1828–1829

Martin Harris ni Ayuweg Joseph

Fil mornga’agen rogon i pagaen’uy ngak Somoel

Reb e rran ngay, napan nima par Joseph nge Emma u Pennsylvania, bay reb e fagar ni fithingan Martin Harris ni yib i fingichiyrow. Martin e bay e milaey’ rok’ ni rib ga’ yang u New York. Ma manang mornga’agen e muruwel rok’ Joseph nge fapi plate nib gold. Ke ayuweg Joseph biyay ko somm’on, ma chiney e ku ba’adag ni nge nang ko fa’anra bay boech ban’en ni rayag ni nge pi’ e ayuw riy.

Saints, 1:49

Joseph nge Emma e kari falfalaen’row. Bo’or e gidii’ nibe lemnag ni Joseph e be baen. Rib fel’ nibay reb e fagar ni woed Martin nib michuwean’ ko fapi plate nib gold ni bay nib riyul’.

Saints, 1:49

Napan ni tabab Joseph i pilyeg e thin ko fapi plate, ma Martin e be yoloey nga butt’ e pin’en nibe yoeg. Martin e kari falfalaen’ ni nge pi’ e ayuw ngak Somoel ko biney e muruwel ni th’abi ga’ mab fel’.

Saints, 1:50

Le’engin Martin, i Lucy, e dani falfalaen’. Ya dani michuwaen’ ni Joseph e bay fapi plate nib gold rok’. Be tafneynag ni Joseph e be gosgos ngak Martin. Ba’adag ni nge sul Martin nga New York me tal ni dabki pi’ e ayuw ngak Joseph.

Saints, 1:49–50

Machan Martin e ul’ul’ ngar muruwel gow Joseph u ta’abang. Ke lemnag ni fa’anra be’eg Lucy e pin’en ni yow be muruweliy, mara michuwaen’. Ke fith ngak Joseph ni fa’an rayag ni nge fek fapi payg nikar mu’ gow i pilyeg e thin riy nga New York ni nge dag ngak le’engin. Joseph e yog nira meybil nge fith ngak Got.

Saints, 1:50–51

Got e yoeg ngak Joseph ni dabi pag Martin ni nge fek fapi babyor nib sug e yoel riy. Martin e fith ngak Joseph ni nge meybil biyay nge fith. Joseph e meybil maku ta’areb rogon e fulweg riy. Machane Martin e ri ba’adag ni nge dag ngak le’engin e pi babyor ney nib sug ko yoel, ma Joseph e ba’adag ni nge ayuweg e fagar rok’. Joseph e meybil ni yan dalip yay ngay. Yaney ni meybil me yoeg Got ngak Joseph ni’ir e bayi duugliy ko mang e nge rrin’.

Saints, 1:51

Joseph e yoeg ngak Martin ni rayag ni nge fek fapi babyor nib sug e yoel riy nga New York, machane kemus ni rayag ni nge dag ngak e tin nikan duugliy gidii’en e tabinaew. Ma rib tu’uf ni nge fulweg fapi babyor nib sug ko yoel go napan l’agruw e wik ngay. Martina e yoeg ni rayag ni nge rrin’ e biney me chuw nge yean nike un fapi babyor nib sug ko yoel riy ngak.

Saints, 1:51

Napan ni chuw Martin, me yibi gargel Joseph nge Emma ko reb e bitir. Machane fare tir e yim’, me yibi m’ar Emma. Emma nge Joseph ni riyow ba kirbaen’.

Saints, 1:51–52

Joseph e be m’agfaen’ ngak Emma. Ma kube m’agfaen’ ngak Martin. Ke gaman l’agruw e wik ngay, ma dawri sul Martin. Emma e ki m’agfaen’ boech.

Saints, 1:52

Emma e yoeg ngak Joseph ni nge yean nga New York nge gay Martin. Joseph e mada’nag Martin ko tabinaew ko galibithir rok’. Napan ni fith Joseph Martin ko fapi babyor nib sug e yol riy, mari kirbaen’ Martin. Me yoeg nike malog fapi babyor nib sug e yoel riy. Ke gay rogon ni nge sapnag u gubin yang ma daniyag ni pire’eg.

Saints, 1:52–53

Joseph e ri kirbaen’ me yib e murus ngak. Ke nang ni dani mat’aw in nge pag Martin ni nge fek fapi babyor nib sug e yoel riy. Ere sul nga tabinaew me yoeg ngak Emma e pin’en nike buch. Fare angel Moroni e sul nge fek fapi plate nib gold. Me yoeg ngak Joseph ni fa’anra sobut’aen nag ir me kalngaen’, ma rayag ni thapeg fapi plate me pilyeg biyay e thin riy.

Doctrine and Covenants 3:5–11; 10:1–3; Saints, 1:53–54

Bo’or e wik ngay, ni’i par Joseph nibe tafney nag e n’en nike rrin’ nib kireb. Ke meybil ma be fith ni ngan n’agfaen rok’. Got e n’agfan rok’. Me yoeg ngak Joseph ni fapi babyor nib sug ko yoel e ke irring e gidii’ nibe gay rogon ni nge talag e muruwel rok’ Got. Machane dariy be’ ni rayag ni nge talag e muruwel rok’ Got. Ya Got e bay wo’en ni nge ul’ul’ nag e muruwel rok’.

Doctrine and Covenants 3:1–10; Saints, 1:54–55

Moroni ni yibi pi’ biyay fapi plate ngak Joseph. Got e yoeg ngak Joseph nge Martin ni fa’anra yowra sobut’aen’ nagrow me pagaen’row ngak, ma rayag ni ngar ul’ul’ gow ngar pi’ew e ayuw ni bo’or kanawo’en ko muruwel rok’. Rayag ni yowra pi’ e ayuw ngar fekew fare Babyor ku Mormon ngak e fayleng. Biney e babyor era ayuweg e gidii’ u gubin yang ni nge kalaen’ me michaen’ ngak Yesus Kristus.

Doctrine and Covenants 3:16–20; 5:21–35; Saints, 1:56–57