ការពាល់របស់ព្រះអង្គសង្គ្រោះ
កាលយើងមករកទ្រង់ ព្រះអម្ចាស់ នឹងសង្គ្រោះយើង មិនថាព្យាបាលយើង ឬប្រទានកម្លាំងឲ្យយើងប្រឈមនឹងស្ថានភាពនានានោះទេ ។
ប្រហែលជាពីរពាន់ឆ្នាំកន្លងទៅ ព្រះអង្គសង្គ្រោះបានចុះមកពីភ្នំ បន្ទាប់ពីការបង្រៀនអំពីសុភមង្គល និងគោលការណ៍នៃដំណឹងល្អផ្សេងទៀត ។ កាលទ្រង់កំពុងយាត្រា មានបុរសកើតឃ្លង់ម្នាក់មកកាន់ទ្រង់ ។ បុរសនោះបានបង្ហាញគារវភាព និងការគោរព កាលគាត់លុតជង្គង់ចុះមុខព្រះគ្រីស្ទ ទូលសូមការធូរស្បើយពីការឈឺចាប់របស់គាត់ ។ សំណើគាត់គឺសាមញ្ញ ៖ « ឱព្រះអម្ចាស់អើយ បើទ្រង់សព្វព្រះហឫទ័យ ទ្រង់អាចនឹងប្រោសឲ្យទូលបង្គំជាស្អាតបាន » ។
រួចព្រះអង្គសង្គ្រោះបានលូកព្រះហស្ដទ្រង់ពាល់គាត់ ហើយមានបន្ទូលថា « ខ្ញុំចង់ដែរ ចូរឲ្យជាស្អាតចុះ » ។១
យើងរៀនថាព្រះអង្គសង្រ្គោះតែងតែចង់ប្រទានពរជ័យមកយើង ។ ពរជ័យខ្លះអាចមកភ្លាមៗ ខ្លះទៀតអាចចំណាយពេលយូរបន្ដិច ហើយពរជ័យខ្លះអាចថែមទាំងកើតមានក្រោយជីវិតនេះ ប៉ុន្ដែពរជ័យនឹងកើតមានក្នុងពេលកំណត់វា ។
ដូចជាមនុស្សឃ្លង់នេះដែរ យើងអាចរកឃើញកម្លាំង និងការលួងលោមក្នុងជីវិតនេះ តាមរយៈការទទួលយកព្រះទ័យរបស់ទ្រង់ ហើយដឹងថា ទ្រង់សព្វព្រះទ័យប្រទានពរយើង ។ យើងអាចរកឃើញកម្លាំងដើម្បីប្រឈមនឹងឧបសគ្គ ដើម្បីយកឈ្នះការល្បួង និងយល់ ហើយស៊ូទ្រាំនៅក្នុងស្ថានភាពលំបាករបស់យើង ។ ប្រាកដណាស់ ក្នុងគ្រាដ៏ពិបាកខ្លាំងមួយក្នុងព្រះជន្មរបស់ទ្រង់ កម្លាំងរបស់ព្រះអង្គសង្គ្រោះក្នុងការស៊ូទ្រាំកាន់តែស៊ីជម្រៅឡើង កាលទ្រង់មានបន្ទូលទៅព្រះវរបិតាទ្រង់ថា « សូមតាមព្រះហឫទ័យទ្រង់ចុះ » ។២
