កម្មសិទ្ធិនៃសេចក្តីសញ្ញា
ដើម្បីជាកម្មសិទ្ធិជាមួយព្រះ ហើយដើរជាមួយគ្នានៅលើផ្លូវនៃសេចក្ដីសញ្ញារបស់ទ្រង់ គឺត្រូវបានប្រទានពរដោយកម្មសិទ្ធិនៃសេចក្ដីសញ្ញា ។
បងប្អូនប្រុសស្រីជាទីស្រឡាញ់ មានរឿងត្រូវបានប្រាប់អំពីការរៀនអធិស្ឋានរបស់កុមារថ្នាក់អង្គការបឋមសិក្សា ។ « អរគុណចំពោះអក្សរ អេ និង អក្សរ ប៊ី … អក្សរ ជី » ។ ការអធិស្ឋានរបស់កុមារបន្ដថា « អរគុណចំពោះអក្សរ អិច វ៉ាយ ហ្សី ព្រះវរបិតាជាទីស្រឡាញ់ អរគុណចំពោះលេខ ១ លេខ ២ » ។ គ្រូបង្រៀនអង្គការបឋមសិក្សាបារម្ភ ប៉ុន្តែចាំមើលដោយឆ្លាតវៃ ។ កុមារបាននិយាយថា « អរគុណចំពោះលេខ ៥ លេខ ៦ — និងអរគុណចំពោះគ្រូថ្នាក់អង្គការបឋមសិក្សារបស់ខ្ញុំ ។ គាត់គឺជាមនុស្សតែម្នាក់គត់ដែលទុកឲ្យខ្ញុំបញ្ចប់ការអធិស្ឋានរបស់ខ្ញុំ » ។
ព្រះវរបិតាសួគ៌ ស្ដាប់ឮការអធិស្ឋានរបស់កុមារគ្រប់ៗរូប ។ ដោយក្ដីស្រឡាញ់ដ៏និរន្ដរ៍ ទ្រង់បានហៅយើងឲ្យមកជឿ ហើយក្លាយជាសមាជិកតាមរយៈសេចក្ដីសញ្ញា ។
ពិភពលោកនេះគឺមានពេញទៅដោយការបំភ័ន្ដ បោកបន្លំយ៉ាងប៉ិនប្រសព្វ ។ មានរឿងជាច្រើនដែលមើលទៅទំនងជាបណ្ដោះអាសន្ន ហើយស្ទាក់ស្ទើរ ។ នៅពេលយើងពុំគិតពីរបាំងមុខ ការបន្លំ ការមានអ្នកចូលចិត្ត ឬមិនចូលចិត្ត នោះគឺយើងចង់បានច្រើនជាងការចាប់អារម្មណ៍មួយភ្លែត ទំនាក់ទំនងបណ្ដោះអាសន្ន ឬការខិតខំចង់បានចំណាប់អារម្មណ៍ផ្ទាល់ខ្លួនខាងលោកិយនោះហើយ ។ ជាអំណរគុណ មានវិធីមួយឆ្ពោះទៅរកចម្លើយដែលសំខាន់ ។
ពេលយើងងាកមករកបទបញ្ញត្តិដ៏ធំរបស់ព្រះ គឺស្រឡាញ់ទ្រង់ និងអ្នកនៅជុំវិញយើងតាមរយៈសេចក្ដីសញ្ញា យើងធ្វើដូច្នោះពុំមែនជាមនុស្សចម្លែក ឬជាភ្ញៀវឡើយ ប៉ុន្តែជាបុត្ររបស់ទ្រង់នៅក្នុងដំណាក់ ។១ ប្រតិមតិកាលពីបុរាណគឺនៅតែពិត ។ នៅពេលយើងប្រគល់ខ្លួនយើងតាមរយៈកម្មសិទ្ធិនៃសេចក្ដីសញ្ញា នោះយើងស្វែងរក និងប្រែក្លាយទៅជាខ្លួនយើងដ៏អស់កល្បជានិច្ច ២ មានសេរីភាព មានជីវិត ពិត— ហើយកំណត់ពីទំនាក់ទំនងសំខាន់បំផុតរបស់យើង ។ កម្មសិទ្ធិនៃសេចក្តីសញ្ញាគឺដើម្បីចុះ ហើយរក្សាសន្យាដ៏មុតមាំចំពោះព្រះ និងចំពោះគ្នា តាមរយៈពិធីបរិសុទ្ធដ៏ពិសិដ្ឋ ដែលយាងអញ្ជើញអនុភាពនៃសេចក្ដីល្អឲ្យសម្ដែងឡើងនៅក្នុងជីវិតរបស់យើង ។៣ នៅពេលយើងធ្វើសេចក្ដីសញ្ញាដោយអស់ពីខ្លួនយើង នោះយើងអាចប្រែក្លាយហួសពីខ្លួនយើងជានរណាទៅទៀត ។ កម្មសិទ្ធិនៃសេចក្តីសញ្ញា ផ្តល់កន្លែង និទានកថា សមត្ថភាពដើម្បីប្រែក្លាយ ។ វាបង្កើតជំនឿទៅកាន់ជីវិត និងសេចក្ដីសង្គ្រោះ ។៤
សេចក្ដីសញ្ញាដ៏ទេវភាពប្រែក្លាយជាប្រភពនៃសេចក្ដីស្រឡាញ់ និងមកពីព្រះ និងជាមួយគ្នាទៅវិញទៅមក ។ ព្រះជាព្រះវរបិតាសួគ៌ស្រឡាញ់យើងខ្លាំង ហើយស្គាល់យើងច្បាស់ជាងយើងស្រឡាញ់ ឬស្គាល់ខ្លួនយើងទៅទៀត ។ សេចក្ដីជំនឿទៅលើព្រះយេស៊ូវគ្រីស្ទ និងការផ្លាស់ប្ដូរផ្ទាល់ខ្លួន ( ការប្រែចិត្ត ) នាំមកនូវក្ដីមេត្តា ព្រះគុណ និងការអភ័យទោស ។ អ្វីទាំងនេះជួយលួងលោមការឈឺចាប់ ភាពឯកោ អយុត្តិធម៌ ដែលយើងមានបទពិសោធន៍នៅក្នុងជីវិតរមែងស្លាប់ ។ ទ្រង់ជាព្រះ ព្រះវរបិតាសួគ៌របស់យើងចង់ឲ្យយើងទទួលអំណោយដ៏មហិមាបំផុតរបស់ព្រះ— ក្តីអំណរ និងជីវិតអស់កល្បជានិច្ចរបស់ទ្រង់ ។ ៥
ព្រះរបស់យើងគឺជាព្រះនៃសេចក្ដីស្រឡាញ់ ។ តាមលក្ខណៈធម្មជាតិរបស់ទ្រង់ ទ្រង់ « កាន់តាមសេចក្ដីសញ្ញា ហើយបង្ហាញសេចក្ដីមេត្តាករុណា » ។ ៦ សេចក្ដីសញ្ញារបស់ទ្រង់បន្ដនៅមាន « ដរាបណាពេលវេលានៅមាន ឬនៅមានផែនដី ឬមានមនុស្សម្នាក់នៅលើផែនដីដែលនឹងបានសង្គ្រោះ » ។ ៧ យើងមិនត្រូវវង្វេងនៅក្នុងភាពមិនពិតប្រាកដ និងភាពសង្ស័យទេ ប៉ុន្តែរីករាយនៅក្នុងទំនាក់ទំនងសេចក្ដីសញ្ញាដ៏រីករាយ « ខ្លាំងជាងចំណងនៃសេចក្ដីស្លាប់ » ។៨
ពិធីបរិសុទ្ធ និងសេចក្ដីសញ្ញារបស់ព្រះ គឺមានជាសាកលជាតម្រូវការរបស់ពួកគេ និងបុគ្គលម្នាក់តាមឱកាសរបស់ពួកគេ ។ នៅក្នុងភាពយុត្តិធម៌របស់ព្រះបុគ្គលម្នាក់ៗនៅគ្រប់កន្លែង និងគ្រប់វ័យ អាចទទួលបានពិធីបរិសុទ្ធនៃការសង្គ្រោះ ។ សិទ្ធិសេរីភាពអនុវត្តឡើង— កាលដែលបុគ្គលម្នាក់ៗជ្រើសរើសថាតើទទួលយកពិធីបរិសុទ្ធដែលផ្ដល់ឲ្យឬយ៉ាងណា ។ ពិធីបរិសុទ្ធនានារបស់ព្រះផ្ដល់ជាសញ្ញាសម្គាល់នៅលើផ្លូវនៃសេចក្ដីសញ្ញារបស់ទ្រង់ ។ យើងហៅផែនការរបស់ព្រះដើម្បីនាំកូនចៅរបស់ទ្រង់មកផ្ទះថាជា ផែនការនៃសេចក្ដីប្រោសលោះ ផែនការនៃសេចក្ដីសង្គ្រោះ ផែនការនៃសុភមង្គល ។ ការប្រោសលោះ ការសង្គ្រោះ សុភមង្គលសេឡេស្ទាល កើតមានតាមរយៈព្រះយេស៊ូវគ្រីស្ទ « ដែលបាននាំមកនូវដង្វាយធួនដ៏ល្អឥតខ្ចោះនេះ » ។ ៩
ដើម្បីជារបស់ផងព្រះ ហើយដើរជាមួយគ្នានៅលើផ្លូវនៃសេចក្ដីសញ្ញា គឺត្រូវបានប្រទានពរដោយកម្មសិទ្ធិនៃសេចក្ដីសញ្ញា ។
ទីមួយ កម្មសិទ្ធិនៃសេចក្តីសញ្ញាផ្ដោតចម្បងទៅលើព្រះយេស៊ូវគ្រីស្ទ « ជាអ្នកកណ្ដាលនៃសេចក្ដីសញ្ញាថ្មី » ។ ១០ គ្រប់ការណ៍ទាំងអស់ផ្សំគ្នាសម្រាប់សេចក្ដីល្អរបស់យើង នៅពេលយើង « ត្រូវបានញែកចេញជាបរិសុទ្ធនៅក្នុងព្រះគ្រីស្ទ…នៅក្នុងសេចក្ដីសញ្ញានៃព្រះវរបិតា » ។ ១១ គ្រប់សេចក្ដីល្អ និងពរជ័យដែលបានសន្យា កើតមានមកចំពោះអ្នកទាំងឡាយដែលបន្ដស្មោះត្រង់ដល់ទីបំផុត ។ « ស្ថានភាពដ៏រីករាយនៃអស់អ្នកណាដែលកាន់តាមព្រះបញ្ញត្តិទាំងឡាយនៃព្រះ » គឺ « បានពរគ្រប់យ៉ាង ទាំងខាងសាច់ឈាម និងខាងវិញ្ញាណផង » ហើយ « អាចរស់នៅជាមួយនឹងព្រះក្នុងស្ថានភាពសុភមង្គលដ៏មិនចេះចប់មិនចេះហើយ… » ។ ១២
នៅពេលយើងគោរពដល់សេចក្ដីសញ្ញារបស់យើង នោះពេលខ្លះយើងអាចមានអារម្មណ៍ថាយើងនៅជាមួយពួកទេវតា ។ ហើយយើងនឹងក្លាយជា—អ្នកទាំងឡាយដែលយើងស្រឡាញ់ និងជាអ្នកដែលប្រទានពរយើងនៅម្ខាងនេះនៃវាំងនន និងជាអ្នកទាំងឡាយដែលស្រឡាញ់ និងប្រទានពរយើងមកពីម្ខាងទៀតនៃវាំងនន ។
ថ្មីៗនេះ ស៊ីស្ទើរ ហ្គង និងខ្ញុំ បានមើលឃើញកម្មសិទ្ធិនៃសេចក្ដីសញ្ញាក្នុងភាពដ៏ទន់ភ្លន់បំផុតនៅក្នុងបន្ទប់ពេទ្យមួយ ។ ឪពុកវ័យក្មេងម្នាក់ត្រូវការផ្លាស់ប្ដូរតម្រងនោមយ៉ាងខ្លាំង ។ គ្រួសាររបស់គាត់បានយំ បានតមអាហារ ហើយបានអធិស្ឋានសម្រាប់គាត់ដើម្បីទទួលបានតម្រងនោមមួយ ។ នៅពេលបានឮដំណឹងថាមានតម្រងនោមសង្គ្រោះជីវិតមួយ នោះភរិយាគាត់បាននិយាយដោយស្ងាត់ៗថា « ខ្ញុំសង្ឃឹមថាគ្រួសារផ្សេងទៀតគឺ មិនអីទេ » ។ ដើម្បីជាសកម្មសិទ្ធិដោយសេចក្ដីសញ្ញា តាមពាក្យសម្ដីរបស់សាវកប៉ុល « ឲ្យយើងបានសេចក្តីកម្សាន្ដចិត្តគ្នាទៅវិញទៅមក ក្នុងពួកអ្នករាល់គ្នា ដោយសារសេចក្តីជំនឿរបស់យើងនិមួយៗ គឺរបស់អ្នករាល់គ្នា និងរបស់ខ្ញុំផង» ។ ១៣
ដំណើរក្នុងជីវិត យើងអាចនឹងបាត់បង់ជំនឿទៅលើព្រះ ប៉ុន្តែទ្រង់មិនដែលបាត់ជំនឿលើយើងទេ ។ ទ្រង់បំភ្លឺជានិច្ចដូចសព្វដង ។ ទ្រង់អញ្ជើញយើងឲ្យមក ឬត្រឡប់មកកាន់សេចក្ដីសញ្ញាដែលគូសសញ្ញាផ្លូវរបស់ទ្រង់ ។ ទ្រង់រង់ចាំជាស្រេចដើម្បីឱបក្រសោបយើង ទាំងយើង « នៅពីចម្ងាយ » ។១៤ នៅពេលយើងរកមើលគំរូ ផ្កាភ្លើង ឬចំនុចភ្ជាប់តូចៗនៃបទពិសោធន៍របស់យើងដោយកែវភ្នែកនៃសេចក្ដីជំនឿ នោះយើងអាចមើលព្រះគុណ និងការលើកទឹកចិត្តដ៏ទន់ភ្លន់របស់ទ្រង់ ជាពិសេសនៅក្នុងការសាកល្បង ការសោកស្ដាយ និងឧបគ្គនានា ក៏ដូចជានៅក្នុងអំណររបស់យើង ។ ទោះជាយ៉ាងណា យើងជំពប់ដួល ឬធ្លាក់ជាញឹកញាប់ បើយើងបន្ដឆ្ពោះទៅមុខទៅរកទ្រង់ នោះទ្រង់នឹងជួយយើងមួយជំហានម្ដងៗ ។
ទីពីរ ព្រះគម្ពីរមរមន គឺជាភស្ដុតាងដែលយើងអាចកាន់នៅក្នុងដៃរបស់យើងនូវកម្មសិទ្ធិនៃសេចក្ដីសញ្ញា ។ ព្រះគម្ពីរមរមន គឺជាឧបករណ៍ដែលបានសន្យាសម្រាប់ការប្រមូលផ្ដុំកូនចៅនៃព្រះដែលបានព្យាករទុក ជាសេចក្ដីសញ្ញាថ្មី ។១៥ នៅពេលយើងអានព្រះគម្ពីរមរមនដោយខ្លួនយើង និងជាមួយអ្នកដទៃ មិនថាដោយស្ងាត់ៗ ឬខ្លាំងៗ នោះយើងអាចសួរព្រះ « ដោយចិត្តស្មោះសរ គឺដោយស្មោះអស់ពីចិត្ត ដោយមានសេចក្ដីជំនឿជឿដល់ព្រះគ្រីស្ទ » ហើយទទួលបានការអះអាងពីព្រះចេស្ដានៃព្រះវិញ្ញាណបរិសុទ្ធថា ព្រះគម្ពីរមរមនគឺជាការពិត ។១៦ រឿងនេះរួមមាននូវការអះអាងថា ព្រះយេស៊ូវគ្រីស្ទគឺជាព្រះអង្គសង្គ្រោះរបស់យើង យ៉ូសែប ស្ម៊ីធ គឺជាព្យាការីនៃការស្ដារឡើងវិញ ហើយសាសនាចក្ររបស់ព្រះអម្ចាស់ ត្រូវបានហៅតាមព្រះនាមរបស់ទ្រង់— សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ ១៧
