“Si Nephi at ang mga Laminang Tanso,” Mga Kuwento sa Aklat ni Mormon (2023)
Si Nephi at ang mga Laminang Tanso
Matutuhang sundin ang Espiritu
Bumalik sina Laman, Lemuel, Sam, at Nephi sa Jerusalem kinagabihan. Nagpunta si Nephi sa bahay ni Laban habang nagtago naman ang kanyang mga kapatid sa labas ng lungsod.
Hinayaan ni na gabayan siya Nephi ng Espiritu. Hindi niya alam kung ano ang dapat niyang gawin, pero alam niya na tutulungan siya ng Panginoon na makuha ang mga laminang tanso.
Nang malapit na si Nephi sa bahay ni Laban, natagpuan niya si Laban na nakabulagta sa lupa. Lasing si Laban. Nakita ni Nephi ang espada ni Laban at dinampot niya ito.
Habang nakatingin si Nephi sa espada, sinabi sa kanya ng Espiritu na patayin si Laban. Pero ayaw ni Nephi na patayin siya. Sinabi ng Espiritu kay Nephi na mas mabuting mamatay si Laban kaysa hindi magkaroon ng mga banal na kasulatan ang pamilya ni Nephi. Kailangan nila ang mga kautusan ng Diyos na nakasulat sa mga laminang tanso.
Alam ni Nephi na tinangka siyang patayin ni Laban. Ninakaw din ni Laban ang kanilang ari-arian at ayaw nitong sumunod sa mga kautusan ng Diyos.
Muling sinabi ng Espiritu kay Nephi na patayin si Laban. Alam ni Nephi na naghanda ng paraan ang Panginoon para makuha niya ang mga laminang tanso. Pinili niyang sundin ang Espiritu. Pinatay ni Nephi si Laban at isinuot ang damit ni Laban.
Pagkatapos ay nagpunta si Nephi sa kabang-yaman ni Laban at nakilala ang tagapagsilbi ni Laban na si Zoram. Kumilos si Nephi at nagsalita na katulad ni Laban.
Sinabi ni Nephi kay Zoram na kailangan niya ang mga laminang tanso. Pagkatapos ay sinabi ni Nephi kay Zoram na sumama sa kanya. Inakala ni Zoram na si Nephi ay si Laban, kaya ginawa niya ang gusto ni Nephi.
Nang nakalabas na ng lungsod sina Nephi at Zoram, inakala nina Laman, Lemuel, at Sam na si Nephi ay si Laban. Natakot sila at nagsimulang tumakas.
Tinawag ni Nephi ang kanyang mga kapatid. Nang malaman nilang ito ay si Nephi, tumigil sila sa pagtakbo. Pero natakot si Zoram at nagtangkang bumalik sa Jerusalem.
Pinigilan ni Nephi si Zoram. Sinabi niya kay Zoram na iniutos sa kanila ng Panginoon na kunin ang mga lamina. Inanyayahan niya si Zoram na sumama sa kanila sa lupang pangako. Nalaman ni Zoram na maaari siyang maging isang malayang tao, hindi na isang tagapagsilbi, at nangakong sasama kay Nephi at sa kanyang pamilya.
Naglakbay sila pabalik kina Lehi at Saria. Masayang-masaya sina Lehi at Saria na makita ang kanilang mga anak. Inakala ni Saria na namatay na ang kanyang mga anak. Dahil nanatiling ligtas ang kanyang mga anak, nagtiwala na siya ngayon na inutusan ang kanilang pamilya na umalis sa Jerusalem. Nag-alay ng mga hain ang pamilya nina Lehi at Saria para pasalamatan ang Panginoon.
Binasa ni Lehi ang mga laminang tanso. Nakita niya na ang mga lamina ay may mga katuruan ng mga propeta. Nalaman din niya na ang isa sa kanyang mga ninuno ay si Jose, na ipinagbili sa Egipto ng kanyang mga kapatid noong unang panahon. Alam ni Lehi na napakahalaga ng mga laminang tanso. Alam niya na nais ng Panginoon na mapasakamay ng kanyang pamilya ang mga kautusan.