មនុស្សឃ្លង់មិនបានស្នើសូមដោយធ្វើពុតជាចង់បាន ឬទាមទារពរជ័យឡើយ ។ សម្ដីរបស់គាត់បង្ហាញពីឥរិយាបថដ៏រាបសា ដែលមានការរំពឹងខ្ពស់ ប៉ុន្ដែក៏មានបំណងស្មោះសរថា នឹងធ្វើតាមព្រះទ័យរបស់ព្រះអង្គសង្គ្រោះ ។ នេះគឺជាគំរូនៃឥរិយាបថមួយ ដែលយើងគួរមករកព្រះគ្រីស្ទ ។ យើងមករកព្រះគ្រីស្ទដោយភាពជឿជាក់ថា ព្រះទ័យរបស់ព្រះអង្គសង្គ្រោះតែងល្អបំផុតសម្រាប់ជីវិតរមែងស្លាប់ និងជីវិតអស់កល្បរបស់យើង ។ ទ្រង់តែងតែមានទស្សនវិស័យដ៏អស់កល្បមួយ ដែលយើងមិនមាន ។ យើងត្រូវមករកព្រះគ្រីស្ទដោយបំណងស្មោះសរថា ឆន្ទៈយើងត្រូវលេបដណ្ដប់ក្នុងព្រះហឫទ័យនៃព្រះវរបិតា ដូចព្រះគ្រីស្ទដែរ ។៣ ការណ៍នេះនឹងរៀបចំខ្លួនយើងសម្រាប់ជីវិតដ៏អស់កល្ប ។
វាពិបាកនឹងស្រមៃពីការរងទុក្ខផ្លូវកាយ និងផ្លូវចិត្ត ដែលមនុស្សឃ្លង់នោះមាន កាលមករកព្រះអង្គសង្គ្រោះណាស់ ។ ជំងឺឃ្លង់ប៉ះពាល់សរសៃប្រសាទ និងស្បែក ហើយបណ្ដាលឲ្យខូចរូបកាយ និងសមត្ថភាព ។ លើសពីនេះ វានាំឲ្យមានការមាក់ងាយយ៉ាងខ្លាំងពីសង្គម ។ អ្នកដែលមានជំងឺឃ្លង់ត្រូវចាកចេញពីមនុស្សជាទីស្រឡាញ់របស់គេ ហើយរស់នៅដាច់ដោយឡែកពីសង្គម ។ មនុស្សឃ្លង់ត្រូវបានគេចាត់ទុកថាមិនស្អាតស្អំទាំងខាងសាច់ឈាម និងខាងវិញ្ញាណ ។ ដោយសារមូលហេតុនេះហើយ ច្បាប់ម៉ូសេតម្រូវឲ្យមនុស្សឃ្លង់ស្លៀកពាក់កណ្តាច ហើយស្រែកថា « ខ្ញុំស្មោកគ្រោកៗ » ពេលពួកគេដើរ ។៤ ដោយឈឺ និងត្រូវគេប្រមាថផង មនុស្សឃ្លង់ត្រូវរស់នៅក្នុងផ្ទះ ឬនៅផ្នូរដែលគេបោះបង់ចោល ។៥ វាមិនពិបាកនឹងស្រមៃទេថា មនុស្សឃ្លង់ដែលមកកាន់ព្រះអង្គសង្គ្រោះនោះខ្ទេចខ្ទាំប៉ុណ្ណាឡើយ ។
ពេលខ្លះ—តាមរបៀបណាមួយ— យើងអាចមានអារម្មណ៍ថាខ្ទេចខ្ទាំផងដែរ មិនថាដោយសារសកម្មភាពយើងផ្ទាល់ ឬរបស់អ្នកផ្សេង ដោយសារស្ថានភាពដែលយើងអាច ឬមិនអាចគ្រប់គ្រងបាននោះទេ ។ ក្នុងគ្រាបែបនោះ យើងអាចដាក់ឆន្ទៈយើងក្នុងព្រះហស្ដទ្រង់ ។
