Na Faia Atamu ma Eva I Foliga O Le Tama Faalelagi

Faamoemoega

Ia fesoasoani ia malamalama tamaiti taitoatasi, na faia Atamu ma Eva i foliga o le Tama Faalelagi.

Sauniuniga

Ia suesue ma le agaga tatalo i le Kenese 1; 2:15–25 ma le 3. Ia tagai foi i le Mataupu Faavae o le Talalelei (31110), mataupu 5 ma le 6.
O Mea e faaaogaina:
1. O se Tusi Paia
2. Ata tipi 1-1 e oo atu i le 1-25; (O lo o mafai foi ona maua ia ata tipi i seti o Ata tipi o Fesoasoani Vaaia a le Peraimeri, 3 4, ma le 5.)
3. Ata 1-33, Atamu ma Eva (Taga Ata o le Talalelei 101; 62461); ata 1-34, Ua Aoaoina e Atamu ma Eva A Laua Fanau.
Ia faia sauniuniga e tatau ai mo so o se Gaoioiga e Faamauoa ai e te manao e faaaoga.

Gaoioiga E Aoao Ai

Tofi se tamaitiiti e faia le tatalo amata.

Gaoioiga E Faatosina Mai Ai:

Fai atu ia tutu uma i luga fanau a le Tama Faalelagi. Faamanatu atu i tamaiti, o i tatou uma lava o fanau a lo tatou Tama Faalelagi, o lea e tatau ai ona tutu tagata uma i luga.

Pese

Ia usu faatasi ma tamaiti le pese lenei “O A’u o se Atalii o le Atua” (Tusi pese a tamaiti). Ia tau atu o lo o tau mai e le pese ia i tatou, ua foaiina mai e le Tama Faalelagi ia i tatou se aiga i le lalolagi e nonofo ai.

O a’u se Atalii o le Atua,
Ua na auina mai a’u nei.
Ia ou nofo ai i lenei lalolagi,
Ma matua agalelei.

Tago mai, savali mai, i o’u tafatafa,
Ina nei ou sese.
Aoao mai mea e ao ona fai,
Ia ou toe foi atu ai.

Na faia le lalolagi e tusa ai ma le fuafuaga a le Tama Faalelagi.

Gaoioiga

Ia faafao ata tipi i luga o le laulau po o luga foi o ou vae.

Gaoioiga

O a nisi o mea na faia e Iesu Keriso mo le lalolagi?

A o tau ane e tamaiti mea taitasi o le foafoaga, ona tuu atu lea ia i latou e faaali atu le ata tipi e talafeagai ma le mea o lo o taua.

Gaoioiga

O a mea na faia pe na foafoaina e tou te faafetai ai?

Ia fesoasoani i tamaiti ia malamalama, o le lalolagi ma mea uma lava o i ai, na foafoa mo lo tatou faaaogaina ma fiafia ai. Tau atu i tamaiti o le lalolagi ma mea uma lava o i ai, o se vaega o le fuafuaga a le Tama Faalelagi.

Pese

Toe usuina faatasi ma tamaiti le pese: “O A’u o se Atalii o le Atua”.

O Atamu ma Eva, o se vaega o le fuafuaga a le Tama Faalelagi.

Tuu atu i tamaiti e vaavaai i ata tipi o lo o faaalia.

O a nisi mea e tatau ona i ai i le lalolagi?

Faaali atu le ata 1-33, Atamu ma Eva. Faamatala atu, ina ua mavae ona faia mea uma lava, ona faia loa lea o Atamu ma Eva. Faamatala le tala e uiga i le faiga o le tagata, e pei ona i ai i le Kenese 1:26–28. Faamatala atu, o Atamu ma Eva, o uluai tagata lava ia e toalua na muamua ona ola i luga o le fogaeleele. Sa i ai ia i laua o tino o aano ma ponaivi e faapei o foliga o le tino o le Tama Faalelagi.

O ai le uluai tagata na muamua ola i luga o le fogaeleele?
O ai le uluai fafine?
O a ituaiga o tino sa i ai ia Atamu ma Eva?

Tuu atu i tamaiti e tagotago i o latou lima, ma faamanatu atu ia i latou e tutusa lava o latou tino ma tino na i ai ia Atamu ma Eva.

Tala

Ia faamatala i au lava upu le tala ia Atamu ma Eva, ma ia taua ai mea o lo o i lalo, ia fai faatatau i le ata 1-33, Atamu ma Eva (tagai i le Kenese 2:15–25; 3):

Tala

Ina ua maua e Atamu ma Eva tino faaletino, sa mau loa i laua i le nuu matagofie e taua o le Faatoaga i Etena.
Sa faaipoipoina e faavavau Atamu ma Eva e le Tama Faalelagi.
Sa faigofie lava ona ola ma tutupu fualaau aina ma fugalaau i le Faatoaga i Etena, ma sa fifilemu manu uma.
Sa le iloa e Atamu ma Eva le lelei ma le leaga.
Sa le mafai e Atamu ma Eva ona maua ni fanau.
Sa faataga Atamu ma Eva e aai i fua o laau uma, vagana ai le laau e tasi.
Sa ai e Atamu ma Eva fua o lena laau.
Sa tatau loa ia Atamu ma Eva ona tuua le faatoaga.
Sa matua suia le lalolagi atoa: Sa tatau ia Atamu ma Eva ona galulue malosi ina ia maua meaai, sa amata loa ona ola mai le vao tuitui, ma sa oo ina feai ma faigata manu.
Sa amata loa ona maua fanau e Atamu ma Eva.

Faaali atu le ata 1-34, Ua Aoao e Atamu ma Eva A Laua Fanau. Faamatala atu, sa faamanuiaina Atamu ma Eva i lo la mauaina o ni fanau toatele. O i laua o uluai matua i luga o le fogaeleele. Sa aoao e i laua a la fanau e uiga i le Tama Faalelagi ma Iesu Keriso. Sa matua faatuputeleina lo laua aiga ma sa salalau atu i le lalolagi atoa.

Tala

O le a le mea na faia e Atamu ma Eva ina ua tuua e i laua le Faatoaga o Etena?

Faamatala atu, sa faaaogaina e Atamu ma Eva ma la laua fanau ia laau ma manu sa foafoaina mo le lalolagi.

Gaoioiga

Tuu atu i tamaiti taitoatasi e filifili mai se ata tipi mai ata o lo o faaalia, ma talanoaina faatasi ma le vasega le ala sa faaaogaina ai e Atamu ma Eva mea na foafoaina, e pei ona faaalia mai i ata tipi taitasi. Fesoasoani i tamaiti ia latou manatua tali faapitoa, e pei o le faaaogaina o manu mo meaai ma le gaosiaina o lavalava, atoa foi ma laupapa mai laau mo le fausiaina o fale.

Gaoioiga

Fesoasoani atu i tamaiti i le faia o le tala o lo o i lalo e faaaoga ai tamatamai lima.

Atamu ma Eva:

Sa mau Atamu ma Eva i le lalolagi, (Faaofuofu lima uma e fai ma lalolagi.)
I ona popo fou ae lei i ai se tagi.
Sa tausia e i laua o manu, (Ia faaaoga le lima e tasi e milimili ai le isi lima.)
Ma meaai na totoina ua tele naua. (Tuu lima i le gutu, faapei o lo o ai.)
Sa maua e Atamu ma Eva o fanau, (Ia faatutu faatasi tamatamai lima e lua.)
Ona maua foi lea e i latou o a latou lava fanau. (Ia faaopopo i ai isi tamatamai lima e lua.)
O lenei la ua toatele tagata ua soifua mai, (Ia faaminominoi tamatamai lima uma e sefulu.)
Vaai nei la i le ola o le lalolagi ua i ai.(Ia faaaoga lima e fai ai se lio tele ona faaloloa lea o lima agai i autafa.)