ព្រះគម្ពីរមរមនថ្លែងពីសេចក្ដីសញ្ញាពីបុរាណ និងសម័យទំនើបចំពោះអ្នកដែលជាកូនចៅលីហៃ « កូនចៅនៃពួកព្យាការី » ។ ១៨ ជីដូនជីតារបស់អ្នក បានទទួលសេចក្ដីសញ្ញាដែលសន្យាថា អ្នក កូនចៅរបស់អ្នក នឹងទទួលស្គាល់សំឡេងមួយ ចេញពីក្នុងធូលីដីនៅក្នុងព្រះគម្ពីរមរមន ។១៩ សំឡេងដែលអ្នកបានទទួលអារម្មណ៍ នៅពេលអ្នកអានថ្លែងទីបន្ទាល់ថាអ្នកគឺជា « កូនចៅនៃសេចក្ដីសញ្ញា » ២០ហើយព្រះយេស៊ូវគឺជាអ្នកគង្វាលល្អរបស់អ្នក ។
ព្រះគម្ពីរមរមនអញ្ជើញយើងម្នាក់ៗ តាមពាក្យរបស់អាលម៉ា ដើម្បីចូលទៅក្នុង « សេចក្ដីសញ្ញាជាមួយនឹង [ព្រះអម្ចាស់] ថា [ យើង ] នឹងបម្រើព្រះអង្គ ហើយកាន់តាមព្រះបញ្ញត្តិទាំងឡាយរបស់ទ្រង់ ដើម្បីឲ្យទ្រង់ស្រោចព្រះវិញ្ញាណទ្រង់ មកលើ [ យើង ] យ៉ាងបរិបូរណ៍? » ។ ២១នៅពេលយើងចង់ផ្លាស់ប្ដូរដើម្បីបានកាន់តែល្អប្រសើរ— មានមនុស្សម្នាក់រៀបរាប់ថា « ឈប់រងទុក្ខវេទនា ចូររីករាយជាតួររីករាយ » — នោះយើងបើកចំពោះការដឹកនាំ ជំនួយ និងកម្លាំង ។ យើងអាចមកដោយសេចក្ដីសញ្ញាដើម្បីមានកម្មសិទ្ធិជាមួយព្រះ និងសហគមន៍នៃអ្នកជឿស្មោះត្រង់ ហើយទទួលបានពរជ័យដែលបានសន្យានៅក្នុងគោលលទ្ធិនៃព្រះគ្រីស្ទ ២២ឥឡូវនេះ ។
សិទ្ធិអំណាចបព្វជិតភាពដែលបានស្ដារឡើងវិញប្រទានពរកូនចៅ របស់ទ្រង់ទាំងអស់ គឺជាផ្នែកទីបីនៃកម្មសិទ្ធិនៃសេចក្ដីសញ្ញា ។ នៅក្នុងគ្រាកាន់កាប់ត្រួតត្រានេះ យ៉ូហានបាទីស្ទ និងសាវកពេត្រុស យ៉ាកុប និងយ៉ូហាន បានយាងមកជាតួអង្គរុងរឿងមកពីព្រះ ដើម្បីស្ដារសិទ្ធិអំណាចបព្វជិតភាពរបស់ទ្រង់ ។២៣ បព្វជិតភាពរបស់ព្រះ និងពិធីបរិសុទ្ធនានារបស់ទ្រង់ ធ្វើឲ្យទំនាក់ទំនងនៅលើផែនដី ហើយអាចផ្សារភ្ជាប់ទំនាក់ទំនងនៃសេចក្ដីសញ្ញានៅស្ថានសួគ៌ ។២៤
បព្វជិតភាពអាចប្រទានពរចាប់តាំងពីជាទារករហូតដល់ស្លាប់— ចាប់ពីពេលដាក់ឈ្មោះ និងការប្រសិទ្ធពររបស់ទារករហូតដល់ពេលឧទ្ទិសឆ្លងផ្នូរ ។ ពរជ័យបព្វជិតភាព ព្យាបាល លួងលោមចិត្ត ទូន្មាន ។ ឪពុកម្នាក់ខឹងនឹងកូនប្រុសគាត់ រហូតដល់មានសេចក្ដីស្រឡាញ់អភ័យទោសកើតឡើង នៅពេលឪពុកប្រទានពរជ័យបព្វជិតភាពដ៏ទន់ភ្លន់ដល់កូនប្រុសរបស់គាត់ ។ សមាជិកតែមួយគត់នៅក្នុងគ្រួសារនាង យុវនារីជាទីស្រឡាញ់មានភាពមិនប្រាកដអំពីសេចក្ដីស្រឡាញ់របស់ព្រះចំពោះនាង រហូតដល់នាងបានទទួលពរជ័យបព្វជិតភាពដ៏បំផុសគំនិត ។ ពួកលោកអយ្យកោដ៏ថ្លៃថ្នូរៀបចំខ្លួនខាងវិញ្ញាណដើម្បីប្រទានពរជ័យបព្វជិតភាពដ៏បំផុសគំនិតនៅទូទាំងពិភពលោក ។ នៅពេលលោកអយ្យកោដាក់ដៃគាត់លើក្បាលរបស់អ្នក គាត់ដឹង ហើយបង្ហាញសេចក្ដីស្រឡាញ់របស់ព្រះចំពោះអ្នក ។ លោកប្រកាសអំពីខ្សែស្រឡាយរបស់អ្នកនៅក្នុងវង្សនៃអ៊ីស្រាអែល ។ លោកបានបង្ហាញពីពរជ័យទាំងឡាយមកពីព្រះអម្ចាស់ ។ ភរិយារបស់លោកអយ្យកោម្នាក់ប្រកបដោយប្រាជ្ញា បានប្រាប់ខ្ញុំអំពីរបៀបដែលគាត់ និងគ្រួសារគាត់អញ្ជើញព្រះវិញ្ញាណ ជាពិសេសនៅថ្ងៃដែលប៉ាប៉ារបស់ពួកគាត់កំពុងផ្ដល់ពរជ័យអយ្យកោ ។
ជាចុងក្រោយ ពរជ័យនៃកម្មសិទ្ធិនៃសេចក្ដីសញ្ញាកើតឡើង ពេលយើងធ្វើតាមព្យាការីរបស់ព្រះអម្ចាស់ ហើយរីករាយនៅក្នុងរស់នៅតាមសេចក្ដីសញ្ញា រួមទាំងនៅក្នុងអាពាហ៍ពិពាហ៍ផងដែរ ។ សេចក្ដីសញ្ញាអាពាហ៍ពិពាហ៍ប្រែក្លាជាអស្ចារ្យ និងអស់កល្ប នៅពេលយើងជ្រើសរើសជាប្រចាំនូវសុភមង្គលរបស់ស្វាមីភរិយាយើង និងគ្រួសារពីមុនខ្លួនយើង ។ នៅពេលពាក្យ « ខ្ញុំ » ក្លាយជា « ពួកយើង » នោះយើងរីកចម្រើនជាមួយគ្នា ។ យើងរីកចម្រើនពីភាពវ័យក្មេង ទៅចាស់ទុំជាមួយគ្នា ។ នៅពេលយើងប្រទានពរដល់គ្នាទៅវិញទៅមកនៅក្នុងជីវិតនៃការមិនគិតពីខ្លួនយើង នោះយើងរកឃើញសេចក្ដីសង្ឃឹម និងអំណរដែលធ្វើឲ្យចិត្តរីករាយ នៅក្នុងពេលនេះ និងអស់កល្បជានិច្ច ។
ខណៈដែលស្ថានភាពផ្សេងៗពីគ្នា នៅពេលយើងធ្វើអ្វីទាំងអស់ដែលយើងអាចធ្វើបាន អស់ពីសមត្ថភាពរបស់យើង ហើយទូលសូមដោយស្មោះសរ ហើយស្វែងរកជំនួយរបស់ទ្រង់នៅពេលយើងធ្វើកិច្ចការនានា នោះព្រះអម្ចាស់នឹងដឹកនាំពួកយើង នៅក្នុងពេលវេលា និងរបៀបរបស់ទ្រង់ នៅក្នុងគំនិត និងដួងចិត្តរបស់យើង តាមរយៈព្រះវិញ្ញាណបរិសុទ្ធ ។២៥ សេចក្ដីសញ្ញាអាពាហ៍ពិពាហ៍កំពុងចងភ្ជាប់នៅពេលពួកគេជ្រើសរើសធ្វើជាមួយគ្នា— ជាការរំឭកមួយអំពីការគោរពរបស់ព្រះ និងយើងចំពោះសិទ្ធិសេរីភាព និងពរជ័យនៃជំនួយរបស់ទ្រង់ នៅពេលយើងស្វែងរកវារួមគ្នា ។
ផលផ្លែនៃកម្មសិទ្ធិនៃសេចក្ដីសញ្ញាមានគ្រប់ជំនាន់ក្នុងគ្រួសារ មាននៅក្នុងគេហដ្ឋាន និងដួងចិត្តរបស់យើង ។ សូមអនុញ្ញាតឲ្យខ្ញុំបង្ហាញឧទាហរណ៍ផ្ទាល់ខ្លួន ។
នៅពេលស៊ីស្ទើរ ហ្គង និងខ្ញុំ កំពុងធ្លាក់ក្នុងអន្លង់ស្នេហ៍ឆ្ពោះទៅកាន់អាពាហ៍ពិពាហ៍ ខ្ញុំបានដឹងអំពីសិទ្ធិសេរីភាព និងការសម្រេចចិត្ត ។ យើងរស់នៅក្នុងប្រទេសពីរផ្សេងពីគ្នា នៅលើទ្វីបពីរផ្សេងគ្នាអស់មួយរយៈ ។ នោះជាមូលហេតុដែលខ្ញុំអាចនិយាយត្រង់ៗថា ខ្ញុំរៀនបានសញ្ញាប័ត្របណ្ឌិតផ្នែកទំនាក់ទំនងអន្តរជាតិ ។
នៅពេលខ្ញុំបានសួរថា « ឱ ព្រះវរបិតាសួគ៌អើយ តើទូលបង្គំគួរតែរៀបការជាមួយស៊ូសានដែរឬទេ ? » ខ្ញុំមានអារម្មណ៍សុខសាន្តក្នុងចិត្ត ។ ប៉ុន្តែវាកើតឡើងនៅពេលខ្ញុំបានអធិស្ឋានដោយស្មោះអស់ពីចិត្តថា « ឱ ព្រះវរបិតាសួគ៌អើយ ទូលបង្គំស្រឡាញ់ស៊ូសាន ហើយចង់រៀបការជាមួយនាង ។ ខ្ញុំសន្យាថា ខ្ញុំនឹងធ្វើជាស្វាមី និងឪពុកដ៏ល្អបំផុតដែលខ្ញុំអាចធ្វើបាន » — នៅពេលខ្ញុំបានអនុវត្ត ហើយធ្វើការសម្រេចចិត្តអស់ពីសមត្ថភាពរបស់ខ្ញុំ នោះការបញ្ជាក់ដ៏ខ្លាំងក្លាបានកើតឡើងដល់ខ្ញុំ ។
ឥឡូវនេះ មែកធាងគ្រួសារ ដំណើររឿង និងរូបថតរបស់គ្រួសារហ្គង និង លីនសេ ក្នុងកម្មវិធីស្រាវជ្រាវពង្សប្រវត្តិ ជួយយើងរកឃើញ ហើយតភ្ជាប់តាមរយៈបទពិសោធន៍រស់នៅនៃកម្មសិទ្ធិនៃសេចក្ដីសញ្ញាជាច្រើនជំនាន់ ។២៦ សម្រាប់យើង រួមមានទាំងការគោរពបុព្វការីជន ៖
លោកយាយទួត អាលីស ប្លោអើរ បែងហ្គើតធើរ ដែលមានគេសុំរៀបការដល់ទៅបីនាក់ក្នុងថ្ងៃតែមួយ ក្រោយមកបានសូមឲ្យស្វាមីរបស់គាត់ភ្ជាប់ឈ្នាន់ធាក់ទៅនឹងធុងសម្រាប់ធ្វើប័ររបស់គាត់ ដើម្បីឲ្យគាត់អាចកូរវឹកទឹកដោះធ្វើប័រផង និងចាក់អាវក្នុងពេលតែមួយផង ។
លោកតាទួត ឡូយ គៀ ឆា បានលីកូនៗរបស់គាត់នៅលើខ្នង និងរបស់មួយចំនួនរបស់គ្រួសារគាត់នៅលើសត្វលា នៅពេលពួកគេបានឆ្លងកាត់វាលឡាវ៉ានៅលើកោះហាវ៉ៃដ៏ធំ ។ ការតាំងចិត្ត និងលះបង់នៃជំនាន់ជាច្រើនរបស់គ្រួសារឆា បានប្រទានពរដល់គ្រួសារយើងនាសព្វថ្ងៃនេះ ។
លោកយាយទួត ម៉ារី អាលីស ផូវ៉េល លីនសេ បានចាកចេញជាមួយនឹងកូនតូចប្រាំនាក់ ពេលស្វាមី និងកូនប្រុសច្បងរបស់គាត់បានស្លាប់ភ្លាមៗរំលងគ្នាតែប៉ុន្មានថ្ងៃ ។ ជាស្ត្រីមេម៉ាយអស់រយៈពេល ៤៧ ឆ្នាំ ហ្គ្រាម បានចិញ្ចឹមគ្រួសាររបស់គាត់ ដោយក្ដីស្រឡាញ់ជ្រោមជ្រែងមកពីថ្នាក់ដឹកនាំ និងសមាជិកក្នុងមូលដ្ឋាន ។ អំឡុងពេលប៉ុន្មានឆ្នាំនោះ ហ្គ្រាម បានសន្យានឹងព្រះអម្ចាស់ថា ប្រសិនបើទ្រង់ជួយគាត់ នោះគាត់នឹងពុំរអ៊ូរទាំឡើយ ។ ព្រះអម្ចាស់បានជួយគាត់មែន ។ គាត់ពុំរអ៊ូរទាំឡើយ ។
បងប្អូនប្រុសស្រី អ្វីទាំងអស់ដែលល្អ និងអស់កល្បគឺបានផ្តោតទៅលើភាពពិតដ៏រស់រវើកនៃព្រះជាព្រះវរបិតាដ៏នៅអស់កល្បជានិច្ច និងព្រះរាជបុត្រាទ្រង់ព្រះយេស៊ូវគ្រីស្ទ និងដង្វាយធួនរបស់ទ្រង់ ដែលបានធ្វើជាសាក្សីដោយព្រះវិញ្ញាណបរិសុទ្ធ ។ ព្រះអម្ចាស់របស់យើង ព្រះយេស៊ូវគ្រីស្ទគឺជាអ្នកកណ្តាលនៃសេចក្តីសញ្ញាថ្មី ។ ការថ្លែងទីបន្ទាល់អំពីព្រះយេស៊ូវគ្រីស្ទគឺជាគោលបំណងនៃសេចក្ដីសញ្ញាមួយរបស់ព្រះគម្ពីរមរមន ។២៧ ដោយសម្បថ និងសេចក្ដីសញ្ញា សិទ្ធិអំណាចបព្វជិតភាពដែលបានស្ដារឡើងវិញរបស់ព្រះ គឺមានបំណងដើម្បីប្រទានពរដល់កូនចៅរបស់ព្រះទាំងអស់ រួមមានទាំងតាមរយៈសេចក្ដីសញ្ញាអាពាហ៍ពិពាហ៍ គ្រួសារជាច្រើនជំនាន់ និងពរជ័យនីមួយៗ ។
ព្រះអង្គសង្គ្រោះរបស់យើងប្រកាសថា « យើងគឺជាអាលផា និងអូមេកា ជាព្រះគ្រីស្ទដ៏ជាព្រះអម្ចាស់ មែនហើយ គឺយើងនេះហើយ គឺជាទ្រង់ គឺជាដើម ហើយជាចុង ជាព្រះដ៏ប្រោសលោះនៃពិភពលោក » ។២៨
ទ្រង់គង់នៅជាមួយយើង នៅក្នុងគ្រប់សិទ្ធិអំណាចនៃសេចក្ដីសញ្ញាទាំងអស់របស់យើងចាប់ពីដើមដំបូងរហូតដល់ចប់ ។ ខ្ញុំសូមថ្លែងទីបន្ទាល់ដូច្នោះ ក្នុងព្រះនាមដ៏ពិសិដ្ឋ និងបរិសុទ្ធនៃព្រះយេស៊ូវគ្រីស្ទ អាម៉ែន ។