អំណាចដើម្បីយកឈ្នះមារសត្រូវ
តើស្វែងរកសេចក្ដីសុខសាន្ត ចងចាំថាយើងជានរណា ហើយយកឈ្នះលើសកម្មភាពទាំងបីរបស់មារសត្រូវតាមរបៀបណា ?
បងប្អូនប្រុសស្រី សូមអរគុណនូវអ្វីៗដែលបងប្អូនបានធ្វើដើម្បីប្រែក្លាយ ហើយជួយមនុស្សដទៃឲ្យប្រែក្លាយជាពួកអ្នកដើរតាមដ៏ពិតរបស់ព្រះយេស៊ូវគ្រីស្ទ ហើយរីករាយនឹងពរជ័យនៃព្រះវិហារបរិសុទ្ធ ។ សូមអរគុណចំពោះសេចក្ដីល្អរបស់បងប្អូន ។ បងប្អូនអស្ចារ្យ បងប្អូនពិតជាស្រស់ស្អាតណាស់ ។
ខ្ញុំសូមអធិស្ឋានថា យើងនឹងស្គាល់ពីព្រះចេស្ដានៃការបញ្ជាក់របស់ព្រះវិញ្ញាណបរិសុទ្ធ ពេលយើងយល់យ៉ាងពេញលេញថា យើងគឺជាបុត្រាបុត្រីរបស់ព្រះ ។ « ក្រុមគ្រួសារ–ការប្រកាសដល់ពិភពលោក » ចែងថា « មនុស្សទាំងអស់—ទាំងប្រុសទាំងស្រី—ត្រូវបានបង្កើតឡើងតាមរូបភាពនៃព្រះ ។ មនុស្សម្នាក់ៗសុទ្ធតែជាបុត្រា និងបុត្រីខាងវិញ្ញាណរបស់មាតាបិតាសួគ៌ ដូច្នេះហើយ មនុស្សម្នាក់ៗមានចរិត និងគោលដៅនៃព្រះ » ។១ យើងគឺជា « ពួកវិញ្ញាណជម្រើសៗឯទៀត ដែលបានករក្សាទុកឲ្យមកនៅពេលពេញកំណត់ ដើម្បីចូលរួមក្នុងការដាក់គ្រឹះនៃកិច្ចការដ៏ធំនៅថ្ងៃចុងក្រោយ » ។២ ប្រធាន រ័សុល អិម ណិលសុន បានប្រកាសថា « បងប្អូនត្រូវបានបង្រៀននៅឯពិភពវិញ្ញាណ ដើម្បីត្រៀមខ្លួនសម្រាប់អ្វីៗដែលបងប្អូននឹងជួបប្រទះអំឡុងសម័យចុងបង្អស់នៅថ្ងៃចុងក្រោយនេះ (សូមមើល គ.&ស. ១៣៨:៥៦) ។ ការបង្រៀននោះស្ថិតស្ថេរនៅជាមួយបងប្អូន » ។៣
បងប្អូនគឺជាបុត្រាបុត្រីជម្រើសរបស់ព្រះ ។ បងប្អូនមានអំណាចដើម្បីយកឆ្នះលើមារសត្រូវ ។ ប៉ុន្តែមារសត្រូវដឹងថាបងប្អូនជានរណា ។ វាដឹងពីមរតកដ៏ទេវភាពរបស់បងប្អូន ហើយខិតខំកំណត់សក្ដានុពលរបស់បងប្អូនតាមរយៈការប្រើសកម្មទាំងបីដូចតទៅនេះ ៖
-
សេចក្ដីបំភាន់
-
ការអូសទាញ
-
ការបំបាក់ទឹកចិត្ត
សេចក្ដីបំភាន់
មារសត្រូវបានបើឧបករណ៍នៃសេចក្ដីបំភាន់នៅជំនាន់របស់ម៉ូសេ ។ ព្រះអម្ចាស់បានប្រកាសទៅម៉ូសេថា