Fesoasoani i tamaiti ina ia malamalama, talu ai ona o Atamu ma Eva o uluai matua sa soifua i le lalolagi, o lea ua avea ai i tatou uma ma se vaega o lo la aiga.

Sa faapea mai le Tama Faalelagi ma Iesu, ua lelei le lalolagi.

Faitau leotele le Kenese 1:31. Fai i tamaiti tou te faitauina faatasi le fuaiupu. Faamatala atu, sa lagona e le Tama Faalelagi ma Iesu Keriso ua lelei mea uma na la foafoaina. O le mea sili lava ona taua, ua la silafia ua lelei i tatou, ma e alolofa ia i tatou uma lava taitoatasi.

Molimau

Ia e molimau atu i le alofa o le Tama Faalelagi ma Iesu ia i tatou uma lava taitoatasi. Faamatala atu, o mea uma ua i ai atoa ma le lalolagi, e mo i tatou ina ia tatou faaaogaina ma maua ai le fiafia. So o se taimi lava la tatou te vaai ai i se fugalaau, po o se fetu, po o so o se isi lava mea o le foafoaga, e faamanatu mai ai ia i tatou, e alolofa le Tama Faalelagi ma Iesu ia i tatou. Faailoa atu lou agaga faafetai mo lo laua alolofa atoa ai foi ma le lalolagi.

O Isi Gaoioiga E Faamauoa Ai

Ia filifili nisi o nei gaoioiga e faaaoga i le taimi o le lesona.

Ia filifili ni gaoioiga mai lesona 8 e oo i le 13 ina ia fai faatasi ma tamaiti, e pei o “O Mea Na Foafoaina e le Atua” ma le gaoioiga ia “Noa”.
Ia iloiloina mea na tutupu i aso taitasi o le Foafoaga a o faitauina e tamaiti aso o le vaiaso mai o latou tamatamai lima.
Ia usuina pe tauloto upu o le pese: “E Alofa Mai Lou Tama Faalelagi” (Tusi Pese a Tamaiti).
Tuu atu i tamaiti latou te tusia pe valivali se ata o se mea ua avea o se vaega o le fuafuaga a le Tama Faalelagi, e pei o se fugalaau, se laau, po o le la. Ia tusi i pito i luga o pepa a tamaiti taitoatasi upu nei Ou te Faafetai mo le lalolagi.

Gaoioiga Faaopoopo Mo Tamaiti Laiti

Ia tauloto upu o le “Lalolagi Matua Tele” (Children’s songbook, p. 235). Fesoasoani i tamaiti ia faia taga o lo o i lalo:

O le lalolagi e matua telē, oi e lapotopoto foi (ia fai se lio tele i lima)

Ma o lo o maua ai i totonu mea na faia e le Atua ua moni;

O mauga, (tuu lima i luga ae o le ulu ma faafoliga e pei o ni mauga)

Ma vanu, (tuu ogalima faatautau i luma o lou tino)

Ma laau e uumi tele, (Sisii lima agai i luma ma tu tetee)

O manu lapopoa, (Sisii lima ma aapa i luga)

Ma manu laiti, (punonou ifo i lalo)

O le lalolagi e matua telē, oi e lapotopoto foi (ia faia se lio tele i lima)

E alofa le Atua ia i tatou uma; ua tele naua o tatou faamanuiaga (ia fusi le tino i lima)
Fesoasoani i tamaiti e fai taga o le tala lea i tamatamai lima a o faia upu:

O Mea Na Faia E Le Atua

Na faia e le Atua le masina (fai se li’o i lima)

Ma fetu fepulafi (faamatala ma faamoe lima)

Ma tuu i le lagi (faaloloa i luga lima)

Sa na faia le la (faalapotopoto lima i luga a’e o le ulu)

Ma laau (faasasao i luga lima)

Ma fugalaau (faaofuofu lima)

Ma manu laiti e felelei (talotalo lima)

(From Fascinating Finger Fun by Eleanor Doan. Copyright © 1951. Used with permission.)