O au.” “O au.” (Ia auauai i luga tamatamai lima pe a fai le “O au” se ia uma i luga tamatamai lima).

   O le tali mai lea a tamatamai lima pisi.

2. Aumai ni mea o lo o fai ma puipuiga i o tatou tino, e pei o seevae, pulou, ma totini lima. Fesili i tamaiti po o le a le ituaiga puipuiga e aumai e mea taitasi (mo se faataitaiga, o seevae latou te puipuia o tatou vae; o pulou e puipuia o tatou ulu mai le malulu po o o tatou mata mai le la). Fai i tamaiti afai tatou te usiusitai i o tatou matua, ua tatou puipuia foi i tatou. Talanoa e uiga i nisi o tulafono ma le ala o lo o puipuia ai i tatou.

3. Tuu i luga ou lima ma faaali i tamaiti le auala o lo o mafai ai ona e faagaoioi ou tamatamai lima. Fai i tamaiti e tuu i luga o latou lima, faagaoioi o latou tamatamai lima, ma tatala ma tapuni o latou lima. Faamalamalama atu e mafai ona faagaoioi e le tagata lava ia ona lima, ae le mafai e se isi ona fai. Faamalamalama atu foi e mafai ona tatou fai i o tatou lima e usitai pe a faatonu mai i tatou e se tasi e fai se mea. O le faia o lenei mea tatou te maua ai le lagona fiafia i totonu o o tatou loto.

4. Fesoasoani i tamaiti e fai taga o le fuaiupu lea e fai ai gaoioiga a o e faia upu:

   Ou te Fiafia i Ou Lima

   Ou te fiafia i ou lima; o au uo mananaia (tuu lima i luma ma tilotilo i ai).

   E galulue ma fesoasoani seia iu le aso (faataitai galuega e fai e lima).

   E mafai ona piilima ma le filemu (piilima) pe patipati leotele (patipati)!

   A la faia mea sao, e ese ma lou nenee!