Tusi Lesona ma le Taimi o Fetufaaiga a le Peraimeri
Lesona 40: E Fesoasoani Le Faamanatuga Ia Te Au Ou Te Mafaufau Ai Ia Iesu

Lesona 40

E Fesoasoani Le Faamanatuga Ia Te Au Ou Te Mafaufau Ai Ia Iesu

Faamoemoega

Ia uunaia tamaiti taitoatasi e mafaufau e uiga ia Iesu Keriso i le taimi o le faamanatuga.

Sauniuniga

  1. Ia aoao ma le agaga tatalo le Luka 22:19–20 ma le 3 Nifae 18:1–11. Tagai foi i le Mataupu Faavae o le Talalelei (31110), mataupu 23.

  2. Ia maua se faatagaga mai le peresitene o la outou Peraimeri, ona e fesili atu lea i le epikopo e faafesootai se sui o le korama a ositaulaga e susū mai i la outou vasega mo ni nai minute i le amataga o le lesona. E tatau ona saunia le sui o le korama a ositaulaga e faamatala atu i tamaiti lona tiute tauave i le faapaiaina o le faamanatuga ma ona lagona e uiga i lenei sauniga paia.

  3. O Mea e faaaogaina:

    1. O se Tusi Paia ma se Tusi a Mamona.

    2. Ata o mea na tutupu i le soifuaga o Iesu, e pei o le ata 1-16, O Le Fanau Mai o le Faaola (Taga o Ata o le Talalelei 201;62495); ata 1-17, O Iesu A O Tamaitiiti i le Malumalu (Taga o Ata o le Talalelei 205; 62500); ata 1-19, O Iesu ma Tamaiti (Taga o Ata o le Talalelei 216; 62467); ata 1-43, O Iesu O Lo o Faamalolo Le Tauaso (Taga o Ata o le Talalelei 213; 62145); ma nisi lava e te manao e faaaoga.

    3. Ata 1-3, O Iesu le Keriso (Taga o Ata o le Talalelei 240; 62572); ata 1-8, O Le Tufatufaina Atu o le Faamanatuga (62021); ata 1-44, O Iesu O Lo o Aoao Atu i le Itu Lalolagi i Sisifo (Taga o Ata o le Talalelei 316:62380); ata 1-70, O le Talisuaga Mulimuli (Taga o Ata o le Talalelei 225; 62174).

  4. Ia faia sauniuniga talafeagai ai mo so o se Gaoioiga E Faamauoa ai e te manao e faaaoga.

Gaoioiga E Aoao Ai

Tofi se tamaitiiti e faia le tatalo amata.

Gaoioiga e Faatosina Mai Ai:

Faaali le ata 1-8, O Le Tufatufaina Atu o le Faamanatuga. Tau i tamaiti o le sauniga o le Aso Sa lea e masani ona tatou auai faatasi ma o tatou aiga e ta’ua o le sauniga o le faamanatuga.

Gaoioiga e Faatosina Mai Ai:

  • O le a le mea e faaigoa ai lenei sauniga o le sauniga o le faamanatuga?

Faailoa atu i tamaiti le sui o le korama a ositaulaga. Ia faamatala atu e lea sui tiute tauave o le Perisitua Arona i le faamanatuga. Ia faamatala mai foi ona lagona e uiga i lona tiute i totonu o lenei sauniga paia. Ia faafetai atu ia te ia ona tuu lea e alu i le sauniga a lana korama po o lana vasega o le Aoga Sa.

Na aumaia e Iesu le faamanatuga ina ia fesoasoani tatou te manatua ai o ia

Faaali le ata 1-3, O Iesu le Keriso. Faamanatu i tamaiti o Iesu o le Alo o le Tama Faalelagi. Talu ai e alofa tele Iesu ia te i tatou, sa ia afio mai i le lalolagi ina ia avea o ia ma o tatou Faaola. Sa ia faamalolo o e mamai, aoao atu le talalelei, ma faasino mai le ala sa’o e ola ai. Ona maliu ai lea o ia mo i tatou.

Tala

Faaali le ata 1-70, O Le Talisuaga Mulimuli. Faamatala le tala o le Talisuaga Mulimuli, o lo o maua i le Luka 22:19–20. Faitau leotele mai le Tusi Paia le fasi fuaitau mulimuli o le fuaiupu 19: “Tou te faia le mea nei e fai ma faamanatuga ia te au.” Faamatala o Iesu na fetalai atu i ona Aposetolo e faapotopoto faatasi i Aso Sapati taitasi ma faamanatu o ia e ala i le aai o le faamanatuga.

