April 1836

Joseph nge Oliver nra Thapegnew fapi Kiy ko Priesthood

Yesus Kristus nge fapi angel ni yib ngalan e Temple u Kirtland

Reb e wik nga tomuren nin yibliy fare Temple u Kirtland, pag e biyu’ e Gidii’en Got ni yib nga temple ni ngar tayed fan fare Tathapeg. Biney e buch ko fare rran ko Madnom ko Easter. Joseph Smith, Oliver Cowdery, nge fare Ragag nge L’agruwi Apostle era pi’ed e sakrament ngak fapi Gidii’en Got.

Doctrine and Covenants 110, mornga’agen e biney e guruy; Gidii’en Got, 1:239

Tomuren fare sakrament, me yean Joseph nge Oliver ngabang ulan fare temple, u barba’ bangi maad, ngar meybil gow.

Doctrine and Covenants 110, mornga’agen e biney e guruy; Gidii’en Got, 1:239

Napan nra mu’ gow ko meybil, mi yow sap ngalang. Ma bay Yesus Kristus nib sak’iy u powchrow! Manang ni fapi Gidii’en Got e kar murwel gaed ni rib alamrin ni ngar toeyed fare Temple. Me yoeg, “Kug fanany e biney e nu’un.” Me yoeg Yesus ngak Joseph nge Oliver ni fapi tawa’ath ko temple era pi’ e falfalaen’ ngak e gidii’ ni bo’or.

Doctrine and Covenants 110:1–10

Tomuren ni chuw Yesus, me yib Moses ni fare profet ko bin Kakrom e M’ag ngabi m’ug ngak Joseph nge Oliver. Me pi’ ngorow fapi kiy ko priesthood nifan ko mukunuy rok’ pi yu Israel. Biney e be yipfan ni rayag ni ngar gagiyeg niged fare muruwel ko weliy mornga’agen fare gospel. Rayag ni ngar pi’ed fapi tamachib u dakean e fayleng ni ga’angin ni nge fek e gidii’ ngalan e Galasia rok’ fare Tathapeg.

Doctrine and Covenants 110:11

Bin migid ngay, e yib Elias ngabi m’ug. Me pi’ ngak Joseph nge Oliver fapi kiy ni ngan sulweg yarmen fare m’ag ku Abraham. Biney e be yipfan ni fapi Gidii’en Got e rayag ni ngar thapeged ku Somoel fare m’ag ni ta’ab rogon ko m’ag ku Abraham ni thapeg. Nra yib gelngin raed ni ngar feked fare gospel nge fapi tawa’ath rok’ Got ngak e gidii’ ni gubin yang ko boech e duw nga mm’on.

Doctrine and Covenants 110:12

Fin ni yib i m’ug fare profet Elijah. Me pi’ ngak Joseph nge Oliver fapi kiy ko seal nag, fa ta’areb nag, e tabinaew ni dariy bi’id manemus. Ma muruwel nra rrin’ fapi Gidii’en Got ulan fapi temple e yira fanay u tharmiy. Chiney ma bay gelngin e Galasia ni ngar rrin’ed e muruwel rok’ fare Tathapeg mi yaed fal’ag rogon ni nge yib bayay nga fayleng.

Doctrine and Covenants 110:13–16