“Si Ammon,” Mga Kuwento sa Aklat ni Mormon (2023)
Si Ammon
Isang mapagpakumbabang tagapagsilbi
Nagnais si Ammon at ang kanyang mga kapatid na turuan ang mga Lamanita tungkol sa Panginoon. Nagtungo sila sa lupain kung saan nakatira ang mga Lamanita. Sa kanilang paglalakbay, nag-ayuno at nanalangin sila upang humingi ng tulong sa Panginoon. Pinanatag sila ng Panginoon. Sinabi Niya sa kanila na maging matiyaga at maging mabubuting halimbawa. Nagpunta ang bawat isa sa kanila sa iba’t ibang lugar upang magturo.
Nagpunta si Ammon sa lupain na tinatawag na Ismael. Iginapos siya ng mga tao roon at dinala siya kay Haring Lamoni. Sinabi ni Ammon kay Lamoni na nais niyang mamuhay kasama ng mga Lamanita. Nagustuhan ni Lamoni si Ammon at pinalaya ito. Nagnais siyang ipakasal si Ammon sa isa sa kanyang mga anak na babae, ngunit sa halip ay pinili ni Ammon na maging tagapagsilbi ni Lamoni.
Sinabihan ni Lamoni si Ammon na bantayan ang kanyang mga hayop. Isang araw, dinala ni Ammon at ng iba pang mga tagapagsilbi ang mga hayop upang uminom ng tubig. Habang umiinom ang mga hayop, dumating ang mga tulisan at itinaboy ang mga ito. Natakot ang iba pang mga tagapagsilbi na parurusahan sila dahil sa pagkawala ng mga hayop ni Lamoni.
Alam ni Ammon na ito ay isang pagkakataon upang ipakita ang kapangyarihan ng Panginoon. Sinabihan niya ang iba pang mga tagapagsilbi na huwag mag-alala at tinulungan niya silang hanapin ang mga nawawalang hayop.
Bumalik ang mga tulisan upang muling itaboy ang mga hayop. Ngunit sa pagkakataong ito, sinabihan ni Ammon ang iba pang mga tagapagsilbi na manatili at pigilan ang mga hayop na tumakbo palayo.
Nagpunta si Ammon upang pigilan ang mga tulisan na itaboy ang mga tupa. Hindi natakot ang mga tulisan kay Ammon. Inakala nila na mas malakas sila kaysa sa kanya. Ngunit hindi nila alam na tinutulungan ng Panginoon si Ammon.
Ipinukol ni Ammon ang mga bato sa mga tulisan gamit ang kanyang tirador. Namatay ang ilan sa kanila. Dahil dito ay nagalit ang iba pang mga tulisan, at nagnais silang patayin si Ammon. Nagulat sila dahil hindi nila matamaan si Ammon gamit ang sarili nilang mga bato. Hindi nila inasahan na napakalakas niya.
Sinubukang hampasin ng mga tulisan si Ammon gamit ang kanilang mga pambambo. Ngunit sa tuwing susubukan nila, pinuputol ni Ammon ang kanilang mga bisig sa pamamagitan ng kanyang espada upang hindi sila makalaban. Hindi nagtagal, masyado silang natakot kaya hindi na sila nakipaglaban pa at nagsitakbuhan na sila.
Sinabi ng mga tagapagsilbi kay Lamoni kung paano iniligtas ni Ammon ang mga hayop. Namangha si Lamoni. Inakala niya na si Ammon ang Dakilang Espiritu, na may dakilang kapangyarihan at nakaaalam sa lahat ng bagay.
Nagnais si Lamoni na kausapin si Ammon, ngunit nag-alala rin siya.
Pinuntahan ni Ammon si Lamoni, ngunit hindi alam ni Lamoni kung ano ang sasabihin. Tinulungan ng Panginoon si Ammon na malaman ang mga iniisip ni Lamoni. Sinabi ni Ammon na hindi siya ang Dakilang Espiritu. Sinabi niya kay Lamoni na ang Dakilang Espiritu ay ang Diyos. Nagnais si Lamoni na malaman ang iba pa tungkol sa Diyos.
Sinabi ni Ammon na nilikha ng Diyos ang daigdig at ang lahat ng narito. Pagkatapos ay sinabi ni Ammon kay Lamoni na ang Diyos ay may plano ng kaligtasan. Bilang bahagi ng planong iyon, darating si Jesucristo. Pinaniwalaan ni Lamoni ang sinabi ni Ammon. Nanalangin si Lamoni at hiniling niya sa Diyos na kaawaan siya at ang kanyang mga tao.