Faaali le ata 1-44, O Iesu O Lo o Aoao Atu i le Itu i Sisifo o le Lalolagi. Faamatala ina ua asiasi atu Iesu i Sa Nifaē, sa ia fetalai atu foi ia te i latou ina ia latou faapotopoto faatasi i Aso Sapati taitasi ma manatua o ia e ala i le aai i le faamanatuga (tagai i le 3 Nifae 18:1–11).

Tala

  • O ai sa tatau ona mafaufau i ai le au Aposetolo pe a aai i le faamanatuga?

  • O ai sa tatau ona mafaufau i ai Sa Nifaē pe a aai i le faamanatuga?

  • O ai e tatau ona tatou mafaufau i ai pe a tatou aai i le faamanatuga?

  • O a aso tatou te aai ai i le faamanatuga?

Gaoioiga

Fai faatasi ma tamaiti le fuaiupu faagaoioiga lea:

Ua Ou Fiafia Lava Ina Ua Ou Sau I Le Lotu I Lenei Aso Sa

Ua ou fiafia lava ina ua ou sau i le lotu i lenei aso (Ia fai le tumutumu o le falelotu i le faapipii faatasi lea o tumutumu lima o tamatamai lima o lima uma e lua).

Ou te aoao ai ina ia iloa ona faalogo (faaofuofu le lima ma faataamilo i le taliga.)

Ma ia faapea ona tatalo (piilima ma punou le ulu).

Ou te aoao ia Iesu i luga (tusi i luga).

Ou te mafaufau ia Iesu ma lona alofa (fusi oe lava).

Tala

Faaali auaua’i ata o le soifuaga o Iesu. A iloa e tamaiti le ata, ona fai lea i ai latou te faamatala mai le tala. Afai latou te le iloa le tala, ona e otootoina lea mo latou. Fai ia toatele tamaiti e fesoasoani i le faamatalaina o tala.

Tala

  • O a tala ia Iesu e mafai ona e mafaufau i ai i le taimi o le faamanatuga?

Fai i tamaiti e faamatala isi tala e uiga ia Iesu e mafai ona latou manatua i le taimi o le faamanatuga. Afai latou te le manatua se mea, ona e faamatala atu lea ia te i latou se tala se tasi pe lua e uiga ia Iesu, e te fia mafaufau lava i ai i le taimi o le faamanatuga.

E mafai ona tatou faaaloalo i le taimi o le faamanatuga

Gaoioiga

Fesoasoani i tamaiti e fai le fuaiupu lea, faaaoga ai taga o lo o faatonuina:

O le a ou piilima (piilima)

O le a punou lou ulu (punou le ulu)

Ma filemu, filemu ai lava (ia musumusu le faiga o le laina lea).

A o faapaiaina le faamanatuga,

O le a ou manatua na o Oe lava.

Faamalamalama talu ai sa aumaia e Iesu le faamanatuga e fesoasoani ai ina ia tatou manatua o ia, e taua lo tatou mafaufau ia Iesu ma fesoasoani foi i isi e mafaufau e uiga ia te ia. E mafai ona tatou faia lenei mea pe a tatou faaaloalo i le taimi o le faamanatuga.

Gaoioiga

Ia musumusu atu se faamatalaga se tasi mai faamatalaga o lo o i lalo i se tamaitiiti ona tau atu lea e le tamaitiiti i le vasega. Faaauau isi faamatalaga ma isi tamaiti.

Gaoioiga

  1. Tatou te sauniuni mo le faamanatuga e ala i le usuina o se pese faaaloalo e faamanatu mai ai ia te i tatou Iesu.

  2. Tatou te faalogologo lelei a o faia le tatalo o le faamanuiaina o le areto.

  3. A tufa mai le areto ia te i tatou, tatou te tago atu i le fasi areto e tasi.

  4. Tatou te faalogologo lelei a o faia le tatalo o le faamanuiaina o le vai.

  5. Tatou te inu ma le faaaloalo le vai ona tuu lea o le ipu i le fata (tray).

  6. Tatou te le taaalo i le areto po o le ipu o le faamanatuga.

Faamalamalama o le faia o nei mea e faaalia ai lo tatou faaaloalo a o tatou aai i le faamanatuga.