ច្រើនឆ្នាំកន្លងទៅ ហ្សុលម៉ា—ភរិយាខ្ញុំ ជាម្ចាស់ជីវិតខ្ញុំ— បានទទួលព័ត៌មានមិនល្អ មួយចំនួន នៅពីរសប្ដាហ៍ពីមុនអាពាហ៍ពិពាហ៍របស់កូនយើងម្នាក់ ។ នាងមានដុំសាច់មួយក្នុងក្រពេញទឹកមាត់ ហើយវាដុះយ៉ាងលឿន ។ មុខនាងចាប់ផ្ដើមហើម ហើយនាងត្រូវវះកាត់ភ្លាមៗ ។ នាងបានគិតច្រើនណាស់ ហើយដួងចិត្តនាងបានធ្ងន់ជ្រប់ ។ តើសាច់ដុះនេះអាចគ្រោះថ្នាក់ដល់ស្លាប់ទេ ? តើរាងកាយនាងជាសះស្បើយរបៀបណា ? តើមុខនាងនៅកម្រើកបានទេ ? តើការឈឺចាប់នោះខ្លាំងប៉ុណ្ណាទៅ ? តើមុខនាងនឹងមានស្នាមរហូតទេ ? តើសាច់ដុះដែលកាត់ចេញហើយដុះមកវិញទេ ? តើនាងនឹងអាចចូលរួមអាពាហ៍ពិពាហ៍កូនប្រុសយើងបានដែរឬទេ ? កាលនាងគេងក្នុងបន្ទប់វះកាត់ នាងមានអារម្មណ៍ថាខ្ទេចខ្ទាំ ។
ក្នុងគ្រាដ៏សំខាន់ខ្លាំងនោះ ព្រះវិញ្ញាណបានខ្សឹបប្រាប់នាងថា នាងត្រូវទទួលយកព្រះទ័យរបស់ព្រះវរបិតា ។ រួចនាងបានសម្រេចចិត្តដាក់ការទុកចិត្តរបស់នាងលើព្រះ ។ នាងបានទទួលអារម្មណ៍យ៉ាងខ្លាំងថា ទោះជាមានអ្វីកើតឡើងក្ដី ក៏ព្រះឆន្ទៈរបស់ទ្រង់នឹងក្លាយជារឿងល្អបំផុតសម្រាប់នាង ។ ភ្លាមនោះនាងបានសន្លប់ដើម្បីវះកាត់ ។
ក្រោយមក នាងបានសរសេរជាកំណាព្យក្នុងសៀវភៅកំណត់ហេតុនាង ៖ « លើតុវះកាត់ កូនឱនក្បាលចុះចំពោះទ្រង់ ហើយដាក់ខ្លួនចុះចូលតាមព្រះទ័យទ្រង់ ខ្ញុំបានដេកលុងលក់ ។ ខ្ញុំបានដឹងថាខ្ញុំទុកចិត្តលើទ្រង់ដោយដឹងថាគ្មានអ្វីដែលអាក្រក់អាចមកពីទ្រង់។
នាងរកឃើញកម្លាំង និងការលួងលោម ពេលនាងសម្របឆន្ទៈនាងតាមព្រះទ័យរបស់ព្រះវរបិតា ។ ថ្ងៃនោះ ព្រះបានប្រទានពរនាងយ៉ាងខ្លាំង ។
មិនថាស្ថានភាពយើងអាចទៅជាយ៉ាងណានោះទេ យើងអាចអនុវត្តសេចក្ដីជំនឿដើម្បីមករកព្រះគ្រីស្ទ ហើយរកឃើញព្រះដែលយើងអាចទុកចិត្តបាន ។ មានគ្រាមួយកូនខ្ញុំម្នាក់ ឈ្មោះ កាព្រីយ៉ែលបានសរសេរថា ៖
ស្របតាមព្យាការី ព្រះភ័ក្ររបស់ព្រះគឺចែងចាំងជាងព្រះអាទិត្យ
ហើយព្រះកេសាទ្រង់សជាងព្រិល
ហើយសំឡេងទ្រង់ឮដូចទឹកហូរ
ហើយប្រៀបនឹងទ្រង់ មនុស្សគ្មានជាអ្វីសោះឡើយ ។…
ខ្ញុំក្ដុកក្ដួល ពេលដឹងថា ខ្ញុំគ្មានជាអ្វីសោះ ។