« មើលចុះ អ្នកជាបុត្ររបស់យើង ។…
« ហើយយើងមានកិច្ចការសម្រាប់អ្នក …ហើយអ្នកនៅក្នុងរូបដូចជាព្រះរាជបុត្រាបង្កើតតែមួយរបស់យើង » ។៤
រំពេចក្រោយមក បន្ទាប់ពីការនិមិត្តដ៏រុងរឿងនេះ សាតាំងបានព្យាយាមបំភាន់ម៉ូសេ ។ ពាក្យដែលវាបានប្រើគឺគួរឲ្យចាប់អារម្មណ៍ណាស់ ៖ « ម៉ូសេ ជាកូនមនុស្សអើយ ចូរថ្វាយបង្គំយើង » ។៥ សេចក្ដីបំភាន់ពុំមែនគ្រាន់តែមាននៅក្នុងការអញ្ជើញឲ្យថ្វាយបង្គំសាតាំងប៉ុណ្ណោះទេ ប៉ុន្តែនៅក្នុងរបៀបដែលវាបានរៀបរាប់ថាម៉ូសេ ជាកូនមនុស្សផងដែរ ។ សូមចាំថា ព្រះអម្ចាស់ទើបតែមានបន្ទូលប្រាប់ម៉ូសេថា លោកគឺជាបុត្រារបស់ព្រះ ដែលបានបង្កើតនៅក្នុងរូបដូចជាព្រះរាជបុត្រាបង្កើតតែមួយ ។
មារសត្រូវបានព្យាយាមឥតឈប់ឈរដើម្បីបំភាន់ម៉ូសេ ប៉ុន្តែម៉ូសេបានជម្នះ ដោយពោលថា « ៖ នែ៎សាតាំង ចូរថយចេញពីខ្ញុំទៅ ត្បិតខ្ញុំនឹងថ្វាយបង្គំដល់ព្រះតែមួយអង្គប៉ុណ្ណោះ គឺជាព្រះនៃសិរីល្អ » ។៦ ម៉ូសេបានចាំថាលោកជានរណា—គឺជាបុត្រារបស់ព្រះ ។
បន្ទូលរបស់ព្រះអម្ចាស់ទៅម៉ូសេអនុវត្តចំពោះបងប្អូន និងរូបខ្ញុំ ។ យើងត្រូវបានបង្កើតតាមរូបរបស់ព្រះ ហើយទ្រង់មានកិច្ចការឲ្យយើងធ្វើ ។ មារសត្រូវព្យាយាមបំភាន់ ដោយធ្វើឲ្យយើងបំភ្លេចថាយើងជានរណាពិតប្រាកដ ។ បើយើងពុំយល់ថាយើងជានរណា នោះវាពិបាកក្នុងការស្គាល់ពីអ្វីដែលយើងអាចប្រែក្លាយណាស់ ។
ការអូសទាញ
មារសត្រូវក៏ព្យាយាមអូសទាញយើងឲ្យចេញឆ្ងាយពីព្រះគ្រីស្ទ និងផ្លូវនៃសេចក្ដីសញ្ញារបស់ទ្រង់ផងដែរ ។ អែលឌើរ រ៉ូណល អេ រ៉ាសបាន បានចែកចាយដូចតទៅនេះថា « ខណៈពេលដែលព្រះអម្ចាស់សព្វព្រះទ័យបំភ្លឺ ហើយរក្សាយើងក្នុងកិច្ចការទ្រង់ នោះបច្ចាមិត្តគ្រោងផែនការដើម្បីបំភាន់យើងពីសាក្សីខាងវិញ្ញាណ » ។៧