Gaoioiga

  • E faapefea ona tatou faaaloalo i le taimi o le faamanatuga?

Gaoioiga

Ia faalogologo lelei tamaiti a o e faatonuina atu taga. Fai i ai e tutu i luga pe afai e te ta’uina se mea e tatau ona latou fai pe mafaufau foi i ai i le taimi o le faamanatuga. Fai i ai e nonofo i lalo pe a e ta’u atu se mea e le tatau ona latou fai pe mafaufau foi i ai i le taimi o le faamanatuga. Faaaoga faataitaiga o lo o i lalo pe fai foi ni au lava mea.

Gaoioiga

  • Ia faalogologo lelei a o faia tatalo o le faamanatuga.

  • Ia manatua e alolofa le Tama Faalelagi ma Iesu ia te i tatou.

  • Mafaufau e o i se tafaoga.

  • Ia manatua sa faamalolo e Iesu tagata mama’i.

  • Talanoa i lou uso po o lou tuagane.

  • Migoi solo.

  • Mafaufau ia Iesu o lo o faamanuiaina tamaiti.

Molimau

Tuuina atu lau molimau e uiga i lou agaga faafetai ona o le faamanatuga ua fesoasoani tatou te manatua ai Iesu ma le mea sa ia faia mo i tatou. Faamatala atu e aupito sili ona e faafetai pe a faaaloalo tagata uma i le taimi o le faamanatuga ina ia mafai ai ona taulai tasi lou mafaufau ia Iesu.

O Isi Gaoioiga E Faamauoa Ai

Filifili nisi o nei gaoioiga e fai i le taimi o le lesona.

  1. Fai i tamaiti e tusi lona lava ata a o tago atu i le faamanatuga. Ia faaigoa a latou ata taitasi, E mafai ona ou mafaufau ia Iesu a o ou tago atu i le faamanatuga.

  2. Aumai i le vasega ni fata o le areto ma le vai e le o faaaogaina. Faavaai i ai tamaiti ma fetagofi e uu. Fai i tamaiti e faamatala po o le a le mea e tupu i le taimi o le faamanuiaina o le faamanatuga i le lotu faamanatuga.

  3. Ia faatinoina e tamaiti nisi o tala e fiafia i ai i le soifuaga o Iesu.

O Gaoioiga Faaopoopo Mo Tamaiti Laiti

  1. Faamalamalama le faamanatuga i se auala faigofie: Faaali atu se ata o Iesu ma ta’u i tamaiti e i ai le taimi i le Aso Sa tatou te manatua ai Iesu i se auala faapitoa. Ta’u i tamaiti o le taimi lea tatou te aai ai sina fasi falaoa laitiiti ma inu sina tama’i ipu vai i le sauniga faamanatuga. Faamatala o le taimi o le faamanatuga, tatou te manatua ai le tele o le alofa o Iesu ia te i tatou ma tatou mafaufau ai i le tele o mea sa ia faia e fesoasoani mai ai ina ia tatou fiafia.

  2. Usu pe tauloto upu o le pese: “Tau Mai Tala Ia Iesu” (Tusi Pese a Tamaiti) po o le pese: “Manao Iesu Ia Ou Fai Ma Sulu” (Tusi Pese a Tamaiti).

  3. Fesoasoani i tamaiti i le faiga o taga o le gaoioiga o lo o i lalo a o e faia upu:

    O le Foafoaga

    Ua fetalai atu Iesu ia susulu le la (ia faia se li’o tele i lima i luga ae o le ulu),

    Ia toulu uaga (ia tuutuu ifo i lalo lima a o faatetetete tamatamai lima).

    Ia tutupu fugalaau mamana, (faaofuofu lima ma faataliaga).

    Ua fetalai mai Iesu ia pepese manulele uma (ia faamomoe ma tatala tamatamai lima e pei o le gutu o se manulele),

    Ma sa faapea lava ona faia (piilima).

    (Johnie B. Wood, in Sing, Look, Do, Action Songs for Children, ed. Dorothy M. Peterson [Cincinnati: Standard Publishing Co., 1965]

    Faamanatu i tamaiti e tele mea ua aumaia e Iesu ia te i tatou ina ia tatou fiafia ai. E mafai ona tatou faaali atu lo tatou agaga faafetai e ala i lo tatou mafaufau ia Iesu i le taimi o le faamanatuga.