ហើយដល់ពេលនោះទើបខ្ញុំខំនឹករករបៀបទៅរកព្រះ ដែលខ្ញុំអាចទុកចិត្តបាន ។
ហើយដល់ពេលនោះទើបខ្ញុំរកឃើញព្រះ ដែលខ្ញុំអាចទុកចិត្តបាន ។៦
ព្រះមួយអង្គដែលយើងអាចទុកចិត្តបង្កើនសេចក្ដីសង្ឃឹមយើង ។ យើងអាចទុកចិត្តលើទ្រង់ពីព្រោះទ្រង់ស្រលាញ់យើងនិងចង់ឲ្យអ្វីដែលល្អបំផុតមកយើងនៅគ្រប់កាលៈទេសៈទាំងអស់ ។
មនុស្សឃ្លង់បានមក ដោយសារតែអំណាចនៃក្ដីសង្ឃឹម ។ ពិភពលោកមិនមានដំណោះស្រាយឲ្យគាត់ទេ សូម្បីតែការលួងលោមក៏គ្មានដែរ ។ ដូច្នេះ ការពាល់ដ៏សាមញ្ញរបស់ព្រះអង្គសង្គ្រោះប្រាកដជាដូចការអង្អែលដល់ដួងព្រលឹងទាំងមូលរបស់គាត់ហើយ ។ យើងអាចត្រឹមស្រមៃពីអារម្មណ៍ដឹងគុណដ៏ខ្លាំង ដែលមនុស្សឃ្លង់នោះមាន កាលព្រះអង្គសង្គ្រោះពាល់គាត់ ជាពិសេសពេលគាត់ឮបន្ទូលថា « ខ្ញុំចង់ដែរ ចូរឲ្យជាស្អាតចុះ » ។
ដំណើររឿងនេះថ្លែងថា « ស្រាប់តែរោគឃ្លង់ក៏ជាស្អាតភ្លាម » ។៧
យើងក៏អាចមានអារម្មណ៍ពីការពាល់នៃព្រះហស្ដព្យាបាលដោយក្ដីស្រឡាញ់របស់ព្រះអង្គសង្គ្រោះបានដែរ ។ តើព្រលឹងយើងនឹងមានអំណរ ក្ដីសង្ឃឹម និងការដឹងគុណយ៉ាងណាទៅ ពេលដឹងថា ទ្រង់សព្វព្រះទ័យជួយយើងឲ្យស្អាតនោះ ! កាលយើងមករកទ្រង់ ព្រះនឹងសង្គ្រោះយើង មិនថាព្យាបាលយើង ឬប្រទានកម្លាំងឲ្យយើងប្រឈមនឹងស្ថានភាពនានានោះទេ ។
ការទទួលយកព្រះទ័យរបស់ទ្រង់ ទោះតាមកម្រិតណាក្ដី—មិនមែនតាមចិត្តយើង—នឹងជួយយើងឲ្យយល់ពីស្ថានភាពរបស់យើង ។ គ្មានអ្វីដែលអាក្រក់អាចមកពីទ្រង់ឡើយ។ ទ្រង់ជ្រាបពីអ្វីដែលល្អបំផុតសម្រាប់យើង ។ ប្រហែលទ្រង់នឹងមិនដកយកបន្ទុកយើងចេញភ្លាមទេ ។ ពេលខ្លះទ្រង់អាចធ្វើឲ្យបន្ទុកទាំងនោះស្រាលជាងមុន ដូចទ្រង់បានធ្វើដាក់អាលម៉ា និងប្រជាជនរបស់លោកដែរ ។៨ ទីបំផុត ដោយសារតែសេចក្ដីសញ្ញា បន្ទុកនោះនឹងបានសម្រាល ៩ មិនថាក្នុងជីវិតនេះ ឬនៅឯការរស់ឡើងវិញដ៏បរិសុទ្ធនោះទេ ។