នៅជំនាន់របស់យើង មានការអូសទាញជាច្រើន រួមមាន Twitter, Facebook, ហ្គេមលើអ៊ិនធើរណែត និងច្រើនទៀត ។ ការជឿនលឿនខាងបច្ចេកវិទ្យាទាំងនេះគឺអស្ចារ្យណាស់ ប៉ុន្តែបើយើងពុំប្រុងប្រយ័ត្ន វាអាចអូសទាញយើងចេញពីការបំពេញសក្ដានុពលដ៏ទេវភាពរបស់យើងបាន ។ ការប្រើប្រាស់វាដោយសមរម្យអាចនាំមកនូវអំណាចនៃស្ថានសួគ៌ ហើយអនុញ្ញាតឲ្យយើងឃើញអព្ភូតហេតុ ពេលយើងខិតខំប្រមូលផ្ដុំវង្សអ៊ីស្រាអែលដែលខ្ចាត់ព្រាត់នៅផ្នែកទាំងសងខាងនៃវាំងនន ។
ចូរយើងប្រុងប្រយ័ត្ន ហើយពុំប្រើប្រាស់បច្ចេកវិទ្យារបស់យើងដោយព្រងើយកន្តើយឡើយ ។៨ សូមស្វែងរកជាបន្តបន្ទាប់នូវវិធីដែលបច្ចេកវិទ្យាអាចនាំយើងខិតទៅជិតព្រះអង្គសង្គ្រោះ ហើយអនុញ្ញាតឲ្យយើងសម្រេចកិច្ចការរបស់ទ្រង់ ពេលយើងរៀបចំខ្លួនសម្រាប់ការយាងមកជាលើកទីពីររបស់ទ្រង់ ។
ការបំបាក់ទឹកចិត្ត
ចំណុចចុងក្រោយ មារសត្រូវមានបំណងចង់ឲ្យយើងបាក់ទឹកចិត្ត ។ យើងអាចនឹងមានការបាក់ទឹកចិត្ត ពេលយើងប្រៀបធៀបខ្លួនឯងទៅនឹងមនុស្សដទៃ ឬមានអារម្មណ៍ថា យើងពុំបានបំពេញតាមការរំពឹងទុកនានា រួមទាំងការរំពឹងទុករបស់យើងផ្ទាល់ផងដែរ ។
ពេលខ្ញុំបានចាប់ផ្ដើមកម្មវិធីថ្នាក់បណ្ឌិតរបស់ខ្ញុំ ខ្ញុំមានការបាក់ទឹកចិត្ត ។ កម្មវិធីនេះបានទទួលយកតែនិស្សិតបួនរូបប៉ុណ្ណោះនៅឆ្នាំនោះ ហើយនិស្សិតផ្សេងទៀតសុទ្ធតែមានសមត្ថភាពអស្ចារ្យ ។ ពួកគេមានពិន្ទុប្រឡងប្រសើរខ្ពស់ ហើយមានបទពិសោធន៍ការងារច្រើននៅក្នុងមុខតំណែងគ្រប់គ្រងជាន់ខ្ពស់ ហើយពួកគេបានជឿជាក់យ៉ាងខ្លាំងលើសមត្ថភាពរបស់ខ្លួន ។ បន្ទាប់ពីខ្ញុំចូលរួមកម្មវិធីនោះបានពីរសប្ដាហ៍ អារម្មណ៍នៃការបាក់ទឹកចិត្ត និងការសង្ស័យបានចាប់ផ្ដើមមានកាន់តែខ្លាំង ស្ទើរធ្វើឲ្យខ្ញុំមានការថប់បារម្ភ ។
ខ្ញុំបានសម្រេចចិត្តថា បើខ្ញុំចង់បញ្ចប់កម្មវិធីនេះរយៈពេលបួនឆ្នាំ ខ្ញុំនឹងបញ្ចប់ការអានព្រះគម្ពីរមរមនរៀងរាល់ឆមាស ។ ពេលខ្ញុំអានព្រះគម្ពីរនោះជារៀងរាល់ថ្ងៃ ខ្ញុំបានស្គាល់ពីការប្រកាសរបស់ព្រះអង្គសង្គ្រោះថា ព្រះវិញ្ញាណវិញ្ញាណបរិសុទ្ធនឹងបង្រៀនខ្ញុំគ្រប់សេចក្ដី ហើយនឹងរំឭកខ្ញុំពីគ្រប់ទាំងសេចក្ដី ។៩ ខ្ញុំបានទទួលការបញ្ជាក់ជាថ្មីថាខ្ញុំជានរណា ជាបុត្រារបស់ព្រះ វាបានរំឭកខ្ញុំកុំឲ្យប្រៀបធៀបខ្លួនឯងទៅនឹងមនុស្សដទៃ ហើយធ្វើឲ្យខ្ញុំជឿជាក់លើតួនាទីដ៏ទេវភាពរបស់ខ្ញុំដើម្បីទទួលបានជោគជ័យ ។១០
មិត្តជាទីស្រឡាញ់របស់ខ្ញុំអើយ សូមកុំបណ្ដោយឲ្យនរណាម្នាក់លួចយកសុភមង្គលរបស់បងប្អូនឲ្យសោះ ។ សូមកុំប្រៀបធៀបខ្លួនឯងទៅនឹងមនុស្សដទៃទៀត ។ សូមចាំពីបន្ទូលគួរឲ្យស្រឡាញ់របស់ព្រះអម្ចាស់ថា « ខ្ញុំទុកសេចក្ដីសុខនៅនឹងអ្នករាល់គ្នា គឺខ្ញុំឲ្យសេចក្ដីសុខសាន្តរបស់ខ្ញុំដល់អ្នករាល់គ្នា ហើយដែលខ្ញុំឲ្យ នោះមិនមែនដូចជាលោកិយឲ្យទេ ។ កុំឲ្យចិត្តអ្នករាល់គ្នាថប់បារម្ភឬភ័យឡើយ » ។១១
ដូច្នេះតើយើងធ្វើវាយ៉ាងដូចម្តេចទៅ ? តើស្វែងរកសេចក្ដីសុខសាន្តនេះ ចងចាំថាយើងជានរណា ហើយយកឈ្នះលើសកម្មភាពទាំងបីរបស់មារសត្រូវតាមរបៀបណា ?
ទីមួយ សូមចាំថា បទបញ្ញត្តិដ៏ធំទីមួយគឺស្រឡាញ់ព្រះឲ្យអស់ពីដួងចិត្ត អស់ពីពលំ អស់ពីគំនិត ហើយអស់ពីកម្លាំង ។១២ អ្វីៗដែលយើងធ្វើគួរត្រូវបានលើកទឹកចិត្តដោយស្រឡាញ់របស់យើងចំពោះទ្រង់ និងចំពោះព្រះរាជបុត្រារបស់ទ្រង់ ។ ពេលយើងអភិវឌ្ឍសេចក្ដីស្រឡាញ់របស់យើងចំពោះពួកទ្រង់ ដោយគោរពតាមបទបញ្ញត្តិរបស់ទ្រង់ នោះសមត្ថភាពរបស់យើងដើម្បីស្រឡាញ់ខ្លួនឯង និងមនុស្សដទៃនឹងកើនឡើង ។ យើងនឹងចាប់ផ្ដើមបម្រើគ្រួសារ មិត្តភក្ដិ និងអ្នកជិតខាង ដោយសារយើងនឹងមើលឃើញពួកគេ ដូចជាព្រះអង្គសង្គ្រោះទតឃើញពួកគេ—ជាបុត្រាបុត្រីរបស់ព្រះ ។១៣
ទីពីរ សូមអធិស្ឋានទៅកាន់ព្រះវរបិតាក្នុងព្រះនាមនៃព្រះយេស៊ូវគ្រីស្ទជារៀងរាល់ថ្ងៃ ។១៤ តាមរយៈការអធិស្ឋាននោះហើយ ទើបយើងអាចទទួលអារម្មណ៍ពីសេចក្ដីស្រឡាញ់របស់ព្រះ ហើយបង្ហាញសេចក្ដីស្រឡាញ់របស់យើងចំពោះទ្រង់ ។ តាមរយៈការអធិស្ឋាន យើងបង្ហាញការដឹងគុណ ហើយទូលសូមកម្លាំង និងភាពក្លាហានដើម្បីចុះចូលឆន្ទៈរបស់យើងតាមព្រះទ័យរបស់ទ្រង់ ព្រមទាំងបានដឹកនាំ ហើយណែនាំនៅគ្រប់សេចក្ដី ។
ខ្ញុំសូមលើកទឹកចិត្តបងប្អូនឲ្យ « អធិស្ឋានដល់ព្រះវរបិតាដោយអស់ពីកម្លាំងចិត្ត ដើម្បីឲ្យអ្នករាល់គ្នាបានពោរពេញដោយសេចក្ដីស្រឡាញ់នេះ… ដើម្បីឲ្យអ្នករាល់គ្នាអាចក្លាយទៅជាបុត្រា [ និងបុត្រី ] ព្រះ ដើម្បីកាលណាទ្រង់នឹងលេចមក នោះយើងរាល់គ្នានឹងបានដូចជាទ្រង់ » ។១៥
ទីបី សូមអាន ហើយសិក្សាព្រះគម្ពីរមរមនរៀងរាល់ថ្ងៃ ។១៦ ការសិក្សាព្រះគម្ពីរមរមនរបស់ខ្ញុំមានភាពប្រសើរឡើង ពេលខ្ញុំអានដោយមានសំណួរមួយនៅក្នុងចិត្ត ។ ពេលយើងអានដោយមានសំណួរមួយ យើងអាចទទួលវិវរណៈ ហើយដឹងថា ព្យាការី យ៉ូសែប ស៊្មីធ បានថ្លែងពីសេចក្ដីពិត ពេលលោកបានប្រកាសថា « ព្រះគម្ពីរមរមន [គឺជា] គម្ពីរដ៏ត្រឹមត្រូវបំផុតជាងគម្ពីរនានាទាំងអស់នៅលើផែនដីនេះ… ហើយ [បុរសម្នាក់ ឬស្ត្រីម្នាក់នឹង] អាចចូលទៅជិតព្រះបាន ដោយសារធ្វើតាមសិក្ខាបទទាំងឡាយនៃគម្ពីរនេះ ជាជាងគម្ពីរដទៃទាំងអស់ » ។១៧ ព្រះគម្ពីរមរមនមាននូវបន្ទូលនៃព្រះគ្រីស្ទ ហើយជួយយើងឲ្យចាំថាយើងជានរណា ។
ជាចុងក្រោយ សូមទទួលទានសាក្រាម៉ង់រៀងរាល់សប្ដាហ៍ប្រកបដោយការអធិស្ឋាន ។ តាមរយៈសេចក្ដីសញ្ញា និងពិធីបរិសុទ្ធនៃបព្វជិតភាពទាំងនេះហើយ រួមទាំងពិធីសាក្រាម៉ង់ដែរ ទើបអំណាចនៃព្រះត្រូវបានបើកបង្ហាញនៅក្នុងជីវិតរបស់យើង ។១៨ អែលឌើរ ដេវីឌ អេ បែដណា បានបង្រៀនថា « ពិធីបរិសុទ្ធនៃសាក្រាម៉ង់ គឺជាការអញ្ជើញដ៏ពិសិដ្ឋ និង ដដែលៗឲ្យប្រែចិត្តដោយស្មោះ និង រំឭកជាថ្មីខាងវិញ្ញាណ ។ ទង្វើនៃការទទួលទានសាក្រាម៉ង់ផ្ទាល់ ពុំបានផ្ដាច់បាបទេ ។ ប៉ុន្តែនៅពេលយើងរៀបចំដោយយកចិត្តទុកដាក់ និងចូលរួមនៅក្នុងពិធីបរិសុទ្ធដ៏ពិសិដ្ឋនេះដោយដួងចិត្តសង្រេង និងវិញ្ញាណទន់ទាប នោះការសន្យានឹងមានចំពោះយើងថា យើងអាចមានព្រះវិញ្ញាណព្រះអម្ចាស់គង់នៅជាមួយយើងជានិច្ច១៩
ពេលយើងទទួលទានសាក្រាម៉ង់ដោយចិត្តរាបសា នោះយើងចាំពីការរងទុក្ខរបស់ព្រះយេស៊ូវនៅក្នុងសួនច្បារពិសិដ្ឋនោះ ដែលហៅថា គែតសាម៉ានី និងពលិកម្មរបស់ទ្រង់នៅលើឈើឆ្កាង ។ យើងបង្ហាញអំណរគុណចំពោះព្រះវរបិតាសម្រាប់ការបញ្ជូនព្រះរាជបុត្រាស្ងួនភ្ងារបស់ទ្រង់ ជាព្រះដ៏ប្រោសលោះរបស់យើង ហើយបង្ហាញពីឆន្ទៈរបស់យើងដើម្បីគោរពបទបញ្ញត្តិរបស់ទ្រង់ ហើយចងចាំទ្រង់ជានិច្ច ។២០ ពិធីសាក្រាម៉ង់មាននូវការបំភ្លឺខាងវិញ្ញាណមួយ—វាមានលក្ខណៈផ្ទាល់ខ្លួន វាមានអនុភាព ហើយវាត្រូវការជាចាំបាច់ ។
មិត្តរបស់ខ្ញុំអើយ ខ្ញុំសូមសន្យាថា ពេលយើងខិតខំស្រឡាញ់ព្រះឲ្យអស់ពីចិត្តរបស់យើង អធិស្ឋានក្នុងព្រះនាមនៃព្រះគ្រីស្ទ សិក្សាព្រះគម្ពីរមរមន ហើយទទួលទានសាក្រាម៉ង់ប្រកបដោយការអធិស្ឋាន យើងនឹងមានសមត្ថភាព ដោយមានកម្លាំងរបស់ព្រះអម្ចាស់ ដើម្បីយកឈ្នះលើការអនុវត្តដែលបំភាន់របស់មារសត្រូវ កាត់បន្ថយការអូសទាសដែលកំណត់សក្ដានុពលដ៏ទេវភាពរបស់យើង ហើយតតាំងនឹងការបាក់ទឹកចិត្តដែលធ្វើឲ្យសមត្ថភាពរបស់យើងដើម្បីទទួលអារម្មណ៍នូវសេចក្ដីស្រឡាញ់របស់ព្រះវរបិតាសួគ៌ និងព្រះរាជបុត្រារបស់ទ្រង់ចុះថយ ។ យើងនឹងយល់ដឹងយ៉ាងពេញលេញថាយើងជានរណា ជាបុត្រាបុត្រីរបស់ព្រះ ។
បងប្អូនប្រុសស្រី ខ្ញុំសូមចែកចាយនឹងបងប្អូននូវសេចក្ដីស្រឡាញ់របស់ខ្ញុំ ហើយប្រកាសពីសាក្សីរបស់ខ្ញុំចំពោះបងប្អូនថា ខ្ញុំដឹងថា ព្រះវរបិតាសួគ៌មានព្រះជន្មរស់ ហើយព្រះយេស៊ូវគឺជាព្រះគ្រីស្ទ ។ ខ្ញុំស្រឡាញ់ពួកទ្រង់ ។ សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយគឺជានគរព្រះនៅលើផែនដីនេះ ។ យើងមានកិច្ចការដ៏ទេវភាពមួយដើម្បីរៀបចំពិភពលោកនេះសម្រាប់ការយាងមកជាលើកទីពីររបស់ព្រះមែស៊ី ។ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ។