Kapitulli 9

Profetë të Perëndisë

Profetët Janë Përfaqësues të Perëndisë në Tokë

Çfarë fuqish dhe dhuratash ka një profet?

“Sepse Zoti, Zoti, nuk bën asgjë, pa ua treguar sekretin e tij shërbëtorëve të tij, profetëve” (Amosi 3:7).

Shumë njerëz jetojnë në errësirë, të pasigurt për vullnetin e Perëndisë. Ata besojnë se qiejt janë mbyllur dhe se njerëzit duhet t’i përballojnë të vetëm rreziqet e botës. Sa me fat janë shenjtorët e ditëve të mëvonshme! Ne e dimë se Perëndia komunikon me Kishën nëpërmjet profetit të Tij. Me zemra të mbushura me mirënjohje, shenjtorët në mbarë botën këndojnë himnin: “Të falemi, Zot, për profetin që rrugën ne sot na ndriçon” (Himne dhe Këngë të Fëmijëve f. 36).

Një profet është një burrë që thirret nga Perëndia për të qenë përfaqësuesi i Tij në tokë. Kur një profet flet në emër të Perëndisë është sikur të na flasë vetë Perëndia (shih DeB 1:38). Një profet është gjithashtu një dëshmitar i veçantë për Krishtin, që dëshmon për hyjninë e Tij dhe jep mësim ungjillin e Tij. Profeti na mëson të vërtetën dhe interpreton fjalën e Perëndisë. Ai u bën thirrje të padrejtëve të pendohen. Ai merr zbulesa dhe orientime nga Zoti për të mirën tonë. Profeti mund të shikojë në të ardhmen dhe të parashikojë ngjarjet e ardhshme që bota të mund të paralajmërohet.

Një profet mund të vijë nga rrethana të ndryshme të jetës. Ai mund të jetë i ri ose i vjetër, tepër i shkolluar ose i pashkolluar. Ai mund të jetë fermer, avokat, ose mësues. Profetët e lashtë vishnin tunika dhe mbanin bastunë. Profetët modernë veshin kostume dhe mbajnë çanta dokumentesh. Çfarë e dallon atëherë një profet të vërtetë? Një profet i vërtetë zgjidhet gjithmonë nga Perëndia dhe thirret nëpërmjet autoritetit të duhur të priftërisë (shih Nenet e Besimit 1:5).

Shenjtorët e ditëve të mëvonshme i mbështesin Presidencinë e Parë dhe Dymbëdhjetë Apostujt si profetë. Megjithatë, kur flasim për “profetin e Kishës”, e kemi fjalën për Presidentin e Kishës, i cili është Presidenti i priftërisë së lartë.

Gjatë Gjithë Epokave Perëndia Ka Thirrur Profetë për të Udhëhequr Njerëzimin

Në çfarë mënyrash i kanë udhëhequr profetët fëmijët e Perëndisë në të shkuarën?

Ka pasur profetë në tokë që nga koha e Adamit. Përvojat e këtyre burrave të mëdhenj na emocionojnë dhe na frymëzojnë. Moisiu, një profet i Dhiatës së Vjetër, udhëhoqi mijëra njerëz të popullit të tij për të dalë nga Egjipti e skllavëria drejt tokës së premtuar. Ai shkroi pesë librat e parë të Dhiatës së Vjetër dhe regjistroi Dhjetë Urdhërimet. Nefi, një profet i Librit të Mormonit, udhëtoi nga Jeruzalemi në kontinentin amerikan rreth 600 vjet para lindjes së Krishtit. Ky udhëheqës dhe kolonizator i madh na dha shumë shkrime të rëndësishme në Librin e Mormonit. Gjon Pagëzori u zgjodh të përgatiste botën për ardhjen e Zotit Jezu Krisht. Nëpërmjet Jozef Smithit, një profet i ditëve të mëvonshme, Zoti rivendosi Kishën. Kur ishte i ri, Jozef Smithi gjithashtu përktheu Librin e Mormonit.

Çfarë keni mësuar ju nga jeta dhe mësimet e profetëve?

Ne Kemi një Profet të Gjallë Sot në Tokë

Përse na duhet sot një profet i gjallë?

Ne kemi një profet që jeton sot në tokë. Ky profet është Presidenti i Kishës së Jezu Krishtit të Shenjtorëve të Ditëve të Mëvonshme. Ai ka të drejtën e zbulesës për mbarë Kishën. Ai mban “çelësat e mbretërisë”, që do të thotë se ai ka autoritetin të drejtojë mbarë Kishën dhe mbretërinë e Perëndisë mbi tokë, përfshirë administrimin e ordinancave të priftërisë (shih Mateu 16:19). Askush tjetër përveç profetit dhe Presidentit të zgjedhur nuk mund të marrë vullnetin e Perëndisë për mbarë anëtarësinë e Kishës. Zoti tha: “Kurrë nuk ka përveçse një njeri mbi tokë gjatë një kohe, mbi të cilin kjo fuqi dhe çelësat e kësaj priftërie jepen” (DeB 132:7). Presidenti i Kishës ndihmohet nga këshilltarët e tij në Presidencinë e Parë dhe anëtarët e Kuorumit të Të Dymbëdhjetëve, që janë gjithashtu profetë, shikues e zbulues.

Ne duhet të bëjmë ato gjëra që na thonë të bëjmë profetët. Presidenti Uillford Udraf tha se një profet kurrë nuk do të lejohet ta drejtojë Kishën në udhë të gabuar:

“Zoti kurrë nuk do të më lejojë mua apo cilindo tjetër që qëndron si President i kësaj Kishe, që t’ju drejtojë në udhë të gabuar. Kjo nuk bën pjesë në program. Nuk është në mendjen e Perëndisë. Nëse unë do të përpiqesha ta bëja këtë, Zoti do të më largonte nga kjo detyrë” (Teachings of Presidents of the Church: Wilford Woodruff [2004], f. 199).

Në çfarë mënyrash profeti i gjallë ka ndikuar Kishën?

Ne Duhet ta Mbështesim Profetin e Zotit

Çfarë mund të bëjmë për të ndjekur dhe mbështetur profetin?

Shumë njerëz e kanë të lehtë të besojnë në profetët e së kaluarës. Por është shumë më mirë të besojmë dhe të ndjekim profetin e gjallë. Ne ngremë dorën për të mbështetur Presidentin e Kishës si profet, shikues dhe zbulues.

Si mund ta mbështesim profetin? Ne duhet të lutemi për të. Barrët e tij janë të rënda dhe ai ka nevojë të forcohet nga lutjet e shenjtorëve.

Ne duhet të studiojmë fjalët e tij. Mund të dëgjojmë bisedat e tij në konferencë. Ne gjithashtu mund të pajtohemi tek Ensign apo Liahona që të mund t’i lexojmë bisedat e tij të konferencës dhe mesazhe të tjera që jep.

Ne duhet t’i ndjekim plotësisht mësimet e tij të frymëzuara. Nuk duhet të zgjedhim të ndjekim vetëm një pjesë të këshillës së tij të frymëzuar dhe ta lëmë mënjanë atë që na duket e pakëndshme ose e vështirë. Zoti na urdhëroi të ndjekim mësimet e frymëzuara të profetit të Tij:

“Ju duhet t’u vini veshin fjalëve dhe urdhërimeve të tij [të profetit], që ai do t’jua japë ashtu siç i merr ato, duke ecur gjithë shenjtëri përpara meje;

Sepse fjalën e tij duhet ta merrni si nga goja ime, plot durim e besim” (DeB 21:4–5).

Zoti kurrë nuk do ta lejojë Presidentin e Kishës të na drejtojë në udhë të gabuar.

Çfarë ka dhënë mësim apo theksuar kohët e fundit Presidenti i Kishës?

Bekime të Mëdha Vijnë nga Bindja ndaj Profetit

Në qoftë se bindemi, Zoti premton: “Portat e ferrit nuk do të hapen kundër jush; po, dhe Zoti Perëndi do t’i shpërndajë fuqitë e errësirës përpara jush dhe do të bëjë që qiejt të dridhen për të mirën tuaj dhe për lavdinë e emrit të tij” (DeB 21:6). Kur veprojmë ashtu siç na udhëzon profeti, bekimet derdhen mbi ne nga qielli.

Që të qëndrojë e fortë, Kisha e vërtetë duhet të “[ndërtohet] mbi themelin e apostujve dhe të profetëve, duke qënë Jezu Krishti vetë guri i qoshes” (Efesianëve 2:20). Në këtë botë të pasigurt ne jemi të bekuar të kemi një profet nëpërmjet të cilit Zoti na bën të ditur vullnetin e Tij.

Çfarë përvojash keni patur kur i jeni bindur këshillës së profetit?

Shkrime të Shenjta të Tjera

Numrat 12:6 (Perëndia flet nëpërmjet profetëve)
1 Samuelit 9:9 (profeti quhej shikues)
Amosi 3:7 (Perëndia ua zbulon sekretet e Tij profetëve)
Mosia 8:16–18 (një shikues mund të dijë gjërat e shkuara dhe gjërat që do të vijnë)
Lluka 1:70 (Perëndia flet nëpërmjet profetëve)
DeB 45:10, 15 (Perëndia flet sot po ashtu si në lashtësi)
1 Nefi 22:2 (nëpërmjet Shpirtit gjërat u bëhen të ditura profetëve)
DeB 68:3–5 (kur shërbëtorët e Zotit flasin të prekur nga Fryma e Shenjtë, ajo që thonë është mendja, vullneti dhe zëri i Zotit)
DeB 107:65–67, 91–92 (detyrat e Presidentit të Kishës)
DeB 43:1–7 (vetëm profeti është i autorizuar të marrë zbulesa për Kishën)