បំណងដ៏ស្មោះសរថា សូមតាមព្រះហឫទ័យទ្រង់ចុះ ព្រមជាមួយនឹងការយល់ពីលក្ខណៈជាព្រះរបស់ព្រះប្រោសលោះរបស់យើង ជួយយើងឲ្យអភិវឌ្ឍសេចក្ដីជំនឿ ដែលមនុស្សឃ្លង់នោះបានបង្ហាញដើម្បីបានសម្អាត ។ ព្រះយេស៊ូវគ្រីស្ទគឺជាព្រះនៃសេចក្ដីស្រឡាញ់ ព្រះនៃក្ដីសង្ឃឺម ព្រះនៃការព្យាបាល ព្រះដែលសព្វព្រះទ័យប្រទានពរយើង និងជួយយើងឲ្យបានស្អាត ។ នោះជាអ្វីដែលទ្រង់សព្វព្រះទ័យ ពីមុនយាងមកផែនដីនេះ កាលទ្រង់ស្ម័គ្រព្រះទ័យសង្គ្រោះយើង ពេលយើងធ្លាក់ក្នុងការរំលង ។ នោះជាអ្វីដែលទ្រង់សព្វព្រះទ័យនៅសួនកែតសេម៉ានី កាលទ្រង់ប្រឈមនឹងការឈឺចាប់ដែលមនុស្សមិនអាចយល់ អំឡុងពេលការរងទុក្ខនៃការបង់ថ្លៃអំពើបាប ។ នោះជាអ្វីដែលទ្រង់សព្វព្រះទ័យឥឡូវនេះ កាលទ្រង់អង្វរជំនួសយើងចំពោះព្រះភ័ក្រព្រះបិតា ។១០ នោះជាមូលហេតុដែលព្រះសូរសៀងទ្រង់បន្លឺដដែលៗថា « អស់អ្នកដែលនឿយព្រួយ ហើយផ្ទុកធ្ងន់អើយ ចូរមកឯខ្ញុំ ខ្ញុំនឹងឲ្យអ្នករាល់គ្នាឈប់សម្រាក » ។១១
ទ្រង់អាចព្យាបាលយើង ហើយលើកស្ទួយយើង ដោយសារទ្រង់មានសមត្ថភាពធ្វើវាបាន ។ ទ្រង់បានលើកដាក់លើព្រះអង្គទ្រង់នូវការឈឺចាប់ទាំងអស់នៃព្រះកាយ និងព្រះវិញ្ញាណ ដើម្បីឲ្យព្រះហឫទ័យទ្រង់បានពេញដោយសេចក្ដីមេត្តា ដើម្បីអាចជួយយើងតាមគ្រប់សេចក្ដី ហើយព្យាបាលយើង និងលើកស្ទួយយើងផង ។១២ ពាក្យរបស់អេសាយដូចបានដកស្រង់ដោយអ័ប៊ីណាដៃ ថ្លែងយ៉ាងល្អ និងរស់រវើក ៖
« ទ្រង់បានទ្រាំទ្ររងអស់ទាំងសេចក្ដីឈឺចាប់របស់យើង ហើយបានទទួលផ្ទុកអស់ទាំងសេចក្ដីទុក្ខព្រួយរបស់យើងជាពិត ។…
« …ទ្រង់ត្រូវរបួស ដោយព្រោះអំពើរំលងទាំងឡាយរបស់យើង ទ្រង់ត្រូវវាយដំ ដោយព្រោះអំពើទុច្ចរិតទាំងឡាយរបស់យើងទេ ឯការវាយផ្ចាលដែលនាំឲ្យយើងបានជាមេត្រី នោះបានធ្លាក់ទៅលើទ្រង់ ហើយយើងរាល់គ្នាបានប្រោសឲ្យជា ដោយសារស្នាមរំពាត់នៅអង្គទ្រង់ » ។១៣
គោលគំនិតដូចគ្នានេះត្រូវបានបង្រៀនក្នុងកំណាព្យនេះ ៖
« ឱ ជាងឈើនៃណាសារ៉ែត
ដួងចិត្តនេះ ដែលខ្ទេចខ្ទាំហួសការព្យាបាល
ជីវិតនេះ ដែលស្លុតហៀបនឹងស្លាប់
ឱ តើទ្រង់អាចជួសជុលវាបានទេ ជាងឈើអើយ ? »
ហើយដោយដៃល្អត្រៀមជួយរបស់ទ្រង់
ព្រះជន្មដ៏ផ្អែមទ្រង់ផ្ទាល់ត្រូវបានត្បាញភ្ជាប់នឹង
ជីវិតខ្ទេចខ្ទាំរបស់យើង រហូតវារស់រានបាន
ជាការបង្កើតថ្មី—« គ្រប់អ្វីថ្មី » ។
« [ ចំណែក ] ស្លុតនៃបេះដូង [ នេះ ]
បំណង មហិច្ឆិតា ក្ដីសង្ឃឹម និងក្ដីជំនឿ
អ្នកផ្គុំទៅជាផ្នែកដ៏ឥតខ្ចោះមួយ
ឱ ជាងឈើនៃណាសារ៉ែត ! »១៤
បើបងប្អូនមានអារម្មណ៍ថា បងប្អូនមិនស្អាតតាមរបៀបណាមួយ បើបងប្អូនមានអារម្មណ៍ខ្ទេចខ្ទាំ សូមដឹងថា បងប្អូនអាចបានស្អាតវិញ បងប្អូនអាចជួសជុលបាន ដោយសារទ្រង់ស្រឡាញ់បងប្អូន ។ សូមទុកចិត្តថា គ្មានអ្វីអាក្រក់អាចកើតមកពីទ្រង់ឡើយ ។
ដោយសារទ្រង់ « បានយាងចុះក្រោមគ្រប់ទាំងអស់ » ១៥ នោះទ្រង់អាចធ្វើការណ៍ទាំងអស់រួច ជួសជុលជីវិតយើងដែលខ្ទេចខ្ទាំ ហេតុដូច្នេះយើងអាចស្រុះស្រួលនឹងព្រះបាន ។ តាមរយៈទ្រង់អ្វីគ្រប់យ៉ាងត្រូវបានផ្សះផ្សារឡើងវិញទាំងអ្វីដែលមាននូវលើផែនដីនិងអ្វីដែលមាននៅលើឋានសួគ៍បង្កើតសន្តិភាពតាមរយៈព្រះលោហិតនៃឈើឆ្កាងរបស់ទ្រង់» ។ ១៦
ចូរយើងមករកព្រះគ្រីស្ទ ដោយធ្វើតាមជំហានដែលចាំបាច់ទាំងអស់ ។ កាលយើងធ្វើដូច្នេះ សូមឲ្យឥរិយាបថយើងបានដូចជាឃ្លានេះ « ឱព្រះអម្ចាស់អើយ បើទ្រង់សព្វព្រះហឫទ័យ ទ្រង់អាចនឹងប្រោសឲ្យទូលបង្គំជាស្អាតបាន » ។ បើយើងធ្វើដូច្នោះ យើងអាចទទួលបានការពាល់របស់លោកចៅហ្វាយដែលព្យាបាលយើង អមដោយព្រះសូរសៀងដ៏ស្រទន់ ទ្រង់បន្លឺថា « ខ្ញុំចង់ដែរ ចូរឲ្យជាស្អាតចុះ » ។
ព្រះអង្គសង្គ្រោះគឺជាព្រះដែលយើងអាចទុកចិត្តបាន ។ ទ្រង់គឺជាព្រះគ្រីស្ទ ព្រះតាំងឡើង ព្រះមែស៊ីដ៏បរិសុទ្ធដែលខ្ញុំថ្លែងទីបន្ទាល់ក្នុងព្រះនាមដ៏បរិសុទ្ធរបស់ទ្រង់គឺព្រះយេស៊ូវគ្រីស្ទ អាម៉ែន ។