“Si Haring Noe at si Haring Limhi,” Mga Kuwento sa Aklat ni Mormon (2023)
Si Haring Noe at si Haring Limhi
Pagtakas mula sa mga Lamanita
Namuno si Haring Noe sa isang grupo ng mga Nephita. Marami siyang ginawang masasamang bagay, at may ilang taong nagalit sa kanya. Isang lalaking nagngangalang Gedeon ang nakipaglaban kay Noe gamit ang isang espada. Si Noe ay tumakas at umakyat sa isang tore. Mula sa tore, nakita niyang paparating ang isang hukbo ng mga Lamanita. Nagkunwari si Noe na natatakot siya para sa kanyang mga tao, kung kaya’t hinayaan siya ni Gedeon na mabuhay.
Tumakas si Noe at ang kanyang mga tao. Subalit hinabol sila ng mga Lamanita at sinimulan silang salakayin. Sinabihan ni Noe ang mga kalalakihan na iwan ang kanilang mga pamilya at sumama sa kanya.
Ang ilang kalalakihan ay umalis kasama ni Noe. Ngunit marami sa mga kalalakihan ang piniling manatili kasama ng kanilang mga pamilya. Pinili rin ng anak ni Noe na si Limhi na manatili.
Maraming anak na babae ang tumayo sa harapan ng hukbo at hiniling nila sa mga Lamanita na huwag saktan ang kanilang mga pamilya. Nakinig ang mga Lamanita sa mga anak na babae at hinayaang mabuhay ang mga Nephita. Sa halip, binihag ng mga Lamanita ang mga Nephita.
Ang mga mga kalalakihang tumakas ay nagnais na bumalik sa kanilang mga pamilya. Sinubukan ni Noe na pigilan sila, kaya pinatay siya ng mga kalalakihan. Pagkatapos ay bumalik na sila sa kanilang mga pamilya.
Masayang-masaya ang mga kalalakihan na ligtas ang kanilang mga pamilya. Sinabi nila kay Gedeon ang nangyari kay Noe.
Pinili ng mga tao si Limhi na maging bagong hari nila. Nangako si Limhi sa hari ng mga Lamanita na magbabayad sila sa mga Lamanita ng kalahati ng lahat ng pag-aari nila. Bilang kapalit, nangako ang hari ng mga Lamanita na hindi niya sasaktan ang mga tao ni Limhi.
Namuhay sila nang payapa sa loob ng maraming taon. Pagkatapos ay nagsimulang pakitunguhan nang masama ng mga Lamanita ang mga tao ni Limhi. Nagnais ang mga tao na maging malaya muli. Sinubukan nilang labanan ang mga Lamanita, ngunit natalo sila. Nanalangin sa Diyos ang mga tao na tulungan sila.
Isang araw, binisita ng isang Nephitang nagngangalang Ammon si Limhi at ang kanyang mga tao. Nagmula si Ammon sa lupaing tinatawag na Zarahemla. Masaya si Limhi na makita si Ammon.
Maaaring akayin ni Ammon ang mga tao ni Limhi patungo sa Zarahemla, ngunit kailangan muna nilang tumakas mula sa mga Lamanita. May plano si Gedeon.
Sa gabi, binigyan ni Gedeon ang mga bantay ng mga Lamanita ng dagdag na alak upang makatulog ang mga ito. Habang natutulog ang mga bantay, tumakas si Limhi at ang lahat ng kanyang tao mula sa lungsod.
Sila ay nagpunta sa Zarahemla at sumama sa mga Nephita roon. Marami pang natutuhan si Limhi at ang kanyang mga tao tungkol sa Diyos. Gumawa sila ng tipan, o espesyal na pangako, na paglilingkuran ang Diyos at susundin ang Kanyang mga kautusan. Nabinyagan sila at naging mga miyembro ng Simbahan ng Diyos. Naalala nila na tinulungan sila ng Diyos na makatakas mula sa mga Lamanita.