August–September 1830

Parley nge Thankful Pratt

Mich ni ngan leak fare Thothup

Parley nge Thankful Pratt e yow e gidii’en e tamilaey’ u Ohio. Reb e rran ngay, me thamiy Parley fare Thothup nibe yoeg ngak ni nge digey e tabinaew rok’ ni nge machib nag mornga’agen fare Bible.

Saints, 1:92

Parley nge Thankful Pratt era pii’ew e milaey’ rorow nifan e chuway’. Darn ningew ko ggin ni yowra sor ngay, machane pagaen’ row ngay ni Got era tawa’ath nagrow ko pigpig rorow Ngak.

Saints, 1:92

Parley nge Thankful era fekew boech e maad nge salpiy miyow ‘af ngalan reb e booech. Napan ni yow be milekag u dakean yu New York, me yoeg fare Thothup ngak Parley ni nge ‘og nga butt’ ko fare booech. Parley e fith ngak Thankful ni nge ul’ul’ nge yean dabi soen nag. Me micheg nira sul ngak ni rib papay. Ke thamiy ni bay ban’en ni ba’adag Got nib tu’uf ni nge rrin’ u New York.

Saints, 1:92

Parley e rib n’ew yang e gin ni yaen riy u butt’. Fin arram me yib ko ba tabinaew rok’ be’ nib tamachib. Facha’ nib tamachib e yeog ngak Parley mornga’agen bake babyor nike be’ ngak. Nike yib ko bugi plates nib gold makan yoloey ni rikub kakrom. Nikan pinning fithingan ni fare Babyor ku Mormon. Reb e mo’on nib fel’yangren u New York e ke pilyeg e thin riy u dakean gelngin Got.

Saints, 1:92

Parley e riba’adag ni nge nang boech mornga’agen e biney. Fare tamachib e dag ngak Parley farke babyor. Ke falfalaen’, me bing Parley farke babyor me tabab i be’eg. Bo’or e awa nga tomuren, ma dabiyag ni nge tal i be’eg, kumus ko abich fa mol ma dani rrin’. Fare Thothup rok’ Somoel e ke yoeg ngak nib riyul’.

Saints, 1:92–93

Parley e riba’adag fare Babyor ku Mormon ni rib gel, ni riba’adag ni nge mada’nag fare mo’on nike pilyeg fapi thin riy. Ke yean ko fare milaey’ ko tabinaew rok’ Smith, ni gin ni mada’nag Hyrum riy, walagen Joseph ni pumo’on. Kar nonow nike n’uw e nep. Hyrum e yoeg ngak Parley ni fare Babyor ku Mormon e ba riyul’. Me pii’ ngak Parley reb e kopy ko fare babyor ni nge fanay.

Saints, 1:93

Napan nibe ul’ul’ i be’eg, me fil Parley mornga’agen Yesus Kristus ni yibi m’ug ngak fapi gidii’ u dakean yu Mariken boech e duw kafram. Ke guy Parley ni fare Babyor ku Mormon e rib ga’ buguwan ko gubin mit e fla’ab ko fayleng. Dabkiyag ni nge soen ni nge sul ngak Thankful nge weliy ngak e pin’en nike fil mornga’agen.

Saints, 1:93; 3 Nephi 11:1–12

Parley e yoeg ngak Thankful nge boech gidii’en e tabinaew rok’ mornga’agen fare Babyor ku Mormon. Ke yoeg ngoraed e pin’en nibe machib nag ni mornga’agen Yesus Kristus. Kari falfalaen’ Thankful ngay nike leak Parley wo’en fare Thothup make pire’eg fare muruwel ni ba’adag Got ni nge rrin’. Ku woed Parley, ke fil Thankful ni fare Babyor ku Mormon e ba riyul’.

Saints, 1